Nalinginnaasumik oqaaseqaatit
Siunnersuutip matuma siunertaraa partiit avataasigut qinigassanngortittut qinigassanngortittutut nalunaarutigineqarneranni Inatsisartunut qinersivimmi qinersisartut ikinnerpaamik 40-it qinigassanngortitsisutut atsiorsimanissaannik piumasaqaat atorunnaarsinneqassasoq.
Siunnersuutip akuersissutigineqarnerata kingunerisaanik inuit, Inatsisartuni partiit avataasigut qinigassanngortikkumasut, pisariillisaaffigineqassapput.
Aalajangersakkanut ataasiakkaanut oqaaseqaatit
§ 15-imutInatsimmi atortuusumi § 15-imi aalajangersagartaqarpoq partiit avataasigut qinigassanngortittunik nalunaarutiginninnermi Inatsisartunut qinersivimmi qinersisartut ikinnerpaamik 40-it, amerlanerpaamillu 50-it, qinigassanngortsisutut atsiorsimassasut kiisalu qinigassanngortitsisut taakku pillugit paasissutissanik tunniussisoqarnissaanut maleruagassanik.
Allannguutissatut siunnersuutikkut tassuuna aalajangersagaq atorunnaarsinniarneqarpoq, taamaalilluni qinigassanngortitsisoqarnissaq, partiit avataasigut qinigassanngortittup Qinersisarnermut ataatsimiititamit akuerineqarsinnaanera pillugu, siunissami piumasaqaataajunnaassalluni.
§ 16, imm. 3-mutAalajangersakkakkut piumasaqaatigineqarpoq qinersisartoq qinigassanngortittumut ataasiinnarmut qinigassanngortitsisuusinnaasoq. Aammattaaq qinersisartoq qinigassanngortittumut, Inatsisartunut qinersivimmi, qinersisartup nammineq qinersinissamut allattorsimaffimmi ilaaffigisaani, taamaallaat qinigassanngortitsisuusinnaavoq.
Taamaalilluni § 15-imi taaneqartutut qinigassanngortitsisup piumasaqaatit naammassisariaqagai maleruagassakkut erseqqinnerusumik iluarsiivigineqarput. § 15 atorunnaarsinneqarneratigut imaaruppoq, taamaammallu atorunnaarsinneqaqqullugu aamma siunnersuutigineqarluni.
§ 17, oqaaseqatigiit aappaatAalajangersakkakkut oqaatigineqarpoq qinersisartoq, qinigassanngortitsisuunermigut qinigassanngortittumut tapersiisoq, qinigassanngortinnermut nalunaarutip qinersisarnermut siulersuisunut tunniunneqareerneragut, tapersiinerminik tunuartitsisinnaanngitsoq.
Siunnersuutigineqarpoq aalajangersagaq atorunnaarsinneqassasoq, § 15-immi atorunnaarsinneqarnerata kingunerissammagu partiit avataasigut qinigassanngortittunut qinigassanngortitsisoqartarnissaa piumasaqaataajunnaassasoq.
§ 18-imutAalajangersakkami pineqarpoq Qinersisarnermut siulersuisut Qinersisarnermut ataatsimiititamut qinigassanngortittunik nalunaarutinik ilisimatitsisussaatitaanerat. Taamatut ilisimatitsisussaatitaanermut ilaatigut ilaavoq qinigassanngortitsisut nalunaarneqarsimanissaat.
Aalajangersakkap oqaasertalerneqarnissaanik siunnersuutitut saqqummiunneqartukkut taamatut ilisimatitsisussaatitaanermik aalajangersagaq aalajangiusimaneqarpoq, imaalilluguli; tassunga ilaatinneqaratik qinigassanngortitsisutut akuersissutigineqartut qassiuneri. Taamaalilluni § 11-imi taaneqartutut nalunaaruteqartarnerit pillugit ilisimatitsissuteqartussaaneq allanngortinniarneqalersaanngilaq.