Ulluunerani paaqqinnittarfiit aqunneqarnerat, siulersugaanerat ingerlanneqarnerallu pillugit Namminersornerullutik Oqartussat nalunaarutaat nr. 5, 16. april 2007-imeersoq
Ulluunerani paaqqinnittarfiit, ulluunerani paaqqinninneq il.il. pillugu Inatsisartut peqqussutaanni nr. 7-imi 21. maj 2002-meersumi Inatsisartut inatsisaatigut nr. 3-kkut 21. maj 2004-mi allanngortinneqartukkut § 3, imm. 3 malillugu aalajangerneqarpoq:
Ulluunerani paaqqinnittarfiiit
§ 1. Ulluunerani paaqqinnittarfiit suliffeqarfiupput tassani sulisuusut pisussaatitaallutik meeqqat takkuttarnerat nakkutigissallugu, nalunaarutigineqanngitsumik takkutinngitsoornerit pillugit angajoqqaat ilisimatittassallugit meeqqallu paaqqinnittarfimmiinnerani nakkutigissallugit.
Imm. 2. Paqqinnittarfiit ima ittut kommunalbestyrelsimit akuerineqarsinnaapput:
1) 0-miit 2-nik ukiulinnut meeraaqqeriviit,
2) 0-miit 6-inik ukiulinnut ukiui akuleriiaartunut,
3) 0-miit 15-inik ukiulinnut ukiui akuleriiaartunut,
4) 3-niit 6-inik ukiulinnut meeqqeriviit,
5) 7-niik 15-inik ukiulinnut sunngiffimmi ornittakkat.
Imm. 3. Ulluunerani paaqqinnittarfiup 1-ip meeqqat ukioqqortussusii assigiinngitsut amerlanerpaamik 4-t tigummiarsinnaavai. Meeqqat ukioqqortussusii assigiinngitsut ataasiakkaat amerlanerpaamik 24-nik inissaqarsinnaapput.
Imm. 4. Meeqqat 3-t inorlugit ukiullit innarluutillillu 6-it inorlugit ukiullit meeqqat 2 inissaannik atuisutut isigineqassapput. Meeqqat 3-t sinnerlugit ukiullit innarluutillillu 6-it sinnerlugit ukiullit meeqqap ataatsip inissaanik atuisutut isigineqassapput.
Siulersuisut
§ 2. Ulluunerani paaqqinnittarfiit ataasiakkaat tamarmik siulersuisussaannik qinersisoqarnissaa kommunalbestyrelsip isumagissavaa. Siulersuisuni inuttaassapput angajoqqaat, sulisut kommunillu sinniisaat. Siulersuisunut ilaasortat amerlanersai tassaassapput angajoqqaat sinniisaat. Kommunip sinniisai tassaasinnaapput kommunalbestyrelsimut ilaasortaq imaluunniit inuk alla kommunalbestyrelsimit toqqagaasoq. Ulluunerani paaqqinnittarfiup pisortaa taasisinnaatitaanani peqataasassaaq.
Imm. 2. Ulluunerani paaqqinnittarfiup anguniagaa perorsaanermilu maleruagassat siulersuisut aalajangersassavaat. Ulluunerani paaqqinnittarfiup anguniagaa kommunalbestyrelsip akuerissavaa.
Imm. 3. Ulluunerani paaqqinnittarfiup isumannaatsumik aalajangersakkallu atuuttut naapertorlugit ingerlanneqarnissaa siulersuisut isumagissavaat.
Paaqqinnittarfimmut ileqqoreqqusat
§ 3. Ulluunerani paaqqinnittarfik sunaluunniit ileqqoreqqusaqassaaq kommunalbestyrelsimit akuersissutigineqarsimasunik. Ileqqoreqqusat minnerpaamik imarissavaat aalajangersakkat makkuninnga imaqartut:
1) inissat akuerisat amerlassusiat,
2) ukioqqortussusissat akuerisat,
3) ammasarfiit,
4) siulersuisut katitigaanerat qinigaanerallu,
5) siulersuisut inissitsiternerat, ataatsimiikulassusissaat, aalajangiiniariaatsit nipangiussisimasussaatitaanerlu.
Imm. 2. Kommunit ulluunerani paaqqinnittarfiinut ileqqoreqqusanut nalinginnaasunut najoqqutassiaq Naalakkersuisut suliarisimavaat, tak. ilanngussaq 1.
Ulluunerani paaqqinnittarfiup pisortaa
§ 4. Suliatigut, allaffissornikkut sulisoqarnikkullu pissutsit kiisalu siulersuisut ilitsersuutitik malillugit aalajangigaasa piviusunngortinnissaat paaqqinnittarfiup pisortaata akisussaaffigai.
Imm. 2. Ulluunerani paaqqinnittarfiup ingerlatsinera pillugu ulluunerani paaqqinnittarfiup pisortaa ukiut tamaasa naatsukullammik nalunaarusiortassaaq. Nalunaarusiaq siulersuisunut saqqummiunneqassaaq, taakkualu oqaaseqaatitik ilanngullugit nalunaarusiaq takkuttarnermullu nalunaarsuiffik kommunalbestyrelsimut ingerlateqqissallugu, tak § 8.
