Kalaallit Nunaanni sullivinni avatangiisit pillugit inatsimmi nr. 1048, 26.oktober 2005-imeer-sumi § 11a, § 15, imm. 2, § 33, imm. 1, § 35, § 56 aamma § 67 naapertorlugit aalajangersarneqarput:

 

Kapitali 1

Atuuffii

 

§ 1. Nalunaarut atuutissaaq illuliornermi sanaartornermilu suliaqarfiusunik (sanaartorfissanik) aaqqissuussinernut, suliat sulisuusunit, sulisitsisunit namminernit imaluunniit namminersortunit sulisoqarani ingerlanneqaraluarpataluunniit.

Imm. 2. Taamaattorli kapitali 9-mi atugarissaarutissatigut iliuutsit pillugit aalajangersakkat atuutissanngillat suliani sulisoqarani ingerlanneqartuni imaluunniit Kalaallit Nunaanni sullivinni avatangiisit pillugit inatsimmi § 2. imm. 2-mi pineqartuni.

Imm. 3. Atugarisaarutissatigut iliuutsit pillugit kapitali 9-mi aalajangersakkat aamma atuussissanngillat

1) sulisitsisup sanaartorfissami suliassanik sulinera sivisunerpaamik ulloq naallugu suliffiusunik pingasunik, sulisuusullu tamarmiusumik suliaqarnerat ulloq naallugu suliffiusunik sivisunerpaamik arfinilinnik sivisussuseqartillugit, imaluunniit

2) sulisuusut sanaartorfissami sulisorineqartut piffissaq suliffissaq allami sanaartorfissaanngitsumi aallartittarlugulu naggasertarpassuk. Taamatut suliaqarnerni sulisuusoq atugarissaarutitigut iliuuseqarfigisaassaaq suliaqarfiusunik nikerartunik aaqqissuussineq pillugu malittarisassat malillugit.

Imm. 4. Nalunaarummi matumani illuliornernik sanaartornernillu suliaqarnermi pineqarput

1) suliat illuliornermut illulianillu allanngortiterinermut titartaanernullu, tamatumani aamma ikkussugassatigut sulianut, atasumik ingerlanneqartut.

2) aqqusinniornerit, sullorsualiornerit, ikaartarfiliornerit umiarsualiviliornerit assigisaannillu sanaartornerit tamakkuninngalu allanngortiterinerit,

3) nunami assaanerit siuliinilu taagorneqartunut atasumik nunami suliat,

4) sullulinnik kabelinillu ikkussuinerit,

5) siuliini taagorneqartunik iluarsaassinerit aserfallatsaaliinerillu aamma

6) siuliini taagorneqartunik tamakkualuunniit ilaannik piiaanerit.

 

§ 2. Nalunaarut sanaartorfiusussanik aaqqissuussinermut immikkut ittumik piumasaqaatinik, sullivinni avatangiisit pillugit inatsisit malittarisassartaannut naapertuuttunik, allannguuteqartitsissanngilaq.

 

§ 3. Sullivinni avatangiisit pillugit inatsisinik aalajangersakkat saniatigut atuutissapput inatsisit allat, soorlu qatserisartoqarneq pillugu inatsisit aamma kallerup innera sakkortooq pillugu nalunaarut, naapertorlugit aalajangersakkat, sanaartorfissanik aaqqissuussineq pillugu aalajangersarneqarsimasinnaasut.

 

§ 4. Nalunaarut naapertorlugu pisussaaffiit sullivinni avatangiisit pillugit inatsisini malittarisassat nalinginnaasut malillugit sulisitsisut, sulisunik siulersuisut allallu sulisuusut pisussaaffigissa-vaat, tak. inatsimmi kapitali 3.

 

Kapitali 2

Pilersaarusiorneq suleqatigiinnerlu

 

§ 5. Sanaartorfissani inunnik qulinit amerlanerusunik ataatsikkut sulisoqarfiunngikkaluarlutik sulisitsisunik marlunnik arlalinnilluunniit ataatsikkut sulisoqarfiusuni, sulisitsisut ataasiakkaat isumannaallisaaneq peqqinnissarlu pillugit suleqatigiinnerup ilaatut sulisitsisunut allanut isumaqatigiissutigisassavaat sanaartorfissap qanoq aaqqissuunneqarnissaa, taamaalilluni sanaatorfissami sulineq sukkulluunniit isumannaatsumik ingerlanneqarsinnaaqqullugu, isumaqatigiissutaasullu pisariaqassappat ingerlaartumik sammineqartassapput.

 

§ 6. Sanaartorfissami sulisitsisut ataasiakkaat isumagissavaat ataatsimut suliaqarfiusuni iliuusissat, sanatitsisumut imaluunniit sulisitsisunut allanut isumaqatigiissutaasimasut, tak. sanatitsisup sullivnni avatangiisit pillugit inatsit malillugu pisussaaffiinik nalunaarut, aallarnerneqarlutillu allanngutsaaliorneqarnissaat tamatumalu nakkutigilluarnissaa.

 

§ 7. Sanaartorfissani, ullut suliffiusut 30-t sinnerlugit suliaqarfiusussatut ilimagisani aammalu ikinnerpaamik 20-nik ataatsikkut sulisoqarfiusuni, imaluunniit suliassat annertussusiisigut ullut suliffiusussat 500-nit amerlanerunissaannik ilimasuffiusuni, sanaartorfissaq pilersinneqalersinnagu sulisitsisup sulianik ingerlatsinermut atatillugu isumannaallisaaneq peqqinnissarlu sulisitsisumit naliliiffigineqartassaaq, sanatitsisup sullivimmi avatangiisit pillugit inatsisit malillugit pisussaaffiinik nalunaarummi § 4, imm. 1, malillugu sanatitsisup pilersaarusiornissaq pisussaaffigissanngippagu.

