Savaateqarneq pillugu Inatsisartut inatsisaat nr. 1, 21. april 1988-imeersoq Inatsisartut inatsisaatigut nr. 8-kkut 13. maj 1993-imeersukkut allanngortinneqartoq naapertorlugu aalajangersarneqarpoq:

§ 1. Savaatilinngorlaanut tapersiissutitut savaateqarfiliornerup nalaani tapiissuteqartoqarsinnaavoq.
Imm. 2. Savaateqarfimmut ataatsimut savaateqarfiliornermut imaluunniit savaateqarfilioqqinnermut ataatsimut ataasiaannarluni taamaallaat tapiissuteqartoqarsinnaavoq.
Imm. 3. Tapiissutit sivisunerpaamik ukiut pingasut ingerlanerini akiliutigineqartassapput.

§ 2. Inuit savaateqarneq pillugu inatsimmi piumasaqaatinik naammassinnissimasut tapiiffigineqarnissamik qinnuteqaateqarsinnaapput,
1) savaateqarfik nutaarluinnaq tunngavianiit aallartittariaqassagunikku imaluunniit
2) savaateqarfik imatut pissusilik tigusimagunikku savaateqarneq imminut akilersinnaasunngortinniarlugu tunngavianiit savaateqarfilioqqittariaqarlutik.
Imm. 2. Qinnuteqaat, Savaatillit Peqatigiit Suleqatigiissunit uppernarsarlugu atsiorneqarsimasoq, naalakkersuisunut aamma kommunimut savaateqarfiup inissisimaffigisaanut nassiunneqassaaq.

§ 3. Naalakkersuisut Savaatillit Peqatigiit Suleqatigiissut aamma "Savaatillit Siunnersorteqarfiat" isumasioreerlugit tapiissuteqartoqarnissaanik aalajangiissapput. Naalakkersuisut aalajangiiniarnerminni ilaatigut pingaartissinnaavaat
1) savaateqarneq tapiiffigineqartussap siunissami pi- ngaarnerutillugu inuussutissarsiutigissagaa. Tamatuma nalilerneqarnerani savaateqarfiup angissusia tunngavigineqassaaq,
2) maskiinat atortut, narsaatit neriniartitsisarfîillu aamma savaatit imminnut naapertuuttumik annertussuseqarnissaat,
3) narsaatit pilersinneqareersinnagit imaluunniit pilerseqqinneqareersinnagit ivikkanillu nerukkaatissat siulliit pigineqalereersinnagit savaateqartoqalissanngitsoq taakkuluunniit amerlisinneqassanngitsut,
4) savaatillip ingerlatsinermut illuutit ungallullu sanareersimanngippagit imaluunniit iluarsaatereersimanngippagit savaateqartoqalissanngitsoq imaluunniit taakku amerlisinneqassanngitsut aamma
5) savaateqarfiliorneq pilersaarutigineqartutut ingerlanneqassasoq.
Imm. 2. Naalakkersuisut ataasiakkaanut tunngatillugu tunngavilersuutit naleqquttut allat pingaarnerutissinnaavaat.

§ 4. Tapiissutit amerlassusissaat akiliutigineqartussallu aveqatigiinnissaat kommunip pineqartup Naalakkersuisullu akornanni isumaqatigiissutigineqassapput.

§ 5. Naalakkersuisut kommuni pineqartoq aamma Savaatillit Peqatigiit Suleqatigiissut isumasioqatigeriarlugit aalajangiisinnaapput, tapiissutit akiliutigineqartarnerat unitsinneqassaaq
1) tapiiffigineqartartup savaateqarneq pillugu inatsimmi aalajangersakkat unioqqutissimassappagit imaluunniit
2) nalunaarut manna malillugu tapiiffigineqartartup tapiissutinik pisarnissaminut piumasaqaataasut naammassisinnaajunnaarsimappagit imaluunniit
3) tapiiffigineqartartoq eqqunngitsunik imaluunniit paatsoorneqarsinnaasunik paasissutissiisimappat imaluunniit tapiiffigineqarnissamut paasissutissanik pingaarutilinnik nipangiussisimappat.
Imm. 2. Immikkoortoq 1-imi nr. 1 aamma 3 malillugit tapiissuteqartoqartarunnaarpat Naalakkersuisut kommuni najugarineqartoq aamma Savaatillit Peqatigiit Suleqatigiissut isumasioqatigeriarlugit aalajangiisinnaapput tapiissutigineqarsimasut utertillugit akilersinneqassasut.

§ 6. Nalunaarut manna atuutilerpoq 10. august 1993.

Namminersornerullutik Oqartussat, ulloq 8. august 1993.

Hans Iversen

/

Henrik Leth