Radiomik naalaarniarneq akornuserneqatsaaliniarlugu qanoq iliuuseqartarnissanik Inatsisartut inatsisaat nr. 11, 15. december 1987-imeersoq.
§ 1. Radiomik naalaarniarneq (tamatumani aamma ilaatinneqarlutik TV-kut isiginnaarniarneq radiolu atorlugu angalasunik kiffartuussisut naalaarniartarnerat) akornusersorneqatsaaliniarlugit Naalakkersuisut piginnaatinneqarput nalinginnaasumik aalajangersagaliorsinnaasut elektricitetip sarfaliaa atorlugu apparatit iluaqusersuutillu allat piusut maligaasat qinngornerit atugaasa sakkortunerpaaffissaannik imaluunniit allatut sakkukillilerneqarsinnaanissaannik, tamatumani aamma pineqarput motorit sarfaq atorlugu aallartinneqartartut.
Imm. 2. Naalakkersuisut aamma immikkut ittumik aalajangersaaffigisinnaavaat elektricitet atorlugu iluaqusersuutit apparatillu atugaanissaat.
Imm. 3. Imm. 1 pillugu nalunaarusiassaq atulerpat elektricitetip sarfaliaata annertussusissaanik allamilluunniit nalunaarummi piumasarineqartunit apparatit iluaqusersuutillu allat sakkortunerusut Kalaallit Nunaanni atugassatut eqqunneqarsinnaanngillat, sananeqarsinnaanatik tunniunneqarsinnaassanatillu.
Imm. 4. Qamutit motorillit imm. 1-imi piumasarineqartunit nalinginnaasunit allaanerusumik aallartittaateqartut malittarisassap atulerneratigut atorneqarsinnaanngillat.§ 2. Paasineqaraangat apparatit allallu iluaqusersuutit elektricitetitortut § 1, imm. 1-imi nalinginnaasumik aalajangersakkat uniorlugit akornusersuisuusut Naalakkersuisut piumasaqarsinnaapput piginnittup (atuisup) apparati allaluunniit iluaqusersuut elektricitetitortoq akornusersuisorlu aalajangersakkanut naapertuuttumik iluarsartissagaa nammineq aningaasartuutigalugu, apeqqutaatinnagu apparati iluaqusersuulluunniit qangarpiaq atugarilersimanerini.
Imm. 2. Paasineqaraangat apparatit allallu iluaqusersuutit elektricitetitortut § 1, imm. 1-imi nalinginnaasumik aalajangersakkat unioqqutinngikkaluarlugit akornusersuisuusut Naalakkersuisut piumasaqarsinnaapput piginnittup (atuisup) apparati allaluunniit iluaqusersuut - apeqqutaatinnagu apparati allaluunniit iluaqusersuut qangarpiaq atugarilersimanerini - iluarsartissagaa nammineq aningaasartuutigalugu soorlu salitsillugu, nipaallisaaserlugu, frekvens atugaa allanngortillugu imaluunniit piffissaq atorneqartarfia sivikillillugu elektricitet atorlugu sarfaliornermini akornutaasinnaajunnaarlugu nunaqarfigisami radiofonip fjernsynillu aallakaatitaannik tigooqqaaniarnermut.§ 3. Pisoqarsimappat § 1-imi nalinginnaasumik aalajangersakkat imaluunniit § 2-mi immikkut iliuusissat malittarigaluarlugilluunniit radioqarfik akornesersuutaajuartoq Naalakkersuisut piumasaqarsinnaapput piginittup (atuisup) apparati imaluunniit iluaqusersuut alla allatut qanoq iliuuseqarnermigut isumannaallisaaffigeqqissagaa, kisianni apparatip iluaqusersuutilluunniit iluaqutaaneranut malunniutussamik akornutissinnagu.
Imm. 2. Immikkut ittumik akornusitsaaliuiumalluni iliuusissanut aningaasartuutit apparatimik iluaqusersuummilluunniit akornusersuisuusumik piginittup akiligassarai.§ 4. Pisoqarsimappat §§ 1-3 tunngavigigaluarlugilluunniit inuiaqatigiinnut iluaqutaasussamik radioqarfik akornusersugaajuartoq Naalakkersuisut suliniutigisinnaavaat taartisilluni naalagaaffimmut kommunemulluunniit pigisanik tunniussisarnissamik inatsimmi nr. 182, 29. maj 1972-ernisami Kalaallit Nunaannut atuuttussanngorlugit aalajangersakkat naapertorlugit tigusinissartik; taamatulli pisoqartillugu inatsimmi § 2 najoqqutariniarneqarsinnaanngilaq.
