Allakkat pillugit Inatsisartut peqqussutissaat nr. 8, 14. november 2004-meersoq.
Pilersuineq, angallassineq, allakkerineq il.il. pillugit Kalaallit Nunaanni inatsimmi nr. 469-imi, 6. november 1985-imeersumi § 8 aamma § 13 naapertorlugit makku aalajangersarneqarput.
Kapitali 1
Atuuffiit§ 1. POST Greenland TELE Greenland A/S-imut, POST Greenlandip ingerlannissaanik siunertaqarluni ingerlatseqatigiiffimmik pigisaminik pilersitsisinnaasumut ilaavoq.
Imm. 2. POST Greenlandip suliassarai:
1) Kalaallit Nunaanni allakkanik nassiussanillu inuiaqatigiit kalaallit pisariaqartitaannik isumaginnissalluni,
2) sullissinermik ingerlatsiviussalluni, sapinngisamik annertunerpaamik niuernermi tunngaviit atorlugit ingerlatsiviusoq, aamma
3) ingerlatsinerminik inuiaqatigiit kalaallit ineriartornerannut naapertuuttunngorsaassalluni suliassanillu nutaanik allakkanik nassiussanillu suliassanut naleqquttunik tigusisassalluni.
Kapitali 2
POST Greenlandip ingerlatsinera§ 2. POST Greenlandip allakkerinikkut kiffaartuussinerit, § 3 malillugu ingerlateqquneqartut pillugit niuernermi piumasaqaatit nalinginnaasut aammalu suliffimmi atugassiaq najoqqutassiaq suliarissavai. Niuernermi piumasaqaatit ilaatigut tunisassianut kiffartuussinernullu ataasiakkaanut atasumik taarsiinissat aamma tunniussinermi malittarisassat allaaserineqarnerinik imaqassapput. Taarsiissutissat nalingi akiliinermut uppernarsaatini assigisaannilu POST Greenlandip nassiussanik tunniussinerminut atatillugu tunniussaani allassimasassapput.
Imm. 2. Peqqussutit imaluunnit aalajangiussat manna naapertorlugu malittarisassat imaluunniit aalajangiunneqartut POST Greenlandimit aalajangersarneqartut niuernermi piumasaqaatini takuneqarsinnaassapput. Tamannali atunngilaq POST Greenlandip § 5 naapertorlugu aalajangersagaani.
Imm. 3. Niuernermi piumasaqaatit nalinginnaasut kikkunnit tamanit takuneqarsinnaassapput.
Imm. 4. Niuernermi piumasaqaatini nalinginnaasuni annertuutigut allannguisoqarnissaa eqqarsaatigineqarpat, tamanna pillugu siumoortumik Naalakkersuisut ilisimatinneqassapput.§ 3. POST Greenland pisussaavoq nuna tamakkerlugu allakkanik ingerlassinissaminut atatillugu nassiussinerit makku qulakkiissallugit:
1) Allakkat qaatiguuliorneqarsimasut.
2) Aviisit ullormut, sapaatip akunneranut qaammammullu saqqummertartut kiisalu atuagassiat qaatiguuliorneqarsimasut.
3) Poortukkat qaatiguuliorneqarsimasut.
4) Tappiitsunut nassiussat qaatiguuliorneqarsimasut.
Imm. 2. POST Greenland aammattaaq pisussaaffiligaavoq nunap iluani aningaasat allakkerivikkut nassiussat allagartaat ingerlatissallugit.
Imm. 3. Nunap iluani allakkat qaatiguuliorneqarsimasut tammatsaalisatut imaluunniit nalinga nalunaarutigalugu ingerlanneqarsinnaassapput.
Imm. 4. Nunap iluani poortukkat qaatiguuliorneqarsimasut nalinga nalunaarutigalugu ingerlanneqarsinnaassapput.
