Kalaallit Nunaanni Ilageeqarnermut Inatsisartut peqqussutaanni nr. 2-mi 30. marts 1982-imeersumi § 4, imm. 5 malillugu Kalaallit Nunaanni organistit ilinniartitaasalernissaat pilersinneqarpoq.

Kapitali I.
Ilinniartitsinissap siunertaa.

§ 1. Ilinniartitsinissap siunertaraa kursusertarnertigut il.il. piginnaaneqarfigalugu organistissat allatigullu ilageeqarnermi nipilersornermik erinarsoqatigiinnik siulersuisinnaaneq ilanngullugu ilinniartinneqarnissaat. Ilinniartitsinissaq tamatumuuna Ilageeqarnermi erinalerinerup immikkoorutai tamakkerlugit siaarsarneqarnissaanut soqutigineqaleriartornissaanullu ilapittuutaassaaq. Ilinniartitsinissap ilagiinni erinalerineq pingaarnerutillugu sammisussaavaa aammattaarli tamatuma saniatigut tamanut tunnganerusunik siunniusimasaqassallani.

Kapitali II.
Ilinniartitsinissap siulersorneqarnissaa ingerlanneqarnissaalu.

§ 2. Ilinniartitsinissap siulersorneqarnissaa ingerlanneqarnissaalu, aningaasartuutissatut pilersaarusiaasartussat naatsorsuutillu Ilagiit siulersuisoqarfiannit suliarineqartassapput.

§ 3. Ilagiit siulersuisui kursusertarnissani ataatsimiititaliamik ilinniagassanik, perorsaanermut atuartitsinermullu tunngasortaanik nalinginnaasumillu ilinniarnissap pilersaarusiornissaanik isumaginnittussanik pilersitsissaaq.
Imm. 2. Ataatsimiititaliap inuttarissavai: vicebiskoppi, Qeqqata provstia, Upperisarsiornermik Ilisimatusarfimmi ilinniartitsisoq ataaseq aammalu nipilersornermik erinalerinermillu ilisimasaqarluartut amerlanerpaamik marluk Ilagiit siulersuisuinit toqqarnerqarsimasut. Taakkua saniatigut kultureqarnermi atuartitaanermilu pisortaqarfik ilaasortassamik ataatsimik toqqaassaaq.
Imm. 3. Qeqqata provstia ataatsimiititaliamut siulittaasuussaaq. Siulittaasup ataatsimiititaliap ataatsimiinnissai piareersartassavai, ataatsimiigiaqqusisassalluni ataatsimiinnerillu siulersortassallugit.
Imm. 4. Ilagiit siulersuisuisa ataatsimiititaliamit innersuussineq malillugu ilageeqarnermi erinalerinermik nipilersornikkullu perorsaanermut ilinniartitsinermullu tunngasutigut piginnaanilik ilinniartitsinermi pisortassatut qinertassavaa, ataatsimiititaliap siulittaasua peqatigalugu ulluinnarni ingerlatsisussaq.

§ 4. Ilinniartunngorsinnaapput misilitsinnerminni ilinniarnermi pisortaasumit ilinniarnissaminnik naammassinnissinnaasorinartut. Ilagiit siulersuisui pissutsit immikkut ittut nalaanneqartillugit piumasaqaatit malivinngikkaluarlugit aalajangiisinnaapput.
Imm. 2. Ataatsimiititaliap ilinniartunngornissamut piumasaqaatit aamma aalajangersaaffigisinnaavai.
Imm. 3. Ataatsimiititaliap ilinniarnerminik ingerlatsilereeraluartoq ingerlaqqinnissaminut piukkunnaateqanngitsoq paasissagaluaruniuk peqataajunnaarsissinnaavaa.
Imm. 4. Ataatsimiititaliap ilinniartumik tunuartitsiniarluni aalajangernera Ilagiit siulersuisuinut suliassanngorteqqinneqarsinnaavoq.

Kapitali III.
Ilinniartitaanerup imarisai.

§ 5. Ilinniarnissap imarissavai atuagarsorluni nipilersornerup pissusiinik ilinniarneq, tulliilersuineq naalaarluaqqissaanerlu, pattagiarsuarmik pisataanillu paasisimasaqarnissaq, naalagiarnermut tunngasut, oqaluffimmi pattassinnaaneq, tussiutit erinaasa saniatigut isaatitsissutikkunnik pattassinnaaneq erinarsortitsisinnaanngornissarlu, makku qulakkeerneqarsimaniassallutik:

Ilinniartoq ennnanik oqaluffimmi atorneqartartunik tamatigoortunngortinniassallugu naalagiarnerup oqaluffimmilu suliaasartut imaanik pissusiinillu pigiliussaqartillugulu paasinnittungortissallugu; tassani pineqarneruvoq ilagiinni erinnat atorneqartartut qanoq siunertaqarneri qanorlu nipeqarlutik tutsiuttarneri ilinniartoq nammineerluni oqaluffimmi tusarnaartitsisarnissanik isamaginnissinnaanngortinniassallugu allanillu oqaluffimmi nipilersornermut tunngasunik suliaqarsinnaasunngortinniassallugu ilinniartoq atuagarsorluni ilinniagassartaasuni isumannaatsumik pikkorissuseqalersinniassallugu, tassanissaaq pineqarput nuutinik atuarsinnaanissaq taakkualu nalinginik paasisimanninnissaq, pattagiarsuarmik nipigissaasinnaalernissaq, erinarsoqatigiinnik sungiusaasinnaanngornissaq allatigallu erinarsornermik nipilersornermillu atuartitsisinnaanngornissaq.

