Kalaallit Nunaata nunap immikkoortuinut kommuneqarfinnullu aggorneqarnera pillugu Inatsisartut inatsisaat nr. 15, 5. december 2008-meersoq
Nunap immikkoortui
§ 1. Kalaallit Nunaat nunap immikkoortuinut Kitaanut, Avannaarsuanut Tunumullu aggorneqarpoq, taakkulu killingi ima aalajangersarneqarput:
1) Kitaa. Kujammut kimmullu killigai Atlantikoq, Ikersuaq Davis Avannaatalu Imaa. Avannamut killigaa titarneq allorniusat sanimukartut avannamut 78°-iata allorniusat ammukartut kimmut 44°-iata naapiffiannit allorniusat sanimukartut 75°-iata Kalaallit Nunaata kimmut sineriaanut attuunneranut, tassanngaanniillu titarneq narlusuumik nangiinnarlugu immap killilernerani titarnermut aallaaviusumut (basisliniamut). Kangimut killigaa allorniusat ammukartut 44°-iata 78°-mik naapiffianniit kujammorluinnaq allorniusat sanimukartut avannamut 61°-iata kujammullu 60°40´-p allorniusat ammukartut 44°20´-ata naapiffiannut, tassangaanniillu Kangerlussuatsiap qeqqa atuarlugu Atlantikumut.
2) Avannaarsua. Kimmut avannamullu killigai Avannaata Imaa, Puikkaasorsuaq, Kane Basin, Kennedy Kanal, Hall Basin, Robeson Kanal aamma Sikuiuitsoq Avannarleq. Kujammut killigai Kitaanut Tunumullu killeqarfigitinneqartut.
3) Tunu. Kangimut killigaa Atlantikoq. Avannamut Nordostrundingimiit titarneq Romersø-enip avannaani kuuit tunussutigiillutik kuuttut aariaannut Kronprins Christian Land aqqusaarlugu sermersuup sinaanut, tassanngaanniillu narlusuumik ingerlaqqilluni allorniusat sanimukartut 78°-iat allorniusallu ammukartut kimmut 44°-iata naapiffiannut. Kimmut kujammullu killigaa Kitaata kangimut killiga.
Imm. 2. Killeqarfiliineq pillugu nunap assinga ilanngunneqartoq allatigut innersuussutigineqarpoq.Kommuneqarfiit
§ 2. Kalaallit Nunaat aggorneqarpoq kommuneqarfinnut Kommune Kujalleq, Kommuneqarfik Sermersooq, Qeqqata Kommunia aamma Qaasuitsup Kommunia.
Imm. 2. Killingisa aalajangersarneqarnerannut tunngatillugu takukkit nunap assingi I,II,III aamma IV ilaliussatut ilaatinneqartut.
Kommuneqarfiit killingisa aalajangersarnerat§ 3. Kommuneqarfiit killingi ataani imm. 2-5-imi taaneqartutut aalajangersarneqarput.
Imm. 2. Kommune Kujalleq: Kommuneqarfiup avannamut killingata aallaavigai kangimut Irmingerhavet qeqertap Timmiarmiut avannaaniittoq tassunnga avannamut kangimut kangerluk Timmiarmiit Kangertivat atuarlugu kangerluup qinnguanut sermip nakkaavianut Snehatten-ip kitaani. Killinga sermip nakkaasup qeqqatigut sermersuarmut ingerlavoq narlusuumillu titarlugu allorniusap avannamut 62° 44’ 50"-ip kimmullu 44°00’00"-imut (WGS 84). Tassannga titarneq narlusuumik Sermersuaq ikaarlugu allorniusat avannamut 62°04’10", kimmut 47°36’18" (WGS84). Sumiiffimmit tassannga killinga ingerlavoq Qipisaqqup Sermia Avannarleq atuarlugu, taanna qiteraarlugu kangerlummut, tassanngaaniit qeqertaq Sannerut kangimut kujammullu uiarlugu imaanut atalluni. Kommuneqarfiup kimmut kujammullu killingi tunngaviusumik killigitinneqarput tak. § 4.
