Nunalerineq pillugu Inatsisartut inatsisaanni nr. 5-imi 2. maj 1996-imeersumi § 14, imm. 1, imm. 2 aamma imm. 6, naapertorlugit aalajangersarneqarpoq:

Atuuffii.

§ 1. Nalunaarut nunalerinermik ingerlatsinermik nakkutilliinermut atuuppoq.

§ 2. Nunalerinermut Naalakkersuisoq nakkutilliinermut ataatsimiititaliamik pilersitsissaaq, nunalerinermik ingerlatsisut nunalerineq pillugu Inatsisartut inatsisaanni aalajangersakkanik kiisalu inatsit tunngavigalugu maleruagassanik suliarineqarsimasunik, tassungalu ilanngullugit maleruaqqusat piumasaqaataasut iluanni suliaasut, malinneqarnerannik nakkutilliisussamik. Nakkutilliinermut ataatsimiititaliap nakkutilliinermik suliassarinngisaanut taamaattoq ilaapput aalajangersakkat inatsip §-sa 7-at malillugu aalajangersakkat.
Imm. 2. Nakkutilliinermut ataatsimiititaliat ilaasortassaannik toqqaaneq kommunini nunalerinermik ingerlatsiviusuni nunalerinermilu kattuffeqarfeqartuni pissaaq, tak. § 3. Kommunalbestyrelsip toqqagai kommunalbestyrelsimi ilaasortaassapput imaluunniit Kommunip aqutsisoqarfianeersuussallutik.

§ 3. Nanortaliup, Qaqortup Narsallu kommuniinut taakkunannga tamanit ilaasortaaffigineqartumik nakkutilliinermut ataatsimiititaliamik pilersitsisoqassaaq. Ataatsimiititaliaq tallimanik ilaasortaqassaaq, taakkunannga pingasut kommunalbestyrelsinit toqqarneqassallutik , ilaasortallu sinneri marluk Savaatillit Peqatigiit Suleqatigiissunit (SPS-imit) toqqarneqassallutik.
Imm. 2. Paamiut Kommuniatnut nakkutilliinermut ataatsimiititaliaq pilersinneqassaaq. Ataat-simiititaliaq pingasunik ilaasortaqassaaq, taakkunannga marluk kommunalbestyrelsimit toqqarneqassallutik ilaasortallu pingajuat Savaatillit Peqatigiit Suleqatigiissunit toqqarneqassalluni.
Imm. 3. Nuup Kommunia-nut nakkutilliinermut ataatsimiititaliaq pilersinneqassaaq. Ataatsimiititaliaq pingasunik ilaasortaqassaaq, taakkunannga marluk kommunalbestyrelsimit toqqarneqassallutik ilaasortallu pingajuat Savaatillit Peqatigiit Suleqatigiissunit toqqarneqassalluni.
Imm. 4. Ilaasortanut tamanut sinniisussamik atiatigut taallugu toqqaasoqassaaq, imm. 1-3-mi kiisalu § 2 mi ilaasortanik toqqaanermi periaatsit atorneqartut atorlugit. Ilaasortat sinniisussaalu ukiunut sisamanut atasussatut toqqarneqartassapput.

§ 4. Nakkutilliinermut ataatsimiititaliamut Savaateqarnermut Siunnersorteqarfik allattoqarfittut atuutissaaq.
Imm. 2. Nakkutilliinermut ataatsimiititaliaq nakkutilliinermik sulinerminut atatillugu sulianut tunngasunik immikkut ilisimasalinnik aammattaaq ataatsimeeqataatitsisinnaavoq. Nersutaateqarfiit nakkutiginerini sapinngisaq naapertorlugu nersutit nakorsaattut sulinermi ilisimasaqarluartunik ataatsimeeqataasoqartassaaq.

Nakkutilliinermut ataatsimiititaliap suleriaasissaa.

§ 5. Nakkutilliinermut ataatsimiititaliaq aallaavittut ukiumut ataasiarluni ataatsimiittassaaq, taamaattoq tak. § 7, imm. 4.
Imm. 2. Kommunit, ilaasortat kommunalbestyrelsinit toqqarneqartut aningaasarsiaqartitaanerannut aningaasartuutit kiisalu ataatsimiititaliap nakkutilliinermut atatillugu angalanernut aningaasartuutai akilertassavaat. Namminersornerullutik Oqartussat allattoqartitsinermut kiisalu ilaasortat nunalerinermi kattuffiit toqqagaasa aningaasarsiaqartitaanerannut kiisalu taakkua najukkaminniit ataatsimiiffissamut ingerlanerannut aningaasartuutit akilertassavaat, nunalerineq pillugu Inatsisartut inatsisaanni § 14, imm. 5 naapertorlugu. Savaateqarnermut Siunnersorteqarfik nakkutilliinermut ataatsimiititaliap ataatsimiinnissaanik piareersaallunilu ingerlatsisassaaq.

