Oqaaseqaatit tamaginnut atuuttussat

 

Tamatumani pineqarpoq radiomik naalaarniarneq akornuserneqatsaaliniarlugu qanoq iliuuseqartarnissanik inatsisartut inatsisissaat.

Radiomik naalaarniartarneq, tamatumani aamma ilagitinneqarlutik fjernsynikkut aallakaatitanik isiginnaarniartarneq radiolu atorlugu angalasunik kiffartuussisut naalaarniartarneranni, avataaniit akornusersuutaasartut Kalaallit Nunaanni radioqarneq fjernsyneqarnerlu pillugit 29. november 1978-ernisamik inatsisiliakkut (piginnaatitsinermik inatsit) allanngortitaasimanngillat.

Danmarkimi tamanna immikkut inatsisiliuunneqarsimagaluarpoq (inatsimmik nalunaarut nr. 528 17. oktober 1978-ernisaq) Kalaallit Nunaannulli atuuttussaatitaanngitsumik.

Suliassaq una piginaatitsinikkut inatsisiliorsinaatitaasimanermut attuumassuteqarpiarsorinanngikkaluartoq taamaattussaasorinarpoq pingaartumik inoqarfiit avatangiisigisaanni pissutsit eqqarsaatigalugit.

Suliassarlu taannarpiaq Namminersornerullutik Oqartussat Naalagaafiullu isumaqatigiissutigisimavaat Namminersornerulernissamik inatsimmi § 4 uppernarsaasiullugu Namminersornerullutik Oqartussat ingerlatilissagaat.

Suliassaq taannarpiaq ullumimut GTO-p ingerlatarisimavaa kaajallaasitaliortarnermigullu aalajangersaaffigisarlugu.

Maannali pisariaqarluinnalersimavoq radiomik naalaarniartarnerup avataaniit akornusersugaasarnerata qanoq iliuuseqarfigisariaqalernissaa.

Suliassaq teknikkimut attuumassutilerujussuummat qanoq iliuuseqartariaqarnissat aamma teknikikkut ineriartorneq, angusarissaariartorneq, peqatigalugu allanngorartitaasariaqarput.

Siunnersuummi aalajangersarniarneqarpoq Naalakkersuisut piginnaatinneqassasut nalinginnaasunik aalajangersagaliornermikkut apparatit iluaqusersuutillu allat elektricitetimik ingerlateqartut radiomik naalaarniarnermut akornutaatinnaveersaarnissaannut, taakkununnga aamma ilaallutik motorit elektricitet atorlugu aallartittaatillit.

Missingersuummi amma tunngavissinniarneqarput iluaqusersuutit apparatillu akornusersuisinnaasut piginerat sutigut inassuteqarfigineqarsinnaanersoq aammalu piginissaat sutigut inerteqqutigineqarsinnaanersoq kiisalu aalajangersagaqarluni tamakku Kalaallit Nunaanni atugassatut tikisinneqarsinnaanersut, nioqqutigineqarsinnaanersut atorneqarsinnaanersullu.

Radiomik naalaarniartarnerup akornusersugaasarneranut aalajangersakkani makku pineqarput:

- Illumi pisariaqartitatut ulluinnarni atugassiat elektricitetitortut, sakkuutit angallattakkat kiisalu apparatit allat elektricitetitortut radiomik naalaarniarnermut akornutaasinnaasut atorneqarnerminni imaluunniit atorneqaleqqaarnerminni, soorlu assersuutigalugit allaffimmi maskinat, filmertitsissutit, lysbilledapparatit, oqaluttartut, apparatit nappaatinut akiuussutaasinnaasut elektronikkiusut, thyristorregulatorit, aningaasanik nakkartitsiinnarluni pisiniartarfiit allallu apparatit aliikkutassiat batteritortuunngitsut.

- Qulliit lysrørinik taaneqartartut toorsinerinnakkut ikigatik immikkut ikikkiartortaatillit.

- Radiot fjernsynillu.

- Qamutit motorillit aallartittaataat.

- Kiisalu atortorissaarutit allat mikroprocessorinik, digitalt kredsløbinik, oscillatorinik allanillu taamaaqataannik atortuuteqartut. Atortorissaarutit makkuupput soorlu assersuutigalugit computerit, dataterminalit, datamodemit, pinnguaatit elektroniskiusut, igaffimmi atortuutit microprocessorertallit allallu taamaaqataat.