Imm. 5. Nunat tamalaat akornanni isumaqatigiissutini allannguinerit ataqqillugit, Danmarkimut tassanngaanniillu, Savalimmiunut tassanngaanniilu nunanillu allaniit aammalu nuanut allanut nassiussanik qaatiguuliorneqarsimasunik ingerlassinissamut pisussaaffimmi allakkat, tappiitsunut nassiussat poortukkallu pineqarput.§ 4. Ingerlassinissamut pisussaaffimmi, takuuk § 3, illoqarfimmut nunaqarfimmulluunniit qaninnermut nassiussanik tigusisarneq nassiussanillu assartuisarneq ilaatinneqarput. Allakkanik nalinginnaasunik ingerlassinissamut pisussaafimmut aamma allakkanut nakkartitsisarfinni katersisarneq kiisalu agguaassisarneq ilaatinneqarput, taamaattorli takuuk imm. 2.
Imm. 2. Allakkat nalinginnaasut qanoq annertutigisumik agguaanneqartarnissaat pillugu malittarisassanik pingaarnernik Naalakkersuisut aalajangersaassapput.§ 5. § 1, imm. 2 naapertorlugu nassiussinerit allat suut POST Greenlandimit isumagineqassanersut ingerlatseqatigiiffiup aalajangiiffigisinnaavai.
Imm. 2. Post Greenlandip suliassat allat suliarisinnaavai Post Greenlandip ingerlatsineranut pissusissamisoortumik ilanngunneqarsinnaasut..§ 6. POST Greenland nioqqutissanik eqqussuinermut annissuinermullu Inatsisartut inatsisaat naapertorlugu maleruaqqusallu taakkununnga atasut naapertorlugit nassiussanik nalunaarsuisussaavoq, aammalu eqqussuinermi nakkutilliinermut akitsuutinillu akileeqqusinernut peqataassalluni.
§ 7. Nunat tamalaat akornanni allakkerinermut attuumassuteqartuni Post Danmark A/S-ip POST Greenland sinniisuuffigisinnaavaa.
Imm. 2. Allakkat il. il. nassiussat Kalaallit Nunaata Danmarkillu, Savallimmiullu nunallu akornanni Danmarki aqqusaarlugu imaluunniit toqqaannartumik ingerlanneqartartut pillugit peqqussut una inuiaqatigiit assigiinngitsut isumaqatigiissutaanni Danmarkemit akuersissutigineqarsimasuni Kalaallit Nunaata nunatut sumiinnera eqqarsaatiginagu aalajangersakkat malillugit saneqqunneqarsinnaavoq.
Kapitali 3
POST Greenlandip kisermaassisuunera§ 8. Allakkanik qaatiguuliorneqarsimasunik nunap iluani ingerlassinermut POST Greenland kisermaassisuuvoq, taannalu imatut paasineqassaaq:
1) Imai apeqqutaatinnagit nassiussinerit qaatiguuliorneqarsimasut, taakku allakkap puussaanut assigisaanulluunniit poorneqarsimappata.
2) Allakkatigut nalunaarutit qaatiguuliorneqarsimasut, taakkununnga ilaallutik postkortit, inunnut ataasiakkaanut tunngasunik imallit.
Imm. 2. Kisermaassisuunermut ilaanngillat katalogit, naqitat paasissutissiat, aviisit atuagassiallu nassiussallu allat assigiiaartunik naqitanik imallit, akimut ersittumik poorneqarsimallutik qaatiguuliorneqarsimasut.
Imm. 3. Allakkanik Danmarkimit, Savalimmiunit nunallu allat sinnerinit nassitsisunit nassiunneqartunik, Kalaallit Nunaannut qaatiguuliorneqarsimasunik, Kalaallit Nunaanni sumiiffinnut ingerlassinissamut, aamma allakkanik qaatiguuliorneqarsimasunik nunanut allanut Kalaallit Nunaannit nassitsisunit Danmarkimut, Savalimmiunut nunallu allat sinnerinut qaatiguuliorneqarsimasunik nassiunneqartunik ingerlassinissamut POST Greenland kisermaassisuuvoq.