Imm. 2. Sanaartorfissami sulisitsisut arlaqassappata, imm. 1 malillugu isumannaallisaanermik peqqinnissamillu naliliiffiginninnissaq sulisitsisut peqatigiillutik aaqqissuutissavaat.

 

§ 8. Illuliornermik sanaartornermillu sulineq ilanngussaq 1-imi taaneqartutut immikkut ulorianartorsiorfissaqassappat, sulisitsisoq sulianik ingerlatsinissaq pillugu allaganngukkamik naliliis-saaq, sanatitsisup sullivimmi avatangiisit pillugit inatsisit malillugit pisussaaffiinik nalunaarummi § 4, imm. 1, malillugu sanatitsisup pilersaarusiornissaq pisussaaffigissanngippagu.

Imm. 2. Suliat sulisitsisunit arlaliusunit ingerlanneqassappata, imm. 1 malillugu isumannaallisaanermik peqqinnissamillu naliliiffiginninnissaq sulisitsisut peqatigiillutik aaqqissuutissavaat.

 

Kapitali 3

Aalajangersakkat tamanut atuuttut

 

§ 9. Illuliornermi atortussat, teknikikkut atortuulersuuteqarfiit ikkussukkallu, sulluliat, nunap iluani piiaaffiit, assaanerit, usilersuinermi ilioraaviit assigisaallu, sanaatorfissami pilersitaasimasut atorfissaattut naatsorsuutigisat tunngavigalugit isumannaatsumik suliaallutillu aaqqissuussaassapput.

 

§ 10. Sumiiffinni ataasiakkaani sulianik ingerlatsiviusussani, sapinngisamik naammattunik inissiivissaqartitsisoqartassaaq pisatsersuutinut pinngitsoorsinnaanngisanut, atortutigut ikiuutinut atortunullu imminnut ajoqusertussaajunnaarlugit inissiiviusinnaasunik, aammalu sulianut atasumik il-iuutsit tamarmik ingerlanneqarsinnaanngorlugit sulinermi pissusissat aalaatsillu isumannaatsut tunngavigalugit.

Imm. 2. Sumiiffinni ataasiakkaani, suliaqarfiusussani, isumannaatsunik isaariaqarlunilu naammattunik qimaariarfissaqassaaq aamma naammattunik silaannarissarfissaqassalluni.

 

§ 11. Nunap qaavani imaluunniit natertut qaffasissulimmi sulinissamut, allatut iliornikkut isumannaallisaanikkut peqqinnissakkullu isumannaalluinnartumik ingerlanneqarsinnaanngitsumut teknikikkut ikiuutissaqassaaq naleqquttunik, taakkunanngaanniit suliat ingerlanneqarsinnaanngorlugit.

Imm. 2. Illuni inerlugit suliaanngitsuni, ikaajusaliani assigisaanniluunniit ammaannartutut suliaasuni, piffissani sivisunerusuni suliaqarfiusussani, aammalu sulisut silap pissusianiit peqqiilliulersinneqarfigisinnaasaanni assiaqutsersuisoqartassaaq assigisaattulluunniit iliuuseqartoqartassaaq. sapinngisaq tamaat naleqquttunillu.

 

§ 12. Sumiiffinni taama ittuni sivisuumik sulianik ingerlatsisoqassappat silap pissusiinut illersuiniutissanik iliuuseqartoqassaaq, soorlu tupersuarnik imaluunniit qulisanik naleqquttunik illersuusiornikkut imaluunniit sulianik illut illuaqqalluunniit iluinut ullup qaamarngata qaammarsarsinnaasaanut inissiinikkut, tamanna naleqqutinngitsutut isumaqarfiginassanngippat.

Imm. 2. Sanaartorfiusumi piffissani sivisunerusuni titartaasartutut sulianik, allaffimmi sulianik allanilluunniit illuliornermut sanaartornermullu attuumassuteqavinngitsunik ingerlatsisoqassappat, suliat ininut suliaqarfiit aalajangersimasut pillugit malittarisassanut naapertuuttumik aaqqissukkanut inissinneqassapput. Aamma taamaassaaq ininut illuaqqani, qulisalialini assigisaanniluunniit aaqqissuussanut tunngatillugu, tamatumanili qilaamut portussuseq 2,10 meterinit minnerussanani.

 

§ 13. Illuaqqat, qulisaliat assigisaallu, tamatumani aamma illuaqqat assakaasullit assigisaallu atortorissaarusersukkat, inissisimatitaassapput sapinngisamik atortunik, pujoralammik allatulluunniit silaannarmik mingutsitsisinnaasunik nakkaaffigisassaajunnaarlugit, nipiliornermit, sajuppilunnernit tipimit il. il. pallitassaajunnaarlugit.

Imm. 2. Illuaqqat il. il. inissisimatitaassapput ullup qaamarnganit naammattumik qaammarsarneqarsinnaanngorlugit aammalu illuaqqanit ataasiakkaaniit nunaannakkut minnerpaamik nunaannarmut sanaartorfiunngitsumut sammivitsigut marluusutigut qimaariarfissalimmi. Illuaqqaniit qimaariarfissat minnerpaamik 2 meterinik silissuseqartitaallunilu akornuteqanngitsumik aqqutigineqarsinnaatitaassapput.

Imm. 3. Illuaqqat il. il. inissitaasassapput aalajaatsumik narlusuunik nateqartussanngorlugit. Matuniit nunaannarmut isumannaatsunik majuartarfiligaassapput, matullu tamarmik silammut ammarsinnaasuussapput.

 

§ 14. Teknikikkut atortulersuutit ikkussukkat atortulersuuteqarfiillu inissaminniititaassapput sapinngisamillu sulinerni ajoquserfissaajunnaarlugit ikkussugaassallutik aammalu ajornartinnagu susassaqanngitsunit atorneqarsinnaajunnaarlugit.

Imm. 2. Atortussat, tamatumani aamma igitassat, inissitaasassapput, qaleriisaagaallutik immaqalu qajannaagaallutik, taamaalilluni isumannaatsuunissamut peqqinnissamullu aarlerinartorsiortitseqqunagut. Atortussiat atortullu, sakkortuunik toqunartortallit, toqunartut, neriuisinnaasut, qaartuujasut, ikuallajalluinnartut ikuallajasullu, taama ittunut inissiivissaqqissumi parnaarsinnaasumilu inissisimatitaassapput.

 

§ 15. Suliaqarfiusumik aaqqissuussinermi sulisuusut innarluutillit pisariaqarneratut pingaartinneqartassapput.

 

Kapitali 4

Nakkaasinnaasutigut sisoorsinnaasutigullu aarlerinartut

 

§ 16. Nunaannarmi manissuunngitsutut aarlerinaatilinni, assagaliani, putuni assigisaannilu isumannaatsumik assiaqutsersuisoqartassaaq, ulissuisoqarluni imaluunniit ungaluusanik assiaqutsersuisoqarluni. Assaaviusut ungalullugit allatulluunniit naleqquttunik isumannaallisarneqartassapput, inunnit imaluunniit atortunit nakkarfigineqarsinnaajunnaarlugit.

 

§ 17. Nunami suliat, ilanngullugit illup toqqaviliorfissaanik assaanerit, ruujorit, kabelit il. il., ingerlanneqartassapput naleqquttumik sivingaarnilerlugit imaluunniit kuitsivilerlugit allatulluunniit naleqquttunik sisoornaveersussanngorlugit aalangeequserlugit.

Imm. 2. Iliuusissat nunap qanoqittuussusia tunngavigalugu aalajangerneqartassapput, s.ass. qangaanerusoq assagaasimagunnartut seqummalasunik immikkat silallu pissusaata sunniisinnaanerii sianigalugit. Tamatuma saniatigut aamma assaaviusup qanittuanut oqimaatsunik ilioraasoqarnaveersaartassaaq imaluunniit suliaqarfiusumi iliuutsini sajutsitsisinnaasut pinaveersaarniarneqartassallutik.

Imm. 3. Pisariaqassappat suliassat aallarnerneqalersinnagit nunap naqqata qanoqittuussusia misissorneqartassaaq aammalu tamaanit aqqusersuutaajunnartut siusinnerusukku tamaani suliaasarsimasut pillugit paasissutissarsiortoqartassaaq.

 

§ 18. Assakkat, puilasuliat, sulluliat allallu nunap iluani suliaqarfiit. ilanngullugit naqqit ataat tattoqisaannartut, suliaqarfiullutilluunniit angalaarfiusut, uukkaattoornaveerlugit atortussanullu sisoorfiusussaajunnaarlugit aamma imermut isaaffissaajunnaarlugit, sioqqanut teqqarfissaajunnaarlugit il. il. isumannaallisarneqartassapput.

Imm. 2. Sulianik ingerlatsisilluni qimaariapallaffissat pisariaqarneratut isumannaarsorneqartassapput, aamma majuarfissat aterfissalluunniit naleqquttumik amerlassuseqarlutillu inissitaasassapput.

Imm. 3. Assaaviusut sinaat naleqquttumik atitussusilimmik atortussanik ilioraaviginaveersaarneqassapput biilinillu aqqusaarnaveersaarneqassallutik. Atitussuseq pineqartoq minnerpaamik 1 meteriutinneqartassaaq.

 

§ 19. Illuliani, aaqqissuussani il. il. naterni, qilaani, iikkani, init quleriit avissaarutaanni assigisaannilu ammanerit, nakkarfiusinnaasut ungaluusalersugaasassapput, ulissugaassallutik allatulluunniit naleqquttunik isumannaallisaasersugaassallutik

Imm. 2. Alliaqutsersuutini suliaqarnerni, tamatumani aamma qaliat qaavinik qallersuinerni pisariaqarneratut qajannaallisagaanngitsuni, nakkariataarnissamut naleqquttunik isumannaallisaasersuisoqartassaaq.

 

§ 20. Angallatit qaavi suliffiusut, puttasuliat suliffiusut, ikaajusaliat, isaariaqarfiit assigisaallu najummatserfissanik ungaluusalersugaassapput allatulluunniit sumi tamarmi 2 meterinit portussusilimmiit nakkarfiusinnaasuni assersuilluartoqartassaaq, tak. § 22, imm. 2.

Imm. 2. Taamaassanngilarli ungaluusaliat imaluunniit assersuutit sulianik ingerlatsinermut akornutaassatillugit, imaluunniit sivikitsumik sulianut atatillugu soorlu ungaluusanik assiaquttanillu ikkussuineq piiaarnerlu assersorniarneqartuniit ulorianarnerussatillugu. Taamaassappat isumannaallisaaniarnerit allat naleqquttut atorniarneqassapput, tak. § 23.

 

§ 21. Qaliat qaavini, anglaarfiusussani imaluunniit suliffiusussani, qaliap qanoq sivingatiginera malillugu isumannaallisaatissat makku atorneqartassapput:

1) Qaliaq 15o-nik sivinganilik: Qaliap sinaakkutaa toqqavimmiit 3,5 meterinik qutsitsigitillugu sinaakkut atuarlugu ungaluusanik allanilluunniit taamatulli isumannaatsigisunik ikkussuisoqartassaaq, tak. § 23. Qaliap qaavani sulineq quaattoornaveersaateqarluni ingerlanneqassappat aammalu anoreqaranilu silagissillugu suliat ingerlanneqarpata qutsissuseq 5 meteriusinnaavoq. Suliat ingerlanneqarsinnaassappata qaliap sinaakkutaanut 2 meterit inorlugit qutsissusilimmi ungaluusanik ikkussuinissamut taarsiullugu erseqqissumik qajannaatsumillu suliaqarfiunera nalunaaqqutserneqarsinnaavoq.

2) Qaliaq 15o-nik sinnerlugilluunniit sivinganilik: Qaliap illumut toqqanera avatangiisigisaniit 2 meterit sinnerlugit qutsissuseqassappat, aammalu sulianik ingerlatsinermi 5 meterinik sinnerlugilluunniit qutsissusilimmi angalaartoqarluniluunniit sulisoqassappat, suliassat aallarnerneqalersinnagit, ikaajusanik tulleqqavissanik, assiaquttanik, qassutaasanik assigisaannilluunniit ikkussuisoqassaaq, tak. § 23, inuit nakkariataarsinnaanerannut illersuutaasussanik. Qaliaq quasar-pat qutsissuseq suliffiusussaq apeqqutaatinnagu qaliap qaavatigut majuartarfilersuisoqassaaq, qisuaralersuineq taamatulli illersuutaatigisinnaassanngippat.

3) Qaliaq 34o-nik sinnerluguluunniit sivinganilik: Pkt. 2-misulli iliuuseqartoqassaaq tamatumalu saniatigut assiaqutassanik, qassutaasanik assigisaannillu ikkussuisoqassaaq, taamaasilluni suliaqarfiusuniit assersuutaasunut il. il. amoorluinnaartumik akuttussuseq 5 meterinit atitunerunngisaannartunngorlugu. Tamatuma saniatigut qutsissuseq apeqqutaatinnagu qaliat qaavisigut majuarfissat tamatigut atorneqartassapput, qisuaralersuinissaq taakkunatulli illersuutaatigisinnaassanngippat.

4) Qaliaq 60o-it sinnerlugit sivinganilik: Pkt. 3-mi taagorneqartut iliuuseqartoqassaaq, imaalilluguli suliaqarfiusuniit ammorluinnaartumik assiaqutsersuutinut il. il. akuttussuseq 2 meterinit atitunerunngisaannartunngorlugu.

Imm. 2. Illersuutissatut ungaluusaliat, assiaqutsersuutit, qassutaasat assigisaallu pinngitsoorneqarsinnaapput, suliat sivikitsuinnarmik aammalu allunaamik qitermut qilikkamik nakkarnaveeqquserluni ingerlanneqassappata.

Imm. 3. Qummut ammullu atortussanik il. il. ingerlaartitsiveqarfiit aamma igitassanut nakkaatitsiveqarfittut sullullit eqqaat ungaluusanik, assiaquttanik, qassutaasanik assigisaannilluunniit pilersugaassapput, qaliap sinaakkutaaniit avatangiisitut toqqavigisamut ammorluinnaartumik 2 meterit sinnersimassappatigik.

Imm. 4. Qaliami iluliumanerit imm. 3-mi taaneqartutut isumannaallisaavigineqartassapput, iluliumaneq taama ittoq nalunaaqqutserluarneqarsimassanngippat, tak. imm. 2-mi pkt. 1.

Imm. 5. Aamma imm. 1, 2, 3 kiisalu 4 malillugit isumannaallisaasersuisoqartassaaq aalajangersakkani taaneqartuni taagorneqartuniit qutsissutsit annikinnerutillugit, suliat suussusii, silap pissusia, qaliap qaavata pissusia pissutsilluunniit allat nakkarnissamut aarlerinartoqartitsissappata, imaluunniit avatangiisigisatut toqqavigisamut nakkarnissaq immikkut ulorianaateqassappat, tak. §§ 22 aamma 23.

 

§ 22. Aamma qutsissumi sulinermi angalaarnermilu nakkarsinnaaneq aarlerinaateqartillugu, nakkarfissaq 2 meterit sinnerlugit portussuseqarpat, isumannaallisaasersuisoqartassaaq § 20 malillugu.

Imm. 2. Aamma nakkarfiusinnaasoq pukkinnerutillugu isumannaallisaasersuisoqartassaaq suliat suussusiat tunngavigalugu nakkaattoorsinnaaneq immikkut aarlerinaateqassappat imaluunniit avatangiisigisami nakkarfiusussaq immikkut ulorianaateqassappat.

Imm. 3. Isumannaallisaasersuinerilli pinngitsoorneqarsinnaapput sivikitsuinnarmik suliassat suliarineqassatillugit, isumannaallisaasersuinermi, tamakkuninnga atuinermi piiaanissamilu navianaatit annertunerussatillugit.

 

§ 23. Inummik nakkartoqarsinnaaneranut sumannaallsaasersuutit s.ass. tassaasinnaasut ikaajusaliat, ungalut, assiaqutsersuutit, qulisaliat, qaliap qaavini majuartarfeeqqat, inunnik kivittaatit angallattakkat sulitilluni tummarfissallit, qassutaasat nakkarnaveeqqutit imaluunniit allunaat qitermut qilertakkat, qinerniarneqartassapput taamaasilluni ikkussornerini piiarnerinilu ulorianaatip illersorniarneqartumiit annikinnerusinnaanera tunngavigalugu.

Imm. 2. Taamaattorli allunaaq qitermut qilerneqarsinnaasoq aatsaat toqqarneqartarsinnaavoq suliassanut, isumannaallisaatit allat naleqquttumik atorneqarsinnaatinnagit.

 

§ 24. Ungalut nakkarsinnaanermut illersuutaasussat, minnerpaamik tassaassapput liste tigummivissaq, liste seeqqut nalaanniittussaq listelu isikkat nalaanniittussaq. Pisariaqarneratut qajannaatsuullutillu isumannaatsumik suliaassapput.

Imm. 2. Qulisat naammattumik ninngussuseqassapput illikartoornaveersaagaassallutillu.

 

§ 25. Suulluunniit imaluunniit atortussat nakkaasinnaatillugit avatangiisigisanut naleqquttunik illersuutissiortoqartassaaq, s.ass. assiaqutsersuinikkut imaluunniit qulisaliornikkut. Atortut il. il. qaliap qaavanut assigisaannullu inissitsiterneqartussat sisoorsinnaajunnaarlugit imaluunniit anorimit tingitaasussaajunnaarlugit inissinneqartassapput.

 

Kapitali 5

Aarlerinaateqarsinnaasut allat

 

§ 26. Aamma sumiluunniit inunnik ajoqusiisinnaasoqartillugu naleqquttunik isumannaalisaasoqartassaaq, s.ass. piffimmik pineqartumik assersuinertut, nakkaattoorsinnaasut eqqaat qerattaqqusersornerisigut, sunilluunniit, saviminernik qerattaqqusersuutissanik il. il. anillangasunik assersuinikkut imaluunniit pertiterinikkut.

 

§ 27. Aqqusinerni allaniluunniit biilinit aportiffiusinnaasuni suliaqarnerni sulisuusut isumannaallisaasersorluarneqartassapput, s.ass. naleqquttunik assiaqutsersuinikkut nalunaaqutsersuinikkulluunniit.

 

§ 28. Sumiiffiit sulianik immikkut ulorianaatilinnik, s. ass. isaterinerit illunillu allanilluunniit sanaanik qaartiterinerit imaluunniit qaarsortanik qaartiterinerit, ingerlataqarfiusussat aaqqissuunneqartassapput taamaasilluni sulineq sapinngisamik ulorianartuerussinnaanngorlugu aamma isumannaallisaatinik pisariaqarneratut atuinikkut.

Imm. 2. Sulineq pujoralatserissappat allatulluunniit silaannarmik mingutsitsiviusinnaassappat, qinngornernik siaruarterisinnaappat, nillerpallaarluniluunniit kiappallaassappat, nipiliorpallaassappat, tipittuussappat il. il. tamakku tamarmik pilerfigisaanni sapinngisamik annikillilerniarneqassapput nungutinniarneqassallutilluunniit.

Imm. 3. Silaannarissarfeqarfiit aaqqissuussaallutillu inissitaassapput, taamaasilluni nipiliorneq nutsoruuttumillu suerneq peqqinnissamut ajoqusiisinnaasut pinngitsoorsinnaaqqullugit, aamma aserfallatsaaliinissaq isumannaatsumik pisinnaaqqullugu. Silaannarissarfeqarfiit misissortarnissaannut atortuligaassapput iluaqutaanissaasa naammannginneranut ersersitsisinnaasumik.

 

§ 29. Silaannaq atortussianik atortunilluunniit peqqiilliortitsilersinnaasunik imaluunniit ikuallaasunik akoqartillugu nakkutigineqarluni misissorneqartassaaq, aamma sulisorisanut illersuiniutissanik ajunaartoqarsinnaaneranullu pitsaaliuutissanik sunniutilimmik iliuuseqartoqartassaaq.

Imm. 2. Aamma taamaassaaq, sumiiffinni silaannaaruttoorfiusinnaasuni sulisoqassappat. Nakkutilliinikkut misissuisarneq ingerlattuarneqartassaaq. Tamatuma saniatigut silataaniit alaatsinaariffiusinnaasunik pilersitsisoqassaaq iliuusissiortoqassaarlu taamaasilluni pineqartoq sukkasuumik annisipallanneqarsinnaanngorlugu ikiorluarneqarsinnaanngorlugulu.

 

§ 30. §§ 24-mi aamma 25-mi taaneqartutut pisoqartillugu allat sulissanngillat imaluunniit piffimmut qanippallaamiissanatik peqqissutsikkut ajoqusiisinnaasunik sunnertiffigisinnaasaminni.

 

§ 31. Sulinermi atortussanik tunillannartortalinnik, imaluunniit atortussianik atortunilluunniit isumannaatsuunissamut peqqinnissamulluunniit ulorianartulinnik piaarnerpaamillu ammimiit piiartariaqartunik imaluunniit siaruaannaaveersaartariaqartunik mingutsitsisoqartillugu tamatumunnga naleqquttunik naammattunillu ikiuutissaqartassaaq, s. ass. isinut errortuutinik, qorlortitsisarfiit ajornartoornerni atortakkat, asaffiit, pisariaqarpallu imeq kissartoq saligutissallu immikkut ittut.

 

§ 32. Pisariaqartitsineq naapertorlugu qajannaatsunik allagartalersuisoqassaaq sumiiffinni naleqquttunik inissitanik tamatumani nalunaarlugu sanaartorfissami immikkut ittunik ulorianartoqartoq imaluunniit pissutsit allat isumannaatsuunissamut peqqinnissamulluunniit pingaarutillit pillugit.

Imm. 2. Sulisorisat suliaqarfiusumi oqarasuaammik atuisinnaatitaassapput.

 

§ 33. Suliap suussusaata pissutsillumi tamanna pisariaqartippassuk suliaqarfiusoq naleqquttunik qatserutissalersugaassaaq annanniutitigullu atortulersugaalluni aamma ajunaartoqartillugu ikiueqqaarnissamut pisariaqarneratut atortulersugaassalluni. Isumannaatsumik ikiueqqaarsinnaanissamut pisariaqartinneqassappat immikkut ittunik ineqassaaq tamatumunnga atortulersugaasunik. Atortut il. il. taaneqartut naammattumik amerlassuseqassapput sumiiffinnullu naleqquttunut inissitaassallutik.

 

§ 34. Immikkut ulorianaatilinnik pisoqarsinnaatillugu suliaqarfiusoq kalerrisaarusersugaassaaq, ulorianartoqalerneranik naleqquttumik kalerrisaarisartussamik.

Imm. 2. Qatserutit kalerrisaaruteqarfiillu akuttunngitsunik misissorneqartarlutillu aserfallatsaalineqartassapput.

 

Kapitali 6

Sanaartorfissamut aqqusernit iserfissat assartuivissallu

 

§ 35. Sanaartorfiusussaq aaqqissuussaassaaq naammattunik amerlassusilinnik iseriartorfissanik aqqusineqarlunilu assartuivissanik aqusineqassaaq biilinik pisuinnarmillu angallattunut isumannaatsuunissakkut peqqinnissakkullu ulorianaateqanngitsumik annertussuseqarlutillu suliaasunik. Nunamernit isaariaqarfiit, assartuiveqarfiit angallaffiusullu pisariaqarneratut aaqqissuussaassapput taamaalilluni teknikikkut ikiuutissat atorneqarsinnaanngorlugit.

Imm. 2. Matunik, isaarissanik, ammartartunik, il. il. inissiineq, amerlassusaat angissusaallu suliat suussusaat pissutsillumi allat eqqarsaatigalugit isumannaatsuussapput. Matut il. il. atortussanik naleqquttunik suliaassapput ilusiligaallutillu aaqqissugaassallutik taamaasilluni ajornanngitsumik ammarneqarsinnaanngorlugit, matuneqarsinnaanngorlugit ulorianaateqanngitsumillu aqqusaarneqarsinnaanngorlugit.

 

§ 36. Aqqusernit aamma atortunut motorilinnut angallaffiusussat naleqquttunik illersuutissanik ungaluusalersugaassapput, nunaminermit ornitaminniit 3 meterit sinnerlugit sivingasukkut qutsinnerusumiissagunik imaluunniit nakkarissamiit 1 meterit sinnerlugit portussusilimmiit qutsinnerusumiissagunik. Aamma taamaassaaq qutsissutsini annikinnerusuni, nakkaaffiusinnaasut immikkut ulorianaateqassappata.

Imm. 2. Aqqusernit nunaminertallu angallaffiusussat nalimasuutinniarneqassapput aammalu atortussanut allanulluunniit angallattunut ulorianartorsiortitsisinnaasunut ilioraaviussanatik. Sullullit eqqaaviit, putut assigisaallu qulisaassapput imaluunniit assiaqutsersugaassallutik.

 

§ 37. Qutsinnerusumiit allamut inunnik akuttunngitsunik angalaartoqartassatillugu naleqquttunik aqqutissiortoqartassaaq, s. ass. majuartarfinnik, elevatorinik imaluunniit rampenik.

Imm. 2. Majuartarfiit atortuagassat sapinngisamik siuningaaniit ikkussorniarneqartassapput. Elevatorilersuisoqassaaq nunap qaavaniit 25 meterinik qutsissusilimmi qaammatit marluk sinnerlugit sulisoqassatillugu, tamanna teknikikkut nalinginnaasumillu ajornassanngippat.

Imm. 3. Majuartarfiit angallanneqarsinnaasut aalangiigaassapput naleqquttumillu uinganilerlugit ivertitaassapput aammalu qutsissutsimi qullerpaami 1 meterit miss. qutsissusilimmi tigummivissaqartitsisoqartassaaq.

 

§ 38. Suliat suussusaat pissutsillumi allat aalajangiisuutillugit naammattunik qimaariarfissaqartassaaq ulorianartorsiulernerni kikkut tamarmik suliaqarfiusumiit isumannaatsumut pisinnaanngorlugit suliaallutillu inissitaasunik. Elvatori qimaanermi aqqutissatut akuersaarneqarsinnaanngilaq.

Imm. 2. Qimaariarfissat piffimmut isumannaatsumut akornuteqanngitsumik tikinneqarsinnaasumut sammisitaassapput.

Imm. 3. Isumannaatsumik sumiissusersinnaanissaq angallannissarlu pillugit pisariaqartitsineq naapertorlugu aqqusernit angallaffiusussat nunaminertallu aamma qimaanermi aqqutissat erseqqissumik sammivii, aniffissat nakkariarnerillu ilisimariinngisat nalunaarsorlugit nalunaarsorluagaassapput.

 

§ 39. Aqqusernit iseriartorfissat assartuivissallu atortunik nakkartoqariataarsinnaatillugu assiaqutsigaallutilluunniit qulisaasassapput.

 

Kapitali 7

Qaammaqqutit

 

§ 40. Suliaqarfiusuni naleqquttunik qaammaqquteqassaaq, suliat suussusaannut naleqqussakkanik, taamaasilluni suliat ataasiakkaat isumannaatsumik, aamma ajornartinnagu sulinermi timip qanoq atornissaanut naleqquttumik, ingerlanneqarsinnaanngorlugit.

Imm. 2. Qaammaqqutit taartoortitsisinnaanatillu allanngorartunik qinngorneqassanngillat imaluunniit kiagupilutsitsisinnaasumik kissassuseqassanatik.

 

§ 41. Aqqusernit suliaqarfiusumut isaariaqarfiit, assartuiveqarfiit nunaminertallu angallaffiusut qaammarsagaassapput taamaalilluni angallanneq isumannaatsooqqullugu. Qaammaqqutit sakkortussusissaat minnerpaamik 25 lux-iussaaq.

Imm. 2. Init, qaammaqqusigaanngitsut aammalu pangallaffiusinnaasut allatulluunniit ulorianartorsiorfiusinnaasut assiaqutsigaassapput.

 

§ 42. Sumiissusersinissamut pisariaqarneratut init, suliaqarfiit, aqqusernit isaariaqarfiit qimaariarfissallu ajornartoornermi namminneq ikittartunik pilersugaassapput. Tamanna ajornassappat imaluunniit naleqqutinngippat, sulisut angallattakkanik qaammmartartoqartitaassapput, pujoralammut kalluuffissanullu illersuusersukkanik.

 

Kapitali 8

Torersaarnissaq saligaatsuutitsinissarlu

 

§ 43. Sanaartorfissaq torersuutinneqarlunilu saligaatsuutinneqassaaq, taamaasilluni atugarisat isumannaatsuunissakkut peqqinnissakkullu sukkulluunniit isumannartuerullugit. Pingaartumik maluginiarneqartassapput

1) aqqusernit, nunaminertat angallaffiusut, teknikikkut atortulersuutit ikkussukkat isumannaallisaatillu ajoquteqannginnissaat,

2) atortut, sakkut ledningit il. il. sulinermut angallannermullu ulorianartumik maangaannaq ilineqannginnissaat,

3) aqqusernit, nunaminertat angallaffiusut suliaqarfiusullu atortukunut assigisaannullu ilioraaviginnginnissaat, aamma aputeqartillugu issitsillugulu salinneqarlutillu siorarterneqartarnissaat, aamma

4) igitassat assigisaasalu sumiiffinnut naleqquttunut inissinneqartarnissaat isumannaatsumillu iginneqartarnissaat. Imm. 2. Eqqiaaneq ingerlanneqartassaaq ajoqusiisinnaasunik mingutsitsisoqartussaajunnaarlugu.

 

Kapitali 9

Atugarissaarusersuutit

 

§ 44. Sulisitsisup isumagissavaa sulisuusup sulinermini

1) parnaarsinnaasumut perusuersariartorsinnaanissaa.

2) Ineeqqamik neriffissaqarnissaa qanittuani imermik imeruersaatissalimmik.

3) Nillertumik kissartumillu kuuginnartumik asaffissaqarnissaa.

4) Ineeqqamik kiassakkamik s. ass. atisanut masattunut taarsiiffissaqarniaa.

5) Siniffissaqarnissaa, suliaqarfiusumi sinittarnissaq akuerisaalluni suliat ingerlanneqassappata.

Imm. 2. Arnat naartusut anaanallu milutsitsisut naleqquttunik atugassaqartitaallutik innarfigisinnaasaannik qasuersaarfissaqartitaassapput.

Imm. 3. Sulisorisat sulinerminni atortussanik tunillannartortaqarsinnaasunik mingutsitaariataarsinnaasut imaluunniit atortussianik atortunillu attuuannissimasut, isumannaallisaaneq peqqin-nissarluunniit pissutigalugit ammimiit piiassallugit pingaarutilimmik, atortulersuutinik sunnerneqarnissamut imaluunniit siaruaanissamut pitsaaliuutinik atuisinnaassapput. Inini taaneqartutut ittutut suliaqarfiusuni, nerisoqaraniluunniit imertoqassanngilaq.

 

§ 45. Init pisariaqartitsineq naapertorlugu kiassagaassapput, taamaalilluni atorneqarnerini minnerpaamik 18o C-mik kiassuseqassallutik. Imm. 2. Init torersuutitaassapput eqqiluitsuullutik isumannaatsumillu aserfallattaalisaallutik. Init susassaqanngitsunut atugassiissutaassanngillat.

 

Kapitali 10

Immikkut akuersisarneq naammagittaalliorsinnaanerlu

 

§ 46. Sullivinnut Nakkutilliisoqarfimmi pisortap, immikkut ittunik pissutissaqartillugu, akuerisarsinnaavaa nalunaarummi matumani aalajangersakkanik saneqqutsinissaq tamanna naammaginarlunilu isumannaalluinnartutut isumaqarfiginartillugu.

 

§ 47. Nalunaarut manna malillugu aalajangiinerit Kalaallit Nunaanni sullivinni avatangiisit pillugit inatsimmi § 64 malillugu naammagittaalliuutaasinnaapput.

 

Kapitali 11

Pinerluttulerinermik inatsisitigut pineqaatissiissutissat

 

§ 48. Kalaallit Nunaanni pinerluttulerinermik inatsit malillugu pineqaatissiissutissat eqqartuussutaasinnaapput

1) §§ 5-45-mik unioqqutitsisunut,

2) nalunaarut naapertorlugu peqqussutaasunik imaluunniit inerteqqutaasunik malinninngitsunut,

3) nalunaarut malillugu immikkut akuerineqarnermi atugassarititanik sumiginnaasunut.

Imm. 2. Pineqaatissiissutissat sakkortussusilerniarneranni sakkortusaatitut naatsorsuunneqassaaq

1) unioqqutitsinerup piaaraluneernikkut imaluunniit mianersuaalliorujussuarnikkut pisimanera,

2) unioqqutitsinikkut inuunermik peqqissutsimilluunniit ajoqusiisoqarsimanera tamatumunngaluunniit aarlerinartorsiortitsisoqarsimanera,

3) pissutsit taama ittut taakkununngaluunniit assingusut pillugit Kalaallit Nunaanni sullivinni avatangiisit pillugit inatsimmi § 60, imm. 1 imaluunniit 2 malillugu peqqussuteqartoqareersimanera, imaluunniit

4) unioqqutitsinikkut pineqartup imminut allanulluunniit aningaasatigut iluanaarutississimanera.

Imm. 3. §§ 5-45-mik unioqqutitsinermut sulisitsisoq akisussaatitaassaaq, unioqqutitsineq pineqartumut piaaraluneernertut imaluunniit mianersuaalliornertut tutsinneqarsinnaangikkaluarpalluunniit. Akisussaatitsinissamut patsisissaassaaq unioqqutitsinerup inummut imaluunniit inunnut arlalinnut sullivimmut attuumassutilinnut imaluunniit sullivimmut taamatut itillugu tutsinneqarsinnaa-nissaa. Aalajangersagaq manna malillugu akiliisitsinissani atortuunneqassanngilaq Kalaallit Nunaanni pinerluttulerinermik inatsimmi § 91, imm. 4. Akiliisitsissutissat annertussusilerneranni imm. 2, nr. 2-4, taamatulli atortuutinneqassapput.

Imm. 4. Unioqqutitsinerit, ingerlatsivinnit aktie- imaluunniit anpartsselskabinit, andelsselskabinit assigisaannilluunniit unioqqutitsinerusut pillugit selskabi taamaattutut akiliisussanngortitaasinnaavoq. Unioqqutitsineq Namminersornerullutik Oqartussanit, kommunimit imaluunniit kommuninit peqatigiissunit Kalaallit Nunaanni kommunalbestyrelsit nunaqarfinnilu aqutsisut il. il. pillugit Inatsisartut inatsisaanni § 64-imi pineqartunit unioqqutitsineruppat Namminersornerullutik Oqartus-sat, kommuni kommunilluunniit peqatigiit taamaattutut akiliisussanngortitaasinnaapput.

 

Kapitali 12

Atortuulersitsineq

 

§ 49. Nalunaarut atuutilissaaq ulloq 1. januar 2006.

 

Sullivinnik Nakkutilliisoqarfik, ulloq 15. december 2005

 

LIS GAMBORG

 

/Charlotte Skjoldager

 

 

Ilanngussaq

 

1 – Suliat immikkut ulorianaatillit allattorsimaffiat

 

1) Suliat, suliat suleriaatsilluunniit atorneqartut suussusii pissutigalugit, imaluunniit suliaqarfiusumi imaluunniit illuliani avatangiisit pissutaallutik, matoorussaariataarnissamut, kivinissamut imaluunniit nakkarnissamut immikkut ulorianaatillit.

2) Suliat, sulisuusunut akoorutissanik atuiffiusut imaluunniit atortussianik atortunilluunniit uumassusilinneersunik sunniiviginnissinnaasut, sulisuusunut isumannaatsuunissakkut peqqinnissakkullu immikkut aarlerinartorsiortitsisumik, imaluunniit peqqissutsikkut misissuisarneq pillugu inatsisitigut piumasaqaatitallit.

3) Suliat, sulisuusunut qinngornernik ulorianartunik sunniiviginnissinnaasut, aamma piffinnik nakkutigisanik alaatsinaatanillu sumiiffissinissamik pisariaqalersitsisut.

4) Suliat sarfap sakkortuup aqqutaasa qanittuiniittut.

5) Suliat ipilluni ajunaarfiusinnaasut.

6) Puilasuliani sullorsuarnilu aamma nunap iluani sulinerit.

7) Immap iluani sulinerit imaanut aqqartartut atortuinik atuiffiusussat.

8) Ineeqqani silaannaap naqitsinilinni sulinerit.

9) Suliat qaartartunik atuiffiusussat.

10) Sanaassat immikkoortortaanik inerlugit sulianik oqimaatsunik ikkussuineq isaterinerlu.