Inatsisartut aalisarneq pillugu inatsisaanni nr. 29, 23. maj 2024-meersumi § 43, imm. 1, § 44, imm. 2, § 45 aamma § 68 imm. 2 naapertorlugit imatut aalajangersaasoqarpoq:

 

Kapitali 1

Atuuffia nassuiaatillu

 

Atuuffia

 

  § 1.  Nalunaarut makkuninnga atuinikkut angallatit tunitsiviusartut atulernissaannut, nunami tunitsiviit pilersinnissaannut aammalu inuussutissarsiutigalugu aalisarnermi imaani usinik nuussueqqittarnermut orsussamik poortuutinillu tigooraanernut tunniussuisarnernullu tunngatillugu atorneqarpoq:

1)  Kalaallit Nunaata aalisarnikkut oqartussaaffigisaani kalaallit nunallu allamiut angallataannut,

2)  Kalaallit Nunaata aalisarnikkut oqartussaaffigisaata avataani angallatinut nunani allaneersunut kalaallinut pisassiissutit atorlugit aalisartunut aamma

3)  Kalaallit Nunaata aalisarnikkut oqartussaaffigisaata avataani kalaallit angallataannut aalisartunut.

  Imm. 2.  Nalunaarut nunami allamiut angallataat siusinnerusukkut pisanik tulaanneqarsimanngitsunik usilik Kalaallit Nunaanni umiarsualivimmut tikitsillugu aamma atorneqassaaq.

  Imm. 3.  Nalunaarut taamatuttaaq Kalaallit Nunaanni nunami tunitsivivimmik pilersitsinermut atatillugu atorneqarpoq.

 

Nassuiaatit

 

  § 2.  Nalunaarummi matumani uku ima paasineqassapput:

1)  "Angallat tunitsivik" Angallat siullertut kaaviiaartitaqarnermi angallatit allat pisaannik pisiortortoq.

2)  ”Nunami tunisassiorfik”: Nunami illuutit suliffissuit, taakkua siullertut kaaviiaartitaqarnermi imaluunniit siullertut pisanik kaaviiaartitassanik avammut ingerlateqqitassanik tigusaqarnermi pisiortortut.

3)  ”Angallat tigooraasoq”: Angallat usilersoqqittoqarnerani angallammiit angallammut allamut pisanik tunisassianilluunniit tigusaqartoq.

4)  ”Angallat nuussisarfik”: Angallat usilersoqqittoqarnerani pisanik tunisassianilluunniit angallammut allamut nuussisartoq.

5)  “Pilersuinerit”: Orsussamik, poortuutissanik il.il. aalisarnerup angallatillu ingerlanneqarnerata ingerlaannarnissaanut.

 

 

Kapitali 2

Angallatinik tunitsivinnik atuilersitsineq

 

  § 3.  Angallatinik tunitsivinnik atuilersitsineq, Aalisarnermut Naalakkersuisumit susassaqarfimmut akisussaasumit angallammik piginnittoq akuersissummik allaganngukkamik pisariaqartitsivoq.

  Imm. 2.  Angallammik tunitsivimmik atuilersitsinermut akuersissut, tulliuttutut siunertat akornanni ataatsimik ilaqassaaq:

1)  Atuilersitsineq piffissami nunami tunitsivioreersuni aserfallatsaaliuisoqarnera pissutigalugu tunisinnaaneq pisinnaatinnagu tunisisarneq ingerlaannartinniarlugu ingerlanneqarpoq.

2)  Atuilersitsineq illoqarfimmi nunaqarfimmiluunniit nunami tunisassiorfiit sanaartornissaasa imaluunniit allilerneqarnissaasa pilersaarusiorfiginissaannik aningaasalersorneqarnissaannillu pilersaarutinik aallartitsiffiusimasuni tunisisarnissaq qulakkeerniarlugu pisarpoq, taakkualu:

a)  nunami tunisassiorfimmik peqariissanngillat imaluunniit tunisassiornermik killeqartumik piginnaasaqassapput, tunisassiornermilu piginnaasaq sanaartortoqarnerani allilerisoqarneraniluunniit annertusineqassaaq aamma

b)  nunami tunisassiorfimmut qaninnermut ungasissutsip tassunga tunisinissaq ajornarnerulersippagu.