Imm. 4. Allakkanik qaatiguuliorneqarsimasunik ingerlassinermik kisermaassisuunermut taakkuninnga katersineq, assartuineq agguaassinerlu ilaatinneqarput.§ 9. Kinaluunniit § 8-imi aalajangersakkat malinngikkaluarlugit inatsisinik unioqqutitsinani nasssiussanik POST Greenland avaqqullugu isumaginnissinnaavoq, tamanna angallassineruppat nammineq susassarisanik imaluunniit alla nassiussanik kiffartuutaq atorfeqarfigisaq sinnerlugu.
Imm. 2. Taamaaliortoqarsinnaavortaaq ingerlassineq pippat alla, ingerlassisup qaqutiguinnaq taamatorluinnaq ittumik ingerlassissuttagaa kiffartuullugu.§ 10. Nassiussinerit ataasiakkaat tamarmik POST Greenlandip nassiussinermut pineqartumut akigititai naapertorlugit kalaallit frimærkiutaanik atuuttunik pilersorneqarsimappata, POST Greenland avaqqullugu inatsisit naapertorlugit ingerlanneqarsinnaapput, § 8-imi aalajangersakkat apeqqutaatinnagit.
Imm. 2. Frimærkit imm. 1 naapertorlugu atorneqartut atorunnaarsinneqassapput.§ 11. Allakkat pillugit Nunarsuaq tamakkerlugu isumaqatigiissummi tamanna pillugu malittarisassiat naapertorlugit, POST Greenlandip nassiussat qaatiguuliorneqarsimasut Danmarkimit, Savalimmiunit nunallu allat sinnerinit Danmarkimi, Savalimmiuni imaluunniit nunat allat sinnerini inummit Kalaallit Nunaanni najugaqartumit, imaluunniit Kalaallit Nunaanni najugaqartoq alla sinnerlugu ingerlateqqinneqartussanngorlugit allakkerivimmut tunniunneqarsimasut, Kalaallit Nunaanni tigusisussanut ingerlatassanngortitat itigartitsissutigisinnaavai.
Imm. 2. Itigartitsinissamut piumasaqaatit pillugit malittarisassanik erseqqinnerusunik Naalakkersuisut aalajangersaasinnaapput.§ 12. POST Greenlandip ilisarnaataa Naalakkersuisunit akuerineqarsimasoq Naalakkersuisut akuersiteqqaarnagit allanit atorneqaqqusaanngilaq.
§ 13. Aqqusinerni allaniluunniit kikkut tamarmik aqqutigisinnaasaanni allakkanut nakkartitsisarfinnik inissiinissamut POST Greenland kisermaassisuuvoq.
§ 14. POST Greenland frimærkinik saqqummersitsinissamut kisermaassisuuvoq, taannalu imatut paasineqassalluni; frimærkit POST Greenlandimit saqqummersinneqarsimassapput, POST Greenlandimiillu allakkerinikkut sullissinermut akigititanut akiliinermut atatillugit atorneqartussaallutik.
Kapitali 4
Allakkerinermi isertuussisussaaneq allakkanillu ammaaneq§ 15. Kinaluunniit POST Greenlandimi sulisuusoq, imaluunniit § 20 naapertorlugu ingerlatitseqqiinermik isumaginnittuusoq susassaqanngitsunut kikkunnulluunniit allat allakkerivimmik atuinerannut tunngasunik ilisimatitsisussaanngilaq periarfisseeqqusaananiluunniit taamatut paasissutissanik pissarsinissamut.
Imm. 2. Nipangiussisussaatitaaneq ataannassaaq pineqartoq POST Greenlandimi suliunnaarsimagaluarpalluunniit, imaluunniit § 20 naapertorlugu ingerlatitseqqittarneq unissimagaluarpalluunniit.§ 16. Nassiussat qaatiguuliorneqarsimasut ingerlatassanngorlugit POST Greenlandimut tunniunneqartut, allakkanik tigusisussaq nassiussisimasorluunniit nassaarineqarsinnaatinnagu, eqqartuussivimmit aalajangiinertaqanngitsumik POST Greenlandimit ammarneqarsinnaapput.
