Sulisitsisup sulinermik inuussutissarsiuteqartumik atorfeqarnermi atugassarititaasut pillugit ilisimatitsisussaaneranut Inatsisartut inatsisaat nr. 16. 21 november 2022-meersoq (Atorfeqarnermut uppernarsaasarnermut inatsimmi) § 1, imm. 7 naapertorlugu aalajangersarneqarpoq:

Kapitali 1

Siunertaq

  § 1.  Nalunaarutip atorfeqarnermi pissutsit ilaanniinnakkut imaluunniit immikkut ittumik pisoqartillugu, atorfeqarnermut uppernarsaasarnermut inatsimmi ilaatinneqanngitsut, pillugit aalajangersarnissai siunertarivaa.

Kapitali 2

Ilaanniinnakkut sulineq

  § 2. Atorfeqarnermi pissutsit tulliuttut ilaanniinnakkut suliffeqarnertut, atorfeqarnermut uppernarsaasarnermut inatsimmi ilaatinneqanngitsut, isigineqassapput, taamaattoq tak. imm. 2:

1)  1) Pisariaqarfikkut taartaasoq/taartaasoq aggersarneqartussaq piffissamik suliffissamik aalajangersimasumik isumaqatigiissuteqanngitsoq, taartaasoq sulisitsisumit suliartoqquneqartoq pissutigalugu:

a)  sulisup atorfillip naatsorsuutiginngisamik sulinngitsoorneranni, soorlu assersuutigalugu napparsimanermut atatillugu, imaluunniit

b)  suliassat amerlassusiisa sulisunit atorfilinnit isumagineqarsinnaasut qaangerlugit amerlassuseqarallarnerini.

2)  Atorfeqarnermi pissutsit, pisimasunut ataasiakkaanut suliassat attuumassuteqarpata.

  Imm. 2.  Atorfeqarnermut uppernarsaasarnermut inatsimmi imm. 1-mi  ilaasoq apeqqutaatinnagu atorfeqarnermi pissutsini, sulisartoq katillugit piffissami qaammatini sisamani sivikinnerpaamik sapaatit akunnerini aqqaneq-marlunni sulisitsisumi tassani suliassanik isumaginnippat aamma sapaatit akunnerini aqqaneq-marlunni taakkunani sapaatip akunneranut agguaqatigiissillugu sivikinnerpaamik nalunaaquttap akunneri 15-it sulisarpat.

Kapitali 3

Immikkut ittumik sulineq

  § 3.  Atorfeqarnermi pissutsit tulliuttut immikkut ittumik sulinertut isigineqassapput, atorfeqarnermut uppernarsaasarnermut inatsimmi ilaatinneqanngitsut, taamaattoq tak. imm. 2:

1) Atorfeqarnermi pissutsit, suliassat amerlassusaannik kiisalu piffissamik suliffiusumik agguataarinninneq inissisimaffillu pillugit siumoortumik ilisimanissaannik takutitsisinnaanngitsut, tassunga ilanngullugit:

a) Usilersorneq usingiarnerlu.

b)  Upalungaarsimanermi akissarsiaqarluni sulineq, tassunga ilanngullugit qatserisartut.

c)  Aalajangersimasumik suliaqarneq, piumaneqarneq malillugu inniminniisoqarnera taamaallaat malillugu sulineq, tassunga ilanngullugu angalanermi angallassisartoq.

2) Ukiup ilaannaani sulineq, ukiup qanoq ilinerani silap pissusianik pissuteqartumik suliaqarneq, soorlu qimusserartitsisoq, ornigulluni sulineq aamma asfalterineq.

  Imm. 2.  Atorfeqarnermut uppernarsaasarnermut inatsimmi imm. 1-mi  ilaasoq apeqqutaatinnagu atorfeqarnermi pissutsini, sulisartoq katillugit piffissami qaammatini sisamani sivikinnerpaamik sapaatit akunnerini aqqaneq-marlunni sulisitsisumi tassani suliassanik isumaginnippat aamma sapaatit akunnerini aqqaneq-marlunni taakkunani sapaatip akunneranut agguaqatigiissillugu sivikinnerpaamik nalunaaquttap akunneri 15-it sulisarpat.

Kapitali 4

Atortuulerfia

  § 4.  Nalunaarut ullormi 1. marts 2026 atuutilissaaq.

Ikaarsaarnermut aalajangersakkat

  § 5.  Piffissamik naatsorsuinermi tak. §§ 2 aamma 3 nalunaarutip piffissami atuutilerfiatut isigineqarpoq, tak. § 4, aallartiffiatut.

Namminersorlutik Oqartussat, ulloq 23. februar 2026

Aqqaluaq B. Egede

Isumaginninnermut, Suliffeqarnermut, Ineqarnermut, Attaveqaasersuutinut Isorliunerusunullu Naalakkersuisoq.

Mikael Mansi Rasmussen