Ukiumoortumik naatsorsuutit pillugit inatsimmi, Kalaallit Nunaannut kunngip peqqussutaatigut nr. 625-kut 23. juni 2008-meersukkut atortuulersinneqartumi, § 37, imm. 3, nr. 4, aamma § 166, imm. 5 naapertorlugit aalajangersarneqarpoq: 

Kapitali 1

Ullormut naliusumik nioqqusiallu nalingata naafferartumik akilersorneranik atuineq pillugu inatsisip § 37-anik saneqqutsisinnaaneq

§ 1. Aningaasaqarnikkutpigisat nalillit pisussaaffiillu ataani taaneqartut, inatsimmi § 37, imm. 1 Kalaallit Nunaannut kunngip peqqussutaatigut atortuulersinneqarsimasoq apeqqutaatinnagu, ullormut naliusuminngarnit naliusumut allamut uuttorneqarsinnaapput:

1) Sullivinnik katussinermut atatillugu sulliutitaanermut piumasaqaatitalimmik akiliutissat pillugit isumaqatigiissutit,

2) akiliutit, pissutsinik allangorartunik tigussaasunik silalluunniit pissusaanut tunngasunik apeqqutaatitaqartut, pillugit isumaqatigiissutit, 

3) sulisitsisup aningaasaqarnikkutpigisai nalillit pisussaaffiilu, sulliviup sulisuinik utoqqalinersiassaqartitsinissamut allatullu atugarissaarnermut aaqqissuussinernut tunngasut, 

4) sillimmasiinissamut isumaqatigiissutit, 

5) attartornermut isumaqatigiissutit, 

6) aningaasalersuinikkut qularnaveeqqusiussanut isumaqatigiissutit, akiligassalik akiliinissaminut pisussaaffimminik sumiginnaasimatillugu akiliuteqartitsinissap isumannaarnissaanut atugassat, kiisalu 

7) isumaqatigiissutit nioqqutissiassanik tunngavillit, illuatungeriit akiligassaminnik aningaasanngorlugit aningaasatigulluunniit atortutigut allatigut akiliinissaannik piginnaatitsisut, taamaattumillu aningaasaqarnikkutatortutut sangutitatut isigineqartut, aamma 

a) pisinermut, tunisaqarnermut atuinermullu tunngatillugu sulliviup piumasaqaatissatut ilimagisai qularnaarniarlugit qularnaartuarniarlugillu isumaqatigiissutaasut, 

b) taamaaliornissaq siunertaralugu aallaqqaammulli isumaqatigiissutaasut aamma 

c) nioqqutissiassap tunniunnerani akilerneqartussatut naatsorsuutigineqartut. 

§ 2. Aningaasaqarnikkutpigisat nalillit pisussaaffiillu taakkualuunniit ilaat inatsimmi, Kalaallit Nunaannut kunngip peqqussutaatigut atortuulersinneqarsimasumi, § 37, imm. 2 apeqqutaatinnagu ullormut naliusumut uuttorneqassapput, isumannaallisaanermut atortumik sunniuteqarluartumik isumannaarneqarsimappata, § 37, imm. 1 malillugu ullormut naliusumut uuttorneqartussamut. 

Kapitali 2

Inatsimmi § 166, imm. 5 naapertorlugu ikaarsaariarnermi aalajangersakkat

§ 3. Imm. 2-mi aalajangersakkat sullivinnit atorneqarsinnaapput, taakku inatsimmi § 7 Kalaallit Nunaannut kunngip peqqussutaatigut atortuulersinneqarsimasoq malillugu naatsorsuusiortarnermut klasse B-mi aalajangersakkanik malinnittussaapput. Aalajangersakkat taamatorpiaq ingerlatseqatigiiffissuit (koncerner) naatsorsuutaannut atorneqassapput, ingerlatseqatigiiffissuit mikinerusut sinnerlugit saqqummiunneqartussat, tak. inatsimmi § 113-mi oqaaseqatigiit aappaat, Kalaallit Nunaannut kunngip peqqussutaatigut atortuulersinneqarsimasoq.

Imm. 2. Inatsimmi § 51, Kalaallit Nunaannut kunngip peqqussutaatigut atortuulersinneqarsimasoq, apeqqutaatinnagu sullivik imm. 1-mi taaneqartoq naatsorsuusioriaatsiminik allannguisinnaavoq, taamaalilluni aningaasanik nuussinerit pisullu inatsisip atortuulersinneqarnerata kingorna pisut, maleruagassat nutaat malillugit naatsorsuutinut ilanngunneqarsinnaaqqullugit. Aammattaaq sullivik pigisanut nalilinnut pisussaaffinnullu, inatsisip atortuulersinneqarnissaa sioqqullugu ilanngunneqarsimasunut, uuttortaanermut tunngavimmik nutaamik atuinngitsoorsinnaavoq.