Imm. 2. Nassiussat innarlerneqarsimanerisa annertussusiat aalajangerniartillugu nassiussat qaatiguuliorneqarsimasut, POST Greenlandimut ingerlatassanngorlugit tunniunneqartut, aammattaaq eqqartuussivimmit aalajangiinertaqanngitsumik ammarneqarsinnaapput.
Imm. 3. Nassiussat piumasaqaatit suut tunngavigalugit ammarneqarsinnaaneri pillugit Naalakkersuisut malittarisassaliussapput.
Kapitali 5
Ingerlassineq il.il.§ 17. Nassiussinerit qanoq ittuuneri aamma nassiussinerit ataasiakkaat killiligaaneri kiisalu nassiussassat allakkerivikkut ingerlatassanngorlugit tiguneqarnissaannut, aningaasallu allakkerivikkut nassiunneqarnerinut allagartanut piumasaqaatit pillugit POST Greenland malittarisassaliussaaq.
Imm. 2. POST Greenland aamma nassiussassap allakkerivikkut qanoq ilinikkut nassiunneqarsinnaannginnera pillugu malittarisassaliussaaq.§ 18. POST Greenland qinnuigineqaruni poortukkat, nassiussat tammatsaaliukkat, nassiussat nalingi allassimasut aamma aningaasallu allakkerivikkoortitsinissamut akiliutigineqarsimasut tigunerinut uppernarsaammik tunisissaaq.
Imm. 2. Uppernarsaat allaffissiami POST Greenlandimit suliarineqarsimasumi imaluunniit akuerineqarsimasumi nassiussisumit immersorneqassaaq.§ 19. Nassitsisup nassiussamut oqaasissaqarsinnaatitaanera pillugu maleruagassat erseqqinnerusut POST Greenlandip aalajangersassavai.
§ 20. Kalaallit Nunaani imaluunniit Kalaallit Nunaanniit Danmarkimut, Savalimmiunut nunalluunniit allat sinnerinut allakkanik ingerlatassanik angallassisussamik POST Greenland isumaqatigiissuteqarsinnaavoq.
Imm. 2. Pissutsit immikkut ittut peqqutaallutik pisariaqartinneqalerpat, POST Greenlandimiillu piumasaqartoqarneratigut, Kalaallit Nunaani imaluunniit Kalaallit Nunaanniit Danmarkimut, Savalimmiunut nunalluunniit allat sinnerinut aalajangersimasumik ingerlassisuusup, siumut utimullu aqqutigisamiittunit allakkerivinnit paarlaateqatigiiffinniluunniit nassiussassat ingerlannissaannut pisussaaffimmik ilaatinneqartut ilanngullugit tigusinissaa Naalakkersuisut aalajangersinnaavaat..
Imm. 3. Ingerlassineq pillugu Naalakkersuisut erseqqinnerusumik malittarisassaliorsinnaapput imm. 1 aamma 2-mi.§ 21. Nassiussat tunniunneqarneri pillugit POST Greenland malittarisassaliussaaq.
§ 22. Illuni immikkoortuni illunilu uiguleriiaani allakkanik nakkartitsisarfinnik kiisalu inissiarsuarni allakkanik ikisisarfinnik ikkussuussinissaq pillugu Naalakkersuisut malittarisassiussapput.
Imm. 2. Inoqutigiit allakkanik ikisisarfiit pillugit malittarisassanik naammassinninngitsut allakkanik agguaassinermi ilaatinngitsoortinneqarsinnaapput.§ 23. Nassiussat apuunneqarsinnaanngitsut iliuuseqarfigisarnissaat nassiussinernilu tigusassat apuunneqarsinnaanngitsut pillugit POST Greenland malittarisassaliussaaq.