Kapitali IV.
Ilinniarnissaq soraarummeernissarlu.

§ 6. Ilinniarnissaq marlunnik immikkoortortaqarpoq tamarmik soraarummeernermik naggaserneqartartussanik. Piumasarineqarpoq ilinniartoq kursuseqarnerni immikkoortortamut ataatsimut sap. akunnerinik 8-nik sivisussuseqartartussamut naammaginartumik malinnaassasoq. Immikkoortortap aappaani ingerlaqqinniassagaanni siullermi misilitsinnermi angusisimasariaqarpoq.
Imm. 2. Pissutsit immikkut ittut pineqartillugit ilinniarnermi pisortap qinnuteqarneratigut ilinniartitaanermi ataatsimiititaliap ilinniartup pisassat ilaannut peqataannginnissaa akuerisinnaavaa.
Imm. 3. Kursusertarfissat pinngitsoorani peqataasarfissat avataasigut ilinniartup angerlarsimalluni ilinniartitsinermi pisortaasup piffissat eqqorlugit suliassiissutigisartagassai ilitsersuussutaalu eqinnaalluni malinnaaffigisariaqarpai. Tamatumani ilinniartup suliassiissutit allattariarsugassat sungiusagassalluunniit naammaginartumik suliarisinnaaniassavai.
Imm. 4. Ilinniartitsinermi pisortap ilinniarnerup ingerlanissaa pilersaarusiassavaa ilinniartut ataasiakkaat sukkulluunniit siunnersorneqarnissaat naliliiffigineqartarnissaalu ajornarunnaarsillugu.

§ 7. Ilagiit siulersuisuisa ilinniartitsinermi ataatsimiititaliap innersuussinera malillugu ilinniarnermi pilersaarusiat sukumiinerusut, soraarummeerutissat soraarammeernerullu qanoq iluseqarnissaa immikkoortoq I-mi inaarutaasumilli immikkoortoq Il-mi soraarummeernissamut aalajangersagassat aalajangersartassavaat. Pisassat soraarummeernissamullu piumasarisaasut siunertamikkut qallunaat aallarnersaataasumik organistissatut soraarummeertarnerannut naapertuupput. Soraarummeernermi avataanit toqqakkanik censoreqartoqartassaaq. Immikkoortoq I-mi imm. II-milu soraarummeersimanermut uppernarsaatit ilinniarnermi pisortamit vicebiskoppimillu suliarineqartassapput.

Kapitali V.
Pisinnaatitaaffissat.

§ 8. Ilinniartitaanikkut tamatumuuna ilinniartup ilagiinni kalaallini piginnaanilittut isigineqarluni organistinngornissaq angusinnaassavaa. Tamatuma saniatigut ilinniartoq organistitut sulinissamini nipilersornerup siuarsarneqarnissaanut suleqataanissaminut alloriarfissaqalissaaq. Inaarutaasumik (Imm. Il-mi) angusilluni soraarummeernermi taamatut ilinniarsimaneq ilaannakuusumik tamarmiusumilluunniit organistitut atorfininnissamut pisinnaalissutaassaaq. Ilagiit siulersuisuisa suliassap annertussusia najoqqutaralugu organistitut atorfiit ataasiakkaat 40%-imiit 100%-imut atorfigineqartarnissaat aalajangersartassavaat.

Kapitali VI.
Pikkorissartarnissaq atasuinnarmillu ilinniarnerup nangeqqinneqarsinnaanera.

§ 9. Ilinniarnermi ataatsimiititaliap pisariaqartitsineq naapertorlugu organistit tapertaasumik pikkorissartarnissaat ilinniarsimanerminnilluunniit nangitsivillutik ingerlaqqerlarfissaqarnissaat pilersaarusiortassavaat. Ataatsimiititaliap ilinniarfiit allat kursusernissanik ilinniarnissanillu ussassaarutaat ingerlateqqittassavaat.

Kapitali VII.
Atortualernera.

§ 10. Nalunaarut una saqqummianneqarnermini atulerpoq.

Kalaallit Nunaanni Namminersornerullutik Oqartussat, ulloq 1. december 1987.

Jonathan Motzfeldt

/

Kristian Mørch