Imm. 3. Kommuneqarfik Sermersooq: Kujammut aamma kujammut-kimmut killingata Kommune Kujalliup killingi assigai. Avammut killinga kitaani Davis Strædemiit ikerasak Oqummiap Paava atuarlugu Upernivik avannaqqullugu, kangimut avannamut-kangimullu Oqummiap Tasersuatigut, qooroq Naqinnersua atuarlugu. Tassanngaaniit Quassuup Quassuttarsuullu aariaat atuarlugu tassanngalu kangimut avannamut-kangimullu taseq Tasersuaq atuarlugu sermeq Saqqap Sermia atuarlugu Sermersuaq kangimut atuarlugu allorniusaq avannamut 66°22’00", kimmut 44°00’00" (WGS84). Allormiusamit tassannga kimmut killingata atuarpaa allormiusaq sanimukartoq kimmut 44 avannamut allormiusaq avannamut 71°00’00", kimmut 44°00’00" (WGS 84).Avannamut kangimut kommuneqarfik killeqarpoq titarnermik Kap Biotimiit (Flemming Fjordip avannaa-tungaani qaqqajunnaq allorniusaq sanimukartoq 72° -mit 10 km miss. kujasitsigisumi) kimmut qaqqap aariaa atuarlugu tassanngaaniit Staunings Alper kangiatungeqqullugit tatsit Imeq-mik atillit avannaqqullugit.Taava kimmut Stormpyntimut Kangersik Kiatteq-up avannaamut sineriaatigut, tassannga Kangersik Kiatteq-up avannamut sineriaa atuarlugu qeqertamut Immikkeertaa. Immikkeertaanit kangerluk ikaarlugu ingerlaqqilluni Tuttut Nunaat napillugu sermimut Rypefjordip avannaa-tungaanut aamma tassangaaniit Nunatarpaat kujaqqullugit allorniusaq avannamut 71°00’00" kimmut 28°50’00" (WGS84). Tassanngaaniit allormiusaq sanimukartoq atuarlugu avannamut 71°00’00", kimmut 44°00’00" (WGS 84). Avannamut killingata peqatigaa Tunup Avannaani Nunap Allangutsaaliukkap killinga (tak.§ 5). Kommuneqarfiup kimmut kangimullu killingi tunngaviusumik killeqarfittut killilerneqarput tak. § 4.
Imm. 4. Qeqqata Kommunia: Kujammut kangimullu Kommuneqarfik Sermersooq-mut killeqarpoq. Avannamut killinga immamiit Nassuttooq atuarlugu Kuup Akuanut ingerlaqqillunilu Kuuk atuarlugu Inuppaat Quuat-nut, tassannga killinga kangimut titarneq narlusooq atuarlugu Kommuneqarfik Sermersuup killinganut kangimut killeqarpoq, allorniusat avannamut 67°32’00", kimmut 44°00’00" (WGS 84). Kommuneqarfiup kimmut killingi tunngaviusumik killeqarfittut killilerneqarput, tak. § 4.
Imm. 5. Qaasuitsup Kommunia: Kujammut Qeqqata Kommunianut kujammut kangimullu Kommuneqarfik Sermersooq-mut killeqarpoq. Allorniusanit avannamut 71°00’00", kimmut 44°00’00"-nit (WGS 84) kangimut killinga killilerneqarpoq allorniusaq ammukartumit 44-mit (WGS 84) allorniusanut avannamut 78°00’00", kimmut 44°00’00" (WGS 84) tassanngalu Sermersuaq napillugu Petermann Gletcherimut taannalu atuarlugu Ikeq-mut (Smith Sund, Nares Stræde, Kennedy Kanal aamma Robeson Kanal). Kommuneqarfiup kimmut avannamullu tunngaviusumik killeqarfianit killilerneqarput tak. § 4. Kommuneqarfiup Pituffimmut tunngatillugu killingi pillugit tak. § 5.§ 4. Kommuneqarfiit immamut killingi tunngaviusumik killeqarfittut killilerneqarput, tak. United Nations Bulletin no. 56, Imavinni Pisinnaatitaaffiit pillugit Isumaqatigiissut. Taamaakkaluartoq kommunalbestyrelsit pineqartut Naalakkersuisut akuersineratigut sumiiffimmi maleruaqqusanik aalajangersaasinnaapput tunngaviusumik killeqarfinnik iluani atuuttussanik.
Aalajangersakkat immikkut ittut§ 5 Kommuneqarfinnut aggorneqarnerup avataatigut ingerlanneqarput:
1) Kalaallit Nunaata illersornissaa pillugu angerfigeqatigiissut 27.april 1951-imeersoq malillugu danskit Amerikamiullu sakkutooqarfii. (Pituffik).
2) Tunup Avannaani Nuna Allanngutsaaliugaq. Nunap allanngutsaaliukkap killingi aalajangersagaapput Inatsisartut inatsisaat nr. 15 novembarip 9-anni 1988-imeersoq Kalaallit Nunaanni pinngortitamik eqqissisimatitsineq pillugu Inatsisartut inatsisaata §1, immikk.2-p 3-llu allannguutaat pillugu.§ 6. Naalakkersuisut pisuni ataasiakkaani killingit pillugit najoqqutassanik erseqqinnerusunik aalajangersaasinnaapput.
§ 7. Kommuneqarfiup aqqanik allannguineq pisinnaavoq taamaallaat Naalakkersuisut siusinaartumik akuersineratigut Nunat Aqqinik Aalajangiisartut innersuussutaat malillugit.
Atuutilernissaa§ 8. Inatsisartut inatsisaat manna atuutilerpoq ulloq 1. januar 2009. Peqatigitillugu atorunnaassaaq Kalaallit Nunaata nunap immikkoortuinut kommuninullu aggornera pillugu Inatsisartut inatsisaat nr. 11, 30. oktober 1998-imeersoq kingusinnerusukkut allanguutitalik.
Namminersornerullutik Oqartussat, ulloq 5. december 2008
Hans Enoksen/
Peter Schultz