3)  Atuutilersitsineq sumiiffinni tunisassiorfeqanngitsuni tunisassiorneq qulakkeerniarlugu pissaaq, taamaalillunilu atuutilersitsineq nunami tunitsivioreersumut tunisinermut sunniuteqassanngilaq.

4)  Atuutilersitsineq saarullinnut uumatitsiviit (angallat uumatitsivilik) imaartarnissaat siunertaralugu uumatitsivimmiillu imaarsinerup kingunerisaanik saarullinnik nunami suliffissuarmut nuussisoqassammat.

  Imm. 3.  Imm. 1 naapertorlugu akuersissuteqarnissami qinnuteqartup piumasaqaatinik aalisarneq pillugu inatsimmi § 9-mi inuussutissarsiutigalugu aalisarnermi aalisartunut piumasarineqartunik naammassinnissimanissaa piumasarineqarpoq.   

  Imm. 4.  Imm. 1 naapertorlugu akuersissuteqarnissamittaaq angallatinut tunitsivittut atorneqartunut tunngatillugu piumasaqaatit tullinnguuttuniittut naammassineqarsimanissaat piumasarineqarpoq:

1)  Angallat kalaallit pigisaattut nalunaarsorneqarsimassaaq.

2)  Angallat angallammi atorsinnaasumik nakkutilliissuteqassaaq.

3)  Angallat siuanit aquanut 24 meter-imit takineruppat (a.t.t.) imaluunniit takinerulluni, kalaallit aalisariutitut angallataanni inuttaqarneq pillugu nalunaarummi sukkulluunniit atuuttumi Kalaallit Nunaannut attuumassuteqartuunermut piumasaqaatit angallatip eqquutsissavai.

4)  Pisat aalisartuneersut nalunaarsorsinnaajumallugit angallat atortulersuutinik pisariaqartunik peqassaaq, matumani oqimaalutaq eqqortumik uuttuisinnaasoq, tunisat amerlassusiannik nalunaarsuinermut nalunaaruteqarnermullu qarasaasiatigut atortut, umiarsuup allattuivia (logbog), tunisassianik nalunaarsuiffik aamma ilitsivinnut pilersaarut ilanngullugit.

5)  Angallat naammaginartumik suliareqqiinissamut piginnaasaqassaaq aamma piffissaq akuersissuteqarfiusoq tamakkerlugu piginnaasamik tassannga attassiinnarnissamut piginnaasaqassaaq.

  Imm. 5.  Imm. 1 naapertorlugu angallammik tunitsivimmik atuilersitsinissamut akuersissummik qinnuteqartup, qinnuteqaammut ilaatillugu piginnittutut allattuiffik nutartigaq nassiutissavaa.

  Imm. 6.  Imm. 1 naapertorlugu angallammik tunitsivimmik atuilernissamut akuersissummik qinnuteqaatip suliarineqarnerani, aalisarnermut Naalakkersuisup suliassaqarfimmut akisussaasuusup ukununnga mianerisassat ilanngutissavai:

1)  tunisinermut suliffissuaq pioreersoq,

2)  pissutsit unammilleqatigiinnermut tunngassutillit,

3)  sumiiffimmi suliffissaqartitsineq aamma

4)  sumiiffimmi aalisarnermi suliareqqiisarnermilu piginnaasat.

 

  § 4.  Angallammik tunitsivimmik atuilersitsinissamut akuersissutip nalunaarutigineqarneranut atatillugu, aalisakkanut tunineqarsinnaasunut tunngatillugu angallammi tunisassiorsinnaaneq pillugu piumasaqaateqartoqarsinnaavoq.

