Quppernerup imai iserfigikkit
Oqaatsit toqqakkit
Ujaasinermut uterit
Inatsisit
Nr. 56
20. novembari 2026
Akuerineqarpoq

Inuit innarluutillit tapersersorneqarnissaannut Inatsisartut inatsisaat

Kapitali 1

Siunertaq, nassuiaatit sullinniakkallu

 

Siunertaq

 

  § 1.  Inatsisartut inatsisaat manna malillugu inunnut timikkut tarnikkulluunniit piginnaasakinnerusunut tapersersuinissamik inuit innarluutillit tamarmik allat assigalugit inuttut pisinnaatitaaffinnik tunngaviusumillu kiffaanngissuseqarnissamut pisinnaatitaaffinnik tamakkiisumik pissarsisarnissaannut siuarsaanissaq, illersuinissaq qulakkeerinissarlu, kiisalu inuit innarluutillit pissusissamisut ittumik naleqassusiisa ataqqineqarnissaannut siuarsarnissaq siunertaavoq.

  Imm. 2.  Inuk innarluutilik ataqatigiissumik tamakkiisumillu isiginnittumik suliniuteqarfigineqassaaq, inuup pisariaqartitaanut suliniuteqarneq naapertuutissalluni.

Inunnut ataasiakkaanut periarfissaappat, inuup ineriartorsinnaaneranut aamma piginnaasai naapertorlugit periarfissaqarfiinik atorluaasinnaaneranut periarfissaata akisussaaffiatalu nukittorsarnissaannik siunertalimmik tapersersuineq tunniunneqassaaq. Inuup innarluutillip maannakkut piginnaasatigut killiffimminik attassiinnarsinnaanera imaluunniit piginnaasaata appasinnerulernissaata annikillinissaa ikorfartorniarlugu aamma taarsiinikkut, isumassuinikkut paaqqutarineqarnikkullu tapersersorneqarnissaa anguniarneqartussaavoq.

  Imm. 3. Inunnut innarluutilinnut suliniuteqarnermi:

1)  inuit innarluutillit siunnersuinermik tapersersuinermillu neqeroorfiginissaat qulakkeerneqassaaq,

2)  inuit ataasiakkaat unammilligassaat ajornerulersinnaanerisa pitsaaliorneqarnissaat anguniarlugu siusissukkut ataqatigiissumik suliniutitut piareersarneqassaaq,

3)  inuit ataasiakkaat nukissaminnik pigisaqaannarnissaasa, nammineernerulernissaannut siuarsaanissamut periarfissai ikorfartorneqassapput kiisalu inuit ataasiakkaat inuuniarnikkut inuttullu piginnaasai pitsanngorsaaffigineqassallutik,

4) attaveqarnikkut, katerisimaartarnerit, sammisaqartarnerit, katsorsartinnerit, isumassorneqarnissamut imaluunniit paaqqutarineqarnissamut neqerooruteqarnikkut inuit ataasiakkaat akornuteqarnani inuuniarnissaannut periarfissai pitsanngorsarneqassapput,

5)  inuiaqatigiinnut akuunerulernissaq siuarsaaffigineqassaaq, soorlu inuit ataasiakkaat ilinniarnermut inuttullu attaveqarfinnut peqataasarnissaannut periarfissai annertusaaqataaffigalugit,

6) inuit innarluutillit suliffeqarfimmut isernissaannut suliinnarnissaannullu ikorfartorneqassapput, aamma

7)  inuit ataasiakkaat nammineerlutik inigisaanni, tassunga ilanngullugu najugaqarfissatut neqeroorummi, immikkut pisariaqartitai malillugit neqeroorutinik naleqqussaalluni tamakkiisumik tapersersuinermik qulakkeerinnittoqassaaq.

 

Nassuiaatit

 

  § 2.  Inatsisartut inatsisaanni matumani makku ima paasineqassapput:

1)  Inuit innarluutillit: Inuit timikkut, tarnikkut, silassorissutsikkut imaluunniit malugisaqarsinnaassutsikkut ataavartumik piginnaanikinnerusut, aporfiillu assigiinngitsut sunniivigeqatigiinnerisigut, allat assigalugit inuiaqatigiinni tamakkiisumik sunniuteqarluartumillu peqataanissamut akornuteqartut.

2)  Inunnik innarluutilinnik illersuisoq: tassaavoq inunnik innarluutilinnik ikiuisoq isumaginninnermik aamma inunnik innarluutilinnik suliassaqarfimmi sukumiisumik ilisimasalik misilittagalillu kiisalu Naalakkersuisut inunnik innarluutilinnik illersuisutut pikkorissaanermik neqeroorutaannik naammassisaqartoq.

3)  Najugaqarfissatut neqeroorut: Najugaqaqatigiiffiit, najugaqarfiit illersugaasut aamma ulloq unnuarlu neqeroorutit.

4)  Najugaqaqatigiiffik inunnut innarluutilinnut arlalinnut ulluunerani ikiorneqarnissamik neqeroorfigineqartussanut najugaqarfissatut neqeroorutaavoq.

5)  Ulloq unnuarlu neqeroorut isumannaallisagaq tassaavoq ulloq unnuarlu neqeroorut imaluunniit ulloq unnuarlu neqeroorummi immikkoortortaqarfik parnaaqqajuarneqarsinnaatitaasunik silarlermi matulik aamma igalaalik.

6) Najugaqarfik: kommunimi angerlarsimaffigisami illoqarfik imaluunniit nunaqarfik, inuup innarluutillip najugaqarfigisaa.

7)  Malitseqartitsineq: inuusuttut 18-iniit 23-nut ukiullit inersimasunngornermut ikaarsaarnissaannut kiisalu namminerisamik inersimasutut inuuneqalernissaannut piareersarneqarnerisigut suliniuteqarneq.

8)  Kinguaassiuutitigut innarliineq: Inuk atoqatigiinnermut akuutinneqarpat, inuup ukiui imaluunniit paasinnissinnaassusaa pissutigalugit tamanna paasilluanngikkuniuk kingunerisinnaasaalu takorloorsinnaanngikkunigit, taamaattumillu tamatumunnga akuersisinnaanngitsoq.

9) Akuersissut: Nammineq piumassutsimik paasititsilluni aalajangersimasumillu piumasamik ersersitsineq, tamatumani inuup iliuuserineqartumut akuersinera.

 

Sullinniakkat

 

  § 3.  Inatsisartut inatsisaat manna inunnut innarluutilinnut ukiui, ukiumikkut pissuteqartumik piginnaasakinneri utoqqaallu angerlarsimaffiini najugaqarneri apeqqutaatinnagit Kalaallit Nunaanni najugalinnut atuuppoq.

  Imm. 2. Inatsisartut inatsisaat inunnut innarluutilinnut, Kalaallit Nunaanni isumaginninnermut oqartussat aalajangiinerisigut Kalaallit Nunaata avataani inissinneqartunut ilanngullugit atuuppoq, tak. § 57, imm. 2 imaluunnit § 59, imm. 1.

 

  § 4. Kommunalbestyrelsip meeqqamut innarluutilimmut Inatsisartut inatsisaat manna malillugu tapersersuinermik aallartinneqartunik meeqqamut pineqartumut inatsisit allat malillugit aallartinneqartunik suliniuteqarnernik ataqatigiissaarinissaq qulakkiissavaa.

 

Kapitali 2

Akisussaaffik aamma aaqqissugaaneq

 

Kommunalbestyrelsip pisussaaffii

 

  § 5. Kommunalbestyrelsi inunnut innarluutilinnut namminersorsinnaassutsimik attassiinnarnissamut imaluunniit annertusarneqarnissaanut kiisalu inuup inuiaqatigiinni peqataanermi, inuttullu piginnaasaasa pitsanngorsarneqarnissaannut piginnaasanik ineriartortitsinissamut tapersersuinissaq, isumassuinissaq, sungiusarnissaq ikiuinissarlu pillugit neqerooruteqassaaq.

 

  § 6. Kommunalbestyrelsi inunnut innarluutilinnut aamma inuit innarluutillit qanigisaannut siunnersuisarlunilu ilitsersuisassaaq.

  Imm. 2.  Imm. 1 naapertorlugu siunnersuineq ilitsersuinerlu ilaatigut imatut ingerlanneqarsinnaavoq:

1)  Peqqissaalluni oqaloqatigiinnerit.

2)  Atortorissaarutit ikiuutaasut toqqarneqarnissaannut siunnersuineq.

3)  Atortorissaarutit ikiuutaasut atorneqarnissaannut ilitsersuineq.

4) Allatigut siunnersuineq ilitsersuinerlu.

 

  § 7.  Kommunalbestyrelsip suliniummik aaqqissuussinikkut kommunip inunnut innarluutilinnut nalinginnaasumik pitsaaliuinermillu suliaqarnera aamma immikkut tapersersorneqarnissamik pisariaqartitsisunut anguniagaqarfiusumik suliniuteqarnerata ataqatigiinnissaat qulakkiissavaa.

  Imm. 2.  Kommunalbestyrelsip siusissukkut pitsaaliuinermik suliniuteqarnermut ilaatillugu isumagissavaa angajoqqaatut oqartussaasut meeqqanut pineqartunut, angajoqqaatut oqartussaasut imaluunniit meeqqat innarluuteqarpata, ilaqutariinni ajornartorsiutit aaqqiivigineqarnissaannut ilaqutariinnut tunngasunik siunnersorneqarsinnaanissaat. Kommunalbestyrelsip ujartuilluni sulinermigut taamatut siunnersuisarnermik inunnut tamanut pissutsit immikkut ittut pissutigalugit pisariaqartitsisutut ilimagineqartunut neqerooruteqarnissani pisussaaffigaa. Angajoqqaatut oqartussaasunngortussat arlaat imaluunniit tamarmik innarluuteqarpata imaluunniit meeqqamik innarluutilimmik naartuppat, siunnersuineq pillugu neqeroorut angajoqqaatut oqartussaasunngortussat ilanngullugit atuuppoq. Angajoqqaatut oqartussaasut, meeqqat, inuusuttut inersimasullu siunnersorneqarnissamik kisimiillutik ujartuisut kinaassusertik isertuullugu aamma neqeroorutitut ammasutut siunnersorneqarsinnaassapput.

  Imm. 3.  Kommunalbestyrelsi imm. 4, nr. 1-4 malillugit tapersersuinermi inuup innarluutillip ilaqutariilluunniit immikkut tapersersorneqarnissamik pisariaqartitsisunut, pisariaqartitaat iliuuseqarfigineqarsinnaasutut nalilerneqarpata, pitsaaliuinermik suliniuteqarnissamik neqerooruteqassaaq.

  Imm. 4.  Kommunalbestyrelsi pitsaaliuinermik suliniutinik tulliuttunik neqerooruteqarsinnaavoq:

1)  Siunnersortimik ikiorneqarneq, tassunga ilanngullugit suliniutit ilaqutariinnut tunngasut.

2)  Attaveqaqatigiittarfiit imaluunniit oqaloqatigiittarfiit

3)  Ilaqutariit pilersaarusiornissaannut siunnersuineq.

4)  Suliniutit allat inuup ilaqutariilluunniit ajornartorsiuteqalersinnaanerannik pitsaaliuinermik siunertaqartut.

 

  § 8.  Inuit innarluutillit pisariaqartumik tapersersorneqarnissaat aamma inunnut innarluutilinnut Inatsisartut inatsisaat manna malillugu tapersersuinissamut periarfissanik pisariaqartunik peqarnissaa kommunalbestyrelsip isumagissavaa.

 

Tapersersorneqarnissamut pisinnaatitaaffik

 

  § 9.  Inuk innarluutilik ajornanngippat nammineerluni inigisassamik toqqaasinnaanermut tapersersorneqarsinnaatitaavoq. Inuk innarluutilik taassumunngalu angajoqqaatut oqartussaasut imaluunniit akisussaasoq tamanna pillugu kissaateqarlutik oqaatigineqarpat nammineq angerlarsimaffimmiiginnarnissamut ilanngullugu tapersersorneqarsinnaatitaavoq. Inuup inigisassamik nammineerluni toqqaaneratigut namminerluunniit angerlarsimaffimmiiginnarneratigut inuup nammineq allalluunniit atugarissaarnerisa navianartorsiortinneqannginnissaat piumasaqaataavoq.

  Imm. 2.  Inuk innarluutilik tamatuminnga pisariaqartitsippat najugaqarfissatut neqeroorummi naleqquttumik tapersersorneqarsinnaatitaavoq.

 

Inunnik innarluutilinnik illersuisoqarnermik aaqqissuussineq

 

  § 10.  Kommunalbestyrelsip inuit innarluutillit inunnik innarluutilinnik illersuisumit tapersersorneqarnissaat  neqeroorfigineqarnissaallu siunertaralugu, inunnik innarluutilinnik illersuisoqarnermik aaqqissuussaq pilersissavaa:

1)  Inatsisartut inatsisaat manna malillugu tapersersorneqarnissaq pillugu kommunalbestyrelsip suliamik suliarinninnerani,

2)  Inatsisartut inatsisaat manna malillugu tapersersorneqarnissaq pillugu kommunalbestyrelsip aalajangigaanik naammagittaalliummik suliaqarnermi tunniussinermilu, aamma

3)  Inatsisartut inatsisaat manna malillugu Isumaginninnermi Naammagittaalliuuteqartarfiup tapersersorneqarnissamut aalajangiineq pillugu naammagittaalliummik suliarinninnerani.

  Imm. 2.  Inuit innarluutillit inunnik allanik, tassa kommunimeersuunngitsunik, inuit innarluutilinnik illersuisoqarnissamik nammineq toqqaanissaminnut pisinnaatitaaffeqarput.

  Imm. 3.  Toqqaaneq, aningaasarsiaqartitsineq, pinerluuteqarsimannginnermik allagartamik aamma meeqqanik innarliisimannginnermut uppernarsaammik pissarsineq, kiisalu inunnik innarluutilinnik illersuisumik piukkunnassusianut piginnaasaanullu piumasaqaatit pillugit Naalakkersuisut malittarisassanik erseqqinnerusunik aalajangersaasinnaapput.

 

Pitsaassutsimut malitassiat

 

  § 11. Inatsisartut inatsisaanni matumani kapitali 4-6 malillugit kommunalbestyrelsip inunnut innarluutilinnut tapersersuinissamut pitsaassutsimut malitassiat aalajangersassavai. Pitsaassutsimut malitassiat tapersersuinerit ataasiakkaat imarisaat, annertussusaat kiisalu tapersersuinerit ataasiakkaat naammassineqarnissaannut paasissutissat pillugit imaqassapput. Kommunalbestyrelsip pitsaassutsimut malitassiat aalajangersarneqartut qanoq iliorluni malitseqartinneqassanersut aalajangiiffigissavai.

  Imm. 2.  Inatsisartut inatsisaat manna malillugu tapersersuinerit tamarmik imaluunniit tapersersuinerit aalajangersimasut pillugit pitsaassutsimut malitassianik aalajangersaasoqassasoq kommunalbestyrelsi aalajangiisinnaavoq.

  Imm. 3.  Imm. 1 malillugu pitsaassutsimut malitassianik erseqqinnerusunik Naalakkersuisut aalajangersaasinnaapput.

 

Oqartussat ataatsimoorlutik akisussaaffiat

 

  § 12. Inatsisartut inatsisaannik matuminnga allaffissornermi kommunit Naalakkersuisullu pisortani ataatsimoorussanik IT-qarnermut atortumik atuissapput.

 

Pissassarfik

 

  § 13.  Naalakkersuisut nuna tamakkerlugu innarluutilinnut sullissivik, Pissassarfik, makkuninnga suliassaqartoq ingerlatissavaat:

1)  inunnut innarluutilinnut qanigisaannullu Inatsisartut inatsisaat manna pillugu siunnersuineq ilitsersuinerlu, tassunga ilanngullugit tapersersorneqarnissaq pillugu aalajangiinernut naammagittaalliuuteqarnissamut periarfissaq,

2)  Inatsisartut inatsisaat manna pillugu kommunalbestyrelsinut siunnersuineq ilitsersuinerlu, tassunga ilanngullugit tapersersorneqarnissanut periarfissat suliassanillu suliarinnittarneq,

3)  § 39 naapertorlugu inuup innarluutillip ulluinnarni sapinngisamik pitsaanerpaamik piginnaaneqalernissaa siunertaralugu, inunnut innarluutilinnut piginnaanngorsarneqarnissamik piginnaanngorsaqqinneqarnissamillu neqerooruteqarneq,

4)  innarluuteqarnermut, inunnut innarluutilinnut tapersersuinermut kiisalu inunnut innarluutilinnut tunngasunut pissutsinut ilisimasanik katersineq siammarterinerlu,

5)  kommuninut, inunnut innarluutilinnut qanigisaannullu innarluuteqarnermut tapersersuinermullu periarfissat pillugit pikkorissaanernik neqerooruteqarneq,

6)  suliani immikkut pisariusuni kommunalbestyrelsemit piumaffigineqarneq malillugu qulaajaaneq, tak. § 20, imm. 2, aamma

7)  kommunalbestyrelsemit piumaffigineqarneq malillugu qaammatisiutit malillugit ullunik 14-inik piffissaqarluni najugaqarfissatut neqeroorummi najugaqarunnaarnissaq pillugu suliani § 60, imm. 3 naapertorlugu oqaaseqaateqarneq.

  Imm. 2.  Naalakkersuisut kommunalbestyrelsip Pissassarfimmik atuineranut akigititat pillugit malittarisassanik erseqqinnerusunik aalajangersaasinnaapput.

 

Kapitali 3

Suliassanik suliarinninneq aamma iliuusissatut pilersaarutit

 

Suliassanik suliarinninnermut tunngaviit

 

  § 14.  Inatsisartut inatsisaat manna malillugu tapersersuinissaq pillugu aalajangiinerit inunnut ataasiakkaanut pitsaanerpaanersut tamakkiisumik nalilersuiffiginerat aallaavigalugu aalajangiiffigineqassapput.

  Imm. 2.  Pissutsit inummut innarluutilimmut tunngassuteqartut pillugit sapinngisamik inuup innarluutillip nammineq isumai innimigineqassapput, nammineerlunilu piginnaasatigut ineriartorneranilu killiffii pissusissamisoortumik qajassuunneqassallutik.

 

  § 15. Inatsisartut inatsisaat manna malillugu inuk innarluutilik tapersersorneqarnissamik qinnuteqartoq, kommunalbestyrelsip piumaffigisinnaavaa:

1)  paasissutissanik pisariaqartunik inuup qanoq tapersersorneqarnissamut pisinnaatitaaneranik kommunalbestyrelsip aalajangiisinnaanissaanut pissarsiniarnermi peqataassasoq, aamma

2)  nakorsamit misissorneqarnissaq imaluunniit malinnaavigineqarnissaq siunertaralugu unitsinneqarnissaq kiisalu pisariaqartillugu qulaajaanermut atatillugu katsorsarneqarnissaq.

  Imm. 2.  Inuup innarluutillip, angajoqqaatut oqartussaasup imaluunniit akisussaasup akuersineratigut kommunalbestyrelsip oqartussanit allanit inuup pissusaanik imaluunniit inuup innarluuteqarneranik ilisimasaqartunit paasissutissanik pissarsisinnaavoq, paasissutissat Inatsisartut inatsisaat manna malillugu tapersersorneqarnissaq pillugu qinnuteqaatip suliarineqarnissaanut pisariaqartutut isigineqarsinnaappata, taamaattoq tak. imm. 3.

  Imm. 3.  Inuk innarluutilik paasititsilluni akuersissummik tunniussisinnaanngippat, aamma taassumunnga angajoqqaatut oqartussaasunit imaluunniit akisussaasumit akuersissut pissarsiarineqarsinnaanngippat, inuup soqutigisaasa illersorneqarnissaat isumaginiarlugu tamanna pingaaruteqartoq isumaqarfigineqarpat, kommunalbestyrelsi paasissutissanik pissarsisinnaavoq.

 

Aalajangiinerit aamma qulaajaaneq

 

  § 16. Kommunalbestyrelsi inunnut innarluutilinnut tapersersuinissaq pillugu kapitali 4-mi aalajangersakkat malillugit imaluunniit ineqarnissamut neqeroorut pillugu kapitalit 6 aamma 7-mi aalajangersakkat malillugit aalajangiissaaq.

  Imm. 2.  Imm. 1 malillugu aalajangiineq pisinnaavoq:

1)  inummit innarluutilimmit qinnuteqartoqarneratigut,

2)  inuup akisussaasuanit qinnuteqartoqarneratigut,

3)  angajoqqaatut oqartussaasunit qinnuteqartoqarneratigut, imaluunniit

4)  kommunalbestyrelsip nammineq iliuuseqarneratigut.

  Imm. 3.  Imm. 1 malillugu aalajangiineq inuit innarluutillit ataasiakkaat pisariaqartitaannik piginnaasaannillu immikkut tigussaasumik nalilersuineq tunngavigalugu pissaaq. Inuk ataavartumik piginnaasakinnerunersoq kommunalbestyrelsip nalilersuinermini qulaajaaffigissavaa.

  Imm. 4.  Kommunalbestyrelsip imm. 1 naapertorlugu aalajangiisoqannginnerani, inuk innarluutilik aamma angajoqqaatut oqartussaasut imaluunniit akisussaasoq oqaloqatigeqqaassavai, tak. § 23.

  Imm. 5.  Nukinginnartumik tapersersorneqarnissamik pisariaqartitsisoqartillugu kommunalbestyrelsi tapersersorneqarnissaq pillugu aalajangiissaaq aamma aalajangiineq nalunaaquttap akunnerisa 48-it iluanni aallartissallugu, § 23 malillugu oqaloqatiginnittoqannginnera, § 18 malillugu qulaajaanerup suliarineqannginnera, §§ 24-25 malillugit iliuusissatut pilersaarut suliarineqannginnera imaluunniit naammassineqannginnera apeqqutaatinnagit.

  Imm. 6.  Kommunalbestyrelsip pisariaqanngitsumik kinguarsaanertaqanngitsumik imm. 5 malillugu iliuusissat aallartissavai:

1)  oqaloqatiginnissaaq, tak. § 23,

2)  § 18 naapertorlugu qulaajaaneq aamma §§ 24-25 naapertorlugit iliuusissatut pilersaarut suliarissavai naammassillugillu, taakkulu tunngavigalugit pisariaqarpat nutaamik aalajangiissalluni.

 

    § 17.  Kommunalbestyrelsi inunnut innarluutilinnut navianartorsiorfimmiittutut nalilerneqartunut immikkorluinnaq ittumik suliniuteqassaaq.

  Imm. 2.  Nalilersuineq aamma imm. 1 naapertorlugu suliniutinik allartitsineq suliamut tunngatillugu tamanillu isiginnilluni nalilersuineq aallaavigalugit pissapput.

 

  § 18.  Kommunalbestyrelsip inuup innarluutillip atugai pillugit qulaajaaneq ingerlatissavaa, inuk kapitali 4-mi aalajangersakkat malillugit tapersersorneqarnissamik pisariaqartitsisutut imaluunniit kapitalit 6 imaluunniit 7-mi aalajangersakkat malillugit najugaqarfissatut neqeroorummi najugaqarnissamik pisariaqartitsisutut ilimagineqarpat. Taamaattoq qulaajaaneq ingerlanneqassanngilaq, tamanna pisariaqanngitsoq ersarippat.

  Imm. 2.  Qulaajaaneq sapinngisamik makkuninnga akimut suleqateqarluni ingerlanneqassaaq:

1)  inuk innarluutilik,

2)  inummut akisussaatitsisoqarpat tassunga akisussaasoq,

3)  meeraappat tassunga angajoqqaatut oqartussaasoq, aamma

4)  isumassuisut allat,

5)  peqqinnissaqarfik,

6)  pisortani oqartussat suliamut attuumassuteqartut, aamma

7)  paaqqinniffiit inunnik innarluutilinnik ilisimasaqartut.

  Imm. 3.  Qulaajaaneq ajornanngippat qajassuartumik ingerlanneqassaaq siunertamillu anguniarneqartumit annertunerussanani.

  Imm. 4.  Kommunalbestyrelsi qulaajaanermut atatillugu tulliuttunik nalilersuissaaq:

1)  Timikkut, tarnikkut, silassorissutsikkut imaluunniit malugisaqarsinnaassutsikkut ataavartumik piginnaanikinnerup annertussusianik.

2)  Imminut isumassorsinnaaneq.

3)  Pissusilersortarneq, atugarissaarneq ineriartornerlu.

4)  Attaveqaqatigiinneq.

5)  Ilaqutariinni pissutsit.

6)  Inuttut atukkani pissutsit inunnillu attaveqarneq.

7)  Peqqissutsikkut pissutsit.

8)  Ilinniagaqarneq, suliffeqarneq suliffissaqarnermullu periarfissat.

9)  Inuiaqatigiinni peqataaneq piginnaasallu.

10)  Inatsisartut inatsisaat manna malillugu imaluunniit inatsisit allat malillugit inummut tapersersuineq.

  Imm. 5.  Naalakkersuisut killilimmik qulaajaanissaq kiisalu qulaajaanissaq pisariaqanngitsoq ersarikkaangat qulaajaasariaqannginneq pillugu aalajangersakkanik erseqqinnerusunik aalajangersaasinnaapput.

 

  § 19.  Kommunalbestyrelsi qulaajaaneq tunngavigalugu tapersersuinissap aallartinneqarnissaanut tunngavissaqarnersoq aalajangiissaaq.

  Imm. 2.  Qulaajaaneq inuup innarluutillip tapersersorneqarnissamik pisariaqartitsisinnaaneranik kommunalbestyrelsip paasisaqarnerata kingorna kingusinnerpaamik qaammatit marluk qaangiunneranni naammassineqassaaq. Qulaajaanerup naammassineranut atatillugu, inuk innarluutilik, tapersersorneqassappat atortorissaarutinilluunniit ikiuutaasunik tunineqassappat aalajangiisoqassaaq kiisalu iliuusissatut pilersaarut allaganngorlugu suliarineqassalluni.

  Imm. 3.  Qulaajaaneq naammassineqarsinnaanngippat imaluunniit imm. 2-mi piffissaliussap aalajangerneqartup iluani iliuusissatut pilersaarusiortoqanngippat, kommunalbestyrelsi utaqqiisaasumik nalilersuissaaq aamma inuk innarluutilik, inummut innarluutilimmut angajoqqaatut oqartussaasut imaluunniit akisussaasoq tamanna pillugu ulloq qulaajaanerup imaluunniit iliuusissatut pilersaarutip naammassineqarfissaatut naatsorsuutigineqarpoq allakkatigut ilisimatinneqassalluni.

 

  § 20.  Tapersersuineq pillugu kommunalbestyrelsi utaqqiisaasumik aalajangiippat qulaajaanerup naammassineqarneranut atatillugu tapersersuineq utaqqiisaasumik aalajangiineq tunngavigalugu aallartinneqartoq ingerlateqqinneqassanersoq atorunnaarsinneqassanersorluunniit pillugu kommunalbestyrelsi isummissaaq. Tassunga atatillugu inuk innarluuteqartoq kiisalu angajoqqaatut oqartussaasup imaluunniit akisussaasup tapersersuineq qanoq isummerfigineraat mianerineqassaaq.

  Imm. 2.  Kommunalbestyrelsi suliani immikkut pisariusuni § 18, imm. 1 malillugu qulaajaanissap ingerlanneqarnissaa pillugu Pissassarfimmut qinnuiginnissinnaavoq.

 

Suliassanik suliarinninnermi piffissaq aamma malitseqartitsineq

 

  § 21. Inatsisartut inatsisaat manna malillugu tapersersorneqarnissaq pillugu kommunalbestyrelsimit aalajangiinissaq siunertaralugu, taamaattoqarpallu suut tapersiissutaassanersut pillugit apeqqutit pillugit pisariaqanngitsumik uninngatitsinani suliarissavai.

  Imm. 2.  Tapersersorneqarnissaq pillugu qinnuteqaatip tiguneqarneraniit, aalajangiinerup pereernissaanut piffissaq qanoq sivisutigissanersoq, piffissamut killiliussanik kommunalbestyrelsi aalajangersaassaaq. Inatsisartut inatsisaanni matumani piffissaliussamut aalajangersaasoqarsimappat tamanna atuutissanngilaq. Piffissamut killissaliussat sivisunerpaamik ukiut sisamakkaarlugit iluarsineqartassapput kommunillu nittartagaatigut tamanut saqqummiunneqassallutik.

  Imm. 3.  Imm. 2 naapertorlugu piffissaliussaq suliami tigussaasumi eqqortinneqarsinnaanngippat, inuk innarluutilik, angajoqqaatut oqartussaasut imaluunniit akisussaasoq, piffissaliussap naannginnerani aalajangiineq qaqugu naatsorsuutigineqassanersoq, kiisalu piffissaliussaq sooq eqqortinneqarsinnaannginnersoq allakkatigut nalunaarfigineqassaaq.

 

  § 22.  Kommunalbestyrelsip tapersorneqarneq imaluunniit najugaqarfissatut neqeroorummi najugaqarnissaq pillugu aalajangiisoqareerpat, tapersersorneqarnermi siunertaasoq suli naammassineqarnersoq ingerlaavartumik malinnaaffigissavaa. Inuk innarluutilik sapinngisamik suleqatigalugu malitseqartitsisoqassaaq.

  Imm. 2.  Naalakkersuisut ingerlaavartumik malitseqartitsineq pillugu malittarisassanik erseqqinnerusunik aalajangersaasinnaapput.

 

Oqaloqatigiinneq

 

  § 23.  §§ 16, 19, 60, 63 imaluunniit 73 malillugit aalajangiisoqannginnerani kommunalbestyrelsip inuk innarluutilik minnerpaamik ataasiarluni oqaloqatigissavaa.

  Imm. 2.  Imm. 1 malillugu kommunalbestyrelsip oqaloqatiginninnermini inuup innarluuteqarnera mianerissavaa aamma oqaloqatigiinneq inuup innarluutillip piumasai tunngavigalugit ingerlatissallugu.

  Imm. 3.  Inuk innarluutilik 18-it inorlugit ukioqarpat imaluunniit nammineersinnaassuseqanngippat imm. 1 malillugu oqaloqatigineqarnera, inuk innarluutilik, taassumunnga angajoqqaatut oqartussaasut imaluunniit akisussaasoq peqataatillugit ingerlanneqassaaq.

  Imm. 4.  Taamaattoq inummut innarluutilimmut mianerisassat tamanna pisariaqartinneqarpat, angajoqqaatut oqartussaasut imaluunniit akisussaasoq akuersiteqqaarnagit imaluunniit najuutsinnagit oqaloqateqarneq ingerlanneqarsinnaavoq.

  Imm. 5.  Angajoqqaatut oqartussaasut imaluunniit akisussaasoq akuersiteqqaarnagit imaluunniit peqataatinnagit oqaloqatigiinneq ingerlanneqassappat, inunnik innarluutilinnik illersuisumik ataatsimiinnermut peqataasussamik toqqaasoqassaaq, tak. § 10.

  Imm. 6.  Inuup inerisimanera piginnaassusialu imaluunniit suliap suunera eqqarsaatigalugit oqaloqatigiinnerup ingerlanneqarnissaa aalajangiisumik naleqqutinngippat, imm. 1 naapertorlugu oqaloqatigiinneq ingerlanneqassanngitsoq kommunalbestyrelsip aalajangersinnaavaa. Oqaloqatigiinneq ingerlanneqarsinnaanngippat, inuup innarluutillip aalajangiinissatut pilersaarutaasumut isumaa allatut pissarsiariniarneqassaaq. Oqaloqatigiinneq ingerlanneqarsimanngippat, tamanna inuup iliuusissatut pilersaarutaani tunngavilersuineq ilanngullugu allanneqassaaq.

 

Iliuusissatut pilersaarut

 

  § 24. Kommunalbestyrelsip inunnut innarluutilinnut iliuusissatut pilersaarut allaganngorlugu suliarissavaa ima pisoqartillugu:

1)  Qulaajaanermut atatillugu, tak. §§ 18, 19 imaluunniit 20.

2)  Kapitalit 4-5 malillugit tapersersorneqarnissap imaluunniit kapitalit 6 7-iluunniit naapertorlugit najugaqarfissatut neqeroorummi najugaqarnissap aallartinnissaa pillugu aalajangiisoqannginnerani.

3)  Kapitali 8 malillugu tapersersorneqarnissap allanngortinneqarnissaa imaluunniit unitsinneqarnissaa pillugit aalajangiisoqannginnerani.

4)  Inatsisartut inatsisaat manna malillugu meeqqap innarluutillip tapersersorneqartup, meeqqat atuarfianni atualernissaa kingusinnerpaamik qaammatit arfinillit sioqqullugit.

5)  Inatsisartut inatsisaat manna malillugu meeqqap innarluutillip tapersersorneqartup, meeqqat atuarfianni atuarnerata naammassinissaa kingusinnerpaamik qaammatit aqqaneq-marluk sioqqullugit.

6)  Inatsisartut inatsisaat manna malillugu meeqqap innarluutillip tapersersorneqartup, 18-inik ukioqalernissaanut kingusinnerpaamik qaammatit aqqaneq-marluk sioqqullugit.

 

  § 25.  Iliuusissatut pilersaarut, § 24 malillugu, inummut innarluutilimmut tunngasuussaaq aamma siunertamit anguniarneqartumit annertunerussanini.

  Imm. 2.  Iliuusissatut pilersaarummi tulliuttuni taaneqartut allassimassapput:

1)  Siunertaq aamma tapersersuinermi anguniagaq.

2)  Anguniagaq imaluunniit anguniakkat anguneqarnissaannut tapersersuineq suna pisariaqarnersoq.

3)  Tapersersuinerup sivisussusissaatut naatsorsuutigineqartoq.

4)  Tapersersuinermut malitseqartitsinissaq, tassunga ilanngullugu malitseqartitsineq qaqugu pisassanersoq.

5)  Inatsisartut inatsisaat manna malillugu aamma inatsisit allat malillugit tapersersuinerit allat ataqatigiinnerat.

6)  Ilaquttat attaveqarfiillu, najugaqariaaseq, ilinniartitaaneq, suliffeqarneq, inuttut ikiorteqarneq, katsorsartinneq aamma atortorissaarutit ikiuutaasut il.il. pillugit pissutsit immikkut ittut allat.

7)  Iliuusissatut pilersaarummut inuup innarluutillip nammineq oqaaseqaatai.

  Imm. 3.  Iliuusissatut pilersaarut sapinngisamik inuk innarluutilik tassungalu akisussaasoq angajoqqaatullu oqartussaasut aamma allat isumassuisui oqaloqatigalugit suleqatigalugillu suliarineqassaaq.

  Imm. 4.  Qulaajaanerup naammassineqarneraniit qaammatip ataatsip ingerlanerani iliuusissatut pilersaarut saqqummiunneqassaaq.

  Imm. 5.  Kapitali 6-7 malillugit najugaqarfissatut neqeroorummi najugaqarnermi iliuusissatut pilersaarutip najugaqarfissatut neqeroorummut tunniunneqarnissaa kommunalbestyrelsip isumagissavaa.

  Imm. 6.  Iliuusissatut pilersaarut inummut innarluutilimmut tassungalu akisussaasumut imaluunniit angajoqqaatut oqartussaasumut tunniunneqassaaq. Kommunalbestyrelsi tunniussinermut atatillugu taassuma imarisai pillugit ilisimatitsissaaq.

 

Paasissutissanik avitseqatigiinneq

 

  § 26.  Najugaqarfissatut neqeroorutip, kommunalbestyrelsip, Naalakkersuisut, ilinniarfiit peqqinnissaqarfiullu suliani tigussaasuni suleqatigiinnermut ilaatillugu, paasissutissat suliap suliarineqarneranut pingaaruteqarpata, paasissutissat inummut tunngasut politiinut ingerlateqqissinnaavaat, tassunga ilanngullugit aamma paasissutissat inummut tunngasut mianernartut, matumani paasissutissat suliap suliarinissaanut pingaaruteqarpata.

  Imm. 2. Inuk suliami pineqartoq, imaluunniit tassunga angajoqqaatut oqartussaasut imaluunniit akisussaasoq akuersiteqqaarlugu taamaallaat paasissutissanik avitseqatigiittoqarsinnaavoq ingerlatitseqqittoqarsinnaallunilu, taamaattoq tak. imm. 3.

  Imm. 3.  Imm. 2 malillugu akuersissut itigartitsissutigineqarpat imaluunniit allanik pissuteqartumik akuersissummik pissarsisoqarsinnaanngippat, kommunalbestyrelsip paasissutissat inummut tunngasut ingerlateqqissinnaavai, tassunga ilanngullugit aamma paasissutissat inunnut tunngasut mianernartut, suliami pissutsit, tassunga ilanngullugit inuup inatsisitigut isumannaatsuunissaata eqqarsaatigineqarnera, erseqqissumik pisariaqartinneqarpat. Ingerlatitseqqiinermut piumasaqaataavoq inuup soqutigisaanik nakkutiginninnissaq, taamaaliornerullu isertuussiinnarnissamik pissuteqarnissamut soqutigisat ersarissumik qaangersimassagai, tassunga ilanngullugit paasissutissat inummut pineqartumut tunngasut.

 

  § 27.  Kommunalbestyrelsip paasissutissat inunnut tunngasut Pissassarfimmut ingerlateqqissinnaavai, tassunga ilanngullugit paasissutissat inunnut tunngasut mianernartut,

§ 13, imm. 1 naapertorlugu Pissassarfik suliaqartillugu, paasissutissat suliap suliarineqarneranut pingaaruteqarpata.

  Imm. 2.  Kommunalbestyrelsip imm. 1 malillugu paasissutissat inummut tunngasut suliami pineqartoq imaluunniit angajoqqaatut oqartussaasoq inummulluunniit akisussaasoq akuersiteqqaarlugu ingerlateqqissinnaavai, taamaattoq tak. imm. 3.

  Imm. 3.  Imm. 2 malillugu akuersissut itigartitsissutigineqarpat imaluunniit allanik pissuteqartumik akuersissummik pissarsisoqarsinnaanngippat, kommunalbestyrelsip paasissutissat inummut tunngasut ingerlateqqissinnaavai, tassunga ilanngullugit aamma paasissutissat inunnut tunngasut mianernartut, suliami pissutsit, tassunga ilanngullugit inuup inatsisitigut isumannaatsuunissaata eqqarsaatigineqarnera, erseqqissumik pisariaqartinneqarpat. Ingerlatitseqqiinermut piumasaqaataavoq inuup soqutigisaanik nakkutiginninnissaq, taamaaliornerullu isertuussiinnarnissamik pissuteqarnissamut soqutigisat ersarissumik qaangersimassagai, tassunga ilanngullugit paasissutissat inummut pineqartumut tunngasut.

 

  § 28.  Kommunalbestyrelsi ulloq unnuarlu neqeroorummut inissinneqarnissaq imaluunniit najugaqarnissaq pillugu aalajangerpat, inummut innarluutilimmut qitiusumik innersuussisarfik aqqutigalugu Namminersorlutik Oqartussat ulloq unnuarlu neqeroorutaanni inissamik utaqqisumut, inissiiviugallartussamik pissarsinissamut kommunalbestyrelsi pisussaaffeqarpoq.

  Imm. 2.  Utaqqiisaasumik inissiivik nammineq angerlarsimaffimmi imaluunniit kommunip najugaqarfissatut neqeroorutaani inissisimasinnaavoq, tassanilu utaqqiisaasumik tapersersuinerit inuup innarluutillip pisariaqartitaanik naammassinnissallutik.

 

Kapitali 4

Tapersersueriaatsit

 

Qanigisat inummik innarluutilimmik paarsinerat

 

  § 29. Kommunalbestyrelsi qanigisamut, inummik innarluutilimmik nammineq angerlarsimaffimmini najugaqartumik aamma inuttut ikiorneqarnissamut paarineqarnissamullu tapersersorneqarnissamut akuerisaasumik, ulluinnarni isumassuinermik isumaginnittumut aningaasaqarnikkut tapersersuissaaq.

  Imm 2.  Imm. 1 malillugu tapersersuineq, kommunalbestyrelsip inummik isumassuisumik atorfinitsitsineratigut pissaaq. Inuup innarluutillip pisariaqartitsinera tunngavigalugu sapaatip akunneranut nalunaaquttap akunneri 40-t angullugit atorfeqartitsiviusussat amerlassusissai, kommunalbestyrelsip aalajangersaaffigissavai.

  Imm.  3.  Naalakkersuisut qanigisamik atorfinitsitsineq akissarsiaqartitsinerlu pillugit malittarisassanik erseqqinnerusunik aalajangersaassapput, tak. imm. 1-2.

 

  § 30.  Kommunalbestyrelsip inuk suliffeqarnermut attuumassuteqartoq inummut innarluutilimmut qanigisaq atorfinitsissinnaavaa, ima pisoqartillugu:

1)  kommunalbestyrelsi ulloq unnuarlu neqeroorummi tulluartumik inissamik utaqqippat imaluunniit qulaajaanerup imaluunniit iliuusissatut pilersaarutip ilaanik amigarpata, aamma

2)  angerlarsimaffiup avataanut utaqqiisaasumik inissinneqarallarnissaq periarfissaappat, aamma

3)  paarsinissaq pillugu pilersitsineq illuatungeriit akornanni isumaqatigiissutaappat, aamma

4)  qanigisamit inuup innarluutillip paarineqarnissaa pillugu akerliinissamut aalajangiisumik mianerisassaqanngitsoq, kommunalbestyrelsip nalilerpagu.

  Imm. 2.  Inuup innarluutillip najugaqarfittut kommunigisaani qanigisaq kommunalbestyrelsimit atorfinitsinneqassaaq.

  Imm. 3.  Qanigisaq inuup innarluutillip paarinissaa siunertaralugu qaammatit arfinillit angullugit atorfinitsinneqarsinnaavoq. Paarsinermut piffissaq qaammatit pingasut angullugit sivitsorneqarsinnaavoq, tamatumunnga pissutsit immikkut ittut tunngavissaqartitsippata, taamaattoq tak. § 31.

  Imm. 4.  Naalakkersuisut qanigisamik atorfinitsitsineq akissarsiaqartitsinerlu pillugit malittarisassanik erseqqinnerusunik aalajangersaassapput, tak. imm. 1.

 

  § 31.  Kommunalbestyrelsi immikkut pisoqartillugu, suliap pineqartup tigussaasumik aamma suliatigut naliliinerup kingorna, § 30 naapertorlugu angerlarsimaffimmi inuup innarluutillip paarineqarnissaanut tapiissutinik akuersissuteqarsinnaavoq § 30, imm. 3 naapertorlugu piffissamit aalajangersarneqartumit sivisunerusumik.

  Imm. 2.  Imm. 1 malillugu tapiissutit aatsaat akuerineqarsinnaapput:

1)  inuup innarluutillip angerlarsimaffimmi paarineqarnissaa naleqqunnerpaatut isigineqarpat, aamma

2)  angerlarsimaffiup avataani paarsinissamut periarfissanik naleqquttunik allanik nassaassaqanngitsoq pillugu inerniliiffiusumik suliatigut tunngavilersukkamik naliliinermik peqarpat.

  Imm. 3. Imm. 1 malillugu tapiissutit sivitsorneqarnissaat piffissamut qaammatit aqqaneq-marluk angullugit tunniunneqarsinnaapput. Imm. 2-mi piumasaqaatit suli naammassineqarsimappata sivitsuinissat taamaallaat akuerineqarsinnaapput.

 

Tapersersortitut ikiorti

 

  § 32.  Inummut innarluutilimmut, timikkut, tarnikkut, silassorissutsikkut imaluunniit malugisaqarsinnaassutsikkut annertuumik piginnaanikinneruneq pissutigalugu, nammineq angerlarsimaffimmini, najugaqaqatigiiffimmi, najugaqarfimmi illersugaasumi imaluunniit utoqqarnut angerlarsimaffimmi nammineersinnaanissamut isumaginninnikkut perorsaasumit tapersersorneqarnissamik pisariaqartitsisumut, tapersersortitut ikiortimik kommunalbestyrelsi neqerooruteqassaaq.

  Imm  2. Naalakkersuisut tapersersortitut ikiortinut malittarisassanik erseqqinnerusunik aalajangersaassapput, tak. imm. 1.

 

Ingiallorteqarneq

 

  § 33.  Kommunalbestyrelsip inummut innarluutilimmut innarluuteqarnini pissutigalugu kisimiilluni angalaarsinnaanngitsumut qaammammut nalunaaquttap akunneri 15-it angullugit ingiallorteqarnissaq neqeroorutigissavaa. Kommunalbestyrelsip qaammammut nalunaaquttap akunneri 15-it angullugit ingiallorteqarnissaq pisariaqartinneqartoq nalilerneqarpat neqeroorutigissavaa.

  Imm. 2. Kommunalbestyrelsi Kalaallit Nunaanni angerlarsimaffiup avataani sammisassanut aaqqissuussanullu ingerlanneqartuni ingiallorteqarnermik neqerooruteqarsinnaavoq.

  Imm. 3. Naalakkersuisut ingiallorteqarneq pillugu malittarisassanik erseqqinnerusunik aalajangersaassapput, tak. imm. 1 aamma 2.

 

Nuunnermut ikiorsiineq

 

  § 34.  Kommunalbestyrelsi meeqqamut innarluutilimmut angajoqqaatut oqartussaasumut imaluunniit akisussaasumut najugaqarfimmik nuunnermut aningaasartuutit matussusernissaannut aningaasaqarnikkut tapiissuteqarnissamik neqerooruteqarsinnaavoq, ima pisoqartillugu:

1)  meeqqap tapersersorneqarnissamik aamma isumassorneqarnissamik pisariaqartitai angajoqqaatut oqartussaasut imaluunniit akisussaasup maannakkut najugaanni naammassineqarsinnaanngippata imaluunniit ajornakusoorpata,

2)  Inatsisartut inatsisaat manna malillugu meeqqap tapersersorneqarnissamik pisariaqartitai, siunissami najugaqarfissatut kissaatigineqartumi pitsaanerusumik naammassineqarsinnaappata, aamma

3)  angajoqqaatut oqartussaasunit imaluunniit akisussaasumit nuunnissaq kissaatigalugu erseqqissumik oqaatigineqarpat.

  Imm. 2.  Ulloq unnuarlu neqeroorummut innersuussineq pillugu aalajangiisoqarpat aamma angajoqqaatut oqartussaasut imaluunniit akisussaasoq ulloq unnuarlu neqeroorutip inissisimaffigisaani illoqarfimmut nuussinnaanissaat meeqqamut pitsaanerpaatut nalilerneqarpat, meeqqamut innarluutilimmut angajoqqaatut oqartussaasumut imaluunniit akisussaasumut najugaqarfimmik nuunnermut aningaasartuutit matussusernissaannut kommunalbestyrelsi ilanngullugu aningaasaqarnikkut tapiissuteqarsinnaavoq. Imm. 1, nr. 1-3-mi piumasaqaatit naammassineqassapput.

  Imm. 3. Kommunalbestyrelsi inunnut innarluutilinnut 18-it sinnerlugit ukiulinnut najugaqarfimmik nuunnermut aningaasartuutit matussusernissaannut aningaasaqarnikkut tapiissuteqarsinnaavoq, ima pisoqartillugu:
1) inuup innarluutillip tapersersorneqarnissamik pisariaqartitai maannakkut najugaqarfimmi naammassineqarsinnaanngippata imaluunniit ajornakusoorpata,
2) Inatsisartut inatsisaat manna malillugu inuup innarluutillip tapersersorneqarnissamik pisariaqartitai siunissami najugaqarfissatut kissaatigineqartumi pitsaanerusumik naammassineqarsinnaappata, aamma
3) inummit innarluutilimmit imaluunniit angajoqqaatut akisussaasumit nuunnissaq kissaatigalugu erseqqissumik oqaatigineqarpat.

  Imm. 4.  Kommunalbestyrelsi inummut innarluutilimmut najugaqarfimmik nuunnermut aningaasartuutit matussusernissaannut aningaasaqarnikkut tapiissuteqarnissamik neqerooruteqassaaq, inunnut innarluutilinnut kommunip avataani najugaqatigiiffimmut imaluunniit najugaqarfimmut illersugaasumut neqerooruteqartoqartillugu, tak. § 34.

  Imm. 5. § 34, imm. 3 malillugu tapiissuteqarneq nuunnermut ikiorsiineq pillugu inatsisini allani aalajangersakkanut salliutinneqassaaq.

 

Eqimattanut tapersersuineq

 

  § 35.  Inunnut timikkut imaluunniit tarnikkut piginnaasakinnerusunut eqimattanut tapersersorneqarnissaq kiisalu eqimattanut sungiusarneqarnissaq aamma piginnaasanik ineriartortitsinermut tapersersorneqarnissaq pillugit kommunalbestyrelsi aallartitsisinnaavoq imaluunniit neqerooruteqarsinnaalluni.

  Imm. 2.  Imm. 1 malillugu ikiorsiissutinut piumasaqaataavoq, neqeroorutinut taamaattunut peqataanerup ikiorneqartup maannakkumut piginnaasaata qaffasissusaanut pitsanngoriartitsisinnaasutut imaluunniit piginnaasakinnerup ajorseriarnissaanut pitsaaliorneqarsinnaasutut kommunalbestyrelsip naliliiffigissagai.

  Imm. 3.  Eqimattanut tapersersuinermut, inuup ilaqutai eqimattanut ilaatinneqarlutik, tapiissutinik neqeroorutinut ikiorsiisoqarsinnaavoq.

  Imm. 4.  Naalakkersuisut eqimattanut tapersersuinermut neqeroorutit pillugit erseqqinnerusunik malittarisassanik aalajangersaasinnaapput.

 

Inunnut ataasiakkaanut piffissami killilikkami tapersersuineq

 

  § 36.  Inunnut timikkut imaluunniit tarnikkut piginnaasakinnerusunut piffissami killilikkami inunnut ataasiakkaanut tapersersorneqarnissaq kiisalu piffissami killilikkami inunnut ataasiakkaanut sungiusarneqarnissaq aamma piginnaasanik ineriartortitsinissamut tapersersorneqarnissaq pillugu neqeroorutinik kommunalbestyrelsi aallartitsisinnaavoq imaluunniit tapiissuteqarsinnaalluni. Neqeroorneq qaammatit arfinillit angullugit ataasiarluni tunniunneqarsinnaavoq.

  Imm. 2.  Imm. 1 malillugu ikiorsiissutinut piumasaqaataavoq, neqeroorutip ikiorneqartup maannakkumut piginnaasaata qaffasissusaanut pitsanngoriartitsisinnaasutut imaluunniit piginnaasakinnerup imaluunniit inuttut ajornartorsiutit ajorseriarnissaannut pitsaaliorneqarsinnaasutut kommunalbestyrelsip naliliiffigissagai.

  Imm. 3.  Naalakkersuisut inunnut ataasiakkaanut piffissami killilikkami tapersersuinermut neqeroorutit pillugit erseqqinnerusunik malittarisassanik aalajangersaasinnaapput.

 

Oqilisaassineq

 

  § 37. Kommunalbestyrelsi inummut innarluutilimmut oqilisaassinissaq pillugu najugaqarnissamut neqerooruteqassaaq, ima pisoqartillugu:

1)  Inuup innarluutillip isumassorneqarnissaanut suliassaq angajoqqaatut oqartussaasunut, qanigisaanut allanut imaluunniit ilaqutariinnut paarsisartunut isumassuinermik isumaginnittunut annertuumik suliaqarnerulersitsippat imaluunniit annertuumik tarnikkut artukkiinerulersitsippat, aamma

2)  angajoqqaatut oqartussaasut, qanigisat allat imaluunniit ilaqutariit paarsisartut isumassuinermik suli ingerlatsisinnaanissaannut oqilisaassineq piumasaqaataappat.

  Imm. 2.  Inuk innarluutilik imm. 1 naapertorlugu oqilisaassinissaq pillugu najugaqarnissamut neqeroorfigineqartillugu, najugaqarfimmi atugassarititaasut pillugit kommunalbestyrelsi oqilisaassinermut allakkatigut isumaqatigiissuteqassaaq.

  Imm. 3.  Kommunalbestyrelsi oqilisaassinissaq pillugu najugaqarnissamut aalajangiinermi ilaqutariinnut paarsisartunut imaluunniit ulloq unnuarlu neqeroorummut akissarsianik akuersissuteqassaaq. Inuup oqilisaassinerup nalaani najugaqarnerani pilersorneqarneranut akiliineq akissarsianut ilaatinneqanngilaq.

  Imm. 4.  Oqilisaassinissaq pillugu najugaqarnermut atatillugu pilersuinermut akiligassat pilersuisussaatitaasumit akilerneqassapput.

  Imm. 5.  Inuk innarluutilik aamma ilaqutariit paarsisartut imaluunniit ulloq unnuarlu neqeroorut pineqartup kommunimi angerlarsimaffigisami kommunalbestyrelsi suleqatigalugu pilersuinerup qanoq akilerneqarnissaa pillugu isumaqatigiissuteqassapput. Inuk innarluutilik nammineersinnaanngippat, angajoqqaatut oqartussaasoq imaluunniit akisussaasoq inuk innarluutilik sinnerlugu isumaqatigiissummik atsiussaaq.

  Imm. 6.  Naalakkersuisunit oqilisaassinermi akissarsiat aalajangersarneqassapput aamma akigititat atuutilinnginnerini ukioq sioqqullugu kingusinnerpaamik novembarip 15-ianni nittartakkatigut nalunaarutit.gl-imi saqqummiunneqassallutik.

 

Tapersersuinermi iliuusissat allat

 

  § 38.  Tapersersueriaatsinut iliuusissat sorliit kommunalbestyrelsip neqeroorutigisinnaanerai imaluunniit neqeroorutigissanerai pillugit Naalakkersuisut malittarisassanik erseqqinnerusunik aalajangersaassapput, ilaatigut:

1)  Atortorissaarutit ikiuutaasut.

2)  Inigisap allanngortinneqarnera.

3)  Qamutit motoorillit, biilit minillugit.

4)  Ataatsimoortunik angallassinermik aaqqissuussineq.

5)  Aningaasartuutaanerusut uppernarsaatillit.

6)  Suliffissaqartitsinermut, sammisassaqartitsinermut katerisimaartitsinermullu neqeroorutit.

7)  Pikkorissaanerit ilinniartitsinerillu, tassunga ilanngullugit qanigisat.

8)  Sungiusarneq.

 

Pissassarfimmi piginnaanngorsarneq aamma piginnaanngorsaqqinneq

 

  § 39.  Inuup innarluutillip Pissassarfimmi piginnaanngorsarneqarnissaanik aamma piginnaanngorsaqqinneqarnissaanik, tamanna inuup piginnaasaata qaffasissusaanik attassiinnarnissamut annertuumik pingaaruteqartoq isigineqarpat, neqerooruteqarnissaq pillugu kommunalbestyrelsi aalajangiisinnaavoq, tassunga ilanngullugu piffissami killilimmi najugaqarneq.

 

Kapitali 5

Malitseqartitsineq

 

  § 40.  Inatsisartut inatsisaat manna malillugu inuusuttoq innarluutilik tapersersorneqartoq 16-inik ukioqalerpat, kommunalbestyrelsi malitseqartitsinissamut piareersaassaaq.

  Imm. 2.  Naalakkersuisut malitseqartitsinissaq, tassunga ilanngullugit malitseqartitsinerup annertussusaa, sivisussusaa suussusaalu, pillugu malittarisassanik erseqqinnerusunik aalajangersaasinnaapput.

 

  § 41.  § 40 malillugu piareersaanissaq suliassaqarfinnik akimuilluni tamakkiisumillu isiginnittuulluni suliaassaaq aamma inuusuttumik taassumalu angajoqqaatut oqartussaasunik imaluunniit akisussaasumik oqaloqateqarluni ingerlanneqassalluni. Piareersaaneq pisuni ataasiakkaani siunertarineqartunit annertunerussanngilaq.

  Imm. 2.  § 40 malillugu piareersaaneq inuusuttumut tunngatillugu pissutsit tulliuttut pillugit isumaliuutinik tunngaveqassaaq:

1)  Piginnaasakinnerup imaluunniit nappaatip kingunerisaanik suliniuteqarnissamut tapersersuinissamiulu pisariaqartitsineq.

2)  Ilinniartitaaneq.

3)  Suliffeqarneq pilersuinissamullu tunngavissaqarneq.

4)  Ineqarnermi pissutsit.

5)  Inuuniarnikkut atugarisat.

6)  Pissutsit attuumassutillit allat.

  Imm. 3.  Imm. 1 malillugu ikaarsaarnissamut piareersaaneq, malitseqartitsineq pillugu kommunalbestyrelsi aalajangiineratigut, naammassineqassaaq. Piffissaagallartillugu aalajangiisoqassaaq, taamaalilluni suliniut inuusuttup 18-inik ukioqalernerata kingorna ingerlaannaq aallartinneqarsinnaalluni. Suliniut inuup iliuusissatut pilersaarutaani allanneqassaaq, tak. §§ 24-25.

 

Kapitali 6

Najugaqarfissatut neqerooruteqarneq

 

Najugaqaqatigiiffiit

 

  § 42.  Inunnut innarluutilinnut najugaqaqatigiiffinnik kommunalbestyrelsi pilersitsassaaq ingerlatsissallunilu.

  Imm. 2.  Naalakkersuisut kommunalbestyrelsimut najugaqaqatigiiffinnik pilersitsinissamik peqqusisinnaapput, ima pisoqartillugu:
1) inuit marluk amerlanerusulluunniit 18-it sinnerlugit ukiullit utoqqaanerusulluunniit, najugaqaqatigiiffimmi ineqarnissamut pisinnaatitaasut, kommunimi najugaqarpata, aamma
2) pineqartut ataatsimoorlutik najugaqatigiissinnaappata.

  Imm. 3. Naalakkersuisut inunnut innarluutilinnut najugaqaqatigiiffiit aamma najugaqaqatigiiffimmi ineqarnissamik neqerooruteqarneq pillugit malittarisassanik erseqqinnerusunik aalajangersaassapput.

 

Najugaqarfiit illersugaasut

 

  § 43.  Kommunalbestyrelsi inunnut innarluutilinnut najugaqarfinnik illersugaasunik pilersitsissaaq ingerlatsissallunilu. Najugaqarfik illersugaasoq tassaavoq inunnut innarluutilinnut arlalinnut, ulloq unnuarlu tamaat tapersersorneqarnissamik neqeroorfigineqartussanut, najugaqarfissamik neqeroorut.

  Imm. 2.  Najugaqarfimmi illersugaasumi ineqarnissamut pisinnaatitaasut inuit marluk arlallilluunniit, 18-it qaangerlugit ukiullit utoqqaanerusulluunniit kommuni kommunimi angerlarsimaffigisamiippat, Nalaakkersuisut kommunalbestyrelsi najugaqarfimmik illersugaasumik pilersitseqqullugu peqqusinnaavaat.

  Imm. 3.  Naalakkersuisut inunnut innarluutilinnut najugaqarfiit illersugaasut aamma najugaqarfimmik illersugaasumik ineqarnissamik neqerooruteqarneq pillugit malittarisassanik erseqqinnerusunik aalajangersaassapput.

 

Kommunit najugaqarfissamik neqerooruteqarneranut ataatsimut aalajangersakkat

 

  § 44.  Inummut kommunimi allami inissisimasumi najugaqaqatigiiffimmi imaluunniit najugaqarfimmi illersugaasumi najugaqarnissaq pillugu neqerooruteqartoqassasoq kommunalbestyrelsi aalajangiippat, inuup najugaqaqatigiiffimmi imaluunniit najugaqarfimmi illersugaasumi najugaqarnissaanut aningaasartuutit kommunalbestyrelsip akilissavai.

 

  § 45.  Najugaqatigiiffinni aamma najugaqarfinni illersugaasuni najugaqartunut tunngatillugu tamakkiisumik sammivilimmik suliniuteqarnermut ataqatigiissaarinissamut kommunimi najugaqaqatigiiffinnit aamma najugaqarfinnit illersugaasunit tamanit ilaannilluunniit sinniisuunik aamma sinniisunik allanik peqataatinneqarnissamut attuumassuteqartutut isigineqartunik inuttalerneqartumik kommunalbestyrelsi ataatsimiititaliamik pilersitsisinnaavoq.

  Imm. 2. Oqartussat peqataasut suliani tigussaasuni suleqatigiinnerup ilaatut suliap suliarineqarneranut pingaaruteqarpata, paasissutissanik inummut tunngasunik avitseqatigiissinnaapput, tassunga ilannngullugit aamma paasissutissat inummut tunngasut mianernartut, taamaattoq tak. imm. 3.

  Imm. 3. Paasissutissanik oqaaseqatigiit siulliit malillugit aatsaat avitseqatigiissutigineqassapput, inuk suliami pineqartoq imaluunniit inummut suliamut pineqartumut angajoqqaatut oqartussaasut imaluunniit akisussaasoq akuersippata, taamaattoq tak. imm. 4.

  Imm. 4.  Imm. 3 malillugu akuersissut tunniunneqanngippat imaluunniit pissarsiarineqarsinnaanngippat, paasissutissat inummut tunngasut, tassunga ilanngullugit paasissutissat inummut tunngasut mianernartut, tamanna inuup innarluutillip soqutigisaanik qulakkeerinninnissaq, taamaaliornerullu isertuussiinnarnissamik tunngaveqarnissamut soqutigisat ersarissumik qaangersimassagai pisariaqartutut naliliiffigineqarpat aatsaat avitseqatigiissutigineqarsinnaapput.

 

Qitiusumik innersuussisarfik

 

  § 46. Naalakkersuisut qitiusumik innersuussisarfimmik (Qitiusumik Innersuussisarfik) ingerlatsissapput.

  Imm. 2.  Naalakkersuisut qitiusumik innersuussisarfimmut malittarisassanik aalajangersaasinnaapput, tassunga ilanngullugit ulloq unnuarlu neqeroorutinut aamma Nuna Tamakkerlugu Innarluutilinnut Sullissivimmut innersuussisarnerit.

 

§ 47.  Inunnut innarluutilinnut ulloq unnuarlu neqeroorutini inissat pisariaqartinneqartut amerlassusilernissaat Naalakkersuisut isumagissavaat.

 

Ulloq unnuarlu neqeroorutit aamma ulloq unnuarlu neqeroorutit matoqqasut

 

  § 48.  Naalakkersuisut inunnut innarluutilinnut ulloq unnuarlu neqeroorutinik pilersitsissapput ingerlatsissallutillu, tassunga ilanngullugit ulloq unnuarlu neqeroorutit matoqqasut.

   Imm. 2. Kommunalbestyrelsi Naalakkersuisut akuersissuteqarnerisigut inunnut innarluutilinnut ulloq unnuarlu neqeroorutinik pilersitsisinnaavoq ingerlatsissinnaallunilu, tassunga ilanngullugit ulloq unnuarlu neqeroorutit matoqqasut.

  Imm. 3. Ulloq unnuarlu neqeroorut tassaavoq najugaqarfissamik neqeroorut, inuit innarluutillit ukiup ullui tamakkerlugit ulloq unnuarlu tapersersorneqarlutik, paaqqutarineqarlutik aamma isumassorneqarlutik najugaqarfiat.

  Imm. 4.  Naalakkersuisut ulloq unnuarlu neqeroorutit aamma ulloq unnuarlu neqeroorutit matoqqasut pillugit malittarisassanik erseqqinnerusunik aalajangersaassapput.

 

  § 49.  Naalakkersuisut inunnut innarluutilinnut ulloq unnuarlu neqeroorutini aamma ulloq unnuarlu neqeroorutini matoqqasuni Naalakkersuisunit ingerlanneqartuni najugaqartunut, suliffeqartitsinermik, sammisaqartitsinermik katerisimaartitsinermillu illersugaasunik neqerooruteqassapput.

 

  § 50.  Kommunalbestyrelsi inummut innarluutilimmut, pineqartoq annertuumik timikkut tarnikkulluunniit piginnaanikinnerunini pissutigalugu ulluinnarni annertuumik imaluunniit immikkuullarissumik tapersersorneqarnissamik pisariaqartitsippat imaluunniit paaqqutarineqarnissamik, isumassorneqarnissamik katsorsarneqarnissamilluunniit pisariaqartitsippat, taakkulu pisariaqartitat allatigut matussuserneqarsinnaanngippata, ulloq unnuarlu najugaqarfimmik Naalakkersuisunit imaluunniit kommunalbestyrelsimit ingerlanneqartumit neqerooruteqassaaq.

 

Ulloq unnuarlu neqeroorummi matoqqasumi inissiineq

 

  § 51.  Inummik innarluutilimmik Kalaallit Nunaanni imaluunniit Danmarkimi ulloq unnuarlu neqeroorummi matoqqasumi inissiisoqarsinnaavoq, imatut pisoqarpat:

1)  Kalaallit Nunaanni eqqartuussisarnermik inatsimmi § 358, aamma § 361, imm. 2, nr. 3 naapertorlugit inummik innarluutilimmik angerlarsimaffimmi imaluunniit paaqqinniffimmi tulluartumi tigusarinninnerup atuutiinnarnissaa pillugu eqqartuussivik aalajangiippat.

2)  Kalaallit Nunaanni eqqartuussisarnermik inatsimmi § 359 aamma § 361, imm. 2, nr. 3 naapertorlugit inuup innarluutillip angerlarsimaffimmi imaluunniit paaqqinniffimmi tulluartumi tigummigallarneqarnissaa pillugu eqqartuussivik aalajangiippat.

3)  Kalaallit Nunaannut Pinerluttulerinermut inatsimmi kapitali 32 imaluunniit 33 naapertorlugit pineqaatissiineq pillugu eqqartuussivik aalajangiippat.

  Imm. 2.  Inuup innarluutillip tigusarineqarnerata nalaani kommunimi najugaqarfigisaani kommunalbestyrelsi, pisuni imm. 1, nr. 1-imi ilaatinneqartuni, politiinit isumannaallisaanermut tunngatillugu illersorneqarsinnaasutut nalilerneqartumik, angerlarsimaffiup avataani inissiiffissamik sapinngisamik piaarnerpaamik pissarsissaaq.

  Imm. 3.  Inuup innarluutillip tigusarineqarnerata nalaani kommunimi najugaqarfigisaani kommunalbestyrelsi, pisuni imm 1, nr 2-mi ilaatinneqartuni, politiinit isumannaallisaanermut tunngatillugu illersorneqarsinnaasutut nalilerneqartumik, angerlarsimaffiup avataani inissiiffissamik piaarnerpaamik, taamaattoq kingusinnerpaamik nalunaaquttap akunnerisa 72-it iluanni, pissarsissaaq.

  Imm. 4.  Naalakkersuisut Kalallit Nunaannut Pinerluttulerinermut inatsimmi § 240, imm. 2-mi taaneqartoq isumaginnittoqarfiup iluani oqartussat eqqartuussisussaanersut pillugit malittarisassanik erseqqinnerusunik aalajangersaassapput.

 

  § 52.  Kalaallit Nunaannut Pinerluttulerinermut inatsimmi § 234 naapertorlugu Kalaallit Nunaanni Parnaarussivinni aqutsisut angerlarsimaffimmi imaluunniit paaqqinniffimmi naleqquttumi inissiinissamik aalajangiippata, inuit innarluutillit ulloq unnuarlu neqeroorummi matoqqasumi inissinneqarsinnaapput.

 

Ineriartortitsinermut pilersaarut aamma killiffimmik nalunaarusiaq

 

  § 53.  Ulloq unnuarlu neqeroorummi aqutsisut §§ 24-25 naapertorlugit iliuusissatut pilersaarut aallaavigalugu, ulloq unnuarlu neqeroorummi najugaqarnerup aallartinneraniit kingusinnerpaamik qaammatit pingasut qaangiunneranni tamatumalu kingorna minnerpaamik ukiumut ataasiarluni, inuup innarluutillip ineriartortinnissaanut pilersaarusiussapput.

  Imm. 2.  Imm. 1 naapertorlugu ineriartortitsinermut pilersaarummi ulloq unnuarlu neqeroorummi najugaqarnermi siunertaq anguniakkallu aallaavigalugit perorsaanermik suliaqarneq iliuusissatut pilersaarutip anguniagaata anguneqarnissaanut qulakkeerinnittussaq allaaserineqassaaq.

 

  § 54.  Ulloq unnuarlu neqeroorummi aqutsisut § 84 malillugu kommunalbestyrelsip inunnik nakkutilliineranut atugassamik §§ 24-25 naapertorlugit iliuusissatut pilersaarummut aamma § 53 naapertorlugu ineriartortitsinissamut pilersaarummut attuumassuteqarneq isigalugu inuup innarluutillip atugarissaarnera ineriartorneralu pillugit killiffimmik nalunaarusiatigut kommunalbestyrelsi ilisimatissavaat.

  Imm. 2.  Killiffimmik nalunaarusiat ulloq unnuarlu neqeroorummi najugaqarnerup aallartinnerata kingorna kingusinnerpaamik qaammatit pingasut qaangiunneranni kommunalbestyrelsinut nassiunneqassapput. Tamatuma kingorna killiffimmik nalunaarusiat imatut nassiunneqassapput:

1)  Inunnut innarluutilinnut 18-it inorlugit ukiulinnut, ukiup affaanut ataasiarluni.

2)  Inunnut innarluutilinnut 18-inik ukiulinnut utoqqaanerusunullu, ukiumut ataasiarluni.

  Imm. 3.  Imm. 2 naapertorlugu ulloq unnuarlu neqeroorut killiffimmik nalunaarusianik nassiussinerup saniatigut, inuk peqqissutsimigut inuttullu atukkatigut pissutsit annertuumik allanngorpata kommunalbestyrelsimut ilisimatitsissaaq.

 

Ukiumoortumik nalunaarusiaq

 

  § 55.  Naalakkersuisut Inatsisartut upernaakkut ataatsimiinnerannut atatillugu Inatsisartunut ukiumoortumik ataatsimoortumik nalunaarusiussapput. Ukiumoortumik nalunaarusiami ulloq unnuarlu neqerooruteqarnermut suliassaqarfimmi maannakkorpiaq inissisimaffik allaatigineqassaaq, tassunga ilanngullugit ukiumi qaangiuttumi sammisat unammilligassallu pingaarnerit.

  Imm. 2.  Ulloq unnuarlu neqeroorutini aqutsisut Inatsisartut upernaakkut ataatsimiinnissaat kingusinnerpaamik qaammat ataaseq sioqqullugu ukiumoortumik nalunaarusiamik Naalakkersuisunut tunniussisassapput.

  Imm. 3.  Naalakkersuisut ukiumoortumik nalunaarusiornermut malittarisassanik erseqqinnerusunik aalajangersaasinnaapput.

 

Periusissiorneq

 

  § 56.  Naalakkersuisut ukiut marlukkaarlugit ulloq unnuarlu neqerooruteqarnermut suliassaqarfimmi ineriartortitsinermut nuna tamakkerlugu periusissiamut siusinnerusumut malitseqartitsisumik periusissiamik suliaqassapput.

  Imm. 2.  Periusissiami makku pineqassapput:

1)  Periusissiamut siusinnerusumut malitseqartitsineq.

2)  Ulloq unnuarlu neqerooruteqarnermik pilersitsineq matusinerlu.

3)  Ulloq unnuarlu neqeroorutini ataasiakkaani sullinniakkat kiisalu allannguutissatut kissaatit.

4)  Ulloq unnuarlu neqeroorutinut innersuussisarneq pillugu kommuninik suleqateqarneq, tassunga ilanngullugit najugaqaqatigiiffinnik aamma najugaqarfinnik illersugaasunik suleqateqarneq.

  Imm. 3.  Naalakkersuisut periusissiamik suliaqarnerminni ulloq unnuarlu neqeroorutini pisortat, soqutigisaqaqatigiiffiit attuumassuteqartut aamma innarluutillit peqatigiiffii kiisalu kommunalbestyrelsit ilanngutitissavaat.

 

Kapitali 7

Kalaallit Nunaata avataani najugaqarfissamik neqeroorutit

 

  § 57.  Kommunalbestyrelsip inuit innarluutillit, §§ 42, 43 imaluunniit 48 naapertorlugit najugaqarfissatut neqeroorummik neqeroorfigineqartut, Kalaallit Nunaanni najugaqarfissatut neqeroorummi najugaqarnissamik neqeroorfigineqarnissaat qulakkiissavaa, taamaattoq tak. imm. 2.

  Imm. 2.  Inuup pisariaqartitai Kalaallit Nunaanni naammassineqarsinnaanngippata aamma Kalaallit Nunaanni naleqquttumik tapersersuinissamut periarfissaqanngilluinnarpat, Naalakkersuisut qaqutigoortumik siumoortumillu akuersinerat tunngavigalugu Kalaallit Nunaata avataani Naalagaaffeqatigiinnerullu iluani najugaqarfissatut neqeroorummik piffissami killilimmi neqeroorutigineqassaaq.

  Imm. 3.  Naalakkersuisunut inassuteqaat tulliuttunik imaqassaaq:

1)  Suliamik saqqummiineq.

2)  Iliuusissatut pilersaarut.

3)  Akuersinermut uppernarsaat.

4)  Kommunalbestyrelsimiit akuersinermut allakkat kiisalu aalajangiinermut allakkat.

5)  Oqaaseqaatit nalunaarusiallu attuumassuteqartut.

6)  Piginnaasat pillugit immersuiffik imaluunniit qulaajaaneq.

7)  Danmarkimi oqartussaniit attuumassuteqartuniit tigusaqarnermik allakkat imaluunniit najugaqartitsinissamik allakkat.

8)  Nakorsap imaluunniit tarnip pissusaanik ilisimasallip misissuinerat. Misissuineq piffissami inuup Kalaallit Nunaata avataani inissinneqarnissaanik inassuteqaateqarnermiit sivisunerpaamik ukiunik pingasunik pisoqaassuseqassaaq.

9)  Inuup pilersorneqarnissamut tunngaveqarneranik allaatiginninneq.

  Imm. 4.  Naalakkersuisut Kalaallit Nunaata avataani najugaqarfissatut neqeroorummi najugaqarneq pillugu malittarisassanik erseqqinnerusunik aalajangersaasinnaapput, tak. imm. 1.

 

  § 58.  Kommunalbestyrelsi Kalaallit Nunaanni najugaqarfissatut neqeroorummik naleqquttumik nassaarpat, imaluunniit Kalaallit Nunaata avataani utaqqiisaasumik najugaqarneq unitsinneqarpat, kommunalbestyrelsip inummut innarluutilimmut Kalaallit Nunaanni naleqquttumik najugaqarfissamik neqeroorut aamma tapersersuineq neqeroorutigissavai.

 

  § 59.  Kommunalbestyrelsip Kalaallit Nunaanni ingerlanneqarsinnaanngitsumik innarluutaanut atatillugu piginnaanngorsarnissamik pisariaqartitsippat imaluunniit piginnaanngorsaqqinnissamik suliniuteqarfigineqarnermik pisariaqartitsippat, inuk innarluutilik Kalaallit Nunaata avataani aamma Naalagaaffeqatigiinnerup iluani ulloq unnuarlu neqeroorummi, efterskolemi neqeroorummiluunniit assigusumi piffissami killilikkami najugaqarnissaanik neqeroorfigisinnaavaa. Kalaallit Nunaata avataani aamma Naalagaaffeqatigiinnerup iluani najugaqarnissaq pillugu najugaqarfissamik neqerooruteqarneq Naalakkersuisut siumut akuersinissaannik piumasaqaateqarpoq.

  Imm. 2.  Naalakkersuisut Kalaallit Nunaata avataani utaqqiisaasumik najugaqarneq pillugu malittarisassanik erseqqinnerusunik aalajangersaasinnaapput, tak. imm. 1.

 

Kapitali 8

Tapersersuinerup aamma najugaqarfissamik neqeroorutip allanngortinneqarneri unitsinneqarnerilu

 

  § 60.  Kommunalbestyrelsip najugaqarfissatut neqeroorummi najugaqarnerup unitsinneqarnissaa imaluunniit najugaqarfissatut neqeroorummut allamut nuunnissaq pillugit aalajangiisoqartinnagu makkua qulakkiissavai:

1)  inuup najugaqarfissatut neqeroorummit angerlartinneqareernerata imaluunniit najugaqarfissatut neqeroorummut allamut nuunneqarnerata kingorna inuk eqqortumik tapersersorneqassasoq,

2)  inuup najugaqarfissatut neqeroorummit angerlartinneqareernerata imaluunniit najugaqarfissatut neqeroorummut allamut nuunneqarnerata kingorna inuup tapersersorneqarneranut iliuusissatut pilersaarummik suliaqartoqassasoq,

3)  inuk taassumalu angajoqqaatut oqartussaq imaluunniit akisussaasoq oqaloqatigineqassasut, aamma

4) najugaqarfissatut neqeroorut allakkatigut oqaaseqaateqartinneqassasoq, najugaqarfissatut neqeroorutip najugaqarfissatut neqeroorummik unitsitsineq pillugu aalajangiinissatut pilersaarutaasoq kiisalu inuup innarluutillip atugarissaarnera ataatsimut isigalugu tapersersorneqarnissamullu nangittumik pisariaqartitsinera pillugit killiffianik imaqartussaq.

  Imm. 2. Kommunalbestyrelsip, meeqqap innarluutillip ulloq unnuarlu neqeroorummi najugaqarnerata unitsinneqarnissaa pillugu aalajangiisoqannginnerani, imm. 2-mi piumasaqaatit saniatigut qulakkiissavai:

1)  meeqqamut, angajoqqaatut oqartussaasunut imaluunniit akisussaasumut aamma meeqqap attaveqarfigisartagaanut, piffissami ulloq unnuarlu neqeroorummi najugaqarnerup unitsinneqarnissaa sioqqullugu aamma kingorna, tapersersuisinnaaneq piareersarneqassasoq, aamma

2)  ulloq unnuarlu neqeroorummi najugaqarnerup unitsinneqarnissaa pillugu meeraq aamma angajoqqaatut oqartussaasut imaluunniit akisussaasoq aamma qanigisaasut allat piareersarluarneqassasut.

  Imm. 3.  Imm. 1, nr. 4 naapertorlugu najugaqarfissatut neqeroorut, inuk najugaqarfissatut neqeroorummi najugaqaannassasoq inassuteqaatigalugu oqaaseqaateqarpat, § 13, imm. 1, nr. 7 naapertorlugu kommunalbestyrelsip Pissassarfik oqaaseqaateqartissavaa. Najugaqarfissatut neqeroorummi najugaqarnerup unitsinneqarnissaa pillugu kommunalbestyrelsip aalajangiinnginnermi Pissassarfiup oqaaseqaataata tigunissaa utaqqissavaa.

 

  § 61. § 63, imm. 1 naapertorlugu najugaqarfissatut neqeroorummi najugaqarnermik unitsitsineq imaluunniit najugaqarfissatut neqeroorummut allamut nuunneq sivikinnerpaamik sapaatit akunneri aqqaneq-marluk sioqqullugit nalunaarutigineqassaaq, ima pisoqanngippat:

1)  inuup innarluutillip taassumunnga angajoqqaatut oqartussaasunit imaluunniit akisussaasumit najugaqarnerup unitsinneqarnissaa erseqqissumik allakkatigut akuerineqarpat,

2)  inummik innarluutilimmik mianerinninnissap siumut nalunaaruteqarnissamut piffissaliussap saneqqunneqarnissaa pisariaqartippagu, imaluunniit

3)  allat mianerisassat pingaaruteqartut pissutigalugit siumut nalunaaruteqarnissamut piffissaliussap saneqqunneqarnissaa pisariaqalerpat.

 

  § 62.  §§ 60-61-mi aalajangersakkat inuup innarluutillip Kalaallit Nunaata avataani najugaqarfissatut neqeroorummi najugaqarnerata unitsinneqarnissaa imaluunniit Kalaallit Nunaata iluani avataaniluunniit najugaqarfissamik neqeroorummut allamut nuunnissaq pillugu kommunalbestyrelsip aalajangiineranut ilanngullutik atuupput, taamaattoq tak. § 58. Inuup innarluutillip kommunimi angerlarsimaffigisaani kommunalbestyrelsip najugaqarnerup unitsinneqarnissaa imaluunniit najugaqarfissamik neqeroorummut allamut nuunnissaq pillugu aalajangiisoqannginnerani, Kalaallit Nunaata avataani kommunimiit najugaqarfigisamiit allakkatigut nassuiaammik pissarsiniassaaq, tak. § 59.

 

  § 63.  Kapitali 8-mi aalajangersakkat malillugit, tapersersuinerup inuup ikiorneqarnissamik pisariaqartitaanut matussusiisinnaajunnaarnera kommunalbestyrelsip ilisimalerpagu, inummut innarluutilimmut tapersersuinerup allanngortinneqarnissaa imaluunniit atorunnaarsinneqarnissaa pillugu kommunalbestyrelsi aalajangiissaaq.

  Imm. 2. Tapersersuinerup allanngortinneqarnissaa imaluunniit unitsinneqarnissaa pillugu aalajangiisoqannginnerani, kommunalbestyrelsip inuk innarluutilik aamma angajoqqaatut oqartussaasut imaluunniit akisussaasoq oqaloqatigeqqaassavai, tak. § 23.

  Imm. 3. Tapersersuinerup unitsinneqarnissaa pillugu aalajangiisoqannginnerani, kommunalbestyrelsip inuup innarluutillip iliuusissatut pilersaarutaa suliareqqaassavaa, tak. §§ 24-25.

 

Kapitali 9

Pitsaaliuineq illersuinerlu

 

Peqqinnissaqarfimmut innersuussineq

 

  § 64.  Angajoqqaatut oqartussaasoq imaluunniit akisussaasoq inummik nammineersinnaanngitsumik innarluutilimmik, tassunga ilanngullugit meeqqamik inuusuttumilluunniit, nappaammik inuunermik ulorianartorsiortitsisinnaasumik imaluunniit nappaammik inummut annertuumik ataavartumillu piginnaasatigut appariarnermik kinguneqarsinnaasumik, misissortinneqarnissaanut imaluunniit katsorsartinneqarnissaanut pinngitsoortitsippat, misissuinissamik imaluunniit katsorsaanissamik pisariaqartitsinerup nalilersuisoqarnissaa siunertaralugu, kommunalbestyrelsi angajoqqaatut oqartussaasup imaluunniit akisussaasup akuersineratigut, inuk innarluutilik nammineersinnaanngitsoq peqqinnissaqarfimmut innersuunneqassasoq, aalajangiisinnaavoq.

  Imm. 2.  Kommunalbestyrelsi angajoqqaatut oqartussaasut imaluunniit akisussaasut akuersissuteqartinnagit meeraq, inuusuttoq imaluunniit inuk nammineersinnaanngitsoq innarluutilik, misissuinissamik imaluunniit katsorsaanissamik pisariaqartitsinerup nalilersorneqarnissaa siunertaralugu, misissortinnginnerup imaluunniit katsorsartinnginnerup inummut ataavartumik tarnikkut timikkullu piginnaasakillinissaanut navianartorsiortinneqarnermik kinguneqarsinnaasoq ersarissumik aarlerinaateqarpat, peqqinnissaqarfimmut innersuunneqassasoq aalajangiisinnaavoq.

 

Kinguaassiuutitigut innarliinermik pitsaaliuineq

 

  § 65.  Inummut innarluutilimmut kinguaassiutitigut innarliinermik pitsaaliuinermut suliaqarnermi ulloq unnuarlu neqeroorummi aqutsisut sulisut immikkut maluginiagassanut makkuninnga eqqumaffiginneqqullugit ilitsersuutissavai:

1)  Pitsaaliuinermik suliaqarnermi ataatsimoortumik naleqartitanik tunngaveqarneq.

2)  Pasitsaassaqarnermi pitsaaliuinermut iliuseqarnissamullu suleriaatsit.

3)  Kinguaassiuutitigut innarliinissamut aarlerinaataasinnaasut pillugit ataatsimoortumik ilisimasaqarneq.

4)  Inuup innarluutillip atugarliorneranut ersiutit, taakkunani pissusilersornikkut timikkullu ersiutit ilanngullugit.

5)  Kinguaassiuutitigut innarliinermut timikkut tarnikkullu ersiutit.

 

Atoqatigiinnermut politikki

 

  § 66.  Inunnut innarluutilinnut najugaqarfinni aqutsisut kinguaassiuutit aamma kinguaassiuutitigut innarliineq pillugit atoqatigiinnermut politikkimik ersarissumik paasinartumillu oqaasertaliissapput. Atoqatigiinnermut politikkeqarneq atoqatigiittarnerup inuit tamarmik inuunerannut tunngaviusumillu pisariaqartitaanut ilaalluinnartuunerisa paasineqarnissaanut tapeeqataassaaq. Atoqatigiinnermut politikkeqarneq inunnik innarluutilinnik innarliinissamut pitsaaliuisitsissaaq.

  Imm. 2.  Atoqatigiinnermut politikkeqarneq ilaatigut makkununnga suleriaatsinik imaqassaaq:

1)  Peqqinnartumik atoqatigiinnissaq inooqatigiinnikkullu inuuneqarnissaq pillugu inunnut innarluutilinnut siunnersuineq ilitsersuinerlu.

2)  Naartunaveersaatit pillugit siunnersuineq ilitsersuinerlu.

3)  Atoqatigiinnissamut akuersineq pillugu siunnersuineq ilitsersuinerlu.

4)  Inuup killiliisinnaanera pillugu siunnersuineq ilitsersuinerlu.

5)  Inunnut innarluutilinnut, najugalinnut allanut sulisunullu qaninniaqatigiinnermut atoqatigiinnermullu killiliinerit allat pillugit siunnersuineq ilitsersuinerlu.

6)  Kinguaassiuutitigut innarliinermik pitsaaliuineq pillugu najugaqarfissatut neqeroorutip iliuusissaa.

7)  Kinguaassiuutitigut innarliinermik paasisaqarnermi imaluunniit pasitsaassaqarnermi najugaqarfissatut neqeroorutip pilertortumik iliuusissaa.

8)  Innarliineq pillugu nalunaarutiginninneq imaluunniit unnerluutiginninneq.

9)  Innarliinermik eqqugaasumut sulisut sulisullu allat ilisimasallit tapersersuinerat.

10) Inuk innarluutilik kinguaassiuutitigut innarlerneqartoq pillugu paasisaqarnermi imaluunniit pasitsaassinermi iliuuseqarnissaq.

  Imm. 3.  Inuk innarluutilik kinguaassiuutitigut innarlerneqartoq pillugu paasisaqarnermi imaluunniit pasitsaassinermi iliuuseqarnissaq pillugu Naalakkersuisut malittarisassanik erseqqinnerusunik aalajangersaasinnaapput.

 

Kapitali 10

Nalunaarutiginninneq malitseqartitsinerlu

 

Nalunaarutiginnittussaatitaaneq

 

  § 67.  Inuup innarluutillip atugarissaarneranut, peqqissusaanut imaluunniit ineriartorneranut navianartorsiortitsisumik atugaqartinneqartoq innuttaasup kialluunniit paasippagu, innuttaasup kommunalbestyrelsimut nalunaaruteqarnissani pisussaaffigaa.

  Imm. 2.  Nalunaarutiginninnerup tiguneqarnerata kingorna kommunalbestyrelsi sapaatip akunnera ataaseq qaangiutsinnagu nalunaarutiginninneq tiguneqartoq pillugu innuttaasumut allakkatigut ilisimatitsissaaq.

 

  § 68.  Isumaginnittoqarfinni, peqqinnissaqarfinni ilinniarfinnilu atorfillit, inuk innarluutilik tapersersorneqarnissamik pisariaqartitsisoq, inuussutissarsiutigalugu sulinerminnut atatillugu atorfillip paasippagu imaluunniit patsaassinissamut pissutissaqarpat, kommunalbestyrelsemut ingerlaannaq nalunaaruteqarnissamut sukannernerusumik pisussaaffeqarput. Nalunaarutiginnittussaatitaaneq taanna, innuttaasunit tamanit qinerneqarlutik suliaqartunut imaluunniit inuiaqatigiinni sullissillutik suliaqartunut, atuuppoq.

  Imm. 2.  Nalunaarutiginninnerup tiguneqarnerata kingorna kommunalbestyrelsi sapaatip akunnera ataaseq qaangiutsinnagu nalunaarutiginninneq tiguneqartoq pillugu atorfilimmut allakkatigut ilisimatitsissaaq.

 

  § 69.  Kommunalbestyrelsip kommune nuuffigineqartoq allakkatigut nalunaarfigissavaa, ima pisoqartillugu:

1)  § 29 naapertorlugu inuk innarluutilik nammineq angerlarsimaffimmini ulluinnarni ikiorneqarlunilu isumassorneqartoq, imaluunniit § 30 naapertorlugu nammineq angerlarsimaffimmini paarineqartoq kommunimut allamut nuuppat, aamma inuk innarluutilik Inatsisartut inatsisaat manna malillugu suli tapersersorneqarnissamik pisariaqartitsisoq kommunalbestyrelsi naliliippat,

2)  kapitali 6 imaluunniit 7 naapertorlugu, inuk innarluutilik najugaqarfissatut neqeroorummut innersuunneqartoq, nammineq piumasani malillugu kommunimut allamut nuuppat, aamma

3)  inuk innarluutilik nammineq piumasani malillugu kommunimut allamut nuuppat, aamma kapitali 4-mi, 6-imi imaluunniit 7-imi aalajangersakkat malillugit eqqortumik tapersersorneqanngippat inuup atugarissaarnera navianartorsiortinneqassasoq nalilerneqarpat.

  Imm. 2.  Imm. 1 malillugu nalunaarutiginninnermut atatillugu kommunip qimanneqartup suliami atortussat attuumassuteqartut nassiutissavai, tassunga ilanngullugit paasissutissat attuumassuteqartut eqikkarneqarnerat, tapersersorneqarnissamut pisariaqartitsinermik naliliinermut kommunip qimanneqartup naliliinermut tunngavigisai.

  Imm. 3.  Imm. 1-2 assinganik atuutissapput kommunimut imaluunniit oqartussamut assingusumut Kalaallit Nunaata avataaniittumut tunngatillugu, nuunneq Kalaallit Nunaanniit pissappat, aamma inuk innarluutilik imaluunniit taassumunnga angajoqqaatut oqartussaasut imaluunniit akisussaasoq tamatumunnga akuersippata.

 

Kommunip iliuuseqartussaatitaanera

 

  § 70.  §§ 67, 68 imaluunniit 69 naapertorlugu inuk innarluutilik pillugu nalunaarutiginninnerup tiguneqarnerata kingorna kommunalbestyrelsip kingusinnerpaamik nalunaaquttap akunneri 48-t qaangiutsinnagit inuup peqqissusaa imaluunniit ineriartornera ulorianartorsiortinneqarnersoq, taamaattumillu inummut innarluutilimmut pinartumik suliniuteqarnissap aallartinneqassanersoq pillugit naliliiffigissavai.

  Imm. 2.  Kommunalbestyrelsi inummut innarluutilimmut pinartumik suliniuteqarnissamik aallartitsisoqassanngitsoq naliliippat, kommunalbestyrelsi piaarnerpaamik, taamaattoq kingusinnerpaamik ullut suliffiusut tallimat iluanni, qulaajaaneq aallartinneqarnissaanut tunngavissaqarnersoq pillugu aalajangiissaaq, tak. § 18.

  Imm. 3. Kommunalbestyrelsi qulaajaaneq aallartinneqassasoq aalajangiippat, tak. imm. 1, qulaajaaneq piaarnerpaamik aallartinneqassaaq kingusinnerpaamillu nalunaarutiginninnerup tiguneqarnerata kingorna sapaatit akunneri marluk qaangiutsinnagit aallartinneqassalluni.

 

  § 71.  §§ 67, 68 imaluunniit 69 naapertorlugu inuk innarluutilik pillugu nalunaarutiginninnermik kommunalbestyrelsi tigusaqartillugu, taanna pillugu kommunalbestyrelsip suliniuteqarnermik aallartitsiffigeriigaa, kommunalbestyrelsip suliaq nalilersoqqissavaa.

 

  § 72.  §§ 67, 68 imaluunniit 69 naapertorlugu nalunaarutiginninnermik nalilersuinermut atugassatut kommunalbestyrelsi inummik innarluuteqartumik oqaloqatiginnissinnaavoq.

  Imm. 2.  Oqaloqatigiinneq, tak. imm. 1, inummut nammineersinnaanngitsumut innarluutilimmut angajoqqaatut oqartussaasut imaluunniit akisussaasoq akuersissuteqartinnagit najuutsinagillu pisinnaavoq, tamatuminnga inummik innarluutilimmik mianerinninnerusoq kommunalbestyrelsip nalilerpagu.

  Imm. 3. Oqaloqatigiinneq, takuuk imm. 1, ingerlanneqanngitsoorsinnaavoq, inuk innarluutilik qanoq inersimasuunera imaluunniit suliap qanoq ittuunera pissutigalugu oqaloqatigiinnerup ingerlanneqarnissaa naapertuutinngippat.

  Imm. 4.  Inuk innarluutilik 18-it inorlugit ukioqarpat meeqqat tapersersorneqarnissaannut Inatsisartut inatsisaanni § 19 naapertorlugu isumaginninnikkut misissuinerup aallartinnissaanut tunngavissaqarnersoq aalajangiisoqassaaq.

 

  § 73.  Inummik innarluutilimmik paarsinerluttoqarnera, nakuusertoqarnera imaluunniit kinguaassiutitigut innarliisoqarnera pillugu nalunaarutiginninnermik tigusaqarnermi kommunalbestyrelsi pasitsaassippat, § 18 naapertorlugu qulaajaaneq aamma § 16, imm. 5 naapertorlugu tapersersuigallarsinnaaneq nalunaarutiginninnerup tiguneqarnerata kingorna nalunaaquttap akunneri 48-t iluanni aallartinneqassapput.

  Imm. 2.  Inummik innarluutilimmik innarliineq pillugu nalunaarutiginnittoqartillugu kommunalbestyrelsi inummik innarluutilimmik oqaloqatiginnissaaq. Inummik innarluutilimmik innarliineq pillugu nalunaarutiginninneq angajoqqaatut oqartussaasumit ataatsimit marlunnilluunniit pisimappat, oqaloqatigiinneq angajoqqaatut oqartussaasut akuersissuteqaarnagit najuutsinnagillu ingerlanneqassaaq.

  Imm. 3.  Inummik innarluutilimmik paarsinerluttoqarnera, nakuusertoqarnera imaluunniit kinguaassiutitigut innarliisoqarnera pillugu nalunaarutiginninneq, takuuk imm. 1, kommunimut pasitsatsitsippat, kommunalbestyrelsi nalunaarutiginninnermik tigusaqarneq pillugu politiinut ingerlaannartumik nalunaarutiginnissaaq.

 

  § 74.  Inummik innarluutilimmik paarsinerluttoqarnera, nakuusertoqarnera imaluunniit kinguaassiutitigut innarliisoqarnera pillugu kommunalbestyrelsi nammineq ingerlatamik eqqumaffigilerpagu imaluunniit pasitsaappagu, §§ 70-73 naapertorlugit kommunalbestyrelsip iliuuseqartussaatitaanera assinganik atuuppoq.

 

Kapitali 11

Tikeraarluni angalanerit, feriarluni ingiallorteqarneq aamma illerfimmik assartuineq

 

Meeqqat tikeraarlutik angalaneri

 

  § 75. Meeraq innarluutilik ulloq unnuarlu neqeroorummi meeqqap najugaqarfigisaata avataaniittumi inissinneqartoq, tak. § 50, nammineq najugaqarfigisaminut imaluunniit qanigisanut, angajoqqaatut oqartussaasunut imaluunniit akisussaasumut ukiumut marloriarluni akiliunneqarluni tikeraarluni angalanissamut pisinnaatitaaffeqarpoq. Inuk innarluutilik ukiumi 18-inik ukioqalerfiani marloriarluni akiliunneqarluni tikeraarluni angalanissamut pisinnaatitaaffeqarpoq.

  Imm. 2.  Tikeraarluni angalaneq angajoqqaatut oqartussaasunut imaluunniit akisussaasumut imaluunniit qanigisanut ataatsimut marlunnulluunniit tunniunneqassasoq meeqqamut pitsaanerpaasoq nalilerneqarpat, taakkualu meeraq ulloq unnuarlu neqeroorummut tikeraarlugu.

  Imm. 3.  Meeqqap angajoqqaatullu oqartussaasut akornanni attaveqarnerup attatiinnarnissaa pisariaqartinneqarpat aamma meeqqap pisariaqartitaanut naleqquppat, meeqqamut innarluutilimmut tikeraarluni angalanermik ataatsimik suli tunniussisoqassaaq.

  Imm. 4.  §§ 57 imaluunniit 59 naapertorlugu meeqqamut innarluutilimmut Kalaallit Nunaata avataanut inissinneqartumut imm. 1-3-mi tikeraarluni angalaneq pillugu aalajangersakkat assinganik atuutissapput.

  Imm. 5.  Imm. 1 aamma imm. 3-4 malillugit tikeraarluni angalaneq, tikikkuminaassuseq, ikiuinissamut periarfissat amigaataanerat imaluunniit najugaqarfimmi atortorissaarutit amigaataanerat pissutigalugit najugaqarfimmut angalanissaq ajornartoq, kommunalbestyrelsip nalilerpagu, najugaqarfimmut qanittumi illoqarfimmut tunniunneqarsinnaavoq. Peqatigalugu illoqarfimmut tassunga angalanermut najugaqarnermullu aningaasartuutit qanigisat marluk angullugit tunniunneqassapput.

  Imm. 6.  Tikeraarluni angalanissamut pisinnaatitaaffik, tak. imm. 1 aamma imm. 3–4, meeqqanut innarluutilinnut ulloq unnuarlu neqeroorummi inissinneqartunut eqqartuussut imaluunniit eqqartuussiviup aalajangiinera naapertorlugu atuutinngilaq. Eqqartuussut imaluunniit eqqartuussiviup aalajangiinera tamatumunnga periarfissiippat, tikeraarluni angalanissaq angajoqqaatut oqartussaasunut imaluunniit akisussaasumut imaluunniit qanigisamut ataatsimut marlunnulluunniit tunniunneqarsinnaavoq, tak. imm. 2.

 

Inersimasut tikeraarlutik angalaneri

 

  § 76.  Inuk innarluutilik 18-it sinnerlugit ukiulik nammineq najugaqarfigisaminut avataaniittumi najugaqarfissatut neqeroorummi najugaqartoq, nammineq najugaqarfigisaminut imaluunniit qanigisanut imaluunniit akisussaasumut, ukiumut ataasiarluni akiliunneqarluni tikeraarluni angalanissamut pisinnaatitaaffeqarpoq, taamaattoq tak. imm. 4 aamma 5.

  Imm. 2.  Inuk innarluutilik nammineerluni angalanissamut pisinnaanngippat imaluunniit ajornakusoortumik angalasinnaappat, tikeraarluni angalanissaq qanigisamut ataatsimut marlunnulluunniit imaluunniit akisussaasumut tunniunneqassaaq, taamaalillutik qanigisat imaluunniit akisussaasoq najugaqarfissatut neqeroorummi inummut innarluutilimmut tikeraarsinnaallutik, tamanna inuup innarluutillip kissaatigippagu.

  Imm. 3.  Imm. 1-2 malillugit tikeraarluni angalanerit pillugit aalajangersakkat inunnut innarluutilinnut Kalaallit Nunaata avataani ulloq unnuarlu neqeroorummi najugaqartunut assinganik atuupput, tak. § 57 imaluunniit § 59.

  Imm. 4.  Inuk 18-it 24-llu akornanni ukiulik, Kalaallit Nunaata avataani ulloq unnuarlu neqeroorummi utaqqiisaasumik najugaqartoq, nammineq najugaqarfigisaminut ukiumut marloriarluni akiliunneqarluni tikeraarluni angalanissamut pisinnaatitaaffeqarpoq. Inuk ukiumi 24-nik ukioqalerfiani marloriarluni akiliunneqarluni tikeraarluni angalanissamut pisinnaatitaaffeqarpoq.

  Imm. 5.  Imm. 1 aamma 3 malillugit tikeraarluni angalaneq, tikikkuminaassuseq, ikiuinissamut periarfissat amigaataanerat imaluunniit najugaqarfimmi atortorissaarutit amigaataanerat pissutigalugit najugaqarfimmut angalanissaq ajornartoq, kommunalbestyrelsip nalilerpagu, najugaqarfimmut qanittumi illoqarfimmut tunniunneqarsinnaavoq. Peqatigalugu illoqarfimmut tassunga angalanermut najugaqarnermullu aningaasartuutit qanigisat marluk angullugit tunniunneqassapput.

  Imm. 6.  Tikeraarluni angalanissamut pisinnaatitaaffik, tak. imm. 1-4, inunnut innarluutilinnut ulloq unnuarlu neqeroorummi inissinneqartunut eqqartuussut imaluunniit eqqartuussiviup aalajangiinera naapertorlugu atuutinngilaq.

 

Tikeraarluni angalanernut imaluunniit feriarnermut aningaasaqarnikkut tapiissuteqarneq

 

  § 77.  Inummut innarluutilimmut tikeraarluni angalanermut atatillugu angalanermut kiisalu ullut unnuallu qulingiluat angullugit unnuinernut aningaasartuutit kommunimi angerlarsimaffigisami kommunalbestyrelsip akilissavai. Tikeraarluni angalanerup aallartinnerani naaneranilu angalanerup sivisussusianut ulloq unnuarlu qulingiluanut ilanngullugit naatsorsuunneqassanngillat.

  Imm. 2.  Imm. 1 malillugu tikeraarluni angalanermut atatillugu kommunalbestyrelsip aningaasartuutit tulliuttut matussusissavai:

1)  inunnut innarluutilinnut eqqortumik tapersersuinernut aningaasartuutit, tassunga ilanngullugit §§ 75 aamma 76 malillugit tikeraarluni angalanermut atatillugu ingiallorteqarnermut aamma immikkut ittumik tapersersuinissamut iliuusissat.

2)  tikeraarluni angalanerup nalaani ingiallortinut kiisalu ingiallortit angerlarsimaffiisa aamma najugaqarfissatut neqeroorutip akornanni angalanermut aningaasartuutit.

3)  § 75, imm. 2 aamma § 76, imm, 2 malillugit angajoqqaatut oqartussaasut, akisussaasup imaluunnit qanigisat allat angalanerannut inissaqartinnerannullu aningaasartuutit.

  Imm. 3. Inummut innarluutilimmut pisariaqartitsineq tunngavigalugu ingiallortissat amerlassusaat aalajangerneqassaaq.

  Imm. 4.  Naalakkersuisut tikeraarluni angalanerit pillugit kiisalu imm. 1-3 naapertorlugit kommunalbestyrelsit aningaasartuutinik akiliinerat aamma aningaasartuutinik matussusiinerat pillugit malittarisassanik aalajangersaasinnaapput.

 

  § 78.  Inuk innarluutilik Kalaallit Nunaanni najugaqarpat, §§ 75 imaluunniit 76 naapertorlugu tikeraarnermi angalanernut ilaatinneqanngippat, nammineq akilikkaminik namminerlu piumassutsimik feriarpat, inullu ingiallorteqarnani feriarsinnaanngippat, kommunalbestyrelsi ullut qulingiluat angullugit ingiallorteqarnissamik ikiorsiissuteqarsinnaavoq. Tikeraarluni angalanerup aallartinnerani naaneranilu angalanerup sivisussusianut ullut qulingiluanut ilanngullugit naatsorsorneqassanngillat.

  Imm. 2.  Naalakkersuisut imm. 1 naapertorlugu kommunalbestyrelsit aningaasartuutinik akiliinerat aamma aningaasartuutinik matussusiinerat pillugit malittarisassanik aalajangersaasinnaapput.

 

Napparsimanermi imaluunniit toqusoqarnerani tikeraarneq

 

  § 79.  Inuk innarluutilik §§ 75 imaluunniit 76 naapertorlugu tikeraarluni angalasinnaatitaasoq, qanigisap perululluni napparsimaneranut, toquneranut imaluunniit ilisaaneranut atatillugu Kalaallit Nunaannut imaluunniit Kalaallit Nunaata iluani angalanermut ataatsimut akiliunneqarnissaminut ilanngullugu pisinnaatitaavoq.

  Imm. 2.  Kommunalbestyrelsip angalanermut aningaasartuutit aamma najugaqarnermut aningaasartuutit ullut qulingiluat angullugit akilissavai. Tikeraarluni angalanerup aallartinnerani naammassineranilu angalanermut piffissamut ullunut qulingiluanut ilanngullugu naatsorsorneqassanngillat. Kommunalbestyrelsip imm. 1 naapertorlugu tikeraarluni angalanernut aningaasartuutit tulliuttut matussusissavai:

1)  Imm. 1 malillugu angalanernut eqqortumik tapersersorneqarnermut aningaasartuutit, tassunga ilanngullugit ingiallorteqarneq aamma angalanermut atatillugu tapersersuinermut iliuuseqarnerit.

2)  Tikeraarluni angalanerup nalaani ingiallortinut kiisalu ingiallortit angerlarsimaffiisa aamma najugaqarfissatut neqeroorutip akornanni angalanermut aningaasartuutit.

  Imm. 3.  Inummut innarluutilimmut pisariaqartitsineq tunngavigalugu ingiallortissat amerlassusaat aalajangerneqassaaq.

  Imm. 4.  Naalakkersuisut imm. 1-3 naapertorlugit angalanerit aaqqissuussaanerat kiisalu kommunalbestyrelsit aningaasartuutinik akiliinerat aamma aningaasartuutinik matussusiinerat pillugit malittarisassanik aalajangersaasinnaapput.

 

Ulluni nalliuttuni imaluunniit perululluni napparsimanermi tikeraarneq

 

  § 80.  Inuk innarluutilik, §§ 75 imaluunniit 76 malillugu tikeraarluni angalasinnaatitaasoq, annertunerusumik nalliuttorsiorpat imaluunniit perululluni napparsimappat, qanigisamut ataatsimut marlunnulluunniit Kalaallit Nunaannut imaluunniit Kalaallit Nunaata iluani angalanermut kommunalbestyrelsi tapersiisinnaavoq.

  Imm. 2.  Naalakkersuisut imm. 1 naapertorlugu angalanerit aaqqissuunneqarnerat aamma aningaasartuutit akilerneqarnerat pillugit malittarisassanik aalajangersaasinnaapput.

 

Illerfimmik assartuineq

 

  § 81.  Inuk innarluutilik najugaqarfissatut neqeroorummi, nunagisap avataaniittumi najugaqartoq najugaqarnermini toqukkut qimaguppat, illerfiup assartornissaanut aningaasartuutit tamakkiisumik ilaannakortumilluunniit matussutissaanut kommunalbestyrelsi tapersiisinnaavoq.

  Imm. 2.  Imm. 1-mi aalajangersagaq illerfimmik assartuinermut aningaasartuutit pillugit inatsisit allat malillugit tapersiisoqarsinnaanngippat aatsaat atuutissaaq.

 

Kapitali 12

Inunnut innarluutilinnut siunnersuisoqatigiit aamma politikkit

 

  § 82.  Kommunalbestyrelsi inunnut innarluutilinnut siunnersuisoqatigiinnik pilersitsissaaq, kommunalbestyrelsimut najukkami apeqqutit tamarmik inunnut innarluutilinnut tunngasunut inuit innarluutillit pillugit politikkikkut apeqqutini siunnersuisussat aamma innuttaasut kommunalbestyrelsillu akornanni isummat pillugit siammarterissussat.

  Imm. 2.  Kommunalbestyrelsip suliniutit tamarmik inunnut innarluutilinnut pingaarutillit pillugit inunnut innarluutilinnut siunnersuisoqatigiit tusarniaaffigisassavai.

  Imm. 3.  Inunnut innarluutilinnut siunnersuisoqatigiit apeqqutinik inunnut ataasiakkaanut tunngasunik suliaqarsinnaanngillat.

  Imm. 4.  Inunnut innarluutilinnut siunnersuisoqatigiit ilaasortanik, kommunalbestyrelsimit toqqarneqartunik, sisamat arfineq-pingasullu akornanni amerlassusilinnik inuttaqassapput. Ilaasortat inuit innarluutillit peqatigiiffiiniit inassutigineqarsinnaapput, inunnut innarluutilinnut suliassaqarfimmut soqutigisaqartuusinnaallutik imaluunniit suliamut tunuliaquteqarsinnaallutik.

  Imm. 5.  Kommunalbestyrelsi inunnut innarluutilinnut siunnersuisoqatigiit allattoqarfeqarnermut tunngasut pillugit pisariaqartumik ikiuutissaaq.

  Imm. 6.  Inunnut innarluutilinnut siunnersuisoqatigiit suliaqarnerat katitigaanerallu pillugit malittarisassanik erseqqinnerusunik kommunalbestyrelsi aalajangersaasinnaavoq.

 

  § 83.  Kommunalbestyrelsi inunnut innarluutilinnut politikkimik aalajangersaassaaq, inunnut innarluutilinnut sullissineq qanoq ittoq pisinnaatitaaffigineqarnersoq imaluunniit naatsorsuutigineqarsinnaanersoq aalajangersarneqassallutik. Kommunimi suliassaqarfinni tamani pilersaarusiornermut inunnut innarluutilinnut isiginneriaatsip akuunerulersinneqarnissaa kommunalbestyrelsi qanoq ililluni qulakkeerissanersoq pillugu inunnut innarluutilinnut politikkimi aamma paasissutissanik imaqassaaq.

  Imm. 2.  Inunnut innarluutilinnut politikki kommunip nittartagaani tamanut saqqummiunneqassaaq kiisalu Naalakkersuisunut ilisimatitsissutitut nassiunneqassalluni.

  Imm. 3.  Inunnut innarluutilinnut politikki sivisunerpaamik ukiut sisamakkaarlugit iluarsaanneqartassaaq.

 

Kapitali 13

Nakkutilliineq

 

Kommunalbestyrelsip nakkutilliisussaatitaaneri

 

  § 84.  Kapitali 6-imi imaluunniit 7-imi aalajangersakkat malillugit inummut innarluutilimmut najugaqarfissatut neqeroorummi najugaqartumut, inummut sammititamik kommunimi angerlarsimaffigisami kommunalbestyrelsi nakkutilliissaaq. Nakkutilliinermut ilaatillugu, najugaqarfissatut neqeroorummi najugaqarnerup inuup timikkut, tarnikkut inooqatigiinnikkullu pisariaqartitai suli naammassineqarnersut kommunalbestyrelsip qulakkiissavai.

  Imm. 2.  Imm. 1 malillugu inummut sammititamik nakkutilliinermut ilaatillugu kommunalbestyrelsi najugaqarfissatut neqeroorummi nalunaaqqaarluni aamma nalunaaqqaarnani nakkutilliinernik ingerlatsisinnaavoq.

  Imm. 3.  Kommunalbestyrelsi Naalakkersuisut qinnuteqarnerisigut kommunalbestyrelsip inummut sammititamik nakkutilliinermik isumaginninnera pillugu paasissutissat kissaatigineqartut tamaasa nassiunneqarnissaannut pisussaaffeqarpoq.

  Imm. 4.  Imm. 1 malillugu inummut sammititamik nakkutilliinermut malittarisassanik erseqqinnerusunik Naalakkersuisut aalajangersaasinnaapput, tassunga ilanngullugit:

1)  kommunalbestyrelsip nakkutilliisussaatitaanerminik ingerlatsinera,

2)  inummut sammititamik nakkutilliinermik aaqqissuussineq,

3)  nakkutilliisussaatitaanerup naammassineqarnissaanut atugassarititat piumasaqatillu, aamma

4)  kommunalbestyrelsip nakkutilliinermut nalunaarusianik suliaqarnera.

 

  § 85.  Kapitali 6-imi aalajangersakkat malillugit najugaqaqatigiiffinnik aamma najugaqarfinnik illersugaasunik kommunalbestyrelsemit pilersinneqartut ingerlanneqartullu, ingerlatsinermut sammititamik kommunalbestyrelsi nakkutilliissaaq.

  Imm. 2.  Imm. 1 malillugu ingerlatsinermut sammititamik nakkutilliinermut ilaatillugu najugaqarfissatut neqeroorummi nalunaaqqaarluni aamma nalunaaqqaarnani kommunalbestyrelsi nakkutilliinernik ingerlatsisinnaavoq.

  Imm. 3.  Kommunalbestyrelsi Naalakkersuisut qinnuteqarnerisigut kommunalbestyrelsip ingerlatsinermut sammititamik nakkutilliinermik isumaginninnera pillugu paasissutissat kissaatigineqartut tamaasa nassiunneqarnissaannut pisussaaffeqarpoq.

  Imm. 4.  Imm. 1 naapertorlugu ingerlatsinermut sammititamik nakkutilliinermut malittarisassanik erseqqinnerusunik Naalakkersuisut aalajangersaasinnaapput, tassunga ilanngullugit:

1)  kommunalbestyrelsip nakkutilliisussaatitaanerminik ingerlatsinera,

2)  ingerlatsinermut sammititamik nakkutilliinernik aaqqissuussineq,

3)  nakkutilliisussaatitaanerup naammassineqarnissaanut atugassarititat piumasaqaatillu, aamma

4)  kommunalbestyrelsip nakkutilliinermut nalunaarusianik suliaqarnera.

 

Naalakkersuisut nakkutilliisussaatitaanerat

 

  § 86.  Naalakkersuisut qitiusumik nakkutilliinermik ingerlatsivimmik (nakkutilliinermik ingerlatsivik) pilersitsissapput.

  Imm. 2.  Inatsisartut inatsisaanni matumani malittarisassat pillugit kommunalbestyrelsip aqutsineranik nakkutilliinermut ingerlatsivik pingaarnertut nakkutilliissaaq.

  Imm. 3.  § 48 malillugu ulloq unnuarlu neqeroorutinut pilersinneqartunut ingerlatsinermut sammititamik nakkutilliinermut ingerlatsivik nakkutilliissaaq.

  Imm. 4.  Nakkutilliinermut ingerlatsivik imm. 3 malillugu ingerlatsinermut tunngasumik nakkutilliinermut ilaatillugu ulloq unnuarlu neqeroorummi pissutsinik nakkutiginnissaaq aamma ulloq unnuarlu neqeroorut pillugu kommunalbestyrelsi oqaloqatigalugu.

  Imm. 5.  Ulloq unnuarlu neqeroorummi ingerlatsinermut sammititamik nakkutilliinermut ilaatillugu Naalakkersuisut ulloq unnuarlu neqeroorummi nalunaaqqaarlutik aamma nalunaaqqaarnatik nakkutilliinernik ingerlatsisinnaapput.

Imm. 6.  Naalakkersuisut nakkutilliinermut ingerlatsiviup imm. 3 malillugu ingerlatsinermut sammititamik nakkutilliinerata qanoq aaqqissuuneqarnissaa imarisaalu pillugit malittarisassanik erseqqinnerusunik aalajangersaasinnaapput.

 

  § 87.  Nakkutilliinermut ingerlatsivik uppernarsaatinik naammaginartunik takutitsinermigut aamma eqqartuussiviup aalajangiinera pisariaqartinnagu kommunip ingerlatsiviini paasissutissanut tamanut pissarsisinnaavoq, nakkutilliinermut ingerlatsiviup § 86, imm. 2 malillugu nakkutilliinermik ingerlatsinermut attuumassuteqartutut naliliiffigisaanut, tassunga ilanngullugit paasissutissat inummut tunngasut mianernartut kiisalu suliffiup iluani allagaatit.

   Imm. 2. § 86, imm. 3 malillugu nakkutilliinermut ingerlatsivik ingerlatsinermut sammititamik nakkutilliinermik ingerlatsinnaaqqullugu, ulloq unnuarlu neqeroorummiit paasissutissat pisariaqartut tunniunneqarnissaannut nakkutilliinermut ingerlatsivik pisinnaatitaaffeqarpoq.

 

  § 88.  Nakkutilliinermut ingerlatsivik nakkutilliinermut atatillugu, tak. § 86, imm. 2, kommunalbestyrelsimut najoqqutassatut innersuussutinik imaqarsinnaasumik, nakkutilliinermut nalunaarusiamik allakkatigut suliaqassaaq.

  Imm. 2. Nakkutilliinermut ingerlatsivik nakkutilliineq tunngavigalugu kommunalbestyrelsimut pisussaaffiliisumik peqqussuteqarsinnaavoq:

1)  Inatsisartut inatsisaat manna malillugu kommunalbestyrelsi suliani ingerlanneqartuni § 18 malillugu qulaajaanermik aallartitsissasoq imaluunniit §§ 24-25 malillugit iliuusissatut pilersaarummik suliaqassasoq, aamma iliuutsit taakkua nakkutilliinermut ingerlatsiviup piffissaliussatut aalajangigaata iluani naammassineqassasut. Nakkutilliinermut ingerlatsivik kommunalbestyrelsimut suliat ingerlanneqartut pillugit nakkutilliinermut ingerlatsivimmut ingerlaavartumik ilisimatitsisassasoq peqqussuteqarsinnaavoq,

2)  Inatsisartut inatsisaat manna malillugu suliat naammassineqartut, kommunalbestyrelsi suliat pineqartut pillugit inatsisitigut kukkusumik ingerlatsisoq nakkutilliinermut ingerlatsiviup nalilerpagu, nutaamik suliarineqarnissaat pillugu kommunalbestyrelsi suliareqqissagai, imaluunniit

3)  Suliami ingerlanneqartumi naammassineqartumiluunniit najugaqarfissatut neqeroorummi najugaqarnissamut pisariaqartitsisoqaraluartoq neqeroorutigineqanngitsoq, nakkutilliinermut ingerlatsiviup nalilerpagu, § 18 malillugu qulaajaanermik kommunalbestyrelsi nakkutilliinermut ingerlatsiviup piffissaliussamik aalajangiinerata iluani aallartitsissasoq.

 

  § 89.  Nakkutilliinermut ingerlatsivik ingerlatsinermut sammititamik nakkutilliinermut atatillugu ulloq unnuarlu neqeroorummi aqutsisunut peqqussuteqarsinnaavoq. Nakkutilliinermut ingerlatsivik peqqussutip malinneqarnissaanut piffissaliussamik aalajangersaasinnaavoq.

  Imm. 2. Nakkutilliinermut ingerlatsivik ingerlatsinermut sammititamik nakkutilliinermut atatillugu, ulloq unnuarlu neqeroorummi pissutsinit tamanna pisariaqartinneqarpat, nakkutilliineq sukannernerusoq pillugu aalajangiisinnaavoq.

  Imm. 3.  Imm. 2 naapertorlugu nakkutilliinermut ingerlatsivik peqqussuteqarpat imaluunniit nakkutilliinermik sukannernerusumik aalajangiippat, nakkutilliinermut ingerlatsiviup kommunalbestyrelsit inissiisut nalunaarfigissavai.

  Imm. 4.  Naalakkersuisut nakkutilliinermik sukannernerusumik qaqugu aallartitsisoqarsinnaanersoq aamma peqqusissuteqartoqarsinnaanersoq pillugit malittarisassanik erseqqinnerusunik aalajangersaassapput.

 

Kapitali 14

Misiliutaasumik aaqqissuussinerit

 

  § 90.  Inatsisartut inatsisaanni matumani aalajangersarneqartut saniatigut kommunalbestyrelsip qinnuteqarneratigut kommunalbestyrelsi allanik tapersersuisinnaasoq aamma najugaqarfissatut neqeroorutinik allanik pilersitsisinnaasoq, Naalakkersuisut akuersissuteqarsinnaapput.

  Imm. 2.  Naalakkersuisut misiliutaasumik aaqqissuussinertut, tak. imm. 1, sivisunerpaamik ukiuni pingasuni sivisussuseqarsinnaasut akuersissutigisinnaavaat.

  Imm. 3.  Kommunalbestyrelsi misiliutaasumik aaqqissuussineq pillugu ukiumoortumik naliliinermik, Naalakkersuisunut tunniunneqartussamik suliaqartassaaq, tak. imm. 2.

  Imm. 4.  Naalakkersuisut tapersersueriaatsit aamma najugaqarfissatut neqeroorutinik, akuersissummut tunngasunik, nakkutilliineq pillugu aalajangersakkanik aalajangersaasinnaapput.

 

Kapitali 15

Aningaasaqarneq akigititallu

 

Aningaasalersuineq

 

  § 91.  Inatsisartut inatsisaat manna naapertorlugu inunnut innarluutilinnut tapersersuinermut aningaasartuutit kommuninit akilerneqassapput.

  Imm. 2.  Inatsisartut inatsisaat manna naapertorlugu Namminersorlutik Oqartussat ulloq unnuarlu neqeroorutaannut pilersinneqarnertunut ingerlanneqartunullu aningaasartuutit attuumassuteqartut Naalakkersuisut akilissavaat.

  Imm. 3.  Namminersorlutik Oqartussat ulloq unnuarlu neqeroorutaannik ingerlatsineq kommunit akigititanut akiliutai aqqutigalugit aningaasalersorneqassapput, tak. § 92.

  Imm. 4.  Inatsisartut inatsisaat manna naapertorlugu nammineq najugaqarfissatut neqeroorutinik pilersitsinermut aamma ingerlatsinermut aningaasartuutit attuumassuteqartut tamaasa kommunit namminneq akilissavaat.

  Imm. 5.  Inuk innarluutilik nunatsinni oqartussat tapersersuinermut iliuuseqarneratigut Kalaallit Nunaata avataani inissinneqarpat, nunani allani ingerlatsinermut oqartussanik isumaqatigiissuteqarnerup kingorna Inatsisartut inatsisaat manna malillugu tapersersuinernut aallartinneqartunut aningaasartuutinut atatillugu, iliuuseqartussaatitaaneq utertitsinerlu pillugit Naalakkersuisut malittarisassanik erseqqinnerusunik aalajangersaasinnaapput.

 

Akigititanik nalimmassaaneq

 

  § 92.  Kommunalbestyrelsip inissiisup inuk innarluutilik ulloq unnuarlu neqeroorummi Namminersorlutik Oqartussanit ingerlanneqartumi najugaqarneranut § 50 naapertorlugu ulloq unnuarlu inissiinermut ullormut inissiiffiusumut ataatsimut akigititaq aalajangerneqartoq akilissavaa.

  Imm. 2.  Imm. 1 naapertorlugu ulloq unnuarlu inissiinermut akigititaq kommunalbestyrelsip akiligassaa Naalakkersuisut aalajangersassavaat, taamaalilluni akigititap tamarmiusup akilerneqarneratigut Namminersorlutik Oqartussat ulloq unnuarlu neqeroorutaannik ingerlatsinermut aningaasartuutit matussuserneqarsinnaallutik.

  Imm. 3.  Inuup innarluutillip ulloq unnuarlu neqeroorummi Namminersorlutik Oqartussat ingerlataanni najugaqartup ulluinnarni pisariaqartitanut, paaqqutarineqarnissamut, isumassorneqarnissamut katsorsarneqarnissamulluunniit pisariaqartitaanik immikkuullarissumik tapersersorneqarsinnaaffiani, allatut matussuserneqarsinnaanngitsut, taamaallaat ulloq unnuarlu neqeroorummik Namminersorlutik Oqartussat ingerlataanni najugaqarnermi, tak. § 50, akigititamik aalajangiinermut aallaavigineqassaaq.

  Imm. 4.  Ulloq unnuarlu akigititaq, tak. imm. 1–3, inummut innarluutilimmut ulloq unnuarlu neqeroorummi najugaqarneranut atatillugu aningaasartuutit tamarmik ilaatinneqassapput, tassunga ilanngullugit aningaasartuutit makkununnga:

1)  nalinginnaasumik sulisunut,

2)  ulloq unnuarlu neqeroorummi najugaqartunut immikkut sulisuusinnaasut,

3)  nerisaqarneq najugaqarnerlu,

4)  meeqqamut inersimasumullu innarluutilimmut siusinaartumik soraarnerussutisiaqanngitsumut utoqqalinersiaqanngitsumullu aningaasat kaasarfimmiussat atisarsiniutissallu

5)  sunngiffimmi sammisassaqartitsinerit, aamma

6)  Kalaallit Nunaata iluani avataanilu asiarnerit angalanerillu.

  Imm. 5.  Ulloq unnuarlu neqeroorutip akigititat Naalakkersuisunit aalajangersarneqartut ukiumullu nalimmassarneqartut tunngavigalugit najugaqartut kaasarfimmiussaat atisarsiniuutissaallu akilissavai. Kaasarfimmiussat atisassarsiutissallu ulloq unnuarlu akigititamut ilaapput, tak. imm. 3.

 

  § 93.  Akigititaq, tak. § 92, imm. 2, ukiumoortumik januaarip aallaqqaataani aningaasanut inatsimmi atuuttumi akit akissarsiallu nalimmassarnerannut akigititaq (PL-akigititaq) assingalugu nalimmassarneqassaaq.

  Imm. 2. Ulloq unnuarlu neqeroorummut nutaamik pilersinneqartumut akigititaq aalajangersarneqartillugu kiisalu akigititanik aalajangersarneqartunik, tak. imm. 1, allannguisoqartillugu, Naalakkersuisut aamma kommunalbestyrelsit imaluunniit kommunit ataatsimoorlutik sinniisaata akornanni isumaqatiginniutigineqassaaq.

  Imm. 3. Naalakkersuisut ulloq unnuarlu neqeroorummi najugaqarnermut akigititaq, tak. imm. 1, nittartakkami nalunaarutit.gl-imi Akigititanut quppersagaq – Isumaginninnermi akigititat – aqqutigalugit, kingusinnerpaamik ukiup siuliani novembarip 15-ianni, akigititat atuutilersinneqarnissaat sioqqullugu tamanut saqqummiutissavaat.

 

  § 94.  Akigititat Inatsisartut inatsisaat manna naapertorlugu tunngaveqartut, ukiumut ataasiarlutik nalimmassarneqassapput.

  Imm. 2.  Naalakkersuisut akigititanik aalajangersaaneq Akigititanut quppersagaq – Isumaginninnermi akigititat – aqqutigalugit nittartakkami nalunaarutit.gl-imi ukiup siuliani kingusinnerpaamik novembarip 15-ianni saqqummiunneqassapput.

 

Kapitali 16

Naammagittaalliuuteqarneq aamma kisitsisitigut paasissutissat

 

Naammagittaalliorsinnaatitaaneq

 

  § 95.  Inatsisartut inatsisaat manna malillugu kommunalbestyrelsip aalajangiineri isumaginnittoqarfiup aqunneqarnera aaqqissuussaaneralu pillugit Inatsisartut peqqussutaanni aalajangersakkat malillugit Isumaginninnermi Naammagittaalliuuteqartarfimmut naammagittaalliuutigineqarsinnaapput, taamaattoq § 42, imm. 1, § 43, imm. 1, § 48 aamma § 49 naapertorlugit ingerlatsivinni pilersinneqartuni inunnut ataasiakkaanut suliat pinnagit.

  Imm. 2.  Inuk innarluutilik imaluunniit taassuma suliami sinniisuutitaa, tassunga ilanngullugu inunnik innarluutilinnik illersuisoq, tak. § 10, imm. 1 malillugu naammagittaalliummik suliakkiinissaq pillugu Pissassarfimmit siunnersorneqarnissamik ilitsersorneqarnissamillu qinnuteqarsinnaavoq.

 

Kisitsisitigut paasissutissat

 

  § 96.  Kommunalbestyrelsi kisitsisitigut paasissutissanik ukiumoortumik Naalakkersuisunut nalunaaruteqassapput, ilaatigut:

1)  Inatsisartut inatsisaat manna malillugu inuit tapersersorneqarnertut amerlassusaannut, ukiuinut, siuaassusermut najugaqarfinnullu agguataarlugit, kiisalu tapersersuinermut iliuutsinut aamma Kalaallit Nunaata avataani inissiinernut agguataarlugit.

2)  Misiliutaasumik aaqqissuussinerit.

  Imm. 2.  Kommunalbestyrelsi kisitsisitigut paasissutissanik Naalakkersuisut piumasaat malillugu nassiussinissamut pisussaaffeqarpoq.

 

Kapitali 17

Paasissutissiisussaatitaaneq kinguneqartitsinerillu

 

  § 97.  Inuk innarluutilik Inatsisartut inatsisaat manna malillugu tapersersorneqartoq aamma angajoqqaatut oqartussaasoq imaluunniit akisussaasoq inummut pissutsinik allannguutit tamarmik, tapersersuinermik tamakkiisumik imaluunniit ilaannakortumik allannguinissamik imaluunniit atorunnaarsitsinissamik kinguneqarsinnaasut, pillugit kommunalbestyrelsimut paasissutissiisussaatitaapput.

  Imm. 2.  Inuk imm. 1-imi paasissutissiisussaatitaanermik pinngitsoortitsippat imaluunniit ilisimagaluarlugu Inatsisartut inatsisaat manna malillugu pisinnaatitaaffiginagu tapersersorneqarpat, kommunalbestyrelsip utertillugit akilerneqarnissaat imaluunniit utertillugit tunniunneqarnissaat piumasarisinnaavaa. Utertillugit akiliisitsisoqarnissaa imaluunniit utertillugit tunniussisoqarnissaa piumasarineqarpat, inuup innarluutillip, angajoqqaatut oqartussaasup imaluunniit akisussaasup tapersersorneqarnissaq pisariaqartinneqarunnaartoq ilisimagaluaraa imaluunniit ilisimasussaagaluaraa piumasaqaataavoq.

  Imm. 3.  Utertillugit akileeqqusinermi imaluunniit utertillugit tunniusseqqusinermi inuup innarluutillip, taassuma angajoqqaatut oqartussaasua imaluunniit akisussaasua tapiissutit tunniunneqartut piffissamiit eqqortuujunnaarneri pillugit ilisimassagaluaraa imaluunniit ilisimasussaagaluaraa piumasarineqarsinnaavoq.

 

  § 98. Inatsisartut inatsisaanni matumani aalajangersakkat naapertorlugit kommunalbestyrelsip oqartussatut pisussaaffini eqquutsinnissai annertuumik imaluunniit arlaleriarluni sumiginnarpagu imaluunniit mianersuaalliorfigippagu, Naalakkersuisut kommunalbestyrelsi pinngitsaaliissutinik akilersuinissamik pisussaaffilersinnaavai, tassunga ilanngullugit ullormut akiliisitsinerit.

  Imm. 2.  Inatsisartut inatsisaat manna tunngavigalugu pinngitsaaliissummik akiliisinneqarnermi akiliutit Nunatta Karsianut nakkartinneqassapput.

 

Kapitali 18

Atuutilertitsinermut, atorunaarsitsinermut ikaarsaarnermullu aalajangersakkat

 

  § 99.  Inatsisartut inatsisaat manna ulloq 1. januar 2027-mi atuutilersinneqassaaq, taamaattoq tak. imm. 4.

  Imm. 2.  Peqatigalugu Inuit innarluutillit tapersersorneqarnissaannut Inatsisartut inatsisaat nr. 13, 12. juni 2019-imeersoq atorunnaarsinneqarpoq.

  Imm. 3.  Allaffissornermut najoqqutassat Inatsisartut inatsisaanni imm. 2, nr. 1-imi taaneqartumi tunngaveqartut atorunnaarsinneqassapput, Isumaginninnermi suliassaqarfimmi nakkutilliineq pillugu Namminersorlutik Oqartussat nalunaarutaat nr. 49, 31. august 2021-meersoq minillugu, Inatsisartut inatsisaat matumuuna imaluunniit Inatsisartut inatsisaasa allat tunngavigalugit malittarisassaliuussat taarserneqarnissaasa atorunnaarsinneqarnissaaaaluunniit tungaannut suli atuutiinnassalluni.

  Imm. 4. Inatsisartut inatsisaanni matumani § 12 1. januar 2028-mi atuutilersinneqassaaq.

 

 

Namminersorlutik Oqartussat, ulloq 20. novemberit 2026

 

 

 

Jens-Frederik Nielsen (atsior.)

Naalakkersuisut Siulittaasuat