Inatsisartut Ombudsmandiat pillugu Inatsisartut inatsisaat
Kapitali 1
Inatsisartunut attaveqarneq
§ 1. Inatsisartunut qinersisoqareernerit tamaasa atorfillu inuttaarukkaangat Inatsisartut ombudsmandimik qinersisassapput.
Imm. 2. Ombudsmandi Inatsisartunit tatigineqarunnaarpat, ombudsmandi Inatsisartut soraarsissinnaavaat.
§ 2. Ombudsmandi toquppat ombudsmandip suliai Inatsisartut ombudsmandimik nutaamik qinersinissaasa tungaanut kimit suliarineqassanersut Inatsisartut Inatsisinut Ataatsimiititaliaata aalajangissavaa.
§ 3. Inatsisartunut, Naalakkersuisunut kommuninilu qinikkatut ilaasortat ombudsmandip suliassaanik suliaqarsinnaanngillat.
Imm. 2. Ombudsmandi inatsisilerinermi kandidatitut soraarummeernermi angusisimasuussaaq.
§ 4. Ombudsmandi qaammatinik arfinilinnik siumut ilisimatitsilluni qaammatip naanerani soraarsinneqarnissaminik piumasaqarsinnaavoq.
Imm. 2. Ombudsmandi qaammatip 70-inik ukioqalerfimmi naaneranit soraarsinneqassaaq.
§ 5. Inatsisartunut qinersisoqareernerit tamaasa kiisalu ombudsmandimut taartaasartutut atorfiup inuttaarunnerani, Inatsisartut ombudsmandimut taartaasartoq toqqassavaat, taannalu ombudsmandip suliassani suliami peqataasinnaassuseqannginnerup nassatarisaanik isumagisinnaajunnaarpagit, ombudsmanditut sulisassaaq.
Imm. 2. Suliami pissutsinik ombudsmandip arlaannaannilluunniit illersuisuunnginneranik qularutiginnilersitsisinnaasoqarpat ombudsmandip suliaq Inatsisartut Inatsisinut Ataatsimiititaliaannut nassiutissavaa, Ataatsimiititaliallu suliaq ombudsmandimut taartaasartumut Inatsisartut qinigaannut suliarisassanngortillugu tunniutissavaa.
Imm. 3. Ombudsmandi Inatsisartut Inatsisinut Ataatsimiititaliaat akuersiseqqaartinnagu pisortat namminersortulluunniit suliffiutaanni, ingerlassaanni, suliffeqarfiutaanni imaluunniit peqatigiiffiutaanni atuuffeqaqqusaanngilaq.
§ 6. Ombudsmandi suliaminik ingerlatsinermini Inatsisartunit qulangersimaneqanngilaq.
Imm. 2. Inatsisartut ombudsmandip sulinera pillugu aalajangersakkanik nalinginnaasunik aalajangersaasinnaapput.
Kapitali 2
Ombudsmandip piginnaatitaanera
§ 7. Kalaallit Nunaanni Namminersorlutik Oqartussat kommunillu ataanni pisortat ingerlatsinerisa ilaat tamarmik Ombudsmandip sulinerani ilaatinneqarput. Pissutsit kiffaanngissusiiagaasut paaqqinniffinni/suliffeqarfinni il.il. namminersortuni, pisortani oqartussaasup aalajangiineratigut, pisortani oqartussaasup kaammattuuteqarneratigut, pisortaniluunniit oqartussaasup akuersineratigut akuersaarneratigulluunniit kiffaanngissusiiagaaffiusuni atugaat, ombudsmandip sulinerani pineqartunut aamma ilaatinneqarput. Pissutsit meeqqanik paaqqinniffinni il.il. namminersortuni meeqqat eqqarsaatigalugit suliassanik toqqaannaq isumagisaqartuni atugaat ombudsmandip sulineranut pineqartunut aammattaaq ilaatinneqarput.
Imm. 2. Aalajangiisartut, namminersortut inuilluunniit ataasiakkaat akornanni saqitsaassutinik isumannaatsumik periaaseqarlutik aalajangiisartut pillugit naammagittaalliuutit ombudsmandip suliarissanngilai, naak aalajangiisartut pineqartut pisuni allani pisortat ingerlatsinerannut ilaasutut isigineqaraluartut.
Imm. 3. Ingerlatseqatigiiffiit, suliffeqarfiit, peqatigiiffiit il.il. inatsisitigut imaluunniit allaffissorluni aalajangiinikkut malittarisassanut tunngavinnulluunniit, pisortat ingerlatsiviannut atuutsinneqartutut tamakkiisumik ilaannakortumilluunniit ilanngunneqarpata pineqartut taakku ombudsmandip sulineranut tamatuma annertoqataanik ilanngunneqassasut, ombudsmandi aalajangiisinnaavoq.
§ 8. Kommunit ingerlatsinerannik naliliinermi kommunit aqutsineranni atugassarititaasut ombudsmandip mianerissavai, tassunga ilanngullugit kommunit aqutsinerminni suliaat.
§ 9. Kalaallit Nunaanni Ilagiit pissutsit ilageeqarnermut tunngasut pillugit aalajangersakkanik Namminersorlutik Oqartussat aalajangersaasinnaanerattut annertutigisumik, ombudsmandip susassarisaanut ilaapput, matumani apeqqutit ilagiit ajoqersuutaannut imaluunniit upperisamik nalunaajaanerannut toqqartumik allatigulluunniit tunngassuteqartut eqqaassanngikkaanni.
§ 10. Ombudsmandi sulinini pillugu Inatsisartunut ukiumoortumik nalunaaruteqartassaaq. Nalunaarut Inatsisartut ukiakkut nalinginnaasumik ataatsimiinnerminni oqaluuserissavaat. Nalunaarut tamanut saqqummiunneqartassaaq.
Imm. 2. Ombudsmandi suliaq aalajangersimasoq pillugu Inatsisartunut, Naalakkersuisunut ilaasortamut pineqartumut imaluunniit kommunalbestyrelsimut nalunaaruteqarpat, tak. § 23, imaluunniit ombudsmandip suliaq aalajangersimasoq ukiumoortumik nalunaarummini eqqartorsimappagu, pineqartup misissuinermi imminut sammitinneqartumi, imminut illersorluni oqaaserisai ombudsmandip nalunaarummi imaluunniit ukiumoortumik nalunaarummi paasissutissiissutigissavai.
§ 11. Ombudsmandi Inatsisartut inatsisaanni, Inatsisartut peqqussutaanni imaluunniit allaffissornikkut aalajangersakkani atuuttuni amigaateqartoqarneranik paasisaqaruni, tamanna pillugu Inatsisartunut Naalakkersuisunullu ilaasortamut pineqartumut nalunaaruteqassaaq. Kommunini aalajangersakkat amigaataat eqqarsaatigalugit ombudsmandi kommunalbestyrelsimut pineqartumut nalunaaruteqassaaq.
§ 12. Oqartussat § 7-imi taaneqartut pillugit naammagittaalliuutit kimilluunniit ombudsmandimut naammagittaalliuutigineqarsinnaapput. Kinaluunniit kiffaanngissusiiagaasimasoq, allakkatigut matoqqasutigut ombudsmandimut saaffiginninnissaminut pisinnaatitaavoq.
Imm. 2. Naammagittaalliortup atini najugaqarfinilu nalunaarutigissavai, naammagittaalliuutip suliarinera pillugu nalunaarutinik ombudsmandip naammagittaalliortumut nassiussiffigisinnaasaanik.
Imm. 3. Naammagittaalliuutiginiagaq, pisup pineranit ukioq ataaseq qaangiutsinnagu suliassanngortinneqassaaq.
Imm. 4. Imm. 3-mi piffissaliunneqartoq ombudsmandip pisuni immikkut ittuni sivitsorsinnaavaa.
§ 13. Pissutsit ingerlatsinermi oqartussaasumut allamut naammagittaalliuutigineqarsinnaasut pillugit naammagittaalliuutit aqutsinermi allaffissornikkut oqartussaasumit qullerpaamit aalajangiiffigineqareersimatinnagit ombudsmandimut suliassanngortinneqarsinnaanngillat.
§ 14. Naammagittaalliuut misissuinermik aallartitsinermut pissutigissallugu naammannersoq ombudsmandip aalajangissavaa.
Imm. 2. Ombudsmandi naammagittaalliuutip suliarinissaa itigartitsissutiginiarlugu aalajangeruni, ajornanngippat naammagittaalliornissamut periarfissat allat pillugit ilitsersuussissaaq.
§ 15. Ombudsmandi suliamik nammineerluni misissuiffiginnilersinnaavoq.
Imm. 2. Ombudsmandi oqartussap sulianik suliarinninnera pillugu ataatsimut misissuiffiginninnernik ingerlatsisinnaavoq.
§ 16. Atorfeqarfiit imaluunniit suliffeqarfiit kiisalu atorfeqarfigisat allat suugaluartulluunniit ombudsmandip sulinerani pineqartunut ilaatinneqartut ombudsmandip misissuiffigisinnaavai. Ombudsmandip misissuinermut taamaattumut atatillugu, §§ 19-20-p nassatarisaasa saniatigut, pissutsit suliffeqarfiup oqartussaasulluunniit aaqqissuussaaneranut ingerlanneqarneranullu tunngasut, kiisalu pissutsit suliffeqarfiup oqartussaasulluunniit atuisuisa ingerlataasalu aaqqissuussaaneranut ingerlanneqarnerannulluunniit tunngasut, inuppalaassutsimut, inunnillu ataqqinassusilimmik ikiuinermut tunngasut aallaavigalugit naliliiffigisinnaavai.
§ 17. Naalliutsitsisarneq allatullu peqqarniingaartumik, inuppalaanngitsumik imaluunniit nikanarsaataasumik pinnittarneq imaluunniit pillaasarneq akiorniarlugit Naalagaaffiit Peqatigiit (FN-ip) isumaqatigiissutaannut ilassut 18. december 2002-meersoq, nammineq piumassuseq malillugu ilannguffigineqarsinnaasoq tunngavigalugu, nuna tamakkerlugu pinaveersaartitsisutut suliassaq ombudsmandip ilassummi aalajangersakkat tunngavigalugit isumagissavaa.
Kapitali 3
Ombudsmandip sulianik suliarinnittarnera
§ 18. Oqartussaasut il.il. ombudsmandip sulinerani pineqartunut ilaatinneqartut paasissutissanik allagaatinillu il.il. Ombudsmandip tunniuteqqusaanik ombudsmandimut nalunaaruteqarnissaminnut tunniussinissaminnullu pisussaaffeqarput.
Imm. 2. Ombudsmandip oqartussaasut il.il. sulinermini pineqartunut ilaatinneqartut allakkatigut oqaaseqaateqaqqullugit piumasaqarfigisinnaavai.
Imm. 3. Ombudsmandi misissuinermini pissutsit pingaaruteqartut pillugit inunnik eqqartuussivimmut nassuiaateqaqqullugit sassaqqusisinnaavoq. Nassuiaatit eqqartuussivimmi killisiuisarneq pillugu malittarisassat malillugit saqqummiunneqassapput.
Imm. 4. Ombudsmandip atorfeqarfiit imaluunniit suliffeqarfiit atorfeqarfiusulluunniit allat suugaluartut oqartussaasut § 7-imi taaneqartut il.il. suliassaannik ingerlatsiffiusut ornillugit misissuiffigisinnaavai, ininullu tamanut isersinnaatitaalluni.
Imm. 5. Ombudsmandip tamanna pisariaqartoq nalilerpagu sukkulluunniit kinaassutsimut uppernarsaammik eqqortumik takutitsilluni, eqqartuussivillu aalajangiitinngikkaluarlugu paaqqinniffinnik/suliffeqarfinnik il.il. inuit kiffaanngissusiiagaaffigisimasaannik kiffaanngissusiiagaaffigisinnaasaannilluunniit, tak. § 7, imm. 1-imi oqaaseqatigiit aappaat, aamma paaqqinniffinnik/suliffeqarfinnik namminersortunik il.il. meeqqanik isumaginnittunik, tak. § 7, imm. 1-imi oqaaseqatigiit pingajui, misissuiartorluni isersinnaavoq. Politiit misissuinerup ingerlanneqarnerani pisariaqarpat ikiuutissapput.
§ 19. Oqartussaasut inuilluunniit, ombudsmandip sulinerani pineqartunut ilaatinneqartut, inatsisinik atuuttunik unioqqutitsisumik iliuuseqarnersut imaluunniit allatut iliorlutik suliassaminnik ingerlatsinerminni kukkussuteqarnernut sumiginnaanernulluunniit ombudsmandip misissussavaa.
Imm. 2. Pisortat ingerlatsineranni suliassat suliarineqartarnerat pillugu Inatsisartut inatsisaanni tunngaviit, allagaatinik paasitinneqarsinnaatitaaneq pillugu malittarisassanut tunngaviusut ilaatinnagit, ombudsmandip sulianik suliarinninnerani aamma taamatut atuutissapput.
§ 20. Ombudsmandi isornartorsiuisinnaavoq, inassuteqaateqarsinnaalluni suliarlu pillugu paasinninnerminik saqqummiussisinnaalluni.
§ 21. Oqartussaasoq inulluunniit pineqartoq oqaaseqaateqarnissamut periarfissinneqareersimatinnagu, ombudsmandi isornartorsiuilluni, inassuteqaateqarluni il.il. oqaaseqaateqassanngilaq.
Imm. 2. Ombudsmandip aalajangersinnaavaa tusarniaanermi allakkat, oqaaseqaataagallartoq, nassuiaataagallartoq imaluunniit § 15 naapertorlugu suliniut ombudsmandip nammineerluni misissuiffigisassanngortitaa pillugu nassuiaataagallartoq pisortat ingerlatsinerat pillugu paasitinneqarsinnaatitaaneq pillugu Inatsisartut inatsisaat aamma pisortat ingerlatsineranni suliassat suliarineqartarnerat pillugu Inatsisartut inatsisaat tunngavigalugu, suliami allagaatinik paasitinneqarsinnaatitaanermut aatsaat ilaatinneqalissasoq inaarutaasumik oqaaseqaatip, inaarutaasumik nassuiaatip imaluunniit inaarutaasumik nalunaarusiap oqartussaasumut pineqartumut ullup nassiussiviusup aqaguani.
§ 22. Pissutsit ombudsmandip oqartussaaffiinut ilaatinneqartut pineqarpata suliap pineqartumut aningaasartuutaanngitsumik eqqartuussivikkut suliarineqarnissaa ombudsmandip inassuteqaatigisinnaavaa.
§ 23. Ombudsmandip suliamik misissuinerata takutippagu pisortat ingerlatsineranni annertunerusumik kukkussuteqartoqarsimanissaa imaluunniit sumiginnaasoqarsimanissaa ilimagisariaqartoq, ombudsmandi suliaq pillugu Inatsisartut Inatsisinut Ataatsimiititaliaannut nalunaaruteqassaaq. Taamatullu ombudsmandi suliaq pillugu Naalakkersuisunut ilaasortamut pineqartumut imaluunniit kommunalbestyrelsimut nalunaaruteqassaaq.
§ 24. Ombudsmandip aalajangiineri, oqaaseqaatai il.il. pissutigalugit innuttaasunik eqqartuussisarneq pillugu inatsimmi periaatsit tunngavigalugit ombudsmandimik eqqartuussivimmut suliassanngortitsinerit ombudsmandip piumasaqarnera tunngavigalugu eqqartuussivimmit tunuartinneqarsinnaapput.
Kapitali 4
Pissutsit aaqqissuussaanermut tunngasut
§ 25. Ombudsmandi Inatsisartut Allattoqarfianni atorfillit qullersaattut akissarsiaqartinneqassaaq. Ombudsmandi tamatuma saniatigut inummut tapilerneqarsinnaavoq. Ombudsmandi sulilernerminut soraarnerminullu atatillugu akiliunneqarluni angalasinnaatitaavoq nuunnermilu aningaasartuutinik akiliunneqarsinnaatitaalluni. Ombudsmandi tamanna pillugu malittarisassat atuuttut malillugit sulinermut atatillugu inissaminik tunineqarnissaminik pisinnaatitaaffeqarpoq.
Imm. 2. Ombudsmandi malittarisassat Naalakkersuisunut ilaasortanut atuuttut malillugit soraarnerussutisiaqartinneqassaaq. Soraarnerussutisiaqalernissamut suliffeqarfiup akileeqataassutai namminerlu akileeqataassutit ombudsmandip, imm. 1-mi oqaaseqatigiit aappaat naapertorlugu inummut tapiutaasinnaasut ilanngullugit, aningaasarsiai tunngavigalugit naatsorsorneqassapput.
Imm. 3. Ombudsmandi ombudsmandiujunnaarnersiutisiaqarsinnaatitaavoq, malittarisassat Naalakkersuisunut ilaasortanut atuuttut malillugit katersorneqartussanik. Ombudsmandiujunnaarnersiutit ombudsmandip, imm. 1-mi oqaaseqatigiit aappaat naapertorlugu inummut tapiutaasinnaasut ilanngullugit, aningaasarsiai tunngavigalugit naatsorsorneqassapput. Qaammatip ombudsmandip 70-inik ukioqalerfiata naaneraniit ombudsmandi ombudsmandiujunnaarnersiuteqarsinnaanngilaq.
Imm. 4. Ombudsmandi siumut ilisimatitsissutaanngitsumik tunuartariaqassaguni, imm. 1-mi oqaaseqatigiit aappaat naapertorlugu inummut tapiutaasinnaasut ilanngullugit, akissarsiassani qaammatip tunuarfimmi naaneranit qaammatini pingasuni pigiinnassavai. Ombudsmandi piffissaq taanna naanngitsoq toquppat akissarsiassaasa ilaat toqunerata nalaani tunniunneqarsimanngitsut ombudsmandip aapparisaata, imaluunniit aapparisaminik qimataqanngippat, ombudsmandip qitornaasa meeqqanut qimataanersiutinik pisinnaatitaasut pissavaat. Akissarsiassat tunniunneqartartillugit ombudsmandiujunnaarnersiutinik soraarnerussutisianilluunniit tunniussisoqassanngilaq.
§ 26. Ombudsmandip sulisuni nammineq atorfinitsittassavai soraarsittassallugillu. Taakku qassiunissaat, akissarsiassaat aamma soraarnerussutisiassaat Inatsisartut Suleriaasianni malittarisassat tunngavigalugit aalajangersarneqassapput.
Imm. 2. Ombudsmandip missingersuutai Inatsisartut missingersuutaasa ilagaat.
Imm. 3. Ombudsmandip naatsorsuutaanik saqqummiussineq kukkunersiuinerlu Inatsisartut Suleriaasianni aalajangersarneqassapput.
Imm. 4. Ombudsmandi naatsorsuuserinerminut imminullu aningaasaliissutigineqartut aqunneqarnerinut akisussaavoq.
Imm. 5. Ombudsmandi aaqqissuussaanikkut suliassami naammassiniarnerini oqartussaasunit allanillu ombudsmandip nakkutilliinerani pineqartunut ilaatinneqartunit, kiffartuussinernik imitassiissutinilluunniit pissarsiniarpat ombudsmandip oqartussaasoq pineqartoq suliassap naammassiniarneqarnissaa pillugu isumaqatigiissuteqarfigissavaa.
§ 27. Ombudsmandip suliassani sulisumi ilaata utaqqiisaagallartumik suliarissagai aalajangersinnaava.
§ 28. Ombudsmandi pissutsinik sulinermini ilisimalersimasaminik nipangiussisussaaÂtitaavoq, isertuussinissaq pissutsit imminni pissusissamisoortuutippassuk. Nipangiussisussaatitaaneq ombudsmandip atorfimminit tunuarneratigut atorunnaarneq ajorpoq. Taamatut pisussaaffiligaaneq ombudsmandip sulisuinut aamma atuuppoq.
Imm. 2. Inuit, suliffeqarfiit aqutsinermilu allaffissornikkut oqartussaasut ombudsmandip suleqatigiinnissamik isumaqatigiissuteqarfigisai, paasissutissat isertuussassat ombudsmandip oqartussaasumut, inummut imaluunniit suliffeqarfimmut pineqartumut nipangiussisussaatitaanngitsumut ingerlateqqillugit tunniussai eqqarsaatigalugit, taanna nipangiussisussaatitaassasoq ombudsmandip aalajangersinnaavaa.
§ 29. Taaguut ombudsmandi imaluunniit taaguut alla taassumunnga paarlaanneqarsinnaasoq inatsimmik Inatsisartunit akuersissutigineqarsimasumik tunngaveqartinneqanngikkuni atorneqassanngilaq.
Kapitali 5
Atuutilersitsineq il.il.
§ 30. Inatsisartut inatsisaat manna 1. december 2026 atuutilerpoq.
Imm. 2. Tamatumunnga peqatigitillugu Inatsisartut Ombudsmandiat pillugu Inatsisartut inatsisaat nr. 7, 1. juni 2017-imeersoq atuukkunnaarsinneqarpoq.
Imm. 3. Taamaattorli naammagittaalliuutit inatsisip matuma atuutilersinneqannginnerani ombudsmandimut naammagittaalliuutigineqarsimasut Inatsisartut ombudsmandiat pillugu Inatsisartut inatsisaat nr. 7, 1. juni 2017-imeersoq tunngavigalugu suliarineqassapput.
Namminersorlutik Oqartussat, 20. novemberi 2026
Jens-Frederik Nielsen (atsior.)
Naalakkersuisut Siulittaasuat
-
PDF (0.14MB)
-
PDF (0.69MB)