  Imm. 2.  Akuersissummi sumiiffik taaneqassaaq, angallatip tunitsiviup ingerlatsiffigisinnaasaa.

 

  § 5.  Angallammik tunitsivimmik atuilersitsineq sumiiffimmi sinerissamiit tunngaviusumillu killeqarfimmiit 3 sømilit tikillugit taamaallaat pisinnaavoq aamma

1)  sumiiffimmi killilikkami allorniusat atorlugit taaneqartumi aamma

2)  piffissami killilikkami ullunik taasanik ilaqartumi, taamaattoq amerlanerpaamik qaammatini aqqaneq-marlunni. Piffissamit tassannga sivisunerusumik angallammik tunitsivimmik atuilersitsineq, akuersissummik nutaamik tunngaveqassaaq.

  Imm. 2.  Aalisakkanik killilersukkanik pisassiiffiusunillu aalisarnermi, aalisakkanik killilersukkanik pisassiiffiusunik aamma saniatigut pisanik angallat tunitsivik taamaallaat tunisiffiussaaq.

  Imm. 3.  Angallat § 3, imm. 2, nr. 1 imaluunniit nr. 2 taaneqartut mianeralugit tunitsivittut atulersinneqartoq, nunami tunisassiorfiup inissisimaffigisaa assigalugu illoqarfimmi nunaqarfimmiluunniit ingerlatsisinnaavoq.

  Imm. 4.  Imm. 1, nr. 2 naapertorlugu angallammik tunitsivimmik atuilersitsinermut akuersissut, § 13 naapertorlugu nunami tunisassiorfimmut suliniummik kommunimit akuersisuusumit uppernarsarneqartoq, ingerlatsisunut taamaallaat nalunaarutigineqassaaq.

 

  § 6.  Angallat tunitsiviunissamut imaluunniit suliareqqiinissaq siunertaralugu tunitsivimmiit nunami tunisassiorfimmut allamut assartuinermut atorneqarnissamut akuersissummik peqarnermi ilutigisaanik, angallat aalisarnissamut akuersissummik peqassanngilaq. 

  Imm. 2.  Angallatip tunitsivittut atorneqarnissaminut akuersissummik nalunaarutisiguni aalisarnermut akuersissutini taarsissavaa.  Piffissami akuersissummik taarsiinermi, angallatip usilersortarfia imaqassanngilaq.

 

  § 7.  Angallammik tunitsivittut atugassamik attartornermi, aalisarnermut akuersissutit pisassiissutillu pillugit nalunaarut sukkulluunniit atuuttumi, aalisarnermut angallatinik attartorneq pillugu maleruagassat malinneqassapput.

 

Nalinginnaasumik immikkut ittumik akuersissuteqarnermut aalajangersakkat

 

  § 8.  Taamaattoq Naalakkersuisut immikkorluinnaq pisoqarsimatillugu utaqqiisaasumik § 3, imm. 3-mi aamma imm. 4-mi piumasaqaatinit immikkut akuersissuteqarnissamik nalunaaruteqarsinnaapput, matumani § 3, imm. 2-mi piumasaqaatit naammassineqareerpata aamma aalisartut § 3, imm. 3-mi piumasaqaatinik naammassinngitsut nassaassaappata imaluunniit angallatit § 3, imm. 4-mi piumasaqaatinik naammassinninngitsut nassaassaappata.

  Imm. 2.  Immikkut ittumik akuersissut piffissamut qaammatit arfinillit tikillugit nalunaarutigineqarsinnaavoq, tamatuma kingorna nutaamik qinnuteqartoqarsinnaavoq nalilersuisoqarlunilu.  

  Imm. 3.  Aalisarnermut oqartussaanermut akisussaalluni Naalakkersuisoq  immikkut akuersissuteqarnerup nalunaarutigineranut atatillugu allanik piumasaqaateqarsinnaavoq.

 

  § 9.  Aalisarnermut oqartussaanermut akisussaalluni Naalakkersuisoq immikkorluinnaq pisoqarsimatillugu. tassunga ilanngullugit kisartarfinnut, sikuusarneranut silallu pissusaanut tunngasut, § 5, imm. 1-imi aamma imm. 3-mi piumasaqaammit immikkut ittumik akuersissuteqarsinnaavoq. 

 

Misileraalluni suliniutinut atatillugu immikkut ittumik akuersissut

 

  § 10.  Aalisarnermut oqartussaanermut akisussaalluni Naalakkersuisoq § 3, imm. 2, imm. aamma imm. 4, nr. 1-imi aammalu § 5, imm. 1-imi aamma 2-milu piumasaqaatinit immikkut akuersissuteqartoqarnissaanik nalunaaruteqarsinnaavoq, matumani pilersaarut aalisagaqatigiinnut pineqartunut tunngatillugu uumassusilerinikkut aningaasarsiornikkullu piujuartitsinermik tunngaveqarluni atorluaanissamut ataavartumik iluaqutaasussatut nalilerneqarpat.

  Imm 2.  Aalisarnermut  oqartussaanermut akisussaalluni Naalakkersuisoq imm. 1 malillugu akuersissuteqarnissamut piumasaqaatinik allanik aalajangersaasinnaavoq.

 

Qinnuteqarneq

 

  § 11.  Angallammik tunitsivimmik atuilersitsinermut akuersissut pillugu qinnuteqaat, aalisarnermut oqartussaanermut akisussaalluni Naalakkersuisumut tunniunneqassaaq.

  Imm. 2.  Aalisarnermut oqartussaanermut akisussaalluni Naalakkersuisup  innersuussutigisaa, qinnuteqarnermut immersuiffissaq qinnuteqartut atortassagaat.

 

Kapitali 3

Nunami tunisassiorfimmik pilersitsineq

 

  § 12.  Nunami tunisassiorfimmik nutaamik pilersitsinermut piginnittunillu nutaanik atuilersitsinermut akuersissummut tunngavissaatitaavoq, qinnuteqartup piumasaqaatinik tulliuttunik eqquutsitsinissaa:

1)  Qinnuteqartoq CVR-imi nalunaarsuiffimmi pilersinneqarsimassaaq.

2)  Nunami tunitsivimmik pilersitsinissamut nunaminertamik atugassinneqarnermut kommunimit pineqartumit akuersissut pigineqassasoq.

3)  Suliffissuup ukioq tamakkerlugu ingerlannissaanut missingersuummik kukkunersiuisumit akuerineqarsimasunik qinnuteqartoq peqassasoq.

4)  Nukissiorfimmiit tunisassiorfissap innaallagissiorfeqarnissaanut imeqarfeqarnissaanullu qulakkeerinninnermik qinnuteqartoq peqassasoq.

  Imm. 2.  Akuerineqarnissaq nunanullu allanut niueruteqarnissap angunissaa siunertaralugu, inuussutissanik tunisassiornissamut suliffeqarfimmut tunisassiorfiullu sunik atortulersorsimanissaanut piumasaqaatit pillugit qinnuteqartoq ilisimaarinninnerminut uppernarsaatinik pigisaqassaaq.

 

  § 13.  Aalisarnermut inatsimmi § 44 imm. 1 naapertorlugu nunami tunisassiorfimmik pilersitsinerup akuerineqarneranik kommunit nalunaaruteqartut, matuma kingorna erngertumik Aalisarnermut Naalakkersuisumut oqartussaaffimmut akisussaasumut nalunaaruteqassapput, nunami tunisassiorfimmik pilersitsinissamut akuersissut tunniunneqartoq. Tassunga atatillugu aalisakkat tunineqartartussatut naatsorsuutigineqartut tunisassiarineqarnissaannut piginnaasaqassuseq nalunaarutigineqassaaq.

  Imm. 2.  Nunami tunisassiorfiup pisanik tigusinissaa sioqqullugu qinnuteqartoq tunisassiorfiup tunisassanik tigusinissaminut piareeqqanera pillugu kommunimut aamma Aalisarnermut Naalakkersuisumut oqartussaaffimmut akisussaasumut paasissutissiissaaq.