Inatsimmi aamma maleruaqqusaqarpoq ataatsimoorussaminnik anteneqaqatigiissut imminnut akornusersuutinnginnissaat, takuuk inatsisissatut siunnersuummut oqaaseqaatigineqartuni § 11.

 

Inatsisartut inatsisaattut siunnersuutip aningaasatigut sulisussaqarnikkullu kingunerisassai.

Inatsisartut inatsisissaata nakkutigineqarnissaanut sinerissami immikkoortoqarfinni pingasuusuni inuit pingasut støjinspektørinik taaguuteqartussat atorfinitsitaasariaqassapput, taakkulu aningaasarsiassaat, ingerlatsinissaat, angalasarnissaat il.il. akeqassangatinneqarlutik 1-1,5 mio.kronenik.

 

Aalajangersakkanut ataasiakkaanut oqaaseqaatit

§§ 1-3-mut.

Aalajangersakkani taakkunani tunngavissinniarneqarpoq radiomik naalaarniartarnermut akornusersuutaasinnaasut akiorniarlugit tamaginnut atuuttussanik maleruagassiortarnissaq. § 1, imm. 1 naapertorlugu maleruagassiornikkut apparatit iluaqusersuutillu allat tikisinneqarsinnaajunnaassapput, sananeqarsinnaajunnaassapput imaluunniit atugassiissutigineqarsinnaajunnaassallutik maleruaqqusani piumasarisaasunut naleqqutinngippata. Atortuutilli maannamut pigineqareersut aammalu akornusersuutaasutut oqaatigineqarsinnaasorinanngitsut pigiinnarneqarsinnaassapput. Taamaattuni akornusersuisoqartillugu iluarsaasitsisarnissamik § 2-mi aalajangersakkat atuuttassapput. Kisianni § 1, imm. 4 malillugu bilit qamutillu allat motorillit tamaginnut atuuttussamik aalajangersakkat maleqqissaassavaat, taamaattumik tamakkununnga tunngasuni § 2-mi aalajangersakkat atoriarneqarsinnaanngillat.

§ 1, imm. 2 aalajangersakkanut ilanngunneqarmat pissutaavoq iluaqusersuutit apparatillu nalinginnaasumik aalajangersakkanut atasutut oqaatigineqarsinnaanngitsut immikkut ittumik piumasaqarfigineqarsinnaanissaat tunngavissaqaqqullugu, tamakkuusinnaappullu ilisimatuut misissuinerminni iluaqusersuutigisartagaat.

§ 4-mut.

Radiop maligaasaanik tigooqqaativiit qanittuini tigooqqaatit ilaatigut pisariaqarsinnaapput immikkut aaqqissuussivigissallugit, akornusersuisooqqunagit nalinginnaasumik aalajangersakkat malillugit naalaaruteqarsinnaatitaasunut.

Tamakku immikkut killiliinerit tunngavissaqarput Naalagaaffimmi inatsisip tunngaviusup §-iisa 73-ianni paasisariaqartumik naalagaaffiup pigisanik "arsaarinnissinnaaneranik", tamannali taamaallaat pisinnaavoq pigisanik naalagaaffimmut kommunemulluunniit tunniussisarnissamik inatsit malillugu aammalu taarsiissutitaqartumik.

Kalaallit Nunaanni pissusiusartut naapertorlugit piginnittussaassusermik oqartarnermi eqqarsaatigineqaannartarpoq illuutigisaq, inuimmi piginnaatitaanngillat nunamik pigisaqarnissaminnut, aammalu imaaliinnarlutik illumik qanittuini piliorsinnaatitaanatik aammalu nunap ilaa nunaannaagaluartoq pigisavimmittut iliuuseqarfigisinnaanagu. Atuisinnaatitaanermik killiliinerit taamaakkamik inunnit imaaliinnarlugit periarneqarsinnaanngillat, pisariaqarlunilu tamakku tungaasigut nunaminernik atuinissamut oqartussaatitat kalluutitinneqarnissaat.

§ 5-imut.

Apparatit iluaqusersuutillu allat aningaasartuutigineri piginnittuusup isumagisassarai, apeqqutaatinnagu radiomik naalaarniarnermut akornutaanersut akornutaannginnersulluunniit; tulluaanassaarli iluaqusersuummik akornusersuisumik piginnittoq (atuisoq) piumasaqaateqarfigitinnagu akornusersugaasup iluaqusersuutigisinnaasai naammassiniartissallugit.