§ 4. Imm. 2 – 4-mi aalajangersakkat sullivinnit akunnattumik angissuseqartunit atorneqarsinnaapput, sulliviit taakku inatsimmi § 7, Kalaallit Nunaannut kunngip peqqussutaatigut atortuulersinneqarsimasoq, malillugu naatsorsuusiortarnermut klasse C-mi aalajangersakkanik malinnittussaapput. Aalajangersakkat assinganik atuutissapput ingerlatseqatigiiffissuit naatsorsuutaannut, ingerlatseqatigiiffissuit akunnattumik angissusillit sinnerlugit saqqummiunneqartussanut.

Imm. 2. Inatsimmi § 51, Kalaallit Nunaannut kunngip peqqussutaatigut atortuulersinneqarsimasoq, apeqqutaatinnagu sullivik imm. 1-imi taaneqartoq pigisanut nalilinnut pisussaaffinnullu imm. 3-mi taaneqartunut naatsorsuusioriaatsiminik allannguisinnaavoq, taamaalilluni aningaasanik nuussinerit pisullu, inatsisip atortuulersinneqarnerata kingorna pisut, kisimik maleruagassat nutaat malillugit naatsorsuutinut ilanngunneqarsinnaaqqullugit. Aammattaaq sulliviup uuttortaarnermut tunngavik nutaaq pigisanut nalilinnut pisussaaffinnullu, inatsisip atortuulersinneqarnerata siorna ilanngunneqartunut, atunngitsoorsinnaavaa.

Imm. 3. Imm. 2-mi aalajangersakkat taamatulli atuutissapput ukununnga:

1) Pigisat nalillit takussaanngitsut aamma init attartukkat aaqqissuunneqarnerat, tak. inatsimmi §§ 33 aamma 83, Kalaallit Nunaannut kunngip peqqussutaatigut atortuulersinneqarsimasut,

2) allat akiligassaattut suliat aallartereerneqarsimasut kiisalu pigisat nalillit aningaasaqarnikkut attartukkat taakkununngalu pisussaaffiit attuumassutillit, tak. inatsimmi §§ 83 a aamma 83 b, Kalaallit Nunaannut kunngip peqqussutaatigut atortuulersinneqarsimasut,

3) aningaasaqarnikkut pigisat nalillit pisussaaffiillu, nioqqutissiap nalingata naafferartumik akilersornissaanut naliusoq atorlugu naatsorsuutinut ilanngunneqartussat, tak. inatsimmi § 37, imm. 2, Kalaallit Nunaannut kunngip peqqussutaatigut atortuulersinneqarsimasoq,

4) aningaasaqarnikkut pigisat nalillit, aningaasaliissutitut illuutit, aatsitassat aamma nalillit tigussaasut taakkununnga assingusut kiisalu aningaasaqarnikkut pisussaaffiit taakkununnga atasut, tak. inatsimmi § 38, imm. 2, Kalaallit Nunaannut kunngip peqqussutaatigut atortuulersinneqarsimasoq, aamma

5) sullivimmi pisiami pigisat nalillit pisussaaffiillu kiisalu sulliviup tatigineqarnera isiginiarneqarneralu negativiusoq, tak. inatsimmi § 122, Kalaallit Nunaannut kunngip peqqussutaatigut atortuulersinneqarsimasoq.

§ 5. Imm. 2-mi aamma 3-mi aalajangersakkat sullivinnit angisuunit atorneqarsinnaapput, sulliviit taakku inatsisip § 7-ia, Kalaallit Nunaannut kunngip peqqussutaatigut atortuulersinneqarsimasoq, malillugu naatsorsuusiortarnermut klasse C-mi aalajangersakkanik malinnittussaapput.  Aalajangersakkat assinganik atuutissapput ingerlatseqatigiiffissuit naatsorsuutaannut, ingerlatseqatigiiffissuit angisuut sinnerlugit saqqummiunneqartussanut.

Imm. 2. Inatsisip § 51-ia, Kalaallit Nunaannut kunngip peqqussutaatigut atortuulersinneqarsimasoq, apeqqutaatinnagu sullivik imm. 1-imi taaneqartoq pigisat nalillit pisussaaffiillu imm. 3-mi taaneqartut pillugit naatsorsuusioriaatsiminik allannguisinnaavoq, taamaalilluni aningaasanik nuussinerit pisullu, inatsisip atortuulersinneqarnerata kingorna pisut, kisimik maleruagassat nutaat malillugit naatsorsuutinut ilanngunneqaqqullugit. Aammattaaq sullivik pigisanut nalilinnut pisussaaffinnullu, inatsisip atortuulersinneqarnera sioqqullugu naatsorsuutinut ilanngunneqartunut, uuttortaanermut tunngavimmik nutaamik atuinngitsoorsinnaavoq.

