Inatsisartut akileraartarnermut akitsuusiisarnermullu Ataatsimiititaliaat
UKA 2006/31-ip siullermeerutaasumik suliarineqareernerani apeqquteqaatinut akissuteqaat
Meeqqanut ileqqaarutit pillugit Inatsisartut inatsisissaattut siunnersuutip (UKA 2006/31) siullermeerutaasumik suliarineqarnerani Inuit Ataqatigiit oqaaseqartartuata pinerlineqarsinnaasut naammagittaalliuuteqartarfimmut aalajangiinermik maalaaruteqarsinnaanermut periarfissaqarsinnaanissaat ujartorpaa.
Naalakkersuisut isumaqatigaat, pisortat aalajangiinerisa maalaarutigineqarsinnaanerannik innuttaasut piumasaqartut. Tamanna aamma meeqqanut ileqqaakkat pillugit aaqqissuussinermut tunngatillugu atuuppoq, tamatumani naammagittaalliuutit Naalakkersuisunut tunniunneqassallutik. Siunnersuummi § 7, imm. 2-mi Naalakkersuisut nalunaarutikkut naammagittaalliuutit il.il. pillugit malittarisassanik aalajangersaasinnaanermut pisinnaatitaanerat ilanngunneqarpoq. Aalajangersakkammut oqaaseqaatini oqaatigineqarpoq, Naalakkersuisut ilaatigut maalaarutit il.il. tunniunneqarnissaannut piffissaliussanik aalajangersaasinnaasut. Naalakkersuisut maannakkut tamatumunnga tunngasumik nalunaarutissaq suliaraat, tamatumunngalu atatillugu naatsorsuutigineqarluni maalaaruteqarnissamut piffissaliussaq qaammatinut pingasunut aalajangersarneqassasoq.
Inussiarnersumik inuulluaqqusillungaJosef Motzfeldt