Sulisut amerlassusissaat
§ 5. Ulluunerani paaqqinnittarfimmi sulisut amerlassusissaat kommunalbestyrelsip aalajangissavaa. Kommunip ulluunerani paaqqinnittarfiutaani pisortaq ulluunerani paaqqinnittarfiup siulersuisuisa aamma kommunip meeqqanut kultureqarnermullu ataatsimiititaliaata inassuteqareernerisigut kommunalbestyrelsip atorfinitsissavaa.
Imm. 2. Sulisut sinneri paaqqinnittarfimmut siulersuisut inassuteqaateqareernerisigut paaqqinnittarfimmi pisortamit atorfinitsinneqarlutillu soraarsinneqartassapput. Kommunip ulluunerani paaqqinnittarfiutaani perorsaasutut sulisut meeqqanut kulturimullu ataatsimiititaliaq akuersiseqqaartinnagu atorfinitsinneqarsinnaanatillu soraarsinneqarsinnaanngillat.
Imm. 3. Ulluunerani paaqqinnittarfinni imminnut ingerlattuni ulluunerani paaqqinnittarfiup pisortaa sulisullu sinneri ulluunerani paaqqinnittarfiup siulersuisunit atorfinitsinneqartassapput.§ 6. Atorfiit inuttaligassat minnerpaamik 50%-ii perorsaanikkut ilinniarsimasunik, matumani ilanngullugit meeqqanut perorsaanermullu ikiortit, inuttalerneqassapput.
Imm. 2. Ulluunerani paaqqinnittarfiup ammanerata nalaani meeraqatigiinnut ataatsinut sulisut ikinnerpaamik 2-jussapput, sulisorlu minnerpaamik ataaseq perorsaanermik ilinniarsimasoq paaqqinnittarfimmiittassaaq.
Akuerineqarneq
§ 7. Ulluunerani paaqqinnittarfik qatserisarnermi oqartussaasunit, peqqinnissamut oqartussaasunit suliffinnillu nakkutilliisunit akuerineqarsimassapput. Illutai kommunalbestyrelsimit akuerineqassapput pisortallu oqartussaasuisa piumasaqaataasa eqquutsinneqarsimanerat nakkutigineqassalluni.
Imm. 2. Inissani akuerisaasuni amerlassutsini imaluunniit sanaartukkani allannguinerit pisinnagit allannguutissat qatserisarnermi oqartussaasunit, peqqinnissamut oqartussaasunit suliffinnillu nakkutilliisunit akuerineqarsimassapput.
Imm. 3. Oqartussaasut akuersissutaasa naqitanngorneqarneri kiisalu ulluunerani paaqqinnittarfiup ileqqoreqqusai kommunalbestyrelsimit Ilinniartitaanermut Pisortaqarfimmut nassiunneqassapput.
Takkuttarnermut nalunaarsuiffik
§ 8. Ullunnerani paaqqinnittarfimmi meeqqat allatsissimasut atii cpr. normui, angajoqqaat paaqqutarinnittulluunnit aqqi, ullormut qanoq sivisutigisumik paaqqinnittarfimmiinneri kiisalu tassaniikkunnaarneq sumillu patsiseqarnersoq nalunaarsorneqartassapput. Aammattaaq takkuttarnermut nalunaarsuiffeqassaaq tassani ulluni ammaffinni tamani takuneqarsinnaassalluni meeqqat kikkut paaqqinnittarfimmut takkussimanersut. Kommunip ulluunerani paaqqinnittarfiutaasa takkuttarnermut nalunaarsuiffik ukiumoortumik nalunaarut ilanngullugu kommunalbestyrelsimut nassiutissavaat.
Missingersuusiat
§ 9. Ulluunerani paaqqinnittarfimmi pisortap siunnersuuteqarneratigut siulersuisut ukiumut naatsorsuusiorfimmut tullermut missingersuusiortassapput. Missingersuusiaq kommunalbestyrelsip piffissaliussaa naatinnagu kommunalbestyrelsimut nassiunneqassaaq. Missingersuusiat kommunalbestyrelsip missingersuusiornermut malittarisassiai malillugit suliarineqassapput.
Atortuulerfia
§ 10. Nalunaarut manna ulloq 1. juni 2007-imi atortuulerpoq.
Imm. 2. Peqatigitillugu ulluunerani paaqqinnittaarfiit siunertaat, aqunneqarnerat ingerlanneqarnerallu pillugit Inunnik isumaginninermut Ineqarnermullu Naalakkersuisoqarfiup kaajallaasitaa nr. 176 17. juni 1986-imeersoq aamma ulluunerani paaqqinnittarfinnik pilersitsineq, aaqqissuussineq, aqutsineq ingerlatsinerlu pillugit ilitsersuut tassunga ilaasoq atorunnaassaaq.
Namminersornerullutik Oqartussat 16. april 2007
Tommy Marų/
Lise Lennert Olsen