Inatsisartut inatsisaat nr. 29, 23 maj 2024-meersumi  § 5, imm. 3, § 6, imm. 3, aamma § 7, imm. 1, § 68 imm. 2 aamma § 71 imm. 4 naapertorlugu

 

Kapitali 1

Atuuffia nassuiaatillu

 

Atuuffia

 

  § 1. Nalunaarut Kalaallit Nunaata inuussutissarsiutiginagu aalisarnikkut oqartussaaffigisaani, kiisalu tatsini kuunnilu atuutissaaq.

 

Nassuiaatit

 

  § 2. Nalunaarummi aalisarnermut inatsit tassaavoq Aalisarneq pillugu Inatsisartut inatsisaat nr. 29 23. maj 2024-meersoq.

  Imm. 2.  Aalisarnermut inatsimmi taaguutinut nassuiaatit nalunaarummi matumani aamma atuupput.

 

Kapitali 2

Inuussutissarsiutiginagu aalisarnermut peqataasinnaaneq.

 

  § 3. Inuit Kalaallit Nunaanni aalajangersimasumik najugaqartut Kalaallit Nunaata aalisarnikkut oqartussaaffigisaani akuersissuteqaratik inuussutissarsiutiginagu aalisarsinnaanngillat, nalunaarummi matumani immikkut aalajangiisoqarsimatinnagu.

  Imm. 2.  Inuit Kalaallit Nunaanni aalajangersimasunik najugaqanngitsut taamaallaat  Akiliuteqarluni aallaaniarneq aalisarnerlu pillugit Namminersornerullutik Oqartussat nalunaarutaanni aalajangersakkat qaqugukkulluunniit atuuttut tunngavigalugit akiliilluni aalisarsinnaanermut Naalakkersuisunit immikkut akuerineqarlutik aalisarsinnaapput.

  Imm. 3.  Inuussutissarsiutiginagu aalisarnermi pisat taamaallaat nammineq atugassaapput kiisalu tuniniarneqarsinnaanatik. Akuersissuteqarluni inuussutissarsiutiginagu saarullinnik tunitsivinnut tunineqarsinnaasunik aalisarneq matumani atuutinngilaq, tak. Aalisarsinnaanermut akuersissutit pisassiissutillu pillugit Namminersorlutik Oqartussat nalunaarutaanni sukkulluunniit atuuttumi.

 

Kapitali 3

Inuussutissarsiutiginagu aalisarnermi teknikikkut piumasaqaatit.

 

Piumasaqaatit tamanut tunngasut

 

  § 4.  Nalunaarummi matumani allamik ilanngussisoqarsimanngippat, Aalisarnerup teknikikkut iluarsartuussivigineqarnera pillugu Namminersorlutik Oqartussat nalunaarutaanni malittarisassat atuuttut kisiisa naapertorlugit inuussutissarsiutiginagu aalisartoqarsinnaavoq.

Saattuarniarneq

 

  § 5.  Saattuarniarnermi kalunnermi ataatsimi pullatit amerlanerpaamik ataatsikkut pingasuusinnaapput.

 

Nipisanniarneq

 

  § 6.  Nipisanniarnermut atatillugu amerlanerpaamik qassutit ataatsikkut marluk atorneqarsinnaapput.

 

Kapisilinniarneq

 

§ 7.  Kapisilinniarnissamut qinnuteqarluni Naalakkersuisunit akuerineqarsimanissaq piumasaqaataavoq. 

  Imm. 2.  Qinnuteqartunut, siorna aalisarfiup ingerlanerani kapisilinniarluni aalisarnermut akuersissummik peqarsimasunut, siornaammat §-it 11 aamma 12 naapertorlugit nalunaaruteqartussaatitaanermik naammassinnissimanissaq akuersissummik pissarsinissamut piumasaqaataavoq.

 

  § 8.  Kapisilinniarluni aalisarnermi Naalakkersuisut ukiut tamaasa, nunat tamalaat akornanni isumaqatigiissutit mianeralugit, Kalaallit Nunaanni kapisilittassanik aalajangersaasassapput.

  Imm. 2.  Tunngaviusumik killeqarfiup 3 sømilit avataanni kapisilinniarluni aalisarneq inerteqqutaavoq.

 

 

  § 9.  Sumiiffinni aalisarnermut peqatigiiffiit isumasioqatigeriarlugit, kapisilinniarluni aalisarnerup ulloq aallartiffissaa Naalakkersuisut aalajangissavaat. Ulloq aallartiffissaq aamma pisassiissutinik aalajangersaaneq kiisalu taakkununnga piumasaqaatit www.naalakkersuisut.gl-imi saqqummiunneqassapput tamanullu nalunaarutigineqassallutik.

  Imm. 2.  Imm. 1-imi ulloq taaneqartoq sioqqullugu kapisilinniarluni aalisarneq aallartinneqassanngilaq.

  Imm. 3.  Kapisilittassiissutitut aalajangikkat tamakkernissaat qanillippat, Aalisarnermut Naalakkersuisup inuussutissarsiutiginagu kapisilinniarneq qaqugu unissanersoq nalunaarutigissavaa. Aalisarnermi atortut silamik peqquteqartoqartinnagu aalisarnerup uninnginnerani  qaqinneqareersimassapput, imaluunniit silarlussimappat periarfissaq siulleq atorlugu qaqinneqassallutik.

  Imm. 4.  Imm. 3-mi ullup taaneqartup kingorna kapisilinniarneq inerteqqutaavoq.

 

  § 10.  Kapisilinniarluni aalisarnermi uku taamaallaat atorneqarsinnaapput:

1)  qarsorsat, imaluunniit

2)  qassutit katitigaanermikkut annerpaamik 45-meterinik takissusillit nigartai siaarlugit minnerpaamik 140 mm-isut. Qassutit arlallit uiguleriissitat atorneqarnissaat inerteqqutaavoq.

 

Kapisilinnik pisarineqarsimasunik nalunaarutiginnittarneq.

 

  § 11.  Kapisilinniarluni aalisarnermi pisarineqarsimasut tamarmik Kalaallit Nunaanni Aalisarnermut Piniarnermullu Nakkutilliisoqarfimmut nalunaarutigineqassapput.

  Imm. 2.  Pisat pillugit nalunaarutiginninneq nalunaarummi ilanngussaq 1 imaluunniit Sullissivik.gl aqqutigalugu pisassaaq.  Kapisilittat kapisilinnik qassutinik napittaajaanerup kingornatigut imaluunniit qissattaat atorlugu aalisareernerup kingorna tikinnermi Kalaallit Nunaanni Aalisarnermut Piniarnermullu Nakkutilliisoqarfimmut nalunaarutigineqassapput.

 

  § 12.  Kinaluunniit kapisilinnik aalisarnissamut akuersissutaatilik, aalisarnerlu matutinnagu kapisilinniarsimanngitsoq, pisussaavoq aalisarnerup matuneqarnerani tamanna nalunaarutigissallugu. tak. imm. 3.

  Imm. 2.  Kinaluunniit kapisilinnik aalisarnissamut akuersissutaatilik, aalisarnerlu matutinnagu kapisilinnik pisaqarsimanngitsoq, pisussaavoq aalisarnerup matuneqarnerani nalunaaruteqassalluni.. tak. imm. 3.

  Imm. 3.  Akuersissutinik atorneqanngitsunik, imm.1 aamma pisaqanngitsoornernik, imm. 2 tak. nalunaaruteqarneq pissaaq nalunaarummut ilanngussaq 1 imaluunniit Sullissivik.gl aqqutigalugu. Nalunaarsuineq Kalaallit Nunaanni Aalisarnermut Piniarnermullu Nakkutilliisoqarfimmeeriissaaq aalisarnerup matuneqarneranit ullut 14-it qaangiutsinnagit.

 

Kapisillit kuuanni eqqaanilu kapisilinniarneq .

 

  § 13.  Kapisillit kuuanni kapisilinniarluni aalisarnermut pisassiissutissat aalisarnerullu ulluata aallartiffissaa Naalakkersuisut ukiut tamaasa aalajangersartarpaat.

  Imm. 2.  Kapisillit kuuani kapisilinnik aalisarnermi akuersissuteqartoqartariaqarpoq, taannalu qinnuteqareernermi Aalisarnermut Naalakkersuisoqarfimmit aalisarnermut susassaqartuusumit akuersissuteqartussamut tunniunneqartarluni.

  Imm. 3.  Aalisarsinnaanermut akuersissutinut qinnuteqartunut akuerineqarnissamut piumasaqaataavoq ukiup siuliani kapisilinniarnissamut akuersissuteqareersut §§ 11-imi 12-milu pisanik nalunaaruteqarnissamut piumasaqaatinut naammassinnissimassasut.

  Imm. 4.  Kapisillit Kuuata akuaniit 1.000 meterinit qaninnerusumut qassuserneq inerteqqutaavoq.

  Imm. 5.  Kapisillit Kuuata akuanit 50 meterinit qaninnerusumi aalisaatit suulluunniit atorlugit aalisarneq inerteqqutaavoq, qissattaat ataasiinnarmik qarsorsalik kisiat atorlugu aalisartoqaqqusaalluni, aammalu kuummi kiisalu tatsini tassunga atasuni taamaallaat qissattaammik aalisartoqaqqusaavoq.

  Imm. 6.  Naalakkersuisoqarfiup aalisarnermut akisussaasup aalisarnerup qaqugu unitsinneqarnissaa pillugu tamanut nalunaaruteqarlutik ilisimatitsissapput.

  Imm. 8.  Aallartiffissaq sioqqullugu aalisalernissaq inerteqqutaavoq, imm. 1 naapertorlugu. Aalisarnerup unitsinnerata kingorna aalisarneq inerteqqutaavoq, imm. 7 naapertorlugu.

 

Saarullinniarneq

 

  § 14.  Oqummersaq imaluunniit immoqquvik atorlugu saarullinnik aalisarneq taamaallaat ingerlanneqassaaq. Ningittakkami qarsorsat amerlanerpaamik 50-it ikkunneqarsinnaapput.

 

Eqalunnik aalisarneq

 

  § 15.  Eqalunniarnermi qassutillu takissusaat tasillugit minnerpaamik 100 mm-isut nigartallit, kiisalu oqummersat, qissattaatit qalusissutillu piniutitut atorneqarsinnaapput.

  Imm. 2.  Qassutit eqalunniarnermi atorneqartut 30 meter sinnerlugu takissuseqassanngillat.

  Imm. 3. Qassutit ningisimatillugit nakkutigineqartuassapput. Eqalunniarfik qimanneqarpat piffissaq apeqqutaatinnagu piginnittup qassutini qaqissavai.

 

  § 16.  Eqalunniarnermi uku atorneqassanngillat:

1)  Sanninngaariniarneq.

2) Ungusissutit.

3)  Qalorsuit.

4)  Pullatit, taamaattoq imm. 2 takuuk.

  Imm. 2.  Imm. 1, nr. 4-imi aalajangersagaq apeqqutaatinnagu kommunalbestyrelse kommunip pineqartup killeqarfiisa iluanni eqalunniarnermi pullatit atorneqarnissaannut akuersisoqarsinnaavoq. Eqalunniarnermi pullatit atorneqarnissaannut kommune akuerseqqaassaaq. Pullatit appasinnerpaamiittup isua qutsinneq qutsinnerpaamiittullu isua qutsinneq naannerpaamik 50 meterinik ungasissuseqassapput. Pullatit kuup ikertussusaata annerpaamik pingajorarterutaa assersinnaavaat. Pullatit nigartaqqortussusaat minnerpaamik 30 mm-iussaaq.

  Imm. 3.  Imm. 2 naapertorlugu akuersissutinut kommunalbestyrelse erseqqinnerusunik piumasaqaasiorsinnaavoq, tassunga ilanngullugit pullatit ilusissaat, piffissaq sumiiffillu atorneqarsinnaaffiat kiisalu pullasersorluni eqalunniarniaraanni qinnuteqaateqaqqaartoqartarnissaa pillugit.

 

Eqalunnut qassuserneq

 

  § 17.  Kuunni taakkualu tasinngortaanni qassusersorluni eqalunniarneq tamarmi inerteqqutaavoq.

 

  § 18.  Tatsini eqalunniarnermi kuuit tatsimut akuaniit kuuillu aariaanniit 100 m-init qaninnerusumut qassuserneq inerteqqutaavoq.

  Imm. 2.  Tatsini qassusersornermi qassutit tatsip sinaaniit akimut ikertussusiata aggornerisa pingajorarterutaat sinnerlugu takissuseqassanngillat.

 

  § 19.  Kuup akuani nalinginnaasumik ulinnerpaaffianiit kuup immallu naapiffianniit illugiinnik kuuk 150 m-init qaninnerullugu, kuup sinaa aallaavigalugu uuttorlugu, qassusersorneq inerteqqutaavoq. Ungasissusissamit tassannga ungasinnerusukkut kommunalbestyrelsit qassusersorfissap killissaanik 150 meterinit ungasinnerusumut nalunaaqutsiisimappat, nalunaaqutsikkap iluani qassusersorneq inerteqqutaavoq.

  Imm. 2.  Qassutit timaatungaat ulinnerani immap angusagaanut attuumasunngorlugit nivinngarneqartassapput.

  Imm. 3.  Qassutit imartap sineriammit sineriammut ikertussusiata pingajorarterutaa sinnerlugu takissuseqassanngillat.

  Imm. 4.  Qassutit narlusuumik nunamiit avammoorlugit nivinngarneqassapput.

  Imm. 5.  Qassutit eqalunniutit qassutinut tullernut naannerpaamik 30 meterinik akunnilerlugit nivinngarneqartassapput.

 

  § 20.  Ujaqqanik sapusiat atorlugit eqalunniarsimagaanni eqalunniarfik qimatsinnagu saputit peerneqassapput kuuk ingerlaarfissalerlugit ammarneqassammat.

 

  § 21.  Qassutit atorlugit eqalunniartoqarsinnaavoq taamaallaat juunip ulluisa 15-ianniit septembarip ulluisa 25-iat ilanngullugu.

 

  § 22.  Kommunalbestyrelse kommunimi ileqqoreqqusatigut sumiiffinnik eqaloqarfiusunik ataatsimik arlalinnilluunniit eqqissisimatitsisinnaavoq.

  Imm. 2.  Kommunalbestyrelsip sumiiffinnik eqqissisimatitsinissamut aalajangiinini nittartakkamini tamanut saqqummiuttassavai.

 

  § 23.  Sumiiffiit § 22 imm. 1 naapertorlugu eqqissisimatitaasut nunap sananeqaataatigut ataqatigiittussaapput, taakkunanilu eqaluit kuunnit eqqissisimatitaneersut sisusimatillutik najortarunagaat toqqammavigalugu killilersorneqartassapput. Killiliinermi eqqissisitsinerup sunniutissaa annerpaaq anguniarneqassaaq, peqatigisaanillu Kalaallit Nunaanni Aalisarnermut Piniarnermullu Nakkutilliisoqarfimmit allanilluunniit nakkutiginnittussatut Naalakkersuisut toqqarsimasaannik politiinillu nakkutilliiffigiuminarnissaa anguniarneqassalluni.

  Imm. 2.  Kommunalbestyrelsit nalluutit qissattaatillu atorlugit eqaloqarfinni eqqissisimatitaasuni eqalunniarsinnaatitsisinnaapput, eqaloqarfiit qangaaniilli eqalunniarfigineqartarnerisa pingaarutaat pigiinnarneqaqqullugu.

 

  § 24.  Kommunalbestyrelse eqalunniarneq eqqarsaatigalugu § 15-21 naapertorlugu aalajangersakkanit sakkortunerusunik kommunip ileqqoreqqusaatigut aalajangersaasinnaavoq, pissutsit tamanna pisariaqartippassuk.

 

  § 25.  Naalakkersuisut aalajangersakkap § 22 naapertorlugu aalajangersarneqartup ilisimatusarnissaq siunertaralugu sanioqqunnissaanut immikkut akuersissuteqarsinnaapput.

  Imm. 2.  Kommuni eqaloqarfimmik kooqanngitsoq imaluunniit ataasiinnarmik kuulik, § 22 naapertorlugu aalajangersakkat sanioqqunnissaannut qinnuteqarsinnaatitaavoq, tamanna  kommunip eqalunnik illersuinissaq pillugu allatut aalajangersagaqarpat, imaluunniit kommunimi eqaloqarfimmik kooqanngitsoq uppernarsarneqarsinnaappat.

 

Kapitali 6

Pineqaatissiissutit

 

  § 26.  Kalaallit Nunaanni Pinerluttulerinermut inatsimmi malittarisassat malillugit akiligassiisoqarsinnaavoq arsaarinnittoqarsinnaalluniluunniit:

1) § 3. imm, 2, 3-millu unioqqutitsisumik aalisartoqartillugu,

2) § 4-mut akerliusumik aalisartoqartillugu,

3) §§ 5-6 allassimasut malillugit atortussanut piumasaqaatit unioqqutinneqarpata,

4)  Akuersissuteqarani aalisartoqartillugu, tak. § 7, imm. 1,

5)  Titarnerup 3 sømilip avataani kapisilinniartoqarpat, tak. § 8 imm. 2,

6) § 9 naapertorlugu ulloq aalisarfissaq nallinngitsoq aalisarneq aallartinneqarpat, tak,  § 9, imm. 1, tak. § 9, imm. 2,

7)  § 9, imm. 3 naapertorlugu aalisarnerup unitsinneqareernerani aalisarnermik ingerlatitsiinnartoqarpat, tak. § 9, imm. 4,

8)  § 10 naapertorlugu unioqqutitsilluni atortunik atuisoqarpat,

9)  §-it 11-12 unioqqutillugit nalunaarsuinissamik naammassinninngittoqarpat,

10) § 13, imm. 2 unioqqutillugu aalisarnissamut akuersissummik atuuttumik peqarani aalisartoqarpat,

11)  § 13. imm. 4-5-mi nassuiarneqarsimasunut naapertuutinngitsumik Kapisillit kuuanut qaninnerusumik aalisartoqarpat,

12)  § 13. imm. 6 unioqqutillugu atortunik allanik atuilluni aalisartoqarpat,

13)  § 13. imm 7-mi allassimasut saneqqullugit aalisarneq sioqqutsilluni aallartinneqarpat imaluunniit unitsinneqareersoq aalisartoqarpat,  

14) § 14 saneqqullugu allanik aalisaateqarluni aalisartoqarpat,

15) § 15, imm. 1-2-mi allassimasut atortussanut piumasaqaatit unioqqutinneqarpata,

16)  Qassutit nakkutigineqanngippata, tak. § 15, imm. 3,

17)  § 16, imm. 1 unioqqutillugu eqalunniarnermi atortunik atuisoqarpat, 

18)  Pullatit eqalunniutit Kommunalbestyrelsip akuersissutigisimanngisai eqalunniarnermi atorneqarpata takuuk § 16, imm. 2,.

19)  §§ 17-21 imi qassusersornissamut aalajangersakkat malinnagit aalisartoqarpat imaluunniit

20) Nalunaarummi uani § 16, imm. 3, § 22, imm. 1, aamma § 24, naapertorlugit najoqqutassat, peqqussutit Naalakkersuisut aalajangersarsimasaat piumasaqaasiorfigisimasaallu unioqqutinneqarpata.

 

Kapitali 7

Atuutilersitsineq

 

  § 27.  Nalunaarut ulloq 1. juuni 2026 atuutilissaaq.

 

 

 

Namminersorlutik Oqartussat, ulloq 7. maji 2026

 

 

 

Peter Borg (atsior.)

Aalisarnermut, Piniarnermut, Nunalerinermut Imminullu Pilersornermut Naalakkersuisoq

 

 

 

/Emanuel Rosing (atsior.)