Imm. 2. Nassiussat nioqqutissanik eqqunneqaqqusaanngitsunik imaqartut imaluunniit imaqarsorineqartut, tamakkununnga ilanngullugit nioqqutissat akileraarusigassat kukkunikkut akileraaruserneqarsimanngitsut, POST Greenlandimiit sumiiffimmi oqartussanut eqqortunut tunniunneqassapput.§ 24. Immersugassat frimærkinik allakkap isumagineqarnerani nipititsivigineqarsimasut POST Greenlandip pigisarai.
Kapitali 6
POST Greenlandip sullissinerata akilerneqartarneraAkiliutit
§ 25. Akiliutit POST Greenlandimit aalajangersarneqassapput kikkunnillu tamanit takuneqarsinnaassallutik.
Imm. 2. Poortukkanut, allakkanut aviisinut ullormut, sapaatip akunneranut qaammammullu saqqummersartunut kiisalu atuagassianut Kalaallit Nunaata iluani aamma Danmarkimut Savalimmiunullu nassiussanut akiliutit annertussusissaat Naalakkersuisunit akuersissutigineqassapput.
Imm. 3. Tappiitsunut nassiussat nunap iluani akeqanngitsumik nassiunneqartassapput.§ 26. Akiliutissat naatsorsorneqartarnerannut frimærkileeriaatsinut kiisalu nassiussanut akiliutissat akileraarutissallu akilerneqartarnerannut tunngasut POST Greenlandip aalajangersassavai.
§ 27. Niuertarfinnit frimærkinik tuniniaaneq pillugu POST Greenland ilumini malittarisassanik aalajangersaassaaq.
Kapitali 7
Taarsiissuteqartarneq§ 28. Aningaasanik allakkerivikkut nassiussinermut aamma ingerlassisussaatitaanermut ilaasunik nassiussanik, § 3-mi ingerlassisussaatitaanermut pisussaaffimmi ilaasunik kinguartoornermut atasunik POST Greenland taarsiineq ajorpoq.
Imm. 2. Nassiussanut, ingerlassisussaatitaanermut ilaasunut tammartunut innarlerneqartunullu piffissami nassiussap tiguneqarneraniit tunniunneqarneranut POST Greenland taarsiissuteqartarpoq, taamaattoq takukkit imm. 3, § 29, imm. 1, § 32, aamma § 35, imm. 2.
Imm. 3. Tammartut innarlerneqarsimasulluunniit nassiussisup tungaaniit kukkunermik sumiginnaanermilluunniit peqquteqarpata, nassiussap qanoq issusia, poortorneqannginnera imaluunniit amigartumik poortorneqarsimanera, imaluunniit pissutsit POST Greenlandip avaqqussinnaasimanngisai kingunerilu POST Greenlandip pinngitsoortissinnaanngisai POST Greenlandimit taarsiissuteqarfigineqarneq ajorput.
Nunap iluani nassiussat
§ 29. Allakkanut nalinginnaasunut tammartunut innarlerneqarsimasunullu POST Greenland taarsiineq ajorpoq. Aamma taamaappoq imarisai tamakkiisumik ilaannakuusumilluunniit annaaneqarsimappata.
Imm. 2. Poortukkat nalinginnaasut tammartut innarlerneqarsimasulluunniit, imaluunniit imarisai tamakkiisumik ilaannakuusumilluunniit annaaneqarsimasut, POST Greenlandip annerpaamik aningaasaliiffissatut aalajangersagaata iluani taarsiiffigineqassapput.§ 30. Allakkat ataatsit poortugarluunniit nalinga nalunaarlugu nassiunneqartoq tammarpat innarlerneqarpalluunniit, imarisaaluunniit tamakkiisumik ilaannakuusumilluunniit annaaneqarpat, annerpaamik naligitinneqartutut nalunaarutigineqartoq tunngavigalugu innarlerneqartoq taarserneqassaaq.
§ 31. Allakkat tammatsaaliukkat tammarpata, POST Greenlandip aalajangersagaa naapertorlugu nassiussisoq taarsiiffigineqassaaq.
