Matumuuna nalunaarutigineqarpoq Illunut sanaqataaffiusunut taarsigassarsiat pillugit Inatsisartut inatsisaat nr. 28, 3. decembari 2018-imeersoq, allannguutit ukunani pineqartut ilanngullugit Inatsisartut inatsisaat nr. 27, 21 maaji 2024-meersoq.

 

Kapitali 1

Atuuffia

 

§ 1.  Inatsisartut inatsisaat manna inigineqartussatut aalajangerneqarsimasunik illunik sanaqataaffigisanik sanaartornermut pissarsinermulluunniit taarsigassarsianut atorneqarpoq.

  Imm. 2. Nunaqarfinni illoqarfinnilu tamani, Ilulissat, Aasiaat, Sisimiut, Nuuk aamma Qaqortoq minillugit, Inatsisartut inatsisaat manna naapertorlugu illunik sanaqataaffiusunik sananissamut imaluunniit pisinissamut taarsigassarsititsisoqarsinnaavoq.

  Imm. 3.  Sumiiffinni nunalerinermut atugassiaasuni illunik sanaqataaffiusunik sanaartornissamut, pissarsinissamulluunniit taarsigassarsisitsisoqarsinnaavoq, illu sanaqataaffiusoq ukunannga najugaqarfiussappat:

1)  nunalerisinnaanermut akuersissummik pigisaqartumit, imaluunniit

2)  inunnit ingerlatsinermik isumaginnittunit.

 

  § 2.  Illunut sanaqataaffiusunut kommunalbestyrelsi taarsigassarsititsissaaq.

  Imm. 2.  Kommunalbestyrelsi inunnut nammineersinnaassusilinnut aamma illoqarfimmi imaluunniit nunaqarfimmi illumik sanaqataaffigineqartussami imaluunniit sanaartorfigineqartumi inuit nalunaarsorsimaffianni najugaqartutut nalunaarsorsimasunut taarsigassarsisitsisinnaavoq.

 

§ 3.  Inuussutissarsiummik ingerlatsiviusumiit imaluunniit ingerlatsiviusussamiit illumik sanaqataanermut taarsigassarsisitsisoqarsinnaanngilaq, taamaattoq tak. imm. 2.

  Imm. 2.  Illumi sanaqataaffigineqartussami inuussutissarsiutit namminersorfiusut mikinerusunik ingerlatsisunut taarsigassarsisitsisoqarsinnaavoq.

 

  § 4. Inatsisartut inatsisaat manna malillugu illunik sanaqataanermut taarsigassarsisitsinerup peqatigisaanik inissianut pisortat tapiissutaat atorlugit inatsisit allat malillugit tapiissuti-sisoqarsinnaanngilaq.

Imm. 2. Illoqarfinni nunaqarfinnilu pisortat attartortitsinermi inissianik atorneqanngitsunik peqarfiusuni imaluunniit illunik sanaqataaffigisanik imaluunniit nammineq illulianik, inissianut attartortittakkanut innersuussinissamut piumasaqaatinik naammassinnittunik, najugaqarfigineqanngitsunik peqarfiusuni, illunut sanaqataaffiusunut nutaanut sananermut taarsigassarsisitsisoqarsinnaanngilaq, taamaattorli tak. § 7.

 

§ 5. Illup sanaqataaffigisap piffissami sanaartorneqarnerani sanaartornermut pilersaarusiornermilu inatsisinik atuuttunik naammassinnittunik sanaartornernut taamaallaat taarsigassarsisitsisoqarsinnaavoq.

 

§ 6.  Illunut sanaqataaffigisanut nutaanut pituttuisumik sanaartornissamut isumaqatigiissuteqarfioreersimanngitsunut imaluunniit sanaartornernut aallartinneqareersimanngitsunut taamaallaat taarsigassarsisitsisoqarsinnaavoq, taamaattorli tak. § 7.

