Ukiumut aningaasanut inatsiseqarfiusumut 2004-mut Inatsisartut aningaasanut inatsisigigallaattut Inatsisartut inatsisaat nr. 16, 10. november 2003-imeersoq
§ 1. Ukiumut aningaasanut inatsiseqarfiusumut 2004-mut Inatsisartut aningaasanut inatsisaata akuersissutigineqarnissaata tungaanut akileraarutit inatsisitigut tunngavillit akilersinniarnissaannut Namminersornerullutillu Oqartussat aningaasatigut isertitaasa allat pigiinnarnissaannut Naalakkersuisut piginnaatinneqarput. Piffissap tamatuma iluani Naalakkersuisut aningaasartuutit Naalakkersuisut, sullissiveqarfiit suliffeqarfiillu ingerlatiinnarneqarnissaannut pisariaqartinneqartut kiisalu suliniutit allat inatsimmik, siornatigut aningaasanut inatsimmik imaluunniit aningaasaliissutitut tunniunneqartut allat akilernissaannut piginnaatinneqarput.
§ 2. Nunamut tamarmut akileraarutip procentia allannguuteqartinnagu 11%-iussasoq aalajangiunneqarpoq. Nunamut tamarmut immikkut akileraarutip allannguuteqartinnagu 24 %-iuinnarnissaa aalajangiunneqarpoq. Kalaallit Nunaannut assartuinermi assigiimmik akeqartitsinermut akitsuut allannguuteqartinnagu 0%-iussasoq aalajangiunneqarpoq. Sulisitsisut inuussutissarsiutinik ilinniartitaanermut akileqaataassutaannut procenti allannguuteqartinnagu 0,9%-iussasoq aalajangiunneqarpoq.
§ 3. Taakkua saniatigut Naalakkersuisut aningaasartuutit makkua akilernissaannut piginnaatinneqarput:
1) Inatsisartut Aningaasaqarnermut Ataatsimiititaliaata akuersissuteqareerneratigut sanaartugassanut pilersaarutit 7,8 mio. kr.-it tikillugit aningaasartaqartut pilersaarusiorlugit aallartinneqarnissaat.
2) Inatsisartut Aningaasaqarnermut Ataatsimiititaliaata akuersissuteqareerneratigut iluarsagassatut suliassatut pilersaarutit 5,0 mio. kr.-it tikillugit aningaasartaqartut pilersaarusiorlugit aallartinneqarnissaat.
3) Inatsisartut Aningaasaqarnermut Ataatsimiititaliaata akuersissuteqareerneratigut sanaartugassatut pilersaarutinut aallartinneqareersunut aningaasartuutaanerusussat 7,7 mio. kr.-it tikillugit aningaasartaqartut.
4) Inatsisartut Aningaasaqarnermut Ataatsimiititaliaata akuersissuteqareerneratigut iluarsagassatut suliassatut pilersaarutinut aallartinneqareersunut aningaasartuutaanerusussat 8,0 mio. kr.-it tikillugit aningaasartaqartut.
5) Inatsisartut Aningaasaqarnermut Ataatsimiititaliaata akuersissuteqareerneratigut iluarsagassatut suliassatut pilersaarutit 2003-mut inatsisartut aningaasanut inatsisaanni kontumi pingaarnermi 80.00.80-imi, Aningaasat pilersaarusiornerit aallartinnissaannut sillimmatit aamma kontumi pingaarnermi 90.00.80-imi, Aningaasat iluarsagassat pilersaarusiorneqarnissaannut sillimmatit, pilersaarusiornermut aningaasaliissuteqarfigineqarsimasut aallartinneqarnissaannut.
6) Inatsisartut Aningaasaqarnermut Ataatsimiititaliaata akuersereerneratigut piginneqatigiilluni inissialiortiternermut, 10/40/50 atorlugu sanaartornermut, kommuninit attartortittagassanik inissialiortiternermut tapersiiffigineqartartumut boligstøttemiillu taarsigassarsisitsisarnermut 118,5 mio. kr.-inik tapersiissuteqarnissamik neriorsuuteqarnissamut.§ 4. Inatsit 1. januar 2004-mi atuutilerpoq.
Namminersornerullutik Oqartussat, ulloq 10. november 2003
Hans Enoksen/
Josef Motzfeldt