13. oktober 2006 UKA 2006/32
Inatsisartut akitsuutit il.il. pillugit inatsisaasa ilaasa
allanngortinnissaat pillugu Inatsisartut inatsisissaattut siunnersuut
pillugu
Inatsisartut Akileraartarnermut Akitsuusiisarnermullu Ataatsimiititaliaata
ISUMALIUTISSIISSUTAA
siunnersuutip appassaaneerneqarnerani saqqummiunneqartoq
Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Augusta Salling, Atassut (siulittaasoq)
Inatsisartunut ilaasortaq Agnethe Davidsen, Siumut (siulittaasup tullia)
Inatsisartunut ilaasortaq Lars Emil Johansen, Siumut
Inatsisartunut ilaasortaq Agathe Fontain, Inuit Ataqatigiit
Inatsisartunut ilaasortaq Lene Knüppel, Demokraatit (sinniisussaq)
Inatsisartunut ilaasortaq Tommy Marĝ, Siumut (sinniisussaq)
Inatsisartunut ilaasortaq Jens Lars Fleischer, Siumut (sinniisussaq)
UPA 2006-imi siunnersuummik siullermeerineq tunngavigalugu inatsisisatut siunnersuut nassuiaatitaalu kiisalu tusarniaanermi akissutitut tiguneqartut Inatsisartut Akileraartarnermut Akitsuusiisarnermullu Ataatsimiititaliaata misissuataarpai. Siullermeerinermi apeqqutit saqqummiunneqartut sukumiinerusumik ersersinneqarnissaat siunertaralugu Aningaasanut Nunanullu Allanut Naalakkersuisoq Akileraartarnermut Akitsuusiisarnermullu Ataatsimiititaliamut allakkamik ulloq 2. oktober 2006-imi nassiussaqarpoq. Allagaq isumaliutissiissummut matumunnga Ilanngussaq 1-itut ilanngunneqarpoq.
Inatsisissatut siunnersuut pillugu tusarniaaneq.Tusarnianeq pillugu allakkiaq naapertorlugu Akileraartarnermut Pisortaqarfiup inatsisissatut siunnersuut pillugu tusarniaanera piffissami ulloq 19. juni 2006-imit 20. juli 2006-imut ingerlanneqarpoq. Akileraartarnermi inatsisit allat marluk tusarniaanermi aamma ilaatinneqarput, tak. UKA 2006/30 kiisalu UKA 2006/32. Tusarniaavigineqartut kiisalu tusarniaanermi angusat pillugit inatsisissatut siunnersuummi naliginnaasumik nassuiaatit innersuussutigineqarput.
Tusarniaanermi atortussat annertussusaat pisariunerallu kiisalu tusarniaanermut piffissaliussap aasaanerani sulinngiffeqarnerup nalaanut inissinneqarsimanera eqqarsaatigalugit tusarniaanermut piffissaliussaq sivikippallaartutut Akileraarnermut Akitsuusiisarnermullu Ataatsimiititaliamit isigineqarpoq. Tamanna tunngavigalugu Akileraartarnermut Akitsuusisarnermullu Naalakkersuisoqarfiup tusarniaanermut naammattumik maannamit piffissaliisarnissaa ataatsimiititaliamit kaammattuutigineqassaaq. Akileraartarnermut Akitsuusiisarnermullu Ataatsimiititaliap isummersuutaasa itisilerneqarnissaat kissaatigineqarpat ataatsimiititaliap inatsisissatut siunnersuummut UKA 2006/30-imut isumaliutissiissutaa innersuussutigineqassaaq.
Akileraartarnermut Akitsuusisarnermullu Ataatsimiititaliap isumaliutersuutai.Akileraartarnermik ingerlatsinerup qitiusumit ingerlanneqalernissaata malitsigisaanik aalajangersakkanik atuuttunik allannguinissaq siunnersuummi annertunerpaamik pineqarpoq. Inatsisartuni siullermeerinninnermi Siumumit, Inuit Ataqatigiinnit, Atassummit kiisalu Kattusseqatigiit Partiiannit siunnersuut taperserneqarpoq.
Siunnersuut maanna ilusimisut iluseqartoq Demokraatinit taperserneqarsinnaanngilaq, tassa ilaasut usillu pillugit Namminersornerullutik Oqartussat paasissutissanik qarasaasiatigut aallersinnaanerat aalajangiisuusumik pisariaqartinneqarsorineqanngimmat, tak. nioqqutissanik eqqussuineq annissuinerlu pillugu inatsimmi § 29, imm. 1-tut aamma 2-tut siunnersuutigineqartut.