 

Kapitali 2

Pissarsinermut aamma illunut sanaqataaffiusunut taarsigassarsineq

 

§ 7. Kommunalbestyrelsimiit taarsigassarsiarititat illup sanaqataaffiusup nutaap sanaartorneranut atorneqarsinnaapput.

Imm. 2.  Kommunalbestyrelsi illumik sanaqataaffiusumik pissarsinermut taarsigassarsititsisinnaavoq aamma naammassillugu sanaartorneqarsimanngitsumik tigusinissamut taarsigassarsisitsisinnaalluni.

Imm. 3. Kommunalbestyrelsi taamaallaat illunik sanaqataaffiusunik qanoq ittuunerinik akuerisanik sananermut pissarsinermulluunniit taarsigassarsisitsisinnaavoq, tak. § 35. Qanoq ittuuneranik akuerisaasumi sanaartoqataasumit ikiortinnermut aalajangersagaq malillugu taarsigassarsisup ikiortinnissaa, taarsigassarsisitsinissami piumasaqaataavoq.

  Imm. 4.  Naalakkersuisut qinnuteqaatinut suleriaatsit, piffissamut killiliussat, qinnuteqaatinut immersugassat suliarineqartarneri aammalu assigiissaartunik atuisarnissaq pillugit maleruagassanik aalajangersaasinnaapput.

 

  § 8.  Kommunalbestyrelsi § 7, imm. 1 malillugu illumik nutaamik sanaqateqarnermi ikkussugassat pisarneq naapertorlugu aaqqissuunneqarsimasunik sumiiffimmilu ikkussugassatut tunniunneqarsimasunik pissarsinermut aningaasartuutinut uppernarsarneqarsimasunut taarsigassarsisitsisinnaavoq.

Imm. 2  Kommunalbestyrelsi § 7, imm. 2 malillugu illuni sanaqataaffiusuni pioreersuni suli naammassillugu sanaartorneqanngitsuni sumiiffimmi saniatigut atortussanik pisariaqartunik tunniunneqarsimasunik pissarsinermut aningaasartuutinut uppernarsarneqarsimasunut taarsigassarsititsisinnaavoq.

Imm. 3.  Kommunalbestyrelsi § 7 malillugu sanaartorfigissaanermut, toqqavissap pilersaarusiorneranut sanaartorneranullu, sanaartoqataasumit ikiortinnermut aamma ilitsersuisumit ikiortinnermut, innaallagissap, erngup imaluunniit kiassarnerup aqqutaasa ikkussornerinut kiisalu innaallagissap erngullu aqqutaannut, kuuffissuarnullu attavilernissamut pisortat piumasaqarnerinut aningaasartuutinut uppernarsarneqarsimasunut taarsigassarsititsisinnaavoq.

  Imm. 4.  Piffissaliussat, illunullu sanaqataaffiusunut taarsigassarsitinneqarnissamik qinnuteqartunut kommunit ikiorsiisarnerat pillugit, Naalakkersuisut paasissutissanik ilassutaasussanik piniartarneq pillugu maleruagassanik aalajangersaasinnaapput.

 

  § 9. § 7 malillugu kommunalbestyrelsip taarsigassarsiissutigisai, tak. § 8, ukiuni 20-ni amerlaqatigiinnik akilersugassanngorlugit taarsigassarsiissutigineqassapput. Nationalbankip erniaritittagai 3%-pointimik ilallugit taarsigassarsiissutit ernialersorneqassapput. Illup sanaqataaffiusup atulernissaanut akuersissutip ulluanit erniaq aalajangersarneqassaaq, taarsigassarsiallu ukiut taarsersorneqarfissaanni atuulluni.

  Imm. 2. Taarsigassarsiissutit ernialersorneqassapput, qaammatillu tamaasa aalajangersimasumik akiliuteqartarnikkut akilersorneqassallutik, qaammammut qaangiuttumut qaammatit aallartinnerini ullormi siullermi, taamaattoq tak. imm. 3.

  Imm. 3.  Taarsigassarsianut siullermeertumik akiliutigineqartussaq, illumut sanaqataaffiusumut atuilernissamik akuersissutip tunniunneranit ukiumi tulliuttumi februaarip aallaqqaataani siullermeertumik akilerneqassaaq.

