Aktie- aamma anpartsselskabit pillugit inatsimmi (ingerlatitseqatigiiffiit pillugit inatsit), kunngip peqqussutaatigut nr. 486, 14. maj 2018-imeersukkut Kalaallit Nunaannut atulersinneqartumi § 172 aamma § 367, imm. 4 naapertorlugit aalajangersarneqarpoq:

§ 1. Akiitsut allagartaannut niuerfimmi malittarisassaqartinneqartumi niuerutigineqartunut pappialanut nalilinnut toqqorsivik aqqutigalugu suliarineqarsimasunut tunngatillugu ingerlatsiviup aningaasaliiffiusup qitiusumik aqutsisutut oqartussat isumagissavaat pappialanut nalilinnut toqqorsiviup paasissutissanik taakkunanillu kingusinnerusukkut allannguutinik makkuninnga erniinnaq tigusaqarnissaa:

1) Ingerlatsiviup aningaasaliiffiusup taaguutaa, najugaa aamma cvr-normua.

2) Taarsigassarsiat katillugit aningaasartaat ilanngullugu taallugit akiitsut allagartaasa amerlassusaat piginneqataassutillu annertussusaa.

3) Erniat aamma akiliisarnerup tungaasigut atugassaritaasut.

4) Piffissaq taarsigassanik allamut nuutsitsiffik.

5) Immikkut atugassarititaasinnaasut.

Imm. 2. Akiitsut allagartaannik allamut nuussisinnaalertoqartinnagu qitiusumik aqutsisuni oqartussat pappialanut nalilinnut toqqorsivik nalunaarfigissavaat taarsigassarsianik allamut nuussinerup aningaasatigut nalinga tassanilu kingusinnerusukkut allannguutit pillugit.

Imm. 3. Akiitsut allagartaat allamut nuunneqarsinnaasut pappialanut nalilinnut toqqorsivik aqqutigalugu suliarineqarsinnaanngillat ingerlatsivik aningaasaliiffiusoq Erhvervsstyrelsimi nalunaarsorneqaqqaartinnagu.

Imm. 4. Aktieselskabit pillugit inatsimmi § 167, Kalaallit Nunaannut kunngip peqqussutaatigut atortuulersinneqarsimasoq naapertorlugu aalajangiinermi aktiasisinnaatitaasinnaanerit pappialanut nalilinnut toqqorsivimmi nalunaarsorneqarnissaat ingerlatsiviup aningaasaliiffiusup qitiusumik aqutsinermi oqartussat isumagissavaat, akiitsut allagartaannik allamut nuunneqarsinnaasunik nutaanik pisinissamut aktiasisinnaatitaanermut pisinnaatitaaffiit qassiunersut ilanngullugu taallugit.

Imm. 5. Akiitsut allagartaat allamut nuunneqarsinnaasut tamakkiisumik akilerneqarsimanngippata qitiusumik aqutsinermi oqartussat tamanna pappialanut nalilinnut toqqorsivimmi nalunaarsorneqartissavaat.

§ 2. Akiitsut allagartaasa allamut nuunneqarsinnaasut pappialanut nalilinnut toqqorsivimmi suliarineqarnerannut il. il. aningaasartuutit tamaasa ingerlatsiviup aningaasaliiffiusup akilissavai. Ingerlatsiviup institutti ataaseq arlallilluunniit isumaqatigiissuteqarfigissavai pisinnaatitaaffeqartitaasut ingerlatsiviup akiligaanik imaaliorsinnaasut:

1) akiitsunut allagartaatiminnik allamut nuunneqarsinnaasunik allatsitsillutillu tassani toqqortarititaqarsinnaasut aamma

2) taarsigassanik allamut nuussineq, tamakkiisumik akiliineq il. il. kiisalu kontop killiffianik ilisimatitsissut ukiumoortoq pillugit nalunaarutisisinnaasut.

Imm. 2. Akiitsut allagartaannut allamut nuunneqarsinnaasunut iluanaaruteqarfiusartunut tunngatillugu pisinnaatitaaffeqartitaasoq iluanaarutit il. il. pillugit aamma nalunaarfigineqartassaaq ingerlatsiviup akiligaanik.

Imm. 3. Pisinnaatitaaffeqartitaasut namminneq instituttimik kontomik aqutsisumik toqqaasinnaatitaapput, suliassanik imm. 1-imi aamma 2-mi taaneqartunik ingerlatsiviup akiligaanik suliaqartussamik, instituttip ingerlatsivik sullikkusuppagu aningaasartuutit ingerlatsiviup instituttimut isumaqatigiissuteqarfigisaminut aningaasartuutissaraluisa amerlaqqataannik akilertilluni.

§ 3. Ingerlatsiviup aningaasaliiffiusup akiitsunut allagartaatai allamut nuunneqarsinnaasut pappialanut nalilinnut toqqorsivik aqqutigalugu siunissami suliarineqartassappata ingerlatsiviup pappialanut nalilinnut toqqorsivik § 1-imi taaneqartunik erniinnaq paasissutississavaa.

Imm. 2. Ingerlatsiviup akiitsunut allagartaatai allamut nuunneqarsinnaasut instituttimut kontomik aqutsisumut tunniunneqassapput pappialanut nalilinnut toqqorsivimmiit aggeqqusissummi aalajangerneqartutut iluseqartillugit. Pisinnaatitaaffeqartitaasoq ingerlatsivillu paasissutissanik aggeqqusissummi aalajangerneqartunik tunniussaqartassapput.

Imm. 3. Aktieselskabit pillugit inatsimmi § 63, Kalaallit Nunaannut kunngip peqqussutaatigut atortuulersinneqarsimasoq, akiitsut allagartaannut allamut nuunneqarsinnaasunut tunngatillugu assinganik atuutissaaq.

§ 4. Nalunaarummik unioqqutitsineq akiliisussanngortitaassutaassaaq.

§ 5. Nalunaarut atortuulersinneqarpoq ulloq 1. juli 2018.

Imm. 2. Akiitsut allagartaannik allamut nuunneqarsinnaasunik børsimi nalunaarsorneqarsimasunik Pappialanut nalilinnut Toqqorsivimmi nalunaarsuinermi ingerlatsiviit pisussaaffii pillugit Kalaallit Nunaannut nalunaarut nr. 784, 10. juli 2008-imeersoq atorunnaarpoq.

Erhvervsstyrelsi, ulloq 29. maj 2018

HENNING STEENSIG

/ Henrik Davidsen