Tassunga atatillugu nioqqutissanik eqqussuinermi nakkutilliineq kiisalu avataanit tikittunik nakkutilliineq nunatsinni piffinni arlalinni akileraartarnermi ingerlatsiveqarfimmit ingerlanneqartut Aningaasanut Nunanullu Allanut Naalakkersuisup 2. oktober 2006-imi allakkamini itisiliivigaa. Taamatut nakkutilliinermi siunertarineqarpoq akitsuutinik akiliinngitsoornissap kiisalu inatsisit allat naapertorlugit nioqqutissanik eqqussuinermi annissuinermilu malittarisassanik unioqqutitsinissap pinngitsoortinnissaat, tassunga ilaallutik hashimik aanngajaarniutinillu allanik eqqussuineq.
Tamatumani danskit oqartussaasuinik suleqateqarneq eqqarsaatigalugu ilaasut usillu pillugit paasissutissanik ingerlaavartumik nutartikkanik akileraartarnermi ingerlatsiveqarfiup ilisimasaqarnissaa assut pingaaruteqartutut Naalakkersuisunit isigineqarpoq. Taamaanngippat ilaasut allattorsimaffiisa, usit pillugit nalunaarsuiffiisa il.il. ataavartut tunniunneqarnissaat akileraartarnermi ingerlatsiviup angallassinermik ingerlatsivinnit piumasaqaatigisariaqartassavai. Tamanna angallassisut akileraaruserinermillu ingerlatsiviup piffissamik annertunerusumik aningaasartuuteqarneruneranillu kinguneqassasoq Naalakkersuisut isumaqarput.
Tassunga atatillugu innuttaasup paasissutissanik imminerminut tunngasunik nammineerluni aalajangiiffiginnissinnaanerata mianerineqarnissaa kiisalu illuatungaatigut oqartussaasut suliassanik inatsisitigut peqqussutaasunik isumaginninnissaanni naammaginartumik periarfissiinissaq inatsisiliortup akuttunngitsumik oqimaaluttartariaqartarmagu Akileraartarnermut Akitsuusiisarnermullu Ataatsimiititaliap oqaatigissavaa. Paasissutissat inunnut tunnganerusut mianernartullu aammalu atornerlunneqarsinnaasutut aarleqqutigineqarsinnaasut pineqartillugit innuttaasut piginnaatitaaffii ataqqillugit oqartussaasut iliuuseqarnissamut periarfissamik killiliivigineqarnissaaannut tunngavilersuutigineqartut naleqarnerulissapput.
Matumani pineqartumi isummat tamakku imminnut assortuuttut nalilersoreerlugit Akileraartarnermut akitsuusiisarnermullu ataatsimiititaliaq isumaqarpoq, ilaasunut nassatanullu paasissutissat qarasaasiat atorlugit akileraartarnermut ingerlatsivik paasissutissanik pissarsinissamut periarfissaqartariaqartoq. Taamaalilluni inuit tikinneranni nioqqutissallu eqqunneqarneranni pitsaasumik naleqquttumillu nakkutilliinissamut piumasaqaatininngarnit annertunerusumik innuttaasut inatsisitigut pisinnaatitaaffiinut akulerunnerusoq ataatsimiititaliaq isumanngilaq. Tassunga atatillugu paasissutissat katersukkat aallaavittut isigalugu akileraartarnermut ingerlatsiviup ilanngaaseriveqarfiani taamaallaat paarineqarlutillu suliarineqartarnissaat Akileraartarnermut Akitsuusiisarnermullu Ataatsimiititaliamit tunngavissaatinneqarput, paasissutissat allanut ingerlateqqinneqarnissaannut ersarissumik tunngavissaqartitsoqarsimanngippat. Taama tunngavissaatitsineq Aningaasanut Nunanullu Allanut Naalakkersuisumit uppernarsarnissasoq ataatsimiititaliap kaammattuutigissavaa.
Akileraartarnermut Akitsuusisarnermullu Ataatsimiititaliap inassuteqaataa.Akileraartarnermut Akitsuusisarnermullu Ataatsimiititaliap isumaqatigiittup siuliani allassimasunik oqaaseqaateqarluni, Inatsisartut aappassaaneerinninnermini inatsisissatut siunnersuut tapersissagaat inassutigaa.
Taama oqaaseqarluni Inatsisartut Akileraartarnermut Akitsuusiisarnermullu Ataatsimiititaliaata siunnersuut Inatsisartunut aappassaaniigassanngortippaa.
Augusta Salling
Siulittaasoq
Lars Emil Johansen
Agathe Fontain
Agnethe Davidsen
Lene Knüppel