Inatsisartut inatsissaat nr. 10, 30. oktober 1998 Kalaallit Nunaanni Inatsisartunut qinersisarneq pillugu Inatsisartut inatsisaata allannguutaa.
§ 1.
Kalaallit Nunaanni Inatsisartunut qinersisarneq pillugu Inatsisartut inatsisaanni nr. 9-mi, 31. oktober 1996-imeersumi makku allannguutigitinneqassapput:
1. § 5 ima oqaasertalerneqassaaq:
"§ 5. Inatsisartut 31-inik ilaasortaqassapput. Kalaallit Nunaat Inatsisartunut qinersiviuvoq ataaseq."2. § 10, imm. 1 ima oqaasertalerneqassaaq:
"Qinersinermik siulersuisut § 7, imm. 3 naapertorlugu Qinersinermut Ataatsimiititaliamit nalunaarfigineqarsimanertik naapertorlugu piffissaq taasiffissaq piaarnerpaamik nalunaarutigissavaat. Tamatumunnga peqatigitillugu nalunaarutigineqassapput taasiartorfissat ataasiakkaat inuillu taasiartorfissani ataasiakkaani taaguinermik siulersuisussatut toqqarneqarsimasut aqqi kiisalu qinigassanngortitanik nalunaarutiginninnissamut killiliussaq."3. § 13, imm. 1-imi "Inatsisartunut qinersivimmi ataatsimi" aamma "Inatsisartunut qinersivimmi" peerneqassapput.
4. § 13, imm. 2 ima oqaasertalerneqassaaq:
"Imm. 2. Partiip ataatsip qinerneqartussat marloriaataat amerlanerpaamik qinigassanngortissinnaavai."5. § 14, imm. 1-imi aamma imm. 3-mi "Inatsisartunullu qinersivimmi" aamma "Inatsisartunut qinersivimmi ataatsimi" peerneqassapput.
6. § 15-imi "Inatsisartunut qinersivimmi" peerneqassapput.
7. § 16, imm. 1 ima oqaasertalerneqassaaq:
"Kinaluunniit partiinut ataatsimit amerlanerusunut qinigassanngortissinnaanngilaq imaluunniit partiimut qinigassanngortiitigaluni partiit avataanni qinigassanngortissinnaanani."8. § 16, imm. 3 ima oqaasertalerneqassaaq:
"Kinaluunniit qinigassanngortittunut ataatsimit amerlanerusunut qinigassanngortitsisuusinnaanngilaq."9. § 18, imm. 3-mi "Inatsisartunut qinersivinni ataasiakkaani" aamma "Inatsisartunut qinersivinni" perneqassapput.
10. § 19-imi "Inatsisartunut qinersivimmi" peerneqassaaq.
11. § 23 ima oqaasertalerneqassaaq:
"§ 23. Inatsisartunut qinersivik, kommunalbestyrelsinut, nunaqarfinni aqutsisunut ilagiillu sinniisaannut qinersisarnerit pillugit inatsisartut inatsisaanni § 5 naapertorlugu, kommuninut taasiartorfinnullu aggorneqarsimavoq.
Imm. 2. Inoqarfiit kommunit aggornerisa avataanniittut Nuup kommuniani qinersiartorfittut naatsorsuunneqassapput.
Imm. 3. Qinersisussat allattorsimaffiat kommuninut tamanut immikkut suliarineqassaaq. Kommuni taasiartorfinnut aggorneqarsimappat qinersisussat allattorsimaffiat taasiartorfinnut tamanut immikkut suliarineqassaaq.
Imm. 4. Qinersisussat allattorsimaffianniissapput qinersisartut aqqi aamma qinersisartut ulloq inuuffiat kiisalu qinersisartut aqqinik krydsiliiffissaq."12. § 24, imm. 1-imi "qinersivimmi" imm. 2-milu "qinersiviup iluani" "kommunimi"-nngortinneqassapput.
13. § 26, imm. 2-mi aamma imm. 3-mi "Inatsisartunut qinersivimmi" aamma "Qinersivimmi ataatsimi" peerneqassapput.
14. § 28, imm. 2-mi "Inatsisartunut qinersivimmi" peerneqassaaq.
15. § 33, imm. 1, oqaaseqatigiit aappaat ima oqaasertalerneqassaaq:
"Qinersisartup allanit isigineqarani pappiara taasivik erngerluni immersussavaa partiip qinigassanngortitsisimasup arlaata aqqa imaluunniit qinigassanngortissimasut arlaata aqqa allallugu."16. § 38, imm. 4-mi "qinersivimmi" peerneqassaaq.
17. § 39, imm. 2, nr. 5 ima oqaasertalerneqassaaq:
"5) pappiarami taasivissami taamaallaat inuup qinigassanngortissimanngitsup aqqa allanneqarsimappat imaluunniit taamaallaat partiip qinigassanngortitsisimanngitsup aqqa allanneqarsimappat."18. § 42, imm 2-mi aamma § 49 -mi "qinersivinni" "kommunimi"-nngortinneqassaaq.
19. § 43, imm. 1 ima oqaasertalerneqassaaq:
"Qinersinermut Ataatsimiititaliap qinersinermik siulersuisunit inernerit tigoreerunigit qinersinerup tamakkerluni inernera naatsorsussavaa. Qinersinermik siulersuisuniit naatsorsuinerup tamakkiisumik inerneri tiguneqarsimanngikkaluarpataluunniit atortussat tigummineqartut malillugit paasissutissat amigaataasut qinersinerup inerneranut sunniuteqartussaanngippata Qinersinermut Ataatsimiititaliaq naatsorsuisinnaavoq."20. § 43, imm. 2-mi aamma imm. 3-mi peerneqassapput: "inatsisartunut qinersivimmi pineqartumi" aamma "qinersivimmi".
21. § 44 atorunnaarsinneqassaaq.
22. § 46, imm. 1 atorunnaassaaq.
Imm. 2-3 matuma kingorna imm. 1-2-nngorput.
23. § 46, imm. 1 ima oqaasertalerneqassaaq:
"Imm. 1. Partiit kattusseqatigiillu ataasiakkaat qinigassanngortitaat qinigaanngitsulli, sinniisussanik nalunaarsuiffimmi allattorneqartassapput, sinniisussatut Inatsisartunut ilaasortaatitaasinnaanertik malillugu tulleriinnilersorneqarlutik. Qinigassanngortittoq qinigaanani amerlanerpaanit taaneqarsimasoq siulliussaaq. Tamatuma kingorna tulliussaaq qinigassanngortittoq qinigaanani amerlanerpaat tulliinit taaneqarsimasoq, taamatullu ingerlalluni tulleriinnilersuineq ingerlanneqassaaq."24. § 47 ima oqaasertalerneqassaaq:
"Qinersinermut Ataatsimiititaliap qinersinermik allattaavinnut allassavaa kikkut ilaasortassatut qinigaasutut isiginerini, qinigaasullu qinigaanerannik allakkatigut nalunaarfigalugit."25. § 50, imm. 1-imi oqaaseqatigiit siulliit imatut oqaasertalerneqassapput:
"Inatsisartunut qinigassanngortittut qinigaasimagunik qinigaasimanngikkunilluunniit, aammalu qinersisartut kikkulluunniit, qinersinerup atorsinnaassusia apeqquserlugu naammagittaalliuuteqarsinnaapput."26. § 53, imm. 4 aamma imm. 5 atorunnaarsinneqassapput.
§ 2.
Inatsisartut inatsisaat 1. december 1998 atulerpoq.
Namminersornerullutik Oqartussat, ulloq 30. oktober 1998.
Jonathan Motzfeldt/
Kaj Kleist