Imm. 2. Taamatut pigisamik piumasaqaateqarneq ima aaqqinniarneqarsinnaavoq illup sumut atugaasinnaaneranik killiliinikkut, tassa aalajangerlugu apparatit imaluunniit iluaqusersuutit elektricitetitortut aalajangersimasuinnaat illumi atugaasinnaalersillugit, imaluunniit illu periarfissarititaasunut akerliusumik allineqarsinnaajunnaarsillugu. Naalakkersuisut aamma illuliorfissanik akuersisartunut piumasarisinnaavaat illup iluaqusersuuteqarfiulluunniit allanngortinniagaanera periarfissarititaasunut akerliusimappat akuersissuteqartaqqunagu, aamma Naalakkersuisut illuliorfissanik akuersisartut piumasaqarfigisinnaavaat periarfissarititaasunut akerliusumik siunertallit sanaartorfigineqaqqunagit imaluunniit nuna illuliorfigineqanngitsoq tamakkununnga atugassatut akuersissutigeqqunagu aalajangersarneqarsimasut malillugit tamanna piumasaqaataasimappat. Periarfissarisanik killilersuisuunerit tamakku nalunaarsorneqassapput ajornanngippat kalaallit inuusaasianni pissutsit tunngavigalugit.§ 5. Tigooqqaat akornusersugaasoq nalinginnaasumik akornusersugaasartuniit malussarinnerusimappat imaluunniit inissitaanerliorsimanera tamatumunnga pissutaasimappat piginnittoq (atuisoq) piumaffigineqarsinnaavoq §§ 2-4 aalajangersakkat atornialersinnagit iluaqusersuummut aaqqiissutaasinnaasunik iliuuseqarniaqqullugu.
§ 6. Akornusersuut apparatip iluaqusersuutilluunniit elektricitetimoortup kukkusaaneranik patsiseqarsimappat imaluunniit ajoqusersuisinnaajunnaarsagaagaluarsimanera kukkusaasimappat Naalakkersuisut piumasarisinnaavaat piginnittup (atuisup) piaarnerpaamik kukkuneq aaqqitsinniassagaa nammineq aningaasartuutigalugu.
Imm. 2. § 3 naapertorlugu akornusitsaaliuineq kukkusumilli suliarineqarsimasoq pillugu Naalakkersuisut aalajangersagaliorsinnaapput taamatut pisoqartillugu piginnittoq (atuisoq) iluarsaaqqinnerminut tamakkiisumik ilaannakortumilluunniit aningaasartuuteqassanersoq pillugu.§ 7. Akornusersuutip inuunermut pisariaqarluinnartut imaluunniit inuiaqatigiinnut pisariaqarluinnartumik radiokkut atassuteqaatigineqartut eqqorsimappagit - taamalu inuit allallu inuiaqatigiit ingerlatitaanerannut pingaaruteqarluinnartut navianartorsiortillugit - Naalakkersuisut piumasaqarsinaapput iluaqusersuut piaarnerpaamik unitsinneqassasoq, tamatumanilu pisariaqartumik iliuuseqarnissaq Naalakkersuisut isumagisassaraat.
§ 8. Inatsimmik matuminnga atuinermut nakkutilliisitsiniarlutik Naalakkersuisut makkunninga pisumasaqarsinnaapput:
1) Apparatit iluaqusersuutillu allat elektricitet atorlugu ingerlateqartut Kalaallit Nunaannut tunineqalersinnagit atugassiissutigineqalersinnagilluunniit piumasaqaatigissallugu radiomut qanoq akornusersuisinnaatiginerinik uuttorneqarnerinut allagartaq uppernarsaat.
2) Apparatit iluaqusersuutillu allat uppernarsineqarsinnaasut maligaasaliornerit killissarititaasut sinnerlugit suliaasimasut tunineqarnissaat atugassiissutigineqarnissaallu inerteqqutigissallugu.
3) Apparatinik iluaqusersuutinillu allanik elektricitet atorlugu ingerlateqartunik tuniniaasut peqqussallugit Naalakkersuisut aalajangersagariumaagassaat naapertorlugu aammalu aalajangersakkani nr. 2 malillugu inerteqquteqarneq tunngavigalugu tunisaraluatik uterteqqullugit uterteqqeqqullugillu.§ 9. Elektricitetitortunik pigisallit atuisullu, tamatumani aamma radioqartut fjernsyneqartullu, kiisalu suliffeqarfiit tamakkuliortartut, tikiussuisitsisartut tuniniaasartullu apparatinik allanilluunniit iluaqusersuutinik eletricitetitortunik immikkut eqqartuussisut saaffigeqqaanngikkaluarlugit Naalakkersuisut tamakkuninnga misissuisussaatitaat ajornarsaarussinnaanngilaat misissuinissaannut imaluunniit elktricitetitortuutimik ilaannik radiomik naalaarniarnermut akornutaasorinartunik misissugassamittut tigusigallarnissaannik.
