Kommunalbestyrelsit, nunaqarfinni aqutsisut il.il. pillugit Inatsisartut inatsisaata allanngortinneqarnera pillugu Inatsisartut inatsisaat nr. 8, 14. november 2004-imeersoq (Aqutsinermut inatsit)
(Aningaasaqarnermut Ataatsimiititaliap piginnaatitaaffiisa annertusineqarnerat)
§ 1
Kommunalbestyrelsit, nunaqarfinni aqutsisut il.il. pillugit Inatsisartut inatsisaat nr. 20, 3. november 1994-imeersumi, Inatsisartut inatsisaat nr. 6, 12. juni 1995-imeersukkut allanngortinneqartumi, imatut allanngortitsisoqassaaq:
1. § 21-mi imm. 2’p kingorna immikkoortutut nutaatut ikkunneqassaaq:
"Imm. 3. Aningaasaqarnermut ataatsimiititaliattaaq kommunini suliassaqarfiit allat ingerlaannartumik ingerlatsivigisinnaavai. Kommunit suliassaqarfiittaaq allat aningaasaqarnermut ataatsimiititaliap aamma ingerlatsivigissappagit, aqutsinermut ileqqoreqqusani aalajangersarneqarsinnaavoq, aningaasaqarnermut ataatsimiititaliaq tamanna naapertorlugu taaneqassasoq."
§ 2
Inatsisartut inatsisaat ulloq 1. januar 2005-imi atuutilerpoq.
Namminersornerullutik Oqartussat, ulloq 14. november 2004
Hans Enoksen/
Kaj Kleist