Maanna Nuup kiisalu Qasigiannguit Aasiaallu pilersorneqarnerannut erngup nukinganik nukissiorfinnik taakkununngalu atatillugu atortunik sanaartornermut, aningaasalersuinermut ingerlatsinermullu killiliussatut atugassarititaasut pillugit Inatsisartut inatsisaat nr. 22, 1. december 2021-meersoq, Inatsisartut inatsisaatigut nr. 17, 21. november 2022-meersukkut allannguutitalik, nalunaarutigineqarpoq.

Atuuffia

  § 1.  Nuup kiisalu Qasigiannguit Aasiaallu pilersorneqarnerannut erngup nukinganik nukissiorfinnik taakkununngalu atatillugu atortunik sanaartornermut, aningaasalersuinermut ingerlatsinermullu killiliussatut atugassarititaasut Inatsisartut inatsisaatigut aalajangersarneqarput.

Erngup nukinganik nukissiorfimmik taakkununngalu atatillugu atortunik sanaartorneq allilerinerlu

  § 2. Naalakkersuisut Utoqqarmiut Kangerluarsunnguanni erngup nukinganik iluaquteqarluni nukissiorfik Nuummut pilersuisoq alliniarpaat, aammalu erngup nukinganut nukissiorfimmik nutaamik Qasigiannguanut aamma Aasiannut pilersuisussanik sanaartorniarlutik.

  § 3. Utoqqarmiut Kangerluarsunnguanni erngup nukinganik iluaquteqarluni nukissiorfimmi Nuummut pilersuisumik allilerinermi ilaapput:

1) nukissiorfimmik innaallagialiuummik nutaamik pilersitsineq, innaallagissap aqqutaanut maanna nukissiuutit Utoqqarmiut Kangerluarsunnguanni pioreersut aqqutaannut teknikkimut atortulersuutit tamatumani ilaasut ilanngullugit, nukissiorfimmut sillimmatitut inissisimasussamut atortulersuutinut pioreersunut ilanngunneqarsinnaasumut ilanngullugu attavilerneqartussamik, attaveqaasersuutinik taakkununngalu ilaasunut atortussanik allanik, aamma illutanik ilaqartussamik, aamma

2) sullorsualiorneq maanna nukissiorfiup imeqarfigisaata Kangerluarsunnguup tasiata aamma Isortuarsuup tasiata akornanni.

  § 4. Erngup nukinganik iluaquteqarluni nutaamik Qasigiannguanut aamma Aasiannut pilersuisussamik sanaartornermi ilaapput:

1) nukissiorfissamik nutaamik sanaartorneq kangerluup Kangersunerup eqqaani inissisimasussamik, teknikkimut atortulersuutit tamatumani ilaasut ilanngullugit, sillimmatitut atortulersuutitalimmik, attaveqaasersuutitalimmik atortunillu tamatumunnga ilaasunik allanik ilalimmik aamma illutassanik ilalimmik,

2) sullorsualiorneq tatsit Kuussuup tasiata aamma Qinngap Ilulialeeraata akornanni,

3) imm. 1-imi pineqartup erngup nukinganik nukissiorfiliamiit innaallagissap aqqutaanik Qasigiannguanut aamma Aasiannut sanaartorneq.

4)  Qasigiannguani aamma Aasianni erngup nukinganik nukissiorfimmit nutaamit tunisisarnissap qulakkeernissaanut attaveqaatit.

Sanaartukkanik erngup nukinganik iluaquteqarlunilu nukissiorfinnik pioreersunik allilerinernik atortulersuusersuinernillu aningaasalersuineq

§ 5. Inatsimmi ilaasutut sanaartugassatut suliniutinik tamakkiisumik imaluunniit ilaannakortumik aningaasaliinissamut Aningaasaqarnermut Akileraartarnermullu Ataatsimiititaliamit akuerineqartumik Naalakkersuisut taarsigassarsisinnaapput, imaluunniit namminersorlutik oqartussat pigisaattut aktianik piginneqatigiiffimmut suliffiup avataanit taarsigassarsisitsisartunit taarsigassarsianut qularnaveeqqusiisinnaallutik.

  Imm. 2. Naalakkersuisut imm. 1 naapertorlugu taarsigassarsiarineqartut, sanaartugassat Inatsisartut inatsisaanni matumani pineqartunut ilaasut aningaasalersorneqarnissaannut, Nukissiorfinnut imaluunniit aktiaatileqatigiiffimmut Namminersorlutik Oqartussanit pigineqartumut taarsigassarsiariteqqissinnaavaat.

  Imm. 3.  Imm. 2-mi eqqaaneqartut aningaasanik taarsigassarsinerit ingerlanneqarsinnaanngillat atugassarititaasut Naalakkersuisut aningaasanik taarsigassarsinermikkut pissarsiarisimasaannit pitsaanerusunik tunngaveqartillugit.

  Imm. 4.  Naalakkersuisut erniat, Nunap Karsiata ernianut aningaasartuutaanut matussutissat, aamma Nunap Karsiata taarsigassarsiarititaanut imm. 2-mi taaneqartunut aningaasartuutaanut allanut matussutissanut akiliutissat pillugit maleruagassiorsinnaapput.

  § 6.  Suliassat §§ 2-4-niittut, taakkununngalu atasutut aningaasartuutit Naalakkersuisut aalajangiussaattut atugassarisani namminersorlutik oqartussat pigisaattut aktianik piginneqatigiiffimmut, pioreersumut imaluunniit nutaatut pilersitamut tamakkiisumik imaluunniit ilaannakortumik tunniunneqarnissaat Naalakkersuisut aalajangiussinnaavaat.

  Imm. 2. Namminersorlutik Oqartussat aktianit aningaasaatit aammalu taarsigassarsianit aningaasaatit akisussaaffigineqartut akiliutigissagaat pillugu aktiaatileqatigiiffimmi Namminersorlutik Oqartussanit pigineqartumi taarsigassarsititsisunut avataaneersunut pisussaaffiliisumik uppernarsaanissamut Naalakkersuisut piginnaatinneqarput.

Imm. 3.  Taarsigassarsianut aktiaatileqatigiiffimmut Namminersorlutik Oqartussanit pigineqartumut taarsigassarsititsisut avataaneersut taarsigassarsiarititaannut qularnaveeqqusiinissamut, Naalakkersuisut piginnaatinneqarput.

  Imm. 4. Utoqqarmiut Kangerluarsunnguanni Erngup nukinganik Nukissiorfimmi ingerlatsivioreersoq, tassungalu ilaasutut teknikkikkut ingerlatsiviit, attaveqarfiit, allatullu atasutut atortut, ivertitikkat aamma illut namminersorlutik oqartussat pigisaattut aktianik piginneqatigiiffimmut tamakkiisumik imaluunniit ilaannakortumik tunniunneqarnissaat Naalakkersuisut aalajangiussinnaavaat, takuuk imm. 1.

Erngup nukinganik iluaquteqarluni nukissiorfissanut atortulersuutitalinnut tunngatillugu neqeroortitsineq

  § 7. Inatsisartut inatsisaat manna naapertorlugu sanaartugassanik aammalu sanaartorneq pillugu neqeroortitsineq pisinnaavoq nunat tamalaat akornanni neqeroortitsinertigut,aammalu nunat tamalaat akornanni ileqquusut naapertorlugit neqeroorutissanik piniarnertigut.

Imm. 2. Sanaartornermi neqeroortitsisarneq pillugu Inatsisartut inatsisaat imm. 1 naapertorlugu sanaartortitsinernut atortinneqanngilaq.

Nunamut tamarmut pilersaarummi peqqussutit

  § 8. Naalakkersuisut nunamut tamarmut pilersaarusiornikkut tunngavissiami ersarinnerusumik aalajangersaasinnaapput erngup nukinganik iluaquteqarluni taakkualu atortulersuutissaannut, Nuummut kiisalu Qasigiannguanut aamma Aasiannut pilersuinissamut atugassarititaasussanik ersarinnerusunik, Inatsisartut inatsisaat manna naapertorlugu aalajangersarneqartunik.

Imm. 2.  Naalakkersuisut aalajangersinnaapput nunamut tamarmut pilersaarusiornermut tunngavissiaq immikkuualuttortalersukkanik aalajangersagartaqartoq sumiiffiup ilaanut atortinneqartussanik ilaqartoq erngup nukinganik iluaquteqarluni nukissiorfiliornermut Nuummut aamma Qasigiannguanut aamma Aasiannut pilersuinissamut atortinneqartussaq pillugit, Inatsisartut inatsisaat manna naapertorlugu, taannalu kommuninut pilersaarutitulli inatsisitigut atortinneqassasoq.

Pinngitsaaliissummik taarsiissutitalimmik pigisanik aalaakkaasunik arsaarinnittarneq

  § 9. Naalakkersuisut piginnaatinneqarput pinngitsaaliissummik taarsiissutitalimmik pigisanik aalaakkaasunik piginnikkunnaarsitsinikkut illuutinik aalajangersimasunik tigusisinnaanermut, tamatuma sanaartugassanik erngup nukinganik nukissiorfiliornermut atatillugu pisariaqassusia naapertorlugit, Nuummut aamma Qasigiannguanut Aasiannullu Inatsisartut inatsisaat manna naapertorlugu pilersuinermut atatillugu. Pigisanik aalaakkaasunik pinngitsaaliissummik arsaarinnittarneq Pigisanik aalaakkaasunik arsaarinnissuteqartarneq pillugu Inatsisartut inatsisaat naapertorlugu pisassaaq.

Naqissusiinikkut pisortanut akitsuut

  § 10. Allagaatit, taarsigassarsinermut atatillugu allagaatit, naqitanngorlugit suliarineqarneri aamma uppernarsaatit il.il., pilersitanut aamma sanaartukkanut Inatsisartut inatsisaannut matumunnga atatillugu suliaasut, pisortanut naqissusiinikkut akitsuusigassaatitaanngillat.

Imm. 2. Naqissusiinikkut akitsuummik akiliisussaatitaannginnermut ilaapputtaaq allagaatit aamma taarsigassarsinermut atatillugu allagaatit il.il. pigisanik nalilinnik tunniussinerni imm. 1 naapertorlugu suliaasut.

Atuutilerfia

  § 11. Inatsisartut inatsisaat una atortuulerpoq ulloq 1. januaari 2022.

Inatsisatut inatsisaat nr. 17, 21. november 2022-meersoq (Aningaasalersuinermut killissaliussat annertusineqarnerat) ^[1] ima atulernissamut aalajangersagaqarpoq:

§ 2

Inatsisartut inatsisaat ulloq 1. decembari 2022 atuutilerpoq.

Inuussutissarsiornermut, Aatsitassanut, Nukissiutinut, Inatsisit Atuutsinneqarnerannut Naligiissitaanermullu Naalakkersuisoqarfik, ulloq 24. november 2025

Jørgen Hammeken Holm (atsior.)

Pisortaq

/Ane Wraae Nielsen (atsior.)