Qilalukkanik qaqortanik qernertanillu piniarneq pillugu Namminersornerullutik Oqartussat nalunaarutaat nr. 21 29. juli 1993-imeersoq.
Inuutissarsiutigalugu piniarnermut aallaaniarnermullu inatsisartut inatsisaanni nr. 12-imi 22. november 1984-imeersumi § 4, §§ 6 aamma 7 kiisalu § 9 allanngortinneqartoq inuutissarsiutigalugu piniarnermut aallaaniarnermullu inatsisartut inatsisaat nr. 4 16. maj 1990 aammalu inatsisartut inatsisaat nr. 7 30. oktober 1991-imeersoq kiisalu Kalaallit Nunaanni pinngortitamik allanngutsaaliuineq pillugu inatsisartut inatsisaanni nr. 11, 12. november 1980-imeersumi § 2, imm. 1, § 18 aamma § 19 naapertorlugit aalajangersarneqarpoq:
Inuit piniarsinnaatitaasut
§ 1. Qilalugaq qaqortaq (Delphinapterus leucas) aamma qilalugaq qernertaq (Monodon monoceros) taamaallaat kalaallit nunaanneersunik aallaaniarnermut allagartanik piginnittunit piniarnerqarsinnaapput.
Kalaallit Nunaata avannaarsuani tunuanilu nunamik uumasuinillu eqqissisimatitsivik Qimusseriarsuarlu
§ 2. Qilalukkat qaqortat qernertallu eqqissisimatitaapput Kalaallit Nunaata avannaarsuani tunuanilu nunamik uumasuinillu eqqissisimatitsiviup imartaani kiisalu Qimusseriarsuarmi uumasunik eqqissisimatitsiviup imartaani.
Imm. 2. Upernaviup, Avanersuup imaluunniit Ittoqqortoormiit kommuneeni najugaqavissulli, inuiaqatigiinnullu aalajangersimasumik attuumassuteqartut, piniarnermik aallaaniarnermillu ingerlatsisinnaatitaapput, Qimusseriarsuarmi aamma Kalaallit Nunaata avannaarsuani tunuanilu nunanik uumasuinillu eqqissisimatitsiviit pillugit maliitarisassat atuuttut malillugit.
Nalinginnaasumik piniariaatsit
§ 3. Qaqortanik qernertanillu qilalugarniarnermi imaluunniit piniarfissamukarnermi tassanngaaniillu angerlarnermi timmisartut, helikopterit kiisalu qamutit motoorillit suulluunniit atorneqassanngillat.
Imm. 2. Kisiannili immikkut ittunik pisoqartillugu pisanik angerlaassuinissamut snescooterit atorneqarnissaat kommunalbestyrelsip immikkut akuerisinnaavaa, tassa siku silalu pissutigalugit pisat tuaviortumik angerlaannissaat pisariaqaleraangat.
Imm. 3. Qoorortuut atussagaanni akuerisaapput minnerpaamik 7,62-imik kaliberillit, taamaattorli qilalukkamut qaqortamut qernertamulluunniit naalitamut, qassutinik pisamut imaluunniit pisarinissaa qulakkiikkamut qanittunnguullugu toqutsissutigissallugu 5,64 mm-inik kaliberilik (cal. 222) atorneqarsinnaavoq. Patruunit tamakkerlugit puukkanik aqerlullit taamaallaat qaqortanik qernertanillu qilalugarniarnermi atorneqassapput.
Imm. 4. Ikiligaq sapinngisamik pilertortumik toqunneqassaaq. Qilalugaq nunap qaanut qaqinneqarniariartoq pilallugu aallartinneqassaaq.
Imm. 5. Qaqortanik qernertanillu qilalugarniarnermi qaartartut, qamutillit tuukkartallit, timmiarsiutit aammalu qoorortuuaqqat atorneqarnissaat inerteqqutaavoq.§ 4. Kommune ataaseq imaluunniit arlallit peqatigiillutik kommunemi ileqqoreqqusaliatigut qilalugarniartarneq annertunerusumik killilersorsinnaavaa, immikkut pisariaqartitsisoqartillugu. Kommunemi ileqqoreqqusaq atortussanngortinneqarsinnaavoq taamaallaat naalakkersuisunit akuerineqarpat.
