Sisimiut, Kangerlussuup Maniitsullu eqqaanni assartuutit motorinik ingerlatillit atorneqarneri pillugit Namminersornerullutik Oqartussat nalunaarutaat nr. 5, 25. maj 1999-imeersoq.
Avatangiisit innarlitsaaliorneqarnissaannik inatsisartut peqqussutaanni nr. 12, 22. december 1988-imeersumi, inatsisartut peqqussutaatigut nr. 7, 13. maj 1993-imeersukkut aamma inatsisartut peqqussutaatigut nr. 14, 31. oktober 1996-imeersukkut allanngortinneqartumi, § 7 b, imm. 1 aamma § 46, imm. 2 naapertorlugit aalajangersarneqarpoq:
Kapitali 1.
Atuuffissai il.il.
§ 1. Sisimiut, Maniitsullu kommuniini kiisalu Kangerlussuup eqqaani kommunit
aggornerisa avataanniittumi nunaannarmi pinngortitap avatangiisillu illersorneqarnissaat
eqqarsaatigalugu assartuutit motorillit sumi atorneqarsinnaaneri pillugit malittarisassat
nalunaarummi uani aalajangersarneqarput.
Imm. 2. Nunaannaat nalunaarummi uani tassaatinneqarput sumiiffiit kommunit
illoqarfinnut nunaqarfinnullu pilersaaruteqarfigisaasa avataanniittut kiisalu
akuerisaasunik nunaannarnut pilersaaruteqarfigineqanngitsut. (nunaannaat pillugit
pilersaarut)
Imm. 3. Kangerluit sikuutillutik nunaannarmiittutut naatsorsuunneqassapput.
Imm. 4. Sumiiffik pineqartoq tassaavoq avannamut Sisimiut Kommuniata avannamut
killinganiit kujammut Maniitsup Kommuniata kujammut killerpiaa - tak. nunap assinga ilanngussaq 1.
Imm. 5. Nunat assingi ilanngussat 1 - 3 sumiiffiit
assartuutit motorillit atorneqarsinnaaffiinik takutitsisuupput.
§ 2. Assartuutit nalunaarummi uani tassaatinneqarput:
1) qamutit motorillit suulluuniit, sikumi, apummi, qaqqani kiisalu nunap ilusaani allani
allanngortinneqanngitsuni atugassatut sanaat taakkunaniluuniit atorneqartartut, kiisalu
2) angallatit motorillit suulluuniit kuunni tatsinilu imeqarfiit eqqaanni naalakkersuisut
matusaasa iluini angalanermut atorneqartut.
Imm. 2. Angallavigineqarsinnaatitaasut nalunaarummi uani tassaatinneqarput aqqutit
nunap assingini ilanngussani 1-3-imi takutinneqartut 100 meterisut silitsigisut
assartuutinik motorilinnik angallavigineqarsinnaasut.
Imm. 3. Sumiiffiit motorilinnit angallavigineqarsinnaasut nalunaarummi uani
tassaatinneqarput sumiiffiit assartuutinik motorilinnik angallavigineqarsinnaasutut
akuerisat.
Kapitali 2.
Angallannermut ataatsimut aalajangersakkat.
§ 3. Nalunaarummi uani angallavigineqarsinnaatitaasutut taaneqartut kiisalu
sumiiffiit, motorilinnik angallavissatut immikkoortitaasut avataanni motorilinnik
angalaneq inerteqqutaavoq.
Imm. 2. Aqqusinerni, unittarfinni assigisaannilu tamanut naatsorsuussani
angallanneq inatsisini allani malittarisassaqartinneqarpoq, taamaammallu nalunaarummi uani
pineqarani.
Imm. 3. Naalakkersuisut kommunillu avatangiisinik pinngortitamillu
nakkutilliillutik angalaneri, annaassiniarnerit, politiit misissuineri assigisaallu
nalunaarummi uani pineqanngillat.
§ 4. Imeqarfiit eqqaanni sumiiffinni matusani angallassissutinik motorilinnik atuineq tamarmi inerteqqutaavoq.