Imm. 2. Allakkat tammatsaaliukkat innarlerneqarsimappata, imarisaaluunniit tamakkiisumik ilaannakuusumilluunniit annaaneqarsimappata, POST Greenlandip annerpaamik aningaasaliiffissatut aalajangersagaata iluani innarlerneqartoq taarsiiffigineqassaaq.§ 32. Aviisinut ullormut, sapaatip akunneranut qaammammullu saqqummertartunut kiisalu atuagassianut tammartunut innarlerneqartunulluunniit POST Greenland taarsiineq ajorpoq.
Danmarkimut Savalimmiunullu siumut utimullu aammalu nunat allat sinnerinut taakkunanngaanniillu nassiussat
§ 33. Danmarkimut, Savalimmiunut nunallu allat sinnerinut siumut utimullu allakkerivikkut nassiussanut Nunarsuaq tamakkerlugu allakkat pillugit isumaqatigiissummi malittarisassat naapertorlugit taarsiisoqartassaaq.
Imm. 2. Kalaallit Nunaanniit Danmarkimut Savaliummiunut nunanullu allat sinnerinulluunniit nassiussaq tammarpat innarlerneqarpalluunniit, imarisaaluunniit tamakkiisumik ilaannakuusumilluunniit annaaneqarsimappat piffissami ingerlassinermi POST Greenlandimit isumagineqartillugu, nunap iluani nassiusinerit assigalugit taarsiisoqassaaq, nassiussisumut tamanna iluaqutaanerussappat.
Imm. 3. Danmarkimiit, Savalimmiuniit nunallu allat sinneriniilluunniit nassiussaq innarlerneqarpat piffissami ingerlassinermi POST Greenlandimit isumagineqartillugu, nunap iluani nassiusinerit assigalugit taarsiisoqassaaq, nassiussisumut tamanna iluaqutaanerussappat.
Aningaasat allakkerivikkut nassiussat allagartaat
§ 34. Post Greenland aningaasanut aningaasat nassiussat allagartaat atorlugu nassiussassatut tunniunneqarsimasunut inussaannut eqqortumik tunniunneqarnissaasa tungaanut akisussaavoq, nassitsisoq tigusisussarluunniit kukkusimanngippata imaluunniit erseqqinngitsumik paasissutissiisimappata, taamaattorli takuuk § 28, imm. 1 aamma § 35, imm. 2.
Taarsiissuteqarnerup annertussusaa
§ 35. Taarsiissutigineqarsinnaapput taamaallaat tammartup nalinga imaluunniit nassiussap ajoquserneqarnermigut nalikillissutigisimasaa. Taarsiissutissat naatsorsorneqarneranni ajoqusiinerup nalaani pissusiusut tunngavigineqassapput.
Imm. 2. Taarsiisoqassanngilaq iluaqutigisartakkanik iluaqutigisartagaqarunnaarnermut, aningaasat nalikillinerisigut, aningaasanut annaasanut imaluunniit ajoqusiinerup kingunerisaanut allatigut sunniuttartunut allanut.
Imm. 3. Nassiussaq tammarpat taarsiissuteqarnerup saniatigut nassiussap allakkerivikkoortumik isumagineqarneranut akiliut taarsiissutigineqassaaq. Tamannattaaq atuuppoq nassiussaq ajoquserneqarsimappat imaluunniit taassuma imarisai tamarmik imaluunniit imarisaasa ilaat tammarsimappata, tamannalu pissutaasimappat nassiussap utertinneqartariaqarneranut.
Taarsiiffigitissinnaatitaaneq
§ 36. Nassiussanut aningaasanullu tammartunut, aamma nassiussap allakkerivikkoortumik isumagineqarneranut akiliutip utertinneqarnissaa ilanngullugu, POST Greenland taamaallaat taarsiisussaavoq, uppernarsarneqarsinnaappat nassiussat POST Greenlandimut tunniunneqarsimasut, imaluunniit aningaasat POST Greenlandimut akilerneqarsimasut.