§ 6. Savaateqarnermut Siunnersorteqarfik ingerlaavartumik ataatsimiititaliap sulinerani atorneqarsinnaasunik katersuisassaaq, tak. imm. 2.
Imm. 2. Savaateqarnermut Siunnersorteqarfiup inassuteqarneratigut aammalu nunalerineq pillugu Inatsisartut inatsisaanni aalajangersakkat kiisalu taanna tunngavigalugu malittarisassiat aallaavigalugit sumiiffinni ingerlatsinermut paasissutissat erseqqissut suut nakkutilliinermut ataatsimiititaliap sulinerminut minnerpaamik misissugassamisut ilannguttassanerai pillugit najoqqutassiat Nakkutilliinermut ataatsimiititaliap akuerisassavai. Najoqqutassat Aalisarnermut, Piniarnermut Nunalerinermullu Pisortaqarfimmut ilisimatitsissutitut nassiunneqartassapput.
Imm. 3. Nakkutilliinermut ataatsimiititaliap ataatsimiinnerini Savaateqarnermut Siunnersorteqarfiup sulinermini inernerit imm. 1 aamma imm. 2 aallaavigalugit saqqummiuttassavai, ilaatigut nalunaarutitut ilaatigullu oqalulluni saqqummiussinertut.
Imm. 4. Ingerlataqarfiit imm. 3 naapertorlugu ajornartorsiutitaqanngitsut nakkutilliinermut ataatsimiititaliamit oqaaseqarfigineqaratik sukkasuumik suliarineqarsinnaasassapput. Nakkutilliinermut ataatsimiititaliap sulinini sumiiffinnut ajornartorsiuteqavissunut Savaateqarnermut Siunnersorteqarfmp uparuussugaanut sammitinnerussavaa.

§ 7. Nakkutilliinermut ataatsimiititaliaq § 6 tunngavigalugu Savaateqarnermullu Siunnersorteqarfiup inassuteqarneratigut aalajangertassaaq savaateqarfiit sorliit tikeraarneqassanerannik, taamaattoq tak. imm. 2 aamma imm.4.
Imm. 2. Aallaavittut nakkutilliinermut ataatsimiititaliap ingerlataqarfiit malittarisassatigut aalajangersakkanik naammassinninniarnermik ajornartorsiutillit kisiisa tikeraartassavai. Taamaattorli ataatsimiititaliap ukiumoortumik ingerlataqarfiit ajornartorsiuteqarfiunngitsut ilaat tikeraartassavai, taamaalilluni kommunimi ingerlataqarfiit tamarmik ukiut arlaqarpallaanngitsut ingerlanerini nakkutilliinermut ataatsimiititaliamit tikeraarneqarsinnaaqqullugit, ingerlataqarfinni ingerlalluartuni ingerlatseriaatsimik malinnaajuarnissaq siunertaralugu.
Imm. 3. Ataatsimiititaliap ataatsimiittarnissai ukiut tulleriiaarnerini piffissami aalajangersimasumi pisassanngillat, kisianni ingerlatseriaatsip immikkoortuini assigiinngitsuni nammineq takullugu paasisaqarsinnaanissap angunissaanut ataatsimiititaliamut periarfissarsiortoqartassalluni.
Imm. 4. Savaateqarnermut Siunnersorteqarfik allattoqarfittut aammattaaq ataatsimiititaliamik ataatsimiikkiaqquseriataarnissamut sukkasuumik kalerriisarnissamik pisussaaffeqarpoq, ingerlataqarfiit ilaanni ukiup ingerlanerani ataatsimiititaliap suliassaqarfiisa iluanni ajornartorsiutinik annerusunik saqqummersoqassagaluarpat.
Imm. 5. Ataatsimiititaliaq oqallinnini pisariaqarpallu ingerlataqarfinnik takusaanini tunngavigalugit isummerfigisassavaa nunalerineq pillugu Inatsisartut inatsisaat najoqqutaralugu iliuuseqarusunnerluni, tak. § 8. Savaateqarnermut Siunnersorteqarfik immikkullu ilisimasalittut ataatsimeeqataajunnartut tamatumunnga atatillugu taamaallaat apeqqutini sulianut tunngasuni oqaaseqarnissamut akisussaapput.

Naalakkersuisunut nalunaaruteqartarneq.

§ 8. Nakkutilliinermut ataatsimiititaliaq suliani pillugu § 6, imm. 2-mi najoqqutassatut akuersissutaasut aallaavigalugit ukiumoortumik Aalisarnermut, Piniarnermut Nunalerinermullu Pisortaqarfimmut nassuiaasiortassaaq. Savaateqarnermut Siunnersorteqarfik nakkutilliinermut ataatsimiititaliamut allattoqarfittut nassuiaasiap ukiumi tulliuttumi kingusinnerpaamik 1. maj pisortaqarfimmut nassiunneqareersimanissaanut akisussaavoq.
Imm. 2. Nakkutilliinermut ataatsimiititaliaq inatsisinik atuuttunik unioqqutitsinermik annertuumik paasisaqarpat piaarnerpaamik tamanna pillugu Naalakkersuisut nalunaarfigineqassapput aammalu nassuiarlugu, pissutsit aaqqikkumallugit qanoq suliniuteqartoqarsinnaanersoq imaluunniit qanoq iliortoqarsimanersoq.

Atuutilerfissaail.il.

§ 9. Nalunaarut una 1. september 1997 atortuulerpoq.

Namminersornerullutik Oqartussat, 8. september 1997.

Pâviâraq Heilmann

/

Peder Munk Pedersen