3. august 2004
UKA 2004/33
Allakkat pillugit Inatsisartut peqqussutissaannut siunnersuut
(Ineqarnermut, Attaveqaqatigiinnermut Avatangiisinullu naalakkersuisoq)
Saqqummiussissut.
Siullermeernera.
Matumuuna Naalakkersuisut sinnerlugit allakkat pillugit Inatsisartut peqqussutissaannut siunnersuut saqqummippara.
Post Greenland TELE Greenlandip ataani niuerfiuvoq Kalaallit Nunaannilu allakkerinermik ingerlatsineq isumagisaralugu Kalaallit Nunaanni Allakkeriveqarneq pillugu Inatsisartut peq-qussutaat naapertorlugu. 1997-imi Kalaallit Nunaanni Allakkeriveqarfik KNI Pilersuisumiit TELE Greenlandimut tunniunneqarpoq. Tamatumunnga tunngatillugu allakkerineq pillugu inatsit nutarterneqanngilaq, sivisuatsiaamilli inatsisip nutarternissaa pisariaqarsimavoq.
Siunnersuummi paragraffit tamaasa samminianngilakka aalajangersakkalli ataasiakkaat malugeqqussallugit.
Pingaartumik peqqussummi atuuttumi § 21 maluginiagassaavoq. Aalajangersakkap taassuma TELE Greenland piginnaatippaa Air Greenland imaluunniit Arctic Umiaq Line allakkanik nassataqarnissaanik peqqussallugit. Aalajangersakkami TELE Greenland piginnaatinneqarportaaq angallassinermi tamatumani atugassarititaasut aalajangersarnissaannut. Aalajangersakkami POST Greenland iluaqutissaminik inissinneqarpoq, tamannalu illuatungeriit akerleriinnerannik kinguneqareersimavoq.
Maannakkut siunnersuutikkut Naalakkersuisut erseqqissarpaat aallaqqaatigalugu nammineq piumassutsimik isumaqatigiissuteqarnissaq anguniarneqartassasoq. Illuatungeriit isumaqatigiissinnaatinnagit Naalakkersuisut angallassisartut peqqusinnaavaat allakkat nassartassagaat tamatumanilu atugassarititaasut aalajangerlugit.
Siunnersuummi siunnersuutigineqarportaaq allakkanik ikisivinnik nivinngaanissaq pillugu aalajangersagaqassasoq POST Greenlandimut ajornannginnerussammat allakkat sumukarfiannut apuuttarnissaat.
Siunnersuummi aalajangiusimaneqarpoq Naalakkersuisut Danmarkimut Savalimmiunullu akit akuerisassagaat. Tamatumunnga pissutaavoq allakkat Kalaallit Nunaanneersut amerlanersaat Naalagaaffeqatigiinnerup iluani ingerlasarmata.
Tamatuma saniatigut siunnersuutikkut taarsiissuteqartarneq pillugu malittarisassat Nunarsuaq tamak-kerlugu allakkat pillugit isumaqatigiissummut nunat killeqarfii akimorlugit nassiussisarnermik nunani tamani ajornannginnerulersitsisumut naapertuuttunngortinneqarput. Tamatuma saniatigut naasiussanut ataasiakkaanut taarsiisussaatitaaneq ersarissarneqarpoq.
Taamatut oqaaseqarlunga allakkat pillugit Inatsisartut peqqussutissaannut siunnersuut akuer-saartumik suliarillaqullugu suliassanngortippara.