Imm. 3. Imm. 2-mi aalajangersakkat atuutissapput ukununnga:

1) Pigisat nalillit takussaanngitsut aamma init attartukkat aaqqissuunneqarnerat, tak. inatsimmi §§ 33 aamma 83, Kalaallit Nunaannut kunngip peqqussutaatigut atortuulersinneqarsimasut, aamma

2) sullivimmi pisiami pigisat nalillit pisussaaffiillu kiisalu sulliviup tatigineqarnera isiginiarneqarneralu negativiusoq, tak. inatsimmi § 122, Kalaallit Nunaannut kunngip peqqussutaatigut atortuulersinneqarsimasoq.

§ 6. § 5, imm. 3, nr. 2-mi aamma imm. 4-mi aalajangersakkat assinganik atuutissapput sullivinnut, inatsisip § 7-ia, Kalaallit Nunaannut kunngip peqqussutaatigut atortuulersinneqarsimasoq, malillugu naatsorsuusiortarnermut klasse D-mi aalajangersakkanik malinnittussanut. Aalajangersakkat assinganik atuutissapput ingerlatseqatigiiffissuit naatsorsuutaannut, ingerlatseqatigiiffissuit sinnerlugit ingerlatseqatigiiffissuit pineqartut piginnittutut sullivinnit saqqummiunneqartussat.

§ 7. Piginnittutut sullivik ukiumoortumik naatsorsuutini ingerlatseqatigiiffissuullu naatsorsuutaani inatsisip § 121-iat, Kalaallit Nunaannut kunngip peqqussutaatigut atortuulersinneqarsimasoq, apeqqutaatinnagu ingerlatseqatigiiffissuarmi pissutsinik pilersitsisinermik suliaqarsinnaavoq, periaaseq inatsisip atortuulersinneqarnera sioqqullugu ingerlatseqatigiiffissuarmik pilersitsinermi atorneqarsimasoq malillugu.

§ 8. Inatsisip § 86-iat, Kalaallit Nunaannut kunngip peqqussutaatigut atortuulersinneqarsimasoq, apeqqutaatinnagu sullivik, aningaasanik ingerlaartunik nassuiaammi allatanut naleqqiussinermi kisitsisinik takutitsinngitsoorsinnaavoq, inatsisip atortuulersinneqarnerata kingorna taassuma siullermeertumik inaarneqarnerani.

Imm. 2. Sullivik kisitsisinik pingaarnernik kisitsisinillu najoqqutassanik inatsisip atortuulersinneqarnissaa sioqqullugu ukiunut sisamanut tunngasunik inatsisip § 101, imm. 1, nr. 2-ani, tak. nr. 1, Kalaallit Nunaannut kunngip peqqussutaatigut atortuulersinneqarsimasumi, pineqartunik naleqqussaanngitsoorsinnaavoq.

Imm. 3. Sullivik aningaasanik kisitsisinillu imm. 1-imi aamma 2-mi taaneqartunik takutitsinngortsoorpat naleqqussaanngitsoorpalluunniit, tamanna nalunaarutigineqassaaq inatsisip § 55, imm. 2-ani, Kalaallit Nunaannut kunngip peqqussutaatigut atortuulersinneqarsimasumi, allanneqartut malillugit.

§ 9. Sulliviit, §§ 3 – 8-mi saneqqutsisinnaanermik maleruagassanik atuisut, naatsorsuutitigut oqaaseqaatiminni tamanna nalunaarutigissavaat. Tamanna aamma atuuppoq sullivinnut inatsisip § 166, imm. 2-ani 3-anilu, Kalaallit Nunaannut kunngip peqqussutaatigut atortuulersinneqarsimasunik, aalajangersakkanik atuisunut. Nalunaarummik matumannga imaluunniit inatsisip § 166, imm. 2-anik 3-anillu, Kalaallit Nunaannut kunngip peqqussutaatigut atortuulersinneqarsimasunik, atuinerup malitsigisaanik naatsorsuutini allatanut assigiiaanut naatsorsuusioriaaseq ataasiinnaanngitsoq pineqarpat, naatsorsuutitigut oqaaseqaasiani paasissutissanik allanik tunniussisoqassaaq, tamanna inatsisip § 11, imm. 1-iata, Kalaallit Nunaannut kunngip peqqussutaatigut atortuulersinneqarsimasup, eqquutsinnissaanut pisariaqassappat.

Imm. 2. Imm. 1-imi oqaaseqatigiit aappaat pingajuilu eqqaassanngikkaanni nalunaarutip matuma oqaasertaasa inatsisip § 166, imm. 2 – 4-ni, Kalaallit Nunaannut kunngip peqqussutaatigut atortuulersinneqarsimasuni, maleruagassat attunngilai.

Kapitali 3

Atortuulersitsineq il.il.

§ 10. Nalunaarut atortuulersinneqarpoq ulloq 1. august 2008 atorneqarsinnaassallunilu ukioq naatsorsuusiorfiusoq 1. juli 2008 sioqqullugu aallartittoq aallarnerfigalugu.

Erhvervs- og Selskabsstyrelsen, ulloq 10. juli 2008

OLE BLÖNDAL

/ Grethe Krogh Jensen