 

§ 10.  Taarsigassarsisup, taassumalu inoqutaasa piffissami pineqartumi isertitaat tamarmiusut ukiut tamaasa januaarip aallaqqaataani naatsorsorneqartut tunngavigalugit, qaammatini tulliuttuni aqqaneq-marluusuni qaammammut akiliutigineqartartussaq, tak. § 9, imm. 2, naatsorsorneqassaaq. Siullermeertumik illumut sanaqataaffiusumut atuilernissamik akuersissutip tunniunneranit ukiumi tulliuttumi januaarip aallaqqaataani.

  Imm. 2.  Taarsigassarsisup, taassumalu inoqutaasa piffissami pineqartumi isertitai tamarmiusut 300.000 koruunit sinnersimatillugit, taamaattoq tak. imm. 1, isertitaasa 35 %-iisa nalinganik ukiumut tamarmiusumik akiliutissat ilaannik taarsigassarsisoq akiliuteqassaaq, taamaattoq annerpaamik ukiumut tamarmiusumik akiliutissaq. Ukiumut tamarmiusumik akiliutissaq taarsigassarsisumit akilerneqanngitsoq nalikillilerneqassaaq.

 

  § 10 a. Kommunalbestyrelsimit taarsigassarsiat § 7 malillugu aningaasartuutit uppernarsarneqartut tamarmiusut 100 procentii tikillugit annertussuseqarsinnaapput, tak. § 8, nammineq akiliutit ilanngaatigalugit, tak. imm. 2.

  Imm. 2. § 7 malillugu taarsigassarsitinneqarnissamik siumut neriorsuuteqarnissami, tak. § 8, qinnuteqartup 25.000 koruuninik nammineerluni akiliutissaminik kommunalbestyrelsimut akiliuteqarnissaa piumasaqaataavoq. Taarsigassarsitinneqarnissamik siumut neriorsuummik qinnuteqartup akuersinera ilutigalugu, nammineq akiliutissat kommunalbestyrelsimut akiliutigineqassapput.

 

  § 10 b.  Inatsisartut inatsisaat manna naapertorlugu illunut sanaqataaffiusunut taarsigassarsiarititanut akilersuutit akilerneqarsimasut, illunik sanaqataaffiusunik pilersaarutaasumik aserfallatsaaliuinissamut, nutarternissamullu kommunip taarsigassarsiissutissatut imaluunniit tapiissutissatut agguagassaanut nuunneqassapput.

 

  § 10 c. Illut sanaqataaffiusut aningaasalersorneqarnissaat pillugu Inatsisartut inatsisaat manna imaluunniit siusinnerusukkut inatsit naapertorlugu illut sanaqataaffiusut taarsigassarsiffigineqarsimallutik taarsersugassartai suli taarsersorneqartut pilersaarutaasumik aserfallatsaaliornissaannut, nutarternissaannullu kommunalbestyrelsi taarsigassarsisitsisinnaavoq imaluunniit tapiissuteqarsinnaavoq.

  Imm. 2.  Taarsigassarsisitsinissamik siumut neriorsuisoqartinnagu pituttuisumik sanaartornissamut isumaqatigiissuteqarfioreersimanngitsunut imaluunniit sanaartornernut aallartinneqareersimanngitsunut sulianut, tunniussanullu taamaallaat taarsigassarsisitsisoqarsinnaavoq imaluunniit tapiissuteqartoqarsinnaavoq.

  Imm. 3.  Kommunalbestyrelsi imm. 1 malillugu taarsigassarsisitsisimatilluni, inissianik aserfallatsaaliuinissamut nutarterinissamullu pisortat ikiorsiissuteqartarnerat, tapiissuteqartarnerat imaluunniit aningaasalersuisarnerat pillugit inatsit alla malillugu ilutigisaanik taarsigassarsisitsisinnaanngilaq imaluunniit tapiissuteqarsinnaanngilaq.

