Europami nunat niueqatigiit pillugit isumaqatigiissutit atorneqarnerisa nangiinnamissaat pillugu Kalaallit Nunaanni inuit taasisinneqarnissaannik landstingip inatsisaa nr. 2, 3. april 1981-imeersoq.
§ 1. Piffissami nunatta naalakkersuisuisa aalajangigaanni paasiniaaffiusumik Kalaallit Nunaanni inuit taasisinneqassapput Europami nunat niueqatigiit pillugit isumaqatigiissutit atorneqarnerisa nangiinnarnissaat pillugu.
Stk. 2. Ulloq inunnik taasisitsivissaq nalunaarutigineqassaaq taasisitsinissaq qaammatinik 3-nik sioqqullugu kingusinnerpaamik qaammatip ulluani ullup taasisitsivissap assingani.§ 2. Pasiniaaviusumik inunnik taasisitsinermi qinersisartut aap-imik imaluunniit naagga-mik akissapput apeqqummut uunga:
Nunarput EF-imiiginnassava?
Stk. 2. Qinersisartut inunnik taasisitsinermi peqataasut akornanni amerlanerussuteqartut apeqqummut tassunga naaggaarlutik akippata, nunatta naalakkersuisui piginnaatinneqassapput Kalaallit Nunaata ilaasortaajunnaarnissaa pillugu piffissaq atugassarisallu pillugit naalagaaffimmi oqartussaatitanik isumaqatiginninniarnissanut.§ 3. Inunnik taasisitsinerup inernera aamma Kalaallit Nunaata siunissami EF-imut tunngassuteqarnissaa pillugu naalagaaffimmi oqartussaatitanik isumaqatiginninniarnerit inernerat nunatta inatsisartuinut saqqummiunneqassapput, taavalu nunatta inatsisartui aalajangiissapput Kalaallit Nunaata ilaasortaajunnaarnissaa aammalu qaqugu tamatuma pinissaa pillugit, tamanna pillugu qinnuteqaatip inissutaasup naalagaaffimmi oqartussaatitanut saqqummiunneqarneratigut.
§ 4. Taasinermi peqataasinnaapput kikkulluunniit, ullormi taasivimmi folketingimut qinersisinnaaneq pillugu pissutissanik eqqortitsisut aammalu ilanngunneqarsimasut qinersisartut nalunaarsuutaanni, Kalaallit Nunaanni folketingimut qinersineq pillugu inatsit naapertorlugu suliarineqarsimasumi.
§ 5. Taasinerup piareersarnera atortinneqarneralu, taasinerup inernerata naatsorsorneqarnera taannalu pillugu nalunaarut aamma taasineq il.il. pillugit assuarliutit tunniunneqarnissaat pissapput Kalaallit Nunaanni folketingimut qinersineq pillugu inatsimmi kapitalini Vll-imi aamma VlII-mi malittarisassat malillugit, allaassutit landstingip inatsisaata matuma nassatarisai atorlugit.
Stk. 2. Kalaallit Nunaanni folketingimut qinersineq pillugu inatsit naapertorlugu piginnaatitaanerit tunngatinneqartut landshøvdingimut (rigsombudsmandi), nunap iluani pissutsit pillugit ministerimut aamma Kalaallit Nunaannut ministerimut taasineq taanna pillugu Namminersornerullutik Oqartussanit isumagineqassapput. Inunnik taasisitsinerup inernera pillugu nalunaarut aamma assuarliutit tunniunneqarsimanerat pillugu nalunaarut nunatta inatsisartuinut saqqummiunneqassapput.§ 6. Taasineq allalluni ingerlanneqassaaq taasivissap tamatumunnga suliarineqarsimasup tunniunneqarneratigut, taannalu pissarsiarineqassalluni Namminersornerullutik Oqartussat iliuuseqarneratigut. Taasivimmi naqiterneqarsimassaaq "paasiniaaviusumik inunnik taasisitsineq" aammalu suna taasissutigineqassasoq allaffissalerlugu "aap" aamma allaffissalerlugu "naagga" kalaallisut qallunaatullu krydsiliiffissanngorlugit.
Stk. 2. Kalaallit Nunaanni folketingimut qinersineq pillugu inatsimmi kapitali VI-imi malittarisassat tamatumunnga atortuusut malillugit allakkatigut taasinerit tunniunneqarnissaanni atorneqassapput taasinermut atortussat immikkut ittut stk. 1-imi eqqartorneqartut, inunnut Danmarkimi aamma Savalimmiuni najugaqartunut.
Stk. 3. Qinersisartut nunani allaniittut inunnik taasisitsinermi tassani peqataasinnaanngillat taasiviup nassiunneqarneratigut.
Stk. 4. Inuit sumiiffinni kommunenut immikkoortortalersuinerup avataani Kalaallit Nunaannut ministerimit piginnaatitaasut Kalaallit Nunaanni folketingimut qinersineq pillugu inatsimmi § 29, stk. 5 malillugu allakkatigut taasinernik tigusisartussatut, inunnik taasisitsineq taanna pillugu piginnaatitaaneq atatiinnassavaat.§ 7. Inatsit erngerluni atortuulerpoq.
Namminersornerullutik Oqartussat, ulloq 3. april 1981.
Jonathan Motzfeldt/
Gunnar Martens