Ataatsimut allanneqarneranut ilaapput

Nal. 1345 Nutsernera - 15. december 2005, nalunaarut atuutilersinneqarpoq 1. januar 2006, aamma

Nal. 365 Nutsernara - 6. april 2010, nalunaarut atuutilersinneqarpoq 15. april 2010

Kalaallit Nunaanni sullivinni avatangiisit pillugit inatsimmi, tak. inatsimmik nalunaarut nr. 1048, 26. oktober 2005-imeersoq, § 50, imm. 4, naapertorlugu aamma inatsimmi § 56 naapertorlugu piginnaatitaaneq malillugu aalajangersarneqarput:

Siunertarisat suliassallu

§ 1. Kalaallit Nunaanni Suliffigissaasut siunertaat tassaavoq suliffeqartitsinermi illuatungeriinnut oqaasissaqaqataanissaq suliffimmi isumannaatsunik peqqinnartunillu avatangiiseqarnissaq pillugu suliniuteqarnerni.

§ 2. Suliffigissaasut makkuninnga suliassaqassapput:

1) Suliffigissaasut peqataaffigissavaat apeqqutinut sullivimmi avatangiisinut tunngasunut ilisimasaqarnerulersitsinissaq.

2) Suliffigissaasut namminneq suliniuteqarnermikkut oqallisigisassavaat apeqqutit sullivinni avatangiisinut pingaaruteqartutut isumaqarfigisatik, tamakkulu pillugit oqaaseqaateqartassapput suliffeqartitsinermut ministerimut, naalakkersuisunut aamma Sullivinnik Nakkutilliisoqarfimmut.

3) Suliffigissaasut inatsisit allannguutissaat malittarisassallu nutaat pillugit aamma suliassat ataasiakkaat suliffeqartitsinermut ministerip, naalakkersuisut imaluunniit Sullivinnik Nakkutilliisoqarfiup suliffigissaasunut saqqummiussaat pillugit oqaaseqaateqarlutillu siunnersuuteqartassapput.

4) Kalaallit Nunaanni sullivinni avatangiisit pillugit inatsimmi § 64 malillugu maalaarutit aalajangiiffigineqalersinnagit siunnersuisoqatigiit oqaaseqaateqartinniarneqartassapput.

5) Suliffeqarfiup isumannaallisaanermut- aamma peqqissuunissamut sulinera Suliffigissaasut malittarissavaat aamma isumannaallisaaneq pillugu suleqatigiisitat sulinerat aamma suliniutaat nukittorsassavaat aammalu pitsaanerulersinniassallugu suliffimmi avatangiisit pillugit ilinniartitsineq ilanngullugu.

Inuttalersugaanerat

§ 3. Suliffigissaasut inuttarissavaat siulittaasoq, Naalakkersuisunit suliffeqartitsinermi illuatungeriit oqaaseqartereerlugit toqqagaq, aamma ilaasortat allat makkuusut:

1) Ilaasortat marluk Sulinermik Inuussutissarsiuteqartut Kattufiannit (SIK) toqqakkat,

2) Ilaasortaq ataaseq Perorsaasut Ilinniarsimasut Peqatigiiffiannit (PIP), Peqqissaasut Kattuffiannit (PK) aamma Ilinniartitsisut Kattuffiannit (IMAK) peqatigiilluni toqqagaq,

3) Ilaasortaq ataaseq Atorfillit (tjenestemandit) Kattuffiannit (AK) aamma Kalaallit Nunaanni Ilinniagaqqortuut Kattuffiannit (ASG) peqatigiilluni toqqagaq,

4) Ilaasortaq ataaseq Kalaallit Nunaanni Sulisunik Siulersuisut Kattuffiannit (SSK) toqqagaq,

5) Ilaasortaq ataaseq Kalaallit Nunaanni Sulisitsisut Peqatigiiffiannit (GA) toqqagaq,

6) Ilaasortaq ataaseq Kalaallit Nunaanni Kommuneqarfiit Kattuffiannit (KANUKOKA) toqqagaq, aamma

7) Ilaasortaq ataaseq Kalaallit Nunaanni Naalakkersuisunit Aningaasanut Ministereqarfik isumasioqatigalugu toqqagaq.

Imm. 2. Suliniaqatigiifiit sinniisumut ataatsimut, sinniisussamik ataatsimik toqqaassapput.

§ 4. Siulittaasoq ilaasortallu allat taakkualu sinniisussaat ukiunut sisamakkaartunut toqqarneqartassapput toqqaqqinneqarsinnaappullu. Piffissap toqqagaaffiup ingerlanerani toqqaasoqassappat toqqagaaneq piffissap naanissaata tungaannaanut atuutissaaq.

Imm. 2. Suliffigissaasut ilaasortamik akornannit siulittaasup sinniisussaanik qinersissapput. Siniisussaq siulittaasup qimagusimanerani aamma siulittaasussamik toqqaasoqartinnagu siulittaasutut atuutissaaq.

§ 5. Teknikikkut nakorsatullu paasisimasallit Suliffigissaasut ataatsimiinnerini pisariaqartitsineq malillugu taaseqataasinnaanatik peqataasarsinnaapput.

§ 6. Suliffigissaasut ataatsimiinnerini sinniisumik peqataatitsisarsinnaapput taasisinnaatitaanngitsumik siunnersuisoqatigiinnullu allatseqarfiussapput.

Ataatsimiititaliat

§ 7. Suliffigissaasut ataavartussamik ataatsimiititaliorsinnaapput, aamma suliat pillugit ataatsimiititalianik, ilanngullugit malittarisassiortartussatut ataatsimiititaliat. Suliffigissaasut ataatsimiititaliani taakkunanni ilaasortassanik aamma namminneq ilaasortarisamik avataaniittunik toqqaasinnaapput.

Imm. 2. Ataatsimiititaliat taakku naleqquttumik inuttalersugaassapput. Suliffigissaasut pisariaqassappat immikkut paasisimasalinnik ataatsimiititaliani suleqataasussanik immikkut aggersaasarsinnaapput.

Imm. 3. Ataavartussatut ataatsimiititaliani aamma suliatigut ataatsimiititaliani ataasiakkaani siulittaasussat siunnersuisoqatigiit siulittaasuannit toqqarneqartassapput, suliffigissaasut allatut aalajangiissanngippata.

Imm. 4. Ataatsimiititaliat suliassani saqqummiunneqartuni suliffigissaasunut inassuteqaateqartassapput. Suliffigissaasut siulittaasuat tamatumunnga piffissarititassanik aalajangersaasinnaavoq.

Suleriaasissaq ataatsimiittarnissallu

§ 8. Suliffigissaasuni nalinginnaasumik ataatsimiittoqartassaaq ukiumut pingasoriarluni tamatumalu saniatigut siulittaasup aalajangiinera malillugu.

§ 9. Suliffigissaasut allatseqarfiat kingusinnerpaamik ataatsimiinnissaq ullunik suliffiusunik qulinik sioqqullugu ataatsimiigiaqqusissummik ullormut oqaluuserisassat allassimaffiannik ilalimmik atortussanillu suliffigissaasuni suliarinninnissamut pisariaqarsorinartunik nassitsisassaaq.

Imm. 2. Ataatsimiinnermi oqaluuserisassanut ilassutaajunnartut nassiunneqartassapput kingusinnerpaamik ataatsimiinnissaq ullunik suliffiusunik tallimanik sioqqullugu. Ilaasortat tamarmik oqaluuserisassat ilassutaanni suliassamik ilanngussisitsisinnaapput, soorlulu ilaasortat tamarmik suliassanik oqaluuserisassanut ilassutini ilanngussamik kinguartitsigallarsinnaallutik.

§ 10. Siulittaasup ataatsimiinnerit siulersussavai. Siulittaasoq najuutinngippat sinniisussaa ataatsimiinnernik siulersuisassaaq.

Imm. 2. Isumaqatigiinniarnerni ilaasortat aamma § 3, imm. 1, § 5 aamma § 6 malillugit sinniisuutitat tamarmik piginnaatitaassapput oqaaseqartarnissamut aamma suliassamik kinguartitsigallarnissamut. Suliassap kinguartitap naammassillugu suliarinissaanut Siulittaasoq piffissaliisinnaavoq.

Imm. 3. Suliffigissaasut immikkut paasisimasalinnut nalunaarusiortitsiniaasinnaapput aamma suliaminnut atugassatut misissuisitsilersinnaallutik.

§ 11. Suliffigissaasut aalajangiisinnaassuseqassapput suliffigissaasuni ilaasortat taakkualuunniit sinniisussaasa ikinnerpaamik affaat najuuppata.

Imm. 2. Anguniarneqartassaaq siunnersuisoqatigiit isumaqatigiinnikkut aalajangiinissaat. Isumaqatigiinnginnerni siunnersuisoqatigiit aalajangiisassapput ilaasortani najuuttuni taasinerit amerlanerussuteqarneratigut. Taasinerit amerlaqatigiikkaangata siulittaasup taasinera aalajangiisuusassaaq.

Imm. 3. Suliassani siunnersuisoqatigiit suliffeqartitsinermi ministerimut inassuteqarfigisaanni siunnersuisoqatigiit inassuteqaataanni erseqqissumik allanneqartassapput kattuffiit sorliit ataasiakkaanik inassuteqaateqarnersut.

Imm. 4. Nalornisoortoqartillugu siulittaasup aalajangiiffigissavaa eqqartuussisulersuussisoqassanersoq.

§ 12. Siulittaasup qularnaartassavaa Suliffigissaasut inassuteqaataat aalajangiinerilu siunnersuisoqatigiit akuersissutigisaannut naapertuuttuunersut taakkuninngalu suliffigisaasut sinnerlugit atsiuisassaaq. Suliffigissaasut allatseqarfiat suliffigissaasut ataatsimiinnerinik imaqarniliuisassaaq.

Aalajangersakkat allat

§ 13. Suliffigissaasut ilaasortaat, aalajangeeqataanatik ataasimeeqataasut, allatsi aamma ataatsimiititaliani ilaasortat immikkut paasisimasallit siunnersuisoqatigiit ilaasortarisaasa avataanniittut Kalaallit Nunaanni pinerluttulerinermik inatsimmi § 29 malillugu nipangiussisussaatitaapput.

§ 14. Nalunaarut atuutilissaaq ulloq 1. januar 2006.

Imm. 2. Peqatigisaanik atorunnaassaaq Kalaallit Nunaanni sullivinni avatangiisit pillugit siunnersuisoqatigiit suleriaasissaat pillugu nalunaarut nr. 119, 9. februar 1989-imeersoq.

Sullivinnik Nakkutilliisoqarfik, ulloq 15. december 2005

LIS GAMBORG

/Charlotte Skjoldager