§ 6-imut.

Nalinginnaasuuvoq apparatinik iluaqusersuutinilluunniit elektricitetitortunik ajortoqartillugu akornusersuisuutillugilluunniit qanoq iliuutsinut piginnittuusoq aningaasartuuteqartarluni.

Pissutsinili immikkut ittuni pisortat piumasaqarnerat malillugu qanoq iliuuseqartariaqarnerni televæsen akiliussisuusinnaasassaaq Naalakkersuisut aalajangersagaat malillugit, tassa una pigilersimasaq kukkusumik ikkussuunneqarsimappat. Tamatumani erseqqissartariaqarpoq naalaarniarnermik akornusiitsaaliiniarneq ilaatigut akisuukasiusinnaasarmat.

§ 7-imut.

Oqaaseqaatissaqanngilaq.

§§ 8-10-mut.

Tassani aalajangersakkat taakkuupput nalinginnaasumik iliuuseqarnissanut akuersissuteqartarnissanullu tunnganerusut.

Aalajangersakkat Danmarkimi atuuttut akornutissaqanngitsumik Kalaallit Nunaanni aamma atuutitilerneqarsinnaapput. Typet atugaasut sorliunissaannik akuersissuteqartarnissamut aningaasartuutissat killilersimaarniarlugit tulluaannassaaq inatsit pillugu nalunaarusiassami erseqqissassallugu apparatit iluaqusersuutillu allat Danmarkimi akuerisaasimasut aamma Kalaallit Nunaanni atugaanissaat akuerisaasoq, taamaaliornikkut suliassersuutaavallaassanngimmata nunanit allaniit tikisinniakkat imaluunniit Danmarkimi atorneqarsinnaasutut akuerisaasimanngitsut pisortatigoortumik sulissutiginiarneqarneri.

§ 11-mut.

Kalaallit Nunaanni radio fjernsynilu pillugit 29. november 1978-ernisamik inatsimmi nr. 583 § 1, imm. 2., pkt. 2-mi allassimavoq inatsimmik unioqqutitsinertut isigineqanngitsumik inuit arlallit ataatsimoorussassaminnik anteneqarfiliorsinnaasut. Taamaaliornissarlu pisariaqarsorinarani teknikimut tunngasutigut ingerlanneqarnissaanullu maleruagassiuunnissaanik.

Namminersornerullutik Oqartussat Naalagaaffiullu isumaqatigiissutigaat suliassaq tamanna immikkukajaaq ittoq Namminersornerullutik Oqartussat isumagisarilissagaat namminersornerulernissamik inatsimmi § 4 tunngavigalugu.

§ 12-imut.

Suliassaq taannarpiaq maannamut Grønlands Televæsenip ingerlataraa immikkut inatsimmik tunngaveqarani.

Aalajangersagaasarumaartullu tamaginnut atuuttussat matuma kingorna naatsorsuutigineqassapput Namminersornerullutik Oqartussat nalunaarusiarisassagaat; ukuli ulluinnarni pisortaaffiginninnermi suliassat Grønlands Televæsenip aqussagai.

Innuttaasut televæsenip aalajangiinerinut akerliugunik Naalakkersuisut orulluvigisassaraat.

§ 13-imut.

Inatsisaaliaasarsimasuni pioreersuni Højesteretip aalajangiisimanera malillugu akiliisitsissutissat taamaaqataallu piginneqatigiinnut tunngasut kommunenut aamma atuutitinneqarsinnaanngillat. Taamaattumik pineqaatissiisinnaanermik aalajangersakkani ukunani ersersinniarneqarsimavoq aamma pineqarmata peqatigiiffiit, kommunet kiisalu kommunet peqatigiiffii.

§ 14-imut.

Radiokkut aallakaatitsisinnaaneq pillugu 6. april 1976-ernisamik inatsisiliamik nalunaarut nr. 210 suli naalagaaffeqatigiinnermi inatsisaavoq, naak 19. december 1986-ernisamik inatsisiliakkut nr. 933-kkut Namminersornerullutik Oqartussat assigiinngitsutigut akuersissuteqarsinnaatitaaleraluartut; tamannalu pissutigerpiarlugu inatsit taanna malillugu radiokkut aallakaatitsiviliornissanik Inatsisartut inatsisiliorsinnaatitaanngillat.