Aktie- aamma anpartsselskabit pillugit inatsimmi, kunngip peqqussutaatigut nr. 486, 14. maj 2018-meersukkut Kalaallit Nunaannut atuuttussanngortinneqartumi § 71, imm. 4 aamma § 367, imm. 4 naapertorlugit aalajangersarneqarpoq: 

Pisinissamik naatsorsuineq

§ 1. Aktieselskabit pillugit inatsimmi, kunngip peqqussutaatigut Kalaallit Nunaannut atuuttussanngortinneqartumi § 70, imm. 2, oqaaseqatigiit pingajuat malillugu pisinissamik naatsorsuinermi, aktiat taasisinnaanermullu piginnaatitaaffiit, neqerooruteqartup pigisai, taamaallaat ilanngunneqartarput. 

Imm. 2. Ingerlatseqatigiiffik nammineerluni aktiaateqarpat, imm. 1 malillugu naatsorsuinermi taakkua ingerlatseqatigiiffiup aktiatigut aningaasaataanut ilanngullugit naatsorsorneqassanngillat. 

Pineqaatissiinerit

§ 2. § 1-imik unioqqutitsisoqarneranut akiliisitsisoqassaaq. 

Imm. 2. Kalaallit Nunaanni pinerluttulerinermi inatsimmi kapitali 5-imi malittarisassat malillugit ingerlatseqatigiiffiit il. il. (inatsisitigut pisinnaatitaasut pisussaatitaasullu) pinerluttulerinermi inatsisitigut akisussaatinneqarsinnaapput. 

Atuutilersinneqarnera 

§ 3. Nalunaarut ulloq 1. juli 2018-imi atuutilersinneqarpoq. 

Imm. 2. Neqeroorfigitittup neqeroorummik tigusinissaminut pisussaaffii aamma tigusinissaminut piginnaatitaaffii pillugit Kalaallit Nunaannut nalunaarut nr. 795, 28. juli 2008-imeersoq atorunnaarpoq. 

Erhvervsstyrelsi, ulloq 29. maj 2018

HENNING STEENSIG

/ Henrik Davidsen