§ 37. POST Greenlandip taarsiisussaatitaanera atorunnaassaaq, nassiussap tunniunneqarneraniit imaluunniit aningaasat allakkerivikkut nassiunneqartussatut akilerneqarneranniit ukioq ataaseq qaangiutsinnagu piumasaqaat POST Greenlandimut nalunaarutigineqarsimanngippat.
§ 38. Taarsiineq atorunnaarsitsinermik kinguneqartumik nassiussisumut tunniunneqarsinnaavoq. Nassiussaq tigusisussamit tiguneqarsimappat, taarsiineq atorunnaarsitsinermik kinguneqartumik tassunga tunniunneqassaaq.
Immikkut itummik pisoqartillugu taarsiissuteqartarneq
§ 39. POST Greenland qaqutigut immikkut ittuni ataasiakkaani taarsiisarsinnaavoq taarsiissuteqarnermut malittarisassat nalinginnaasut naapertorlugit POST Greenland taarsiisinnaavoq, taamaaliortassaarlu ajoqusiineq pissutsinik ima immikkut illuinnartigisunik pissuteqarsimappat POST Greenlandip taarsiissuteqartussaaneranik kapitalimi uani aalajangersakkanik atuinissaq naapertuutinngitsutut pissuteqartussatut isumaqarfiginassalluni.
Kapitali 8
Maalaarutit§ 40. POST Greenlandip aalajangiineri Naalakkersuisunut maalaarutigineqarsinnaapput, taamaattoq takuuk imm. 2.
Imm. 2. § 39 naapertorlugu aalajangiinerit Naalakkersuisunut maalaarutigineqarsinnaanngillat.
Imm. 3. Maalaarutinik tunniussinissamut piffissarititaasoq aalajangiinerup maalaarutigineqartup tiguneraniit sapaatit akunnerinik sisamanik sivisussuseqarpoq.
Kapitali 9
Inatsisartut peqqussutaannik unioqqutitsineq§ 41. § 8, imm. 1, 3 aamma 4, §§ 12, 13, 14 aamma 15-imik unioqqutitsinerit Kalaallit Nunaanni pinerluttulerinermut inatsisit malillugit akiliisitsinermik kinguneqarsinnaapput.
§ 42. Maleruaqqusani peqqussut manna naapertorlugu Naalakkersuisunit atortuulersinneqartuni maleruaqqusanik unioqqutitsinermut akiliisitsisarneq pillugu maleruagassat aalajangersarneqarsinnaapput.
§ 43. Ingerlatseqatigiiffik, anpartsselskabi, piginneqatigiiffik assigisaalluunniit unioqqutitsippata, selskabi taamaalluni akiliisitaanermut akisussaatinneqarsinnaavoq. Unioqqutitsineq Namminersornerullutik Oqartussanit, kommunimit imaluunniit kommunit suleqatigiiffiannit, kommunalbestyrelsit nunaqarfinnilu aqutsisut il.il. pillugit Inatsisartut inatsisaanni § 64-imi ilaatinneqartumit piliaasimappat, Namminersornerullutik Oqartussat, kommunalbestyrelsi imaluunniit kommunit suleqatigiiffiat akiliinissamut akisussaatinneqarsinnaapput.
Kapitali 10
Atortuulersitsinermik aalajangersagaq§ 44. Inatsisartut peqqussutaat atortuulissaaq januaarip aallaqqaataani 2005-imi.
Imm. 2. Tamatunnga peqatigitillugu Kalaallit Allakkeriviat pillugu Inatsisartut peqqussutaat nr. 15 30. oktober 1992-imeersoq aammalu Kalaallit Allakkeriviat pillugu Inatsisartut peqqussutaata nr. 7, 6. juni 1997-imeersup allannguutaa atorunnaarsinneqarput.
Namminersornerullutik Oqartussat, ulloq 14. november 2004
Hans Enoksen/
Jens NapãtôK’
Akissuteqaat (Aappassaaneerinninneq)