Angattatit
§ 5. Angallatiniit 25 BRT-tut angitigisut imalunniit taakkuninnga mikinerniit taamaallaat qernertanik qaqortanillu qilalugaqqusaapput, taakkuninngalu kalaalimineerniarfmni pisititsisinnaapput kiisalu tunitsivinnut tunisisinnaatitaallutik.
Imm. 2. Angallatiniit 50 BRT-tut angitigisut taakkuninngaluunniit mikinerniit, kisianni 25 BRT-mit anginerit namminermut atugassanik qernertanik qaqortanillu qilalugarsinnaatitaapput. Immikkoortumi tassani kalaalimineerniarfmni tuniniaasinnaatitaanngillat tunitsivinnullu tunisisinnaatitaanatik.
Imm. 3. Angallatiniit 50 BRT-mit anginerit amerlanerpaamik qilalukkanik qernertanik qaqortanilluunniit marlunnik angalanermi ataatsimi taquassatut pisaqarsinnaapput. Immikkoortumi pineqartuni angallatit qilalugartaminnik tunisisinnaanngillat tuniniaasinnaanatillu.
Ungusisarneq
§ 6. Ungusinermi angallatip ataatsip ullormut qilalukkat qaqortat aamma/imaluunniit qernertat 7-k tikillugit pisarisinnaavai.
Imm. 2. Ikiligaq sapinngisamik pilertortumik toqunneqassaaq. Qilalugaq nunamut qaqinneqarniariartoq pilallugu aallartinneqassaaq.
Imm. 3. Ungusisarnermi qilalukkat qaqortat qernertallu pisat tamarmik najukkamut angerlaanneqassapput imaluunniit qimatulineqarlutik. Ungusinermi pisanik pilaffik torersarneqassaaq, sinnikut atorneqarsinnaanngitsut peerneqarnerisigut.
Imm. 4. Neqit, mattaat orsullu piginnittumit nalunaaqqutsikkat kiisalu qilalukkat pitutat piginnittui akuersisimatinnagit nikisinneqassanngillat.
Sassat
§ 7. Sassanik nassaartoqarpat sumiiffiat nunaqarfmnut/illoqarfmnut eqqaanniittunut tuaviornerpaamik, VHF-radio-luunniit atorlugu nalunaarutigineqassaaq.
Imm. 2. Ikiligaq sapinngisamik pilertortumik toqunneqassaaq. Qilalugaq sikup qaanut qaqinneqarniariartoq pilallugu aallartinneqassaaq.
Imm. 3. Piniartut sasseqataasut kikkulluunniit sassinerup inerneratigut qimussimik erniinnaq assartorsinnaasorisatik akimorlugit pisaqartassanngillat, imaluunniit § 3, imm. 2 naapertorlugu.
Imm. 4. Piniaqataasut pisussaapput sinnikut inunnit qimminillu atorneqarsinnaanngitsut tamaasa piniarfik qimatsinnagu piiarnissaannut.
Imm. 5. Neqit, mattaat orsullu piginnittumit nalunaaqqutsikkat kiisalu qilalukkat pitutat piginnittui akuersisimatinnagit nikisinneqassanngillat, kommunimi oqartussaasut piniarnermi pissarsiat tamakkua sila pissutigalugu assartorneqarnissaat ullormik killiliiffígisimanngippassuk killiliussarlu taanna qaangerneqarsimanngippat.
Nalunaartarneq nakkutilliinerlu
§ 8. Qilalukkat qaqortat qernertallu pisat pissatallu kommuneqarfimminnut nalunaarutigisassavaat. Pisaqartoqarsimagaangat kingusinnerpaamik nalunaarutigineqartassaaq qaammatip tulliata ulluata tallimassaani. Pisaqarnermi pissaanermilu nalunaarutigineqassaaq qilalukkap suunera, amerlassusai, suiaanera, (ilanngunneqarsinnaappullu taaguutaat, arnaviaanersoq, angutiviaanersoq, inuusuttuunersoq, piaraanersorlu), ulloq pisaqarfík kiisalu pisaqarfiup pissaaffiulluunniit aqqa. Nalunaarutigineqassaartaaq pisat pissatalluunniit qoorortuumik, unaamik tuukkartalimmik, qassutinik, ungusinermi imaluunniit sassani pisarineqarsimanersut.
Imm. 2. Sassinermi qilalugartat najugarisami KNAPP-mut nalunaarutigineqassapput sassisoqareerniariarpat. Pisaqarnermi nalunaarneq imm. 4-mi taaneqartumut immersuiffimmut allattorneqassapput. KNAPP-ip akisussaaffigissavaa sassinermi pisanik nalunaarutit kommunemut ingerlateqqissallugit.
Imm. 3. Ungusinermi pisanik agguaasartup imaluunniit agguaasartut pisanik pissatanillu nalunaarsuinissaq ingerlateqqissavaa imm. 1 malillugu.
Imm. 4. Pisat pissatallu allattuiffissamut nalunaarsuutini ilanngussatut I ilanngunneqartukkut allattorneqassapput piniartup aqqa, cpr.nr., kommunerisaq, qaammat pisaqarfik, angallatip suunera BRT/fod-tullu angissusaa kiisalu immikkoortoq sorlermut ilaanersoq, takuuk § 5. Allattuiffissaq kommunep imaluunnit nunaqarfiup allaffianiit pineqarsinnaavoq.
Imm. 5. Kommunep pisaqarnermik allattorsimaffiit tigusani Aalisarnermi, piniarnermi nunalerinermilu pisortaqarfimmut nassiutissavai kingusinnerpaamik qaammatip tulliata ulluisa 14-nissaani, pisaqartoqarsimatillugu.
Alleqqunik katersuineq
§ 9. Piniartut qilalukkamik qaqortamik qernertamilluunniit pisaqartut tamarmik pisussaapput allerui angerlaatissallugit, tak. nalunaarsuutit ilanngussaq II, taakkulu KNI-mut imaluunniit Royal Greenlandi-mut tunniutissallugit qanga sumilu pisaqarnini nalunaarutigalugit, kingusinnerpaamik ullut 14-nit pisaqareernerup kingorna.
Imm. 2. Alleqqut piniaqatigiinnermi pissarsiat tamarmik tunniunneqassapput §-imi 5 aamma 6-imi taaneqartunit pisanik nalunaartussanit, ilanngullugu nalunaarutigineqassaat pisat qassiunersut.
Imm. 3. Alleqqut tunniunneqartut KNI-p imaluunniit Royal Greenlandi-p ingerlateqqissavai uunga: Kalaallit Nunaata Aalisakkanik Misissuisoqarfia, Box 570, 3900 Nuuk.
Immikkut akuersineq
§ 10. Ilisimatusarnermut allanullu tunngatillugu naalakkersuisut aalajangersinnaavaat nalunaarummi aalajangersakkat sanioqqunneqarnissaat.
Avammut annissineq
§ 11. Qilalukkap qaqortap qernertallu ilamerninik taamaallaat nunanut allanut annissisoqarsinnaavoq Namminersornerullutik Oqartussat akuersereernerisigut, tamakkuninngali annissisoqarsinnaavoq § 10 tunngavigalugu.
Pineqaatissiinerit
§ 12. Maleruagassanik §§ 1 - 3, §§ 5 - 9, aamma § 11-mik unioqqutitsineq akiliisitsissutaasinnaavoq.
Imm. 2. Qilalukkat qaqortat qernertallu inatsisinik unioqqutitsilluni pisarineqartut pissarsiarineqartulluunniit neqaat, mattaat, niaquisa saarni, tuugaavi ilamernilu allat arsaarinnissutigineqarsinnaapput.
Imm. 3. Nalunaarut una malillugu kommunemi ileqqoreqqusalianik unioqqutitsisoqarsimatillugu akiliisitsisoqarsinnaavoq pisanillu arsaarinnittoqarsinnaalluni.§ 13. Nalunaarut una ulloq 1. august 1993 atortuulerpoq, peqatigitillugulu Namminersornerullutik Oqartussat nalunaarutaat nr. 10 19. juni 1992-meersoq atorunnaarsinneqarpoq.
Imm. 2. Sassat pillugit landsrådip ileqqoreqqusaa 18. januar 1958-imeersoq naapertorlugu kommunini ileqqoreqqusaliat atortussanngortinneqarsimasut imaluunniit allakkiat atortuuinnassapput, qilalugarniarnermi malittarisassat sakkortunerusimappata.
Namminersornerullutik Oqartussat, ulloq 29. juli 1993.
Hans Iversen/
Henrik Leth