  Imm. 3.  Imm. 2 naapertorlugu nunami tunisassiorfik, Aalisarnermut Naalakkersuisumit oqartussaaffimmut akisussaasumit nalunaarsorneqassaaq.

 

Kapitali 4

Usinik nuussineq

 

  § 14.  Kalaallit Nunaata aalisarnikkut oqartussaaffigisaani imaani usinik nuussueqqittarnermut peqqumaatissanillu tigooraanernut tunniussuisarnernullu usinik nuussineq kiisalu Kalaallit Nunaanni angallatit Kalaallit Nunaata aalisarnikkut oqartussaaffigisaata avataani usinik nuussinerat peqqumaatissanillu tigooraasarnernut, Aalisarnermut Naalakkersuisumit oqartussaaffimmut akisussaasumit allaganngukkamik akuersissummik piumasaqaateqarfiupput.

 

  § 15.  § 14 naapertorlugu immikkorluinnaq pisoqarsimatillugu usilersoqqittarnissamut peqqumaatissanillu tigooraanernut taamaallaat akuersissuteqartoqarsinnaavoq, taakkualu immikkorluinnaq pisoqartillugu ilaatigut uku taaneqarsinnaapput:

1)  Motorimik ajornartorsiuteqarnermi aamma

2)  angallatip attartukkap iluani allanik atuuffitsigut ajutoornerit pisanik tulaassinissamut toqqortaqarsinnaanermulluunniit periarfissiinngitsut.   

 

  § 16.  Usinik nuussinermut peqqumaatissanillu tigooraanernut tunniussuisarnernullu akuersissut pillugu qinnuteqaat, Aalisarnermut Naalakkersuisumut oqartussaaffimmut akisussaasumut tunniunneqassaaq. Aalisarnermut oqartussaanermut akisussaalluni Naalakkersuisup  innersuussutigisaa, qinnuteqarnermut immersuiffissaq qinnuteqartut atortassagaat.

  Imm. 2.  Usinik nuussinissamut akuersissut pillugu qinnuteqaat makkuninnga imaqassaaq:

1)  Qinnuteqaammut tunngavilersuut.

2)  Radiokkut attaveqarnermut ilisarnaat, umiarsualiviup ilisarnaataata normua, aamma IMO normu atorlugit angallammik attartukkamik nalunaarutiginninneq.

3)  Angallammik tigusisartumik nalunaarutiginninneq.

4)  Usinik nuussinerup ingerlanneqarfissaanut sumiiffiup naatsorsuutaasup aamma ullup piffissallu naatsorsuutaasut pillugit nalunaarutiginninneq.

 

  § 17.  Nunami allammiut angallataasa marluk akornanni usilersoqqittarnerit Kalaallit Nunaata aalisarnermut oqartussaaffigisaani inerteqqutaapput, taamaattoq takuuk imm. 2.

  Imm. 2.  Nunami allamiut angallataataasa marluk akornanni usinik nuussinermut akuersissut nalunaarutigineqarsinnaavoq, umiarsualivinni immikkut ittumik toqqakkani. NEAFC Scheme of Control and Enforcement amma NAFO Conservation and Enforcement Measures (CEM)-mi tamanna pillugu malittarisassat malillugit umiarsualiviit tamakku usilersoqqittarnissamut NEAFC-mi aamma NAFO-mi akuerineqarsimassapput.

 

  § 18.  Usinik nuussinermut akuersissut pillugu qinnuteqaat, usinik nuussinermi peqqumaatissanillu tigooraanernut tunniussuisarnernullu aammalu umiarsualivik sorleq atorneqassanersoq pillugu paasissutissat saniatigut, aalisakkat nuunneqartussat taakkulu amerlassusiinut eqqoqqissaartumik imaqassaaq.

  Imm. 2.  NEAFC Scheme of Control and Enforcement amma NAFO Conservation and Enforcement Measures (CEM)-mi tamanna pillugu malittarisassat malillugit umiarsualiviit tamakku usilersoqqittarnissamut NEAFC-mi aamma NAFO-mi akuerineqarsimassapput.

  Imm. 3.  Angallatinut nunanit allaneersunut, angallatip naalagaaffittut erfalasoqarfianit oqartussaasunit pisariaqartunit akuersissut ilanngunneqassaaq.

  Imm. 4.  Nunanit allanit angallatinut tunngatillugu, angallammut tassunga angallatip uppernarsaatit pigisai kinguliini allanneqartut, angallat attartugaanersoq imaluunniit angallat tigusisussaanersoq apeqqutaatinnagu, qinnuteqaammut atatillugu qinnuteqartup nassiutissavai:

1)  Angallatip qalipaatilerlugu assilinera

2)  IMO-normu

3)  Naalagaaffimmi sorlermi najugaqartuunermut uppernarsaatip assilinera

4)  Angallatip angissusaanut uppernarsaatip assilinera

5)  Angallammut angallatip  malinnaavigineranut atortulersuutip (FOE-anlæg) atorsinnaaneranik naalagaaffik erfalasoqarfiusoq pillugu uppernarsaat aamma angallatip sumiiffia KANUAPNA-p angallatinik malinnaanermut qitiusoqarfianut (FOC) nassiunneqarsinnaapput.

 

Kapitali 5

Nalunaarutit

 

  § 19.  Nalunaarummi uani pissutsinut tunngatillugu nalunaarutigineqartut Aalisarnermut Naalakkersuisumit oqartussaaffimmut akisussaasumit tamanut nalunaarutigineqassapput, matumani Naalakkersuisut nittartagaat ilanngullugu.

 

Kapitali 6

Pineqaatissiissutit

 

  § 20.  Kalaallit Nunaanni pinerluttulerinermut inatsimmi maleruagassat malillugit akiligassiisoqarsinnaavoq arsaarinnittoqarluniluunniit, ima iliortoqarpat:

1)  § 3, imm. 1 naapertorlugu matumunnga akuersissummik peqarnani angallammik tunitsivimmik atuilersitsisoqarpat,

2)  § 5, imm. 2 unioqqutillugu tunisineq pisimappat,

3)  § 6, imm. 2, oqaaseqatigiit siulliit naapertorlugit, piffissami aalajangersimasumi angallammik tunitsivittut atuuttussanngortinneqarsimasumi akuersissut taarseqqaarnagu aalisarneq ingerlanneqarsimappat,

4)  § 6, imm. 2 oqaaseqatigiit aappaat naapertorlugu, usilersortarfik imaaqqaarnagu akuersissut taarserneqarpat,

5)  § 7-mik unioqqutitsisoqarpat,

6)  § 14 naapertorlugu matumunnga akuersissummik peqarnani usinik nuussineq imaluunniit tigooraasimappat imaluunniit tigooraaneq nuussinerluunniit nikingassuteqarsimappata,

7)  § 17, imm. 1 naapertorlugu akuersissummik peqarnani nunami allamiut angallataataasa marluk akornanni usinik nuussineq pisimappat imaluunniit

8)  Nalunaarummi uani § 4, § 8, imm. 3, § 10, imm. 2 naapertorlugit akuersissutit, peqqussutit, aalajangiinerit, atugassarititallu Naalakkersuisup aalajangersarsimasai unioqqutinneqarpata.

 

Kapitali 7

Atuutilersitsineq

 

  § 21.  Nalunaarut 15. december 2026-mi atuutilissaaq.

 

 

 

Kalaallit Nunaanni Namminersorlutik Oqartussat, ulloq 9. november 2026

 

 

 

Peter Borg (atsior.)

Aalisarnermut, Piniarnermut, Nunalerinermut Imminullu Pilersornermut Naalakkersuisoq

 

 

 

/Emanuel Rosing (atsior.)