12. november 2009 UKA2009/121
Nunaoil A/S pillugu Inatsisartut inatsisissaannut nr. xx, uu. qqqq 2009-meersussamut siunnersuut
pillugu
Inuussutissarsiornermut Ataatsimiititaliap
ISUMALIUTISSIISSUTAA
Inatsisissatut siunnersuutip aappassaaneerneqarneranut saqqummiunneqartoq
Inuussutissarsiornermut Ataatsimiititaliaq suliarinninnermini ukuninnga ilaasortaqarpoq:
Inatsisartunut ilaasortaq, Aqqaluaq Egede, siulittaasoq, Inuit Ataqatigiit
Inatsisartunut ilaasortaq , Niels Thomsen, siulittaasup tullia, Demokraatit
Inatsisartunut ilaasortaq, Naaja Nathanielsen, Inuit Ataqatigiit
Inatsisartunut ilaasortaq, Siverth K. Heilmann, Atassut
Inatsisartunut ilaasortaq, Per Berthelsen, Siumut
1. Siunnersuummut tunuliaqutaasut imarisaalu.Namminersorlutik Oqartussat namminersorneq pillugu inatsisip atuutilerneqarneranut peqatigitillugu Nunaoil A/S-imi naalagaaffiup aktiatigut piginneqataassutai pisiarai, taamalu ingerlatseqatigiiffimmi kisiartaalluni piginnittuulerluni.
Taamaattorli Inatsisartut inatsisaanni atuuttumi (Kalaallit Nunaanni kulbrintisiornerit isumagineqarnissaannut selskabiliornermut Inatsisartut inatsisaat) Nunaoil A/S-illu ingerlatsineranut qulliunerusumik killiliussaasumi suli nalunaarneqarsimavoq aktiatigut piginneqataassutit affaat Namminersornerullutik Oqartussanit pigineqassasut affaalu allat naalagaaffimmit pigineqarlutik.
Namminersorlutik Oqartussat eqqarsaatigalugit taamaalilluni Nunaoil A/S-imi aktiatigut piginneqataassutit tamakkiisumik pigineqalernissaannut inatsisitigut killiliussassat suli (naalagaaffiup piginneqataassutaasa pisiarineqarnerannit qaammat sisamat qaangiutereersut) inissinneqavinngillat.
Siunnersuutikkut matumuuna tamanna pissusissaminut inissinneqassaaq. Taamaalilluni siunnersuut akuerineqarpat kulbrintisiornerit isumagineqarnissaannut selskabiliornermut Inatsisartut inatsisaat atuukkunnaarsinneqarluni piginnittuunermut pissutsinut nutaanut naapertuuttunik Nunaoil A/S-imut qulliunerusumik killiliussanik nutaanik aalajangersaasoqassaaq.
2. Siunnersuutip aningaasatigut kingunerisassaiNamminersorneq pillugu inatsisip malitsigisaanik ullorlu 21. juni 2009 Nunaoil A/S-imi naalagaaffiup piginneqataassutaanik pisinerup malitsigisaasa saniatigut siunnersuut immini aningaasartuuteqarfiussanngilaq.
Ukiuni missingersuusiorfiusuni Nunaoil A/S-imut aningaasalersuinissamut ukiumut aningaasartuutaanerusussat 4 mio. kr.-iunissaat naatsorsuutigineqarpoq. 2010-mut aningaasanut inatsisissatut siunnersuummi immikkut ittumik aningaasaliisoqannginnissaa siunnersuutigineqarpoq.
3. Ataatsimiititaliap siunnersuummik suliarinninneraAtaatsimiititaliap aallaqqaasiutigalugu oqaatigerusuppaa nuannaarutigigamiuk inatsisikkut matumuuna Kalaallit Nunaat aatsitassarsiornermut tunngasut Namminersorlutik Oqartussanit tiguneqarnissaata naammassineqarnissaanut alloriaqqimmat.
Ataatsimiititalialli maluginiarsimavaa Sulisitsisut (GA) tusarniaanermut akissuteqaamminni ilaatigut oqaatigimmassuk:
“Sulisitsisut kissaatigaat inatsimmi Nunaoil A/S-ip aqunneqarnera isummerfigineqassasoq, taamaalilluni Nunaoil A/S-ip aqunneqarneranut aatsitassarsiornermi aningaasaateqarfiup akuersissutigineqaqqammersup aqunneqarneranut piumasaqaatit aamma piumasaqaatinngortillugit. Sulisitsisut tamanna pissusissamisoortutut isigaat, tassami Nunaoil A/S uuliamik nassaartoqassagaluarpat aatsitassarsiornermi aningaasaateqarfimmut aningaasalersuisut pingaarutillit ilagilersussaammassuk, pissusissamisuussananilu aqutsisunut piumasaqaatit assigiinngippata.”
Naalakkersuisut Inatsisileriffiannit tusarniaanermi akissuteqaammi taamatuttaaq Nunaoil A/S-ip pisortaqarnikkut allaffissornikkullu aqunneqarnera eqqarsaatigalugit Kalaallit Nunaata Aatsitassarsiornermi Aningaasaateqarfianut Inatsisartut killiliussaasa aamma qularnaarneqarnissaat periarfissatut taaneqarpoq.
Tamanna tunngavigalugu taamatullu aamma Kalaallit Nunaata Aatsitassarsiornermi Aningaasaateqarfia pillugu Inatsisartut inatsisaata ilusilersorneqarneranut tunngavilersuutit eqqarsaatigalugit Ataatsimiititaliap kissaatiginartutut isigivaa Inatsisissatut siunnersuummi Nunaoil A/S-imut killiliussatut aalajangersakkat sukaammerneqassasut, siunnersuummi ingerlatseqatigiiffiup siulersuisuinik pisortaanillu toqqaasarneq pillugu aalajangersakkanik ilanngussinikkut Kalaallit Nunaata Aatsitassarsiornermut Aningaasaateqarfiani Namminersorlutik Oqartussat soqutigisaat illersorniarlugit malittarisassianut naapertuuttunik.
Tunngaviusumik killiliussat taakkua ingerlatseqatigiiffiup aqutsisuisa qaqugukkulluunniit ataatsimut pisariaqartunik piginnaasaqarnissaannik ingerlatseqatigiiffiup (taama aamma piginnittut; Namminersorlutik Oqartussat) soqutigisaanik naammassinnissapput. Tamanna aktiaateqarluni ingerlatseqatigiiffinnut suugaluartunulluunniit Namminersorlutik Oqartussanit pigineqartunut atuuttariaqarpoq.
Pisariaqartitsineq tamanna naammassiniarlugu siunnersuummilu teknikikkut amigaatit ataasiakkaat iluarsiniarlugit aappassaaneerinninnissamut Inuussutissarsiornermut Ataatsimiititaliaq allannguutissatut siunnersuuteqarpoq. Allannguutissatut siunnersuut aalajangersakkanut ataasiakkaanut itisiliissutaasunik nassuiaatitaqarpoq.
Isumaliutissiissummut ilanngussami inatsisissatut siunnersuut Ataatsimiititaliap allannguutissatut siunnersuutai akuerineqarpata ilusissamisut ilusilik takuneqarsinnaavoq.
4. InassuteqaatAtaatsimiititaliap isumaqatigiittup inassutigaa Ataatsimiititaliap allannguutissatut siunnersuutai akuerineqassasut.
Taamatut oqaaseqarluni siunnersuummillu siuliani nalunaarneqartutut paasinnilluni Inuussutissarsiornermut Ataatsimiititaliap siunnersuut aappassaaniigassanngortippaa.
Siulittaasoq/Siulittaasup tullia