  Imm. 4.  Suliat suliarineqarsimanerinut imaluunniit tunniussassat tunniunneqarsimanerinut uppernarsaammik takutitsinikkut taarsigassarsiat imaluunniit tapiissutit sulisartumut pineqartumut akilerneqassapput. 

  Imm. 5.  Illunik sanaqataaffiusunik pilersaarutaasumik aserfallatsaaliuinissamut, nutarterinissamullu kommunalbestyrelsip taarsigassarsisitsinissaanut imaluunniit tapiissuteqarnissaanut Naalakkersuisut malittarisassanik aalajangersaasinnaapput

 

  § 10 d.  Taarsigassarsitinneqartup, taassumalu inoqutaasa piffissami tapiissutit aningaasaliiffigineqarnerini piffissami pineqartumi isertitai tamarmiusut 300.000 koruunit sinnersimanngippagit aatsaat tapiissuteqartoqarsinnaavoq.

 

  § 10 e.  100.000 koruunit tikillugit taarsigassarsisitsisoqarsinnaavoq. Taarsigassarsiaritinneqartut tamakkerlugit akilerneqarsimatillugit, taarsigassarsitinneqarnissamik qinnuteqaqqittoqarsinnaavoq. Taarsigassarsiat ukiuni 15-ini akilersugassanngorlugit amerlaqatigiinnik akilersugassaallutik taarsigassarsiissutigineqassapput. Nationalbankip erniaritittagai 3%-pointimik ilallugit taarsigassarsiissutit ernialersorneqassapput. Taarsigassarsiat ullormi tunniunneqarfiisa ulluanit erniaq aalajangersarneqassaaq.

 

§ 11. § 7 malillugu kommunalbestyrelsimit taarsigassarsiat, tak. § 8, § 7 malillugu taarsigassarsiatigut aningaasalersorneqaratik taarsigassarsiffiusinnaallutik aningaasartuutit tamarmiusut taarsigassarsisup nammineerluni aningaasalersorpagit, tak. § 8, aningaasalersorsimaneranullu uppernarsaammik takutitsineratigut aatsaat taarsigassarsiissutigisinnaapput.

  Imm. 2. § 7 malillugu kommunalbestyrelsip taarsigassarsisitsinissamut siumut neriorsuutaanut, tak. § 8, piumasaqaataasinnaavoq, § 7 malillugu taarsigassarsiatigut aningaasalersorneqaratik taarsigassarsiffiusinnaallutik aningaasartuutit tamarmiusut aningaasalersorneqarnissaannut taarsigassarsisup kommunalbestyrelsimut aningaaserivimmi qularnaveeqqusiinissaa, tak. § 8.

 

§ 12. § 7 malillugu taarsigassarsiatigut aningaasalersorneqaratik taarsigassarsiffiusinnaallutik aningaasartuutit tamarmiusut aningaasalersorneqarnissaannut taarsigassarsisup taarsigassarsiarisinnaasai, tak. § 8, illu sanaqataaffiusoq qularnaveeqqusiullugu qulakkeerneqarsinnaapput.

  Imm. 2. Kommunalbestyrelsimit taarsigassarsiat illumi sanaqataaffiusumi qularnaveeqqusiisoqarneratigut isumannaarneqassapput.

  Imm. 3.  § 7 malillugu taarsigassarsiatigut aningaasalersorneqaratik taarsigassarsiffiusinnaallutik aningaasartuutinut tamarmiusunut taarsigassarsisup aningaasalersuinissaanut, illu sanaqataaffiusoq qularnaveeqqusiullugu taarsigassarsiissutigineqarsimasut, kommunalbestyrelsimit taarsigassarsiat ataqqissavaat, tak. § 8.

  Imm. 4.  Kommunalbestyrelsip taarsigassarsiarititai illumi sanaqataaffiusumi qaffatsinneqarlutik qularnaveeqqutaassapput.