§ 10. Naalakkersuisut aalajangersagaliorsinnaapput:
1) § 1-imi nalinginnaasumik aalajangersakkat atuutitinneqarnissaat anguniarlugu apparatinik iluaqusersuutinillu pisaarnianut akuersissuteqartarnissaminnik pisaarineqartunillu nalunaaqutsersuisarnissaminnik.
2) akuersissutigisinnaallugu apparatinik iluaqusersuutinillu pineqartunik nioqqutissiortartut nioqquteqartartullu qanoq atsigisumik akileraartitaasarnissaasa (afgift) annertussuseqarnissaat.§ 11. Ataatsimoorussamik antenneqarfiliorniarnerit taakkulu ulluinnarni ingerlatinnerat pillugu teknikkikkut tunngasumik qanoq ilioqqusissutinik Naalakkersuisut aalajangiisinnaapput, aamma antenneqarfimmik piginneqataasuugaluilluunniit apparatinik akornusersuisinnaasunik atuinissaat inerteqqutigisinnaallugu.
§ 12. Naalakkersuisut Grønlands Televæsen piginnaatissinnaavaat inatsimmi matumani Naalakkersuisunut isumageqquneqartut nalinginnaasumik suliarisaqqullugit.
Imm. 2. Taamatut piginnaatitsinissamik aalajangersagaliortoqartinnagu Grønlands Televæsenip manna tikillugu televæsenimut isumagititaasarsimasut ingerlatiinnassavai.
Imm. 3. Kalaallit Nunaanni Nalunaarasuartaaserisoqarfiup aalajangigaanik maalaarutit Naalakkersuisunut tunniunneqarsinnaapput.
Imm. 4. Kalaallit Nunaanni radiomik naalaarniarnermut akornusersuutaasartut pillugit ingerlatsinermi aningaasartuutaasartut Grønlands Televæsenip ingerlataralugillu akilertassavai.§ 13. Akiliisinneqarsinnaapput
1) § 1, imm. 2-mi aalajangersakkanik unioqqutitsisut,
2) § 1, imm. 3-mi aalajangersakkanik unioqqutitsisumik tikisitsisut, sanaartortut imaluunniit atugassiissuteqartut,
3) § 1, imm. 4-mi aalajangersakkanik unioqqutitsisumik qamutinik motorilinnik atuisut,
4) §§-ini 2, 3, 6, 7, 8 imalt. 9 peqqussutigeqqusaasunik, inerteqqutaasunik inassutigisaasunillu unioqqutitsisut imaluunniit
5) § 4 malillugu periarfissarititatut qaangeqqusaanngitsunik qaangiisimasut.
Imm. 2. Aamma unioqqutitsisunik atortoqartut pigisaminnik arsaarneqarsinnaapput.
Imm. 3. Naalakkersuisut inatsimmi uani pineqartut §§-it 1,8, 10 aamma 11 nalunaarusiornermikkut maleruagassiorsinnaavaat, taakkunaniittunillu unioqqutitsinerit akiliisitsinermik pigisamillu arsaarinninnermik kinguneqartissinnaallugit.
Imm. 4. Piginneqatigiiffiit, soorlu aktieselskabit, anpartsselskabit, andelsselskabit, peqatigiiffiit allalluunniit taamatut naatsorsuunneqartariaqartut, unioqqutitsisimappata selskabi peqatigiiffilluunniit peqquneqarsinnaavoq akiliissutissaq akisussaaffigeqqullugu arsaagaasinnaallutillu. Tamanna aamma atuutissaaq kommunep imaluunniit kommuneqarfikkuutaartoqatigiit ingerlataannut.§ 14. Inatsisartut inatsisaat una atuutinngilaq radiokkut atassuteqartarneq pillugu 6. april 1976-ernisamik inatsimmik nalunaarut nr. 210 naapertorlugu radiokkut aallakaatitsiviit akornusersuisinnaanerannut.
§ 15. Inatsisartut inatsisaat l.januar 1988 atuutilissaaq.
Namminersornerullutik Oqartussat, ulloq 15. december 1987.
Jonathan Motzfeldt/
Aqqaluk Lynge