1. august 2004 UKA2004/23
Inatsisissatut siunnersuummut nassuiaatit
Nassuiaatit nalinginnaasut
1. Aallaqqaasiut:
Kommunit arlallit kissaatigisimavaat inuussutissarsiornermut suliffeqarnermullu tunngasut kommunip aningaasaqarnermut ataatsimiititaliaanit isumagisassanngorlugit inissinneqassasut. Inatsit maanna atuuttoq naapertorlugu tamanna pisinnaanngilaq. Aammattaaq suliassat allat aningaasaqarnermut ataatsimiititaliamut inissinneqarnissaannik kissaateqarneq akuersaarneqarsinnaasimanani.
2. Siunnersuummi pingaarnerit:
Siunnersuummi pingaarnertut anguniagaavoq kommunit ataasiakkaat pisariaqartitaannut assigiinngitsunut naleqqussarlugit naalakkersuinikkut sukkanerusumik eqaannerusumillu sulianik ingerlatsisarnissamik kissaatigisat akuerineqarnissaat.Aaqqissuussaanermut Ataatsimiititaliap sulinerani maannakkut ingerlanneqartumi kommunit ingerlatsinermik namminneq aaqqissuunnissaannut kommunit periarfissaasa siuarsarnissaat kissaatigineqarpoq imaalillugu kommunit ataasiakkaat nutaanik periaaseqarlutik aaqqissuussinissaannut kommunalbestyrelsit, nunaqarfinni aqutsisut il.il. pillugit Inatsisartut inatsisaannit (aqutsinermut inatsimmit) killilersorneqaratik. Inatsisissatut siunnersuummi kommunini aqutsinermi tunngavissaqartitaanerulernissaq taamaalilluni siunertarineqarpoq.
3. Aningaasaqarnerikkut allaffissornikkullu pisortanut kingunerisassat:
Naalakkersuisut siunnersuutaat kommunit aningaasartuutaannik annertunerulersitsisussatut naatsorsuutigineqanngilaq. Aningaasaqarnermut ataatsimiititaliat amerlanerusunik suliassaqalersinnaanissaannik siunnersuut kommunit ataatsimiititaliat naalakkersuinermik suliallit ikilisinnissannik pilersaaruteqareersut sipaaruteqarnissaannik kinguneqarsinnaavoq.
4. Aningaasaqarnikkut allaffissornikkullu inuussutissarsiutinut kingunerisassat:
Pisariillisaanissamut sukkanerusumillu sullissinissamut inatsisissatut siunnersuut periarfissiissaaq.
5. Avatnagiisunut pinngortitamullu kingunerisassat:
Tassunga oqaaseqaateqartoqarsimanngilaq.
6. Innutaasunut allaffisornikkut kingunerisassat:
Inatsisissatut siunnersuummi allaffissornikkut kingunerisassani sulianik assigiiaarnerusunik naalakkersuinermik sulialinnik ataatsimiititaliaqarnerup ikilisaaffiginissaa kommunit qanoq annertutigisumik aaqqissuussiffiginiarneraat apeqqutaassaaq, Ataatsimiititaliat kattussorneqassappata allaffissornermi sullissineq eqaannerusariaqarpoq, sulisut ikilisinneqartariaqarlutik, innuttaasut sullinneqarnerat pitsaanerulertariaqarluni, inatsisitigut isumannaatsuuneq annertusisariaqarluni kiisalu IT-teknologi nutaaliaasoq atoluarneqarnerusariaqarluni.
7. Kingunerisinnaasat pingaarutillit allat:
Tassunga oqaaseqaateqartoqarsimanngilaq.
8. Naalagaaffeqatigiinnermut namminersornermullu tunngasut:
Tassunga oqaaseqaateqartoqarsimanngilaq.
9. Oqartussaasut kattuffiillu tusarniaaffigineqarnerat:
Inatsisissatut siunnersuut kommuninut KANUKOKA-mullu ulloq 18. majimiit 16. juni 2004-mut tusarniaassutigineqarpoq.Tusarniaanermi akissutini atuarneqarsinnaavoq allannguutissatut siunnersuut KANUKOKA-mit taperserneqarsinnaasoq kommunillu tamarmik akissuteqartut tamatumunnga nangaassuteqarartik tapersersuisinnaaasut.
Inatsisissatut siunnersuummi aalajangersakkanut ataasiakkaanut nassuiaatit
§ 1-imut
Nr. 1-imut
Kommunalbestyrelsit, nunaqarfinni aqutsisut il.il. pillugit Inatsisartut maannakkut inatsisaat (aqutsinermut inatsit) malillugu isumaqartoqarpoq aningaasaqarnermut ataatsimiititaliami suliassat taamaattut aningaasaqarnermut ataatsimiititaliap suliassaanut inatsisitigut aalajangikkanut pissusissamisoortumik attuumassutillit kisimik suliakkiissutigineqarsinnaasut.Allannguutissatut siunnersuut aningaasaqarnermut ataatsimiititaliap oqartussaaffiisa annertusitinnissaannut inatsisitigut tunngavissiivoq, ataatsimiititaliat akornanni suliassat naligiinnerusumik agguataarneqarsinnaalissallutik suliassallu kommunimi ataasiakkaami pissusissamisoortutut isigineqarpata aningaasaqarnermut ataatsimiititaliamut inissinneqarsinnaalissallutik.
Nr. 2-mut
Taaguutip "aningaasaqarnermut ataatsimiititaliap" atunngitsoornissaanut siunnersuut periarfissaqartitsinngilaq. Taamaallaat taaguummut tassunga oqaasertassap naleqquttup ilanngutitinnissaanut kommunalbestyrelsi periarfissinneqarpoq. Taaguut "aningaasaqarnermut ataatsimiititaliap" kingornanut inissinneqassaaq, siornanuunngitsoq. Assersuutigalugu aningaasaqarnermut ataatsimiititaliap, siunnersuummi § 21, imm. 2 nr. 5 naapertorlugu, kommunip inuussutissarsiutitigut suliassaasa ingerlatsiviginerat ingerlaannaq suliarisassappagu, "aningaasaqarnermut inuussutissarsiutinullu ataatsimiititaliamik" taaneqarsinnaavoq.