 

  § 13. Ukiuni akileraarfiusuni inaarutaasumik akileraarusiiffiusuni kingullerni tallimani inuussutissarsiuteqarlutik ingerlataqarsimanngitsunut inunnut kommunalbestyrelsi taarsigassarsisitsisinnaanngilaq.

  Imm. 2. Imm. 1-imi killiliussat apeqqutaatinnagit kommunalbestyrelsi ilinniartunut, ilinniakkaminnik naammassinnissimasunut, aammalu ilinniarnertik peqqutigalugu ukiuni akileraarfiusuni kingullerni tallimani sulisimanngitsunut taarsigassarsititsisinnaavoq.

 

§ 14. Inunnut illumik pigisaqareersunut imaluunniit inigisassatut aalajangersarneqartunut illumi piginneqataasunut aamma Namminersorlutik Oqartussat imaluunniit kommunalbestyrelsip taarsigassarsisitsiffigisimasaanut, suli tamakkerlugit akiliisimanngitsunut kommunalbestyrelsi taarsigassarsisitsisinnaanngilaq.

 

Kapitali 3

Oqartussaaffissamik killiliineq, atuineq il.il.

 

Piginnittussaatitaaneq atulerneralu

 

§ 15. Taarsigassarsisup § 7 malillugu ullormi taarsigassarsinissamut neriorsuummik tunineqarnerminiit ukiut marluk qaangiutsinnagit illu sanaqataaffiusoq naammassisimanngippagu atulersimanngippagulu siumoortumik ilisimatitsinertaqanngitsumik taarsigassarsinissamut neriorsuut atorunnaarsinneqassaaq.

  Imm. 2. Imm. 1-imi allanneqartumit piffissamik killiliinermiit immikkut pisoqartillugu kommunalbestyrelsi immikkut akuersisinnaavoq.

Imm. 3. Illumi sanaqataaffiusumi naammassillugu sanaartorneqarsimasumi qularnaveeqquteqartumik kommunalbestyrelsimut inaarutaasumik qularnaveeqqusiussaqarluni taarsigassarsinermi allagartamik inaarutaasumik taarsigassarsisup peqalernissaata tungaanut tamannalu naqqiutitaqanngitsumik Kalaallit Nunaanni Eqqartuussivimmi nalunaarsorneqarpat kommunalbestyrelsi atortunut tunniunneqartartunut tamanut kiisalu illumut sanaqataaffiusumut sanaartorneqartumut kommunalbestyrelsi piginnittussaatitaavoq, tassunga ilanngullugit nalilinnut aamma taarsigassarsisup sulinermini imaluunniit illumi sanaqataaffigisamini aningaasaliisimanerani pilersinneqarsimasuni.

Imm. 4. Illumut sanaqataaffiusumut piginnittussaatitaaneq taarsigassarsitinneqartumut tunniunneqarsinnaanngippat, taarsigassarsisup nammineerluni akiliutigisai 25.000 koruuniusut, illumillu sanaqataaffiusumik sanaartornermi imaluunniit tigusinermi taarsigassarsiffiusinnaallutik aningaasartuutini tamarmiusuni taarsigassarsisup aningaasartuutigisimasai, § 7 malillugu taarsigassarsiatigut aningaasalersorneqanngitsut, kommunalbestyrelsip utertissavai, tak. § 8

 

Najugaqartussaatitaaneq attartortitsinerlu

 

§ 16.  Illumik sanaqataaffiusumik, Inatsisartut inatsisaat manna naapertorlugu taarsigassarsititsiviusumik piginnittoq illumi sanaqataaffiusumi najugaqarnissamut pisussaaffeqarpoq aamma illumi sanaqataaffiusumi inuit nalunaarsorsimaffianni najugaqartutut nalunaarsorsimassallutik, taamaattorli tak. §§ 17-18.

  Imm. 2.  Illu sanaqataaffiusoq illumi piginnittumit imaluunniit inummit piginnittup inoqutaanut ilaasumit ukiumut minnerpaamik ulluni 180-ini najugaqarfigineqarpat, najugaqartussaatitaaneq naammassineqarsimassaaq.

