Inatsisissatut siunnersuummut nalinginnaasumik nassuiaatit

Ukiumut aningaasanut inatsisip atuuffianut 2004-mut Aningaasat Inatsisissaannut Inatsisartut inatsisaannut siunnersuutit ulloq 15. november Missingersuusiornermut inatsimmi ukiumut aningaasanut inatsisip atuuffissaanut tullermut akuersissuteqarnissamut piffissaliunneqartoq nallertinnagu naammassillugit suliarineqarnissaat ilimagineqanngilaq. Taamaaqataanik Aningaasarsianit akileraarutit pillugit inatsimmi nuna tamakkerlugu akileraarutinut aammalu nuna tamakkerlugu immikkut akileraarutinut akileraartarnermut procentip aalajangerneqarfissaatut piffissaliunneqartoq atuuppoq. Tamatuma kingunerisaanik aammalu 2004-mut aningaasaliissutinut inatsisip Inatsisartut 2004-mut aningaasanut inatsimmik akuersissuteqareersimanissaat tunngavigalugu atugassanngortitsisoqarnissaanik pisariaqartitsinerup kingunerisaanik, Inatsisartut Naalakkersuisullu pillugit Inatsisartut inatsisaanni § 23, imm. 3 naapertorlugu ukiumut aningaasanut inatsisip atuuffissaanut aggersumut inatsisartut aningaasaliissuteqarnissamut inatsisissarigallagaattut siunnersuut saqqummiunneqarpoq.

Inatsisartut 2004-mut aningaasaliissuteqarnissamut inatsisissarigallagaanni siunertarineqarpoq pingaartumik suliassaqarfinni 2004-mut Inatsisartut aningaasanut inatsisissaata akuersissutigineqareersimanissaa pitinnagu 2004-mut aningaasaliissutinut inatsimmit Naalakkersuisut atugassanngortitsinissaminnut piginnaatinneqarnissaat. Tamanna pingaartumik akileraarutinut suliassaqarfimmut atuuppoq, tamatumani siumoortumik akissarsisartut eqqarsaatigalugit ukiumut aningaasanut inatsisip atuuffianut akileraarutinut procentiliussat Inatsisartunit akuersissutigineqartut tunngavigalugit siumoortumik atugassanngortitsisoqarnissaanut pisariaqartitsisoqarluni.

Tamatuma saniatigut siunnersuutikkut siunertarineqarpoq Namminersornerullutik Oqartussat akornusersorneqaratik sulinerminnik ingerlatitseqqinnissaattut suut taaneqarsinnaanersut. Naatsorsuutigineqarpoq aningaasatigut isertitassat pissarsiarineqarsinnaassasut aningaasartuutillu akilerneqarlutik 2003-mut aningaasaliissutit amerlassusiat aallaavigalugu.

Naatsorsuutigineqarpoq Aningaasaqarnermut Nunanullu allanut tunngasunut Naalakkersuisoq 2004-mut Inatsisartut aningaasaliissuteqarnissamut inatsisigigallagaata ataani atugassanngortitsinerit pillugit kaajallaasitaliussasoq.

Inatsimmi aalajangersakkat atorunnaassapput ukiumut aningaasanut inatsisip atuuffianut 2004-mut Inatsisartut aningaasanut inatsit akuersissutigippassuk.

 

Aalajangersakkanut ataasiakkaanut nassuiaatit

§ 1-imut

Aalajangersakkami Naalakkersuisut piginnaatinneqarput Namminersornerullutik Oqartussat akornusersorneqaratik sulinerminnik ingerlatitseqqinnissaattut suut taaneqarsinnaanersut. Naatsorsuutigineqarpoq aningaasatigut isertitassat pissarsiarineqarsinnaassasut aningaasartuutillu akilerneqarlutik 2003-mut aningaasaliissutit amerlassusiat aallaavigalugu.

Aalajangersakkami siumut eqqarsaatigineqarpoq Inatsisartut 2004-mut Inatsisartut aningaasat inatsisaannik akuersissuteqarsimanngimmata, tamatumani akileraarutinut akitsuutinullu procentiliussassat, Inatsisartunit akuersissutigineqartut imaluunniit Inatsisartut 31. december 2003 nallertinnagu 2004-mut aningaasanut inatsisip akuersissuteqarnissaat tunngavigalugit.

 

§ 2-mut

Aalajangersakkami Naalakkersuisut piginnaatinneqarput akileraarutit akitsuutillu procentiliussassatut taaneqartut malillugit akilersinniarnissaannut. Procentiliussassat procentiliussanut Inatsisartut 2003-mut Inatsisartut aningaasanut inatsisaanni akuersissutigisimasaannut naleqqiullugit allannguuteqanngillat.

 

§ 3-mut

Aalajangersakkami Naalakkersuisut piginnaatinneqarput Namminersornerullutik Oqartussat akornusersorneqaratik sulinerminnik ingerlatitseqqinnissaannut malitsigitinneqartussat saniatigut siunertanut erseqqinnerusumik aalajangersarneqartunut aningaasartuutinik akiliinissaannut. Aalajangersakkami 2004-mut Inatsisartut aningaasanut inatsisissaata aatsaat 31. december 2003-mi akuersissutigineqarnissaata kinguneranik Namminersornerullutik Oqartussat sanaartugassanut aningaasaliissutaanni kinguaattooruteqannginnissaq pingaartumik siunertaavoq. Piginnaatitsissummi Inatsisartut Aningaasaqarnermut Ataatsimiititaliaata aningaasaliissutinik akuersissuteqarnissaa naatsorsuutigineqarpoq.

Sanaartornermik suliassaqarfimmi suliassatut pilersaarutit aallartinneqarnissaannut aningaasaliissutit kontumi pingaarnermi 80.00.80-imi, Aningaasat suliniutinik aallartitsinissamut sillimmatit, tunniunneqassapput atugassanngortitsinerlu Inatsisartut Aningaasaqarnermut Ataatsimiititaliaata akuersissuteqarneratigut pissalluni.

Iluarsaassinermik suliassaqarfimmi suliassatut pilersaarutit aallartinneqarnissaannut aningaasaliissutit kontumi pingaarnermi 90.00.80-imi, Iluarsagassat pilersaarusiorneqarnerisa aallartinneqartarnissaannut immikkoortitat, tunniunneqassapput atugassanngortitsinerlu Inatsisartut Aningaasaqarnermut Ataatsimiititaliaata akuersissuteqarneratigut pissalluni.

Sanaartugassatut pilersaarutitut suliassanut aallartinneqartussanut aningaasartuutaanerusunut aningaasaliissutit kontumi pingaarnermi 80.00.01-imi, Nuussinissamut sillimmatit, tunniunneqassapput atugassanngortitsinerlu Inatsisartut Aningaasaqarnermut Ataatsimiititaliaata akuersissuteqarneratigut pissalluni.

Iluarsaassinermik suliassaqarfimmi suliassatut pilersaarutinut aallartinneqartunut aningaasaliissutit kontumi pingaarnermi 90.00.01-imi, Nuussinissamut sillimmatit, tunniunneqassapput atugassanngortitsinerlu Inatsisartut Aningaasaqarnermut Ataatsimiititaliaata akuersissuteqarneratigut pissalluni.

Kontukkut pingaarnikkut 80.00.80-ikkut aamma 90.00.80-ikkut 2003-mut Inatsisartut aningaasanut inatsisaanni suliassatut pilersaarutinut suliassatut pilersaarutinut siunnersuutitalinnut aningaasaliissutit missingersuusianik B-nik ilallit ilanngunneqarput. Pingaartuuvoq suliassatut pilersaarutit nutaat piffissami eqqortumi sulisussarsiuunneqassappata, tassa imaappoq martsip aprilillu qaammataanni. Taamaattumik pisariaqarpoq suliassatut pilersaarusiorneq 2004-p aallartinneraniit nangeqqinneqassappat. Suliassatut pilersaarutinut kontuni suliamut tunngassuteqartuni aningaasaliissutit Inatsisartut Aningaasaqarnermut Ataatsimiititaliaata akuersissuteqarneratigut tunniunneqassapput.

Piginneqatigiilluni inissialiornermut tapiissuteqarnissamik neriorsuutit kontumi pingaarnermi 89.72.15-imi, Piginneqatigiilluni inissiat tapiissuteqarfigineqartut, aningaasaliiffigineqarput. 10/40/50 atorlugu sanaartornermut tapiiffigineqarnissamik neriorsuutit kontumi pingaarnermi 89.72.19-imi, 10/40/50 atorlugu sanaartorneq, aningaasaliiffigineqarput. Kommunit attartortittagaliornerannut tapersersukkamut tapiissuteqarnissamik neriorsuutit kontumi pingaarnermi 87.72.21-mi, Kommunit attartortittagaliornerat tapersersugaq, aningaasaliissutitigut tunniunneqassapput. Boligstøttemit taarsigassarsinissamik neriorsuutit kontumi pingaarnermi 89.72.20-mi, Boligstøtte, Nammineq illuliat toqqaviinut innaallagissatigullu ikkussukkanut taarsigassarsiat, aammalu kontumi pingaarnermi 99.72.20-mi, Boligstøtte, nutarterinermut taarsigassarsiarititat immikkullu aserfallatsaaliineq, aningaasaliissutinit tunniunneqassapput. Aningaasaliissutit Inatsisartut Aningaasaqarnermut Ataatsimiititaliaata akuersissuteqarneratigut tunniunneqassapput.

 

§ 4-mut

Inatsisartut inatsisaat 1. januar 2004-mi atuutilerpoq.