§ 5. Tamanna pisariaqartutut isigineqarpat kommunalbestyrelsit angallavigineqarsinnaatitaasunik kiisalu sumiiffinnik motorilinnit angallavigineqarsinnaasunik nalunaaqutsersuisitsisinnaapput.
Sumiiffinni angallavissiarineqartuni angalanermut maleruaqqusat
§ 6. Nunami angalasoqarsinnaavoq
1) nuna imermik unerarfigineqanngippat kiisalu ima qajannaatsigippat nuna naasullu
ajoquserneqartussaanatik, kiisalu
2) nuna qerisimappat naasullu apummit 20 cm-iteriusumit, aputip naqigutap 7 cm-iusup nunap
qaaniit uuttukkap taamaaqataanik, qallersimappata.
Imm. 2. Nuna angallavigineqarunnaassaaq aput illersuutaasoq peeruppat kiisalu
issangiarneratigut aattornerup nalaani nunalluuniit aqilinerata nalaani.
Imm. 3. Angalanermi nuna naasunut aseruutaasinnaasumik
sangupiloorfigineqassanngilaq. Kiisalu orpikkat masarsuttallu aqqusaarneqassanngillat.
Imm. 4. Kuuit sinaat uingarnillu kiisalu tatsit killingi, kuuit annerit kiisalu
kangerluit ajornanngippat ikaarneqartassapput naasut nunallu
ajoquserneqarfissarinngisaasigut.
Imm. 5. § 6, imm. 1-imi aalajangersakkat immap sikuani angallannermut
atuutinngillat.
Kapitali 3.
Immikkut akuersissuteqartarnerit
§ 7. Inuussutissarsiorlutik angalasut § 3, imm. 1-imi aalajangersakkanit
atuutitsivigineqannginnissaannik naalakkersuisut immikkut akuersissuteqarsinnaapput.
Imm. 2. Imm. 1 naapertorlugu immikkut akuersissutit sivisunerpaamik ukiumut
ataatsimut atuuttussanngortinneqartassapput.
Imm. 3. Kattuffiit peqatigiiffiillu inuussutissarsiortut sinnerlugit imm. 1
naapertorlugu immikkut akuersissuteqartoqarnissaanik qinnuteqarsinnaapput.
§ 8. Angallavigineqarsinnaasut sumiiffiillu nalunaarummi uani taaneqartut avataanni angalanissamut naalakkersuisut immikkut akuersissuteqarsinnaapput soorlu ilisimatuutut sulianut, sulianut inuussutissarsiornermut tunngassuteqartunut, timersornikkut aaqqissuussinernut, nerisassanik angallassinernut imaluuniit allanik inuiaqatigiit eqqarsaatigalugit pisariaqartunik patsiseqartunut.
§ 9. §§ 7 aamma 8 malillugit immikkut akuersissuteqarfigineqarnissamik
qinnuteqaat allakkatigoortuussaaq, kiisalu makku pillugit paasissutissanik imaqassalluni:
1) Inuit immikkut akuersissummi ilaatinneqartut tamarmik aqqi
2) Immikkut akuereqqunermut pissutaasut
3) Nunap assingini pineqarsinnaasuni annerpaani angallavigineqartussatut pilersaarfiit
titartakkat kiisalu angallavigineqartussat qanoq akulikitsigisumik
angallavigineqartarnissaat
4) Assartuutit amerlassusaat suussusaallu
5) Piffissaq immikkut akuersissuteqarfigineqartussaq kiisalu
6) Paasissutissat allat naalakkersuisut suliamik suliarinninnerannut
pingaaruteqarsinnaasut.
Imm. 2. Angalanissaq qaammammik ataatsimik sioqqullugu qinnuteqaat nassiunneqassaaq
Imm. 3. Naalakkersuisut immikkut akuersissuteqarnermi naleqqussorineqartunik
piumasaqaateqarsinnaapput.
Imm. 4. §-it 7 aamma 8 naapertorlugit immikkut akuersissutigineqartut
naalakkersuisunit qaqugukkulluunniit allanngortinneqarsinnaallutilluunniit
atorunnaarsinneqarsinnaapput immikkut akuersissuteqarnermi piumasaqaatigineqartut
unioqqutinneqarpata imaluuniit naalakkersuisut isumaat naapertorlugu pinngortitaq
avatangiisillu ajoquserneqartillugit.
§ 10. Kapitali manna naapertorlugu aalajangiinerit tamarmik kommunit pineqartut tusarniaavigineqareernerisigut pisassapput.
Kapitali 4.
Nakkutilliineq il.il.
§ 11. Kommunalbestyrelsit nalunaarummi uani malittarisassat malinneqarnersut
nakkutigissavaat.
Imm. 2. Kommunalbestyrelsit angallavissani sumiiffinnilu nalunaarummi uani
taaneqartuni angalanernik inerteqquteqarsinnaapput peqqussuteqarsinnaallutillu § 6, imm.
1 aamma 2-imi angalanermut maleruaqqusat piffissap ilaani naammassineqanngikkaanngata.
Imm. 3. Peqqussutit tassaasinnaapput angallaviit aalajangersimasut
atorneqarnissaannik piumasaqaatit.
Imm. 4. Inerteqqutit tassaasinnaapput sumiiffinni aalajangersimasuni piffissami
aalajangersimasumi angallannerup tamarmi unitsinneqarnissaanik piumasaqaatit.
Imm. 5. Nakkutilliinermut atortitsinermullu Avatangiisit
innarlitsaaliorneqarnissaat pillugu inatsisartut peqqussutaanni nr. 12, 22 december
1988-imeersumi, inatsisartut peqqussutaasigut nr. 7, 13. maj 1993-imeersukkut
allanngortinneqartumi, kapitali 4-imi § 44, imm. 2-imi malittarisassat aamma atuupput.
§ 12. Nalunaarut manna naapertorlugu aalajangikkat tamarmik Avatangiisit innarlitsaaliorneqarnissaat pillugu inatsisartut peqqussutaanni kapitali 10-mi malittarisassat naapertorlugit naammagittaalliutigineqarsinnaapput.
Kapitali 5.
Pineqaatissiinerit atuutilernissaanullu aalajangersakkat.
§ 13. Uku akiliisussanngortinneqarsinnaapput:
1) § 3, imm. 1-imik, § 4, imm. 1 aamma 2-imik kiisalu § 6, imm. 1-4-imik
unioqqutitsisut
2) § 11, imm. 2 naapertorlugu peqqussutinik inerteqqutinillu uniuisut
3) § 9, imm. 3 naapertorlugu piumasaqaatigineqartunik malinninngitsut.
§ 14. Aktiaateqarluni piginneqataassuteqarlunilluunniit ingerlatseqatigiiffik, piginneqatigiilluni ingerlatseqatigiiffik (piginneqatigiiffik) assigisaaluunniit unioqqutitsisuuppat ingerlatseqatigiiffik inatsisini taama isigineqarnini naapertorlugu akiliisussanngortinneqarsinnaavoq. Namminersornerullutik Oqartussat, kommunit imaluuniit kommunit suleqatigiiffiat unioqqutitsisuuppata Namminersornerullutik Oqartussat, kommunit kommunilluuniit suleqatigiiffii taamaannermissut akiliisussanngortinneqarsinnaapput.
§ 15. Nalunaarut manna ulloq 15. juni 1999 atuutilerpoq.
Namminersornerullutik Oqartussat, ulloq 25. maj 1999.
Alfred Jakobsen
/
Søren Hald Møller
Ilanngussaq 1 nunap assiga: (Asseq tooruk allisillugu takussagukku)
© KMS, ASIAQ-mi suliarineqarpoq
Ilanngussaq 2 nunap assiga: (Asseq tooruk allisillugu takussagukku)
© KMS, ASIAQ-mi suliarineqarpoq
Ilanngussaq 3 nunap assiga: (Asseq tooruk allisillugu takussagukku)
© KMS, ASIAQ-mi suliarineqarpoq