 

  § 17. Illumik sanaqataaffiusumik, Inatsisartut inatsisaat manna naapertorlugu taarsigassarsititsiviusumik piginnittup, piginnittup taassumaluunniit inoqutaasa utaqqiisaasumik peqannginnerani, najugaqarfiginngikkallarsinnaavaa imaluunniit inunnut nammineersinnaasunut illu sanaqataaffiusoq attartortissinnaavaa. Qaammatinik pingasunik sivikinnerusumik imaluunniit qaammatinik aqqaneq marlunnik sivisunerusumik attartortitsisoqarsinnaanngilaq, taamaattoq tak. imm. 2.

  Imm. 2.  Imm. 1-imi piffissami killiliineq apeqqutaatinnagu, piginnittup illu sanaqataaffiusoq piffissami sivisunerusumi najugaqarfiginngikkallarsinnaavaa imaluunniit attartortissinnaavaa, piginnittup inoqutaasaluunniit peqannginnerat utaqqiisaasumik pippat ukuninngalu peqquteqarpat:

1) napparsimaneq,

2) ilinniarneq,

3) inissiisarfimmut inissinneqarneq,

4) innuttaasuni suliassanik isumagisaqarneq, imaluunniit

5) piginnittup nammineerluni imaluunniit piginnittup inoqutaasa ilaata nuutsinneqarallarnera-nik.

  Imm. 3.  Attartortitsinermik isumaqatigiissut tassanilu piumasaqaatit attartortup attartukkamik tigusinissaa sioqqullugu kommunalbestyrelsimit akuerineqarsimassaaq, tak. § 18.

Imm. 4. Illumik sanaqataaffiusumik piginnittoq kommunalbestyrelsemut nalunaaruteqassaaq piffissami qaqugukkut illu sanaqataaffiusoq najugaqarfigineqanngikkallarnissaanik, tak. imm. 2.

 

§ 18. § 17 naapertorlugu attartortitsinermi attartortitsinermut isumaqatigiissut Naalakkersuisunit akuerisaq atorneqassaaq.

  Imm. 2.  Ineqarnermut akiliutit piumasaqaatillu pisortat inissiaataannik attartortittakkanik attartortitsisarnermut maleruagassat sukkulluunniit atuuttut naapertorlugit aalajangersarneqartassapput.

  Imm. 3.  Attartorneq pillugu isumaqatigiissummi pequtit ilaappata akiliineq aningaasanut qaffasinnerusunut aalajangersarneqarsinnaavoq, taamaattorli annerpaamik ineqarnermut akiliummut naapertuuttoq 10 %-inik ilallugu.

  Imm. 4. Attartortitsineq pillugu isumaqatigiissummi piumasarineqassanngilaq attartortup piginnittumik allanik isumaqatigiissuteqarnissaa. Taamatut ittunik isumaqatigiissutit atuuttuunngillat. Attartorneq pillugu isumaqatigiissut atuutissaaq, tassungali atasumik piumasaqaateqarnani.

  Imm. 5.  Illumik sanaqataaffiusumik attartortup attartukkani inummut allamut attartortissinnaanngilaa. Attartortoq attartortitsippat imaluunniit attartorneqartunik atuineq allanut atugassanngortippagu kalerriisoqaqqaarnani attartorneq pillugu isumaqatigiissut atorunnaassaaq attartortullu illu sanaqataaffiusoq ingerlaannartumik qimassallugu. Taamaattoqartillugu piginnittup illu sanaqataaffiusoq nammineq najugaqarfigilissavaa.

 

Eqqartuussivikkut malersuineq aamma taarsigassarsianut qularnaveeqqusiineq

 

§ 19.  § 7 malillugu taarsigassarsinerit suulluunniit tamakkerlugit nalikillilernissaasa imaluunnit akilernissaasa tungaannut, illumut sanaqataaffiusumut oqartussaanikkut killiliinerit uku atuutissapput:

1) Illumi sanaqataaffiusumi eqqartuussivikkut malersuisoqarsinnaanngilaq.

2) Illu sanaqataaffiusoq taarsigassarsinermi qularnaveeqqutitut atorneqarsinnaanngilaq, taamaattorli tak. § 12.

Imm. 2. § 12-imut ilaasunut piumasaqaatinut isumannaarinermut qularnaveeqqusiussaqarluni taarsigassarsinermi allagartaq tunngavigalugu imm. 1 eqqartuussivikkut malersuinermi atorneqarsinnaanngilaq.

  Imm. 3. Sillimmasiisarfik, illup ikuallattoornissaanut sillimmasiiffiusoq, imm. 1 apeqqutaatinnagu, sillimmasiinermi akiliutissanut ernialersorneqartunut aningaasartuutinullu allanut qularnaveeqqusiussaminut pisinnaatitaaffeqarpoq. Sillimmasiisarfik aamma ullormit akiliiffissamit ukiumi ataatsimi qularnaveeqqusiiffigisanut allanut siulliulluni illumi sillimmaserneqartunik akiliutissanut qularnaveeqqusiussanut pisinnaatitaaffeqarpoq.

 

Piginnittut nikinneri

 

  § 20. § 7 malillugu taarsigassarsiat piginnittut nikinnerini akiligassanngussapput, taamaattorli tak. imm. 2 aamma § 21, imm. 2.

  Imm. 2. § 7 malillugu taarsigassarsiat piginnittut nikinnerini akiligassanngussanngillat:

1) taarsigassarsisumiit taassuma aappaanut imaluunniit inooqataanut, imaluunniit

2) taarsigassarsisup toqunerani taarsigassarsisup kingornussisussaanut.

Imm. 3.  Inooqataasutut isigineqarpoq inuk piginnittut nikinneri sioqqutitsiarlugu sivikinnerpaamik ukiuni marlunni taarsigassarsisumit inoqutaalluni inuit nalunaarsorsimaffiani nalunaarsugaasimasoq.

 

  § 21. Taarsigassarsisup illu sanaqataaffiusoq tuniniassaguniuk, sumiiffimmi atuagassiami atugaanerpaasumi nunalu tamakkerlugu aviisimi ikinnerpaamik ataatsimi tamanut ammasumik nalunaaruteqarnikkut illu sanaqataaffiusoq tuniniassavaa.

Imm. 2.  Illup sanaqataaffiusup tunineqarneranut atasumik kommunalbestyrelsimut akiitsut sinneri akilerneqassapput imaluunniit taarsigassarsinermi piumasaqaatit allanngortinnagit piginnittumit nutaamit tiguneqassallutik.

 

  § 22.  Taarsigassarsisup kingorna illu sanaqataaffiusoq § 21 naapertorlugu tunisinnaanngippagu, kommunalbestyrelsip isumaqatigiissuteqarnikkut akiitsut sinnerinut naapertuuttumik akiliuteqarluni illu sanaqataaffiusoq tigusinnaavaa.

 

Akiligassanngortitsineq taarsigassarsianillu tigusineq

 

§ 23.  § 7 malillugu kommunalbestyrelsimit taarsigassarsiat akiligassanngortinneqassapput:

1)  Taarsigassarsiat erniaat akilersuutillu akilerneqanngippata, illuummilu qularnaveeqqusiussaqarluni taarsigassarsinermi allagartaq malillugu ernianik akilersuutinillu akilersuisarneq pillugu malittarisassat naapertorlugit ernianut, akilersuutinullu akiitsut piffissarititaasup qaangiutinnginnerani taarsigassarsisup akilersimanngippagit, tak. lov for Grønland om pant (qularnaveeqqusiineq pillugu Kalaallit Nunaannut inatsit)

2) taarsigassarsisoq illumik sanaqataaffiusumik illersorneqarsinnaasumik aserfallatsaaliisimannngippat, paasineqarpallu kommunalbestyrelsip qularnaveeqqusiinikkut isumannaagai ajornerulersinneqartut,

3) taarsigassarsisup ikuallattoornissamut illullu ajoqusersinnaaneranut illu sanaqataaffiusoq sillimmasersimanngippagu, tak. § 34,

4) taarsigassarsisup illu sanaqataaffiusoq tamakkiisumik ilaannakuusumilluunniit isaterpagu,

5) illumi sanaqataaffiusumi inuussutissarsiornermut ininik aaqqissuussisoqarpat imaluunniit illumit sanaqataaffiusumiit inuussutissarsiummik ingerlatsisoqarpat. Inuussutissarsiutilli namminersorfiusut mikinerusut ilaatinneqanngillat, tak. § 3. imm. 2,

6) taarsigassarsisup najugaqartussaatitaaneq malinngippagu, tak. § 16,

7) taarsigassarsisup illumik sanaqataaffiusumik kommunalbestyrelsip misissuinissaanut itigartitsisimalluni, kommunalbestyrelsip taarsigassarsisumut nammineq kajumissutsimik isumaqatigiissuteqarniarsimanera iluatsissimanngippat,

8) taarsigassarsisoq piginnittut nikinneri pillugit kommunalbestyrelsimut nalunaaruteqanngippat aamma pissutsinik utoqqatsissutaasinnaasunik peqanngippat aammalu

9) taarsigassarsisoq §§ 17-18-imut akerliusumik illumik sanaqataaffiusumik attartortitsippat.

  Imm. 2. Pissutsit aaqqinneqarnissaannut piffissami taarsigassarsisumut kommunalbestyrelsi nalunaaruteqarsinnaavoq.

 

  § 24. Taarsigassarsiat § 23 naapertorlugu akiligassanngortinneqarpata, illup sanaqataaffiusup tiguneqarnissaa imaluunniit taarsigassarsisup taarsigassarsiat ingerlaannartumik tamaasa akilinngippagit pinngitsaaliinikkut akitsorterussisoqarneratigut tunisisoqarnissaata piumasarinissaa pillugu kommunalbestyrelsi aalajangiisinnaavoq.

Imm. 2.  Kommunalbestyrelsip illu sanaqataaffiusoq tiguppagu, kommunalbestyrelsip aamma taarsigassarsisup akornanni aningaasatigut isumannaagassat kommunalbestyrelsimit naatsorsorneqassapput.

  Imm. 3.  Aningaasatigut isumannaagassat piffissami kommunalbestyrelsimut tunniussivissami illup sanaqataaffiusup tunisinermi akiata nalingatut naatsorsorneqassapput, kommunalbestyrelsip akiitsut sinnerinut piumasaqaataannik ilanngarlugit. Nikingassutaasut taarsigassarsisumut iluaqutaasut tunniunneqassapput. Nikingassutaasut kommunalbestyrelsimut iluaqutaasut 0 kr.-imut appartinneqassapput.

  Imm. 4. Illumi sanaqataaffiusumi kommunalbestyrelsip taarsigassarsiarititaannit siulliullugit akilerneqartussanik qularnaveeqqusiussaqarluni taarsigassarsianik nalunaarsorsimasoqarpat aammalu qularnaveeqqummik piginnittup kommunip illumik sanaqataaffiusumik tigusinissaanut ilaatillugu qularnaveeqqutip atsiornissaa itigartippagu, kommunalbestyrelsip illu sanaqataaffiusoq tigusinnaanngilaa.

  Imm. 5.  Kommunalbestyrelsi illumik sanaqataaffiusumik utertitamik, pisortat illumik qularnaveeqquteqarfigisaannik tunisinermi, illup nalinganut tunineqarnissaanik, taamaattorli minnerpaamik illup teknikkimut aningaasaqarnermullu tunngasortaata nalinganit akikinnerusumik tunisisoqartannginnissaanik qulakkeerissaaq.

 

Kapitali 4

Allaffissorneq

 

Akitsuutit

 

§ 25.  Inatsisartut inatsisaat manna malillugu suliamik suliarinninnermi aningaasartuutinut matussutitut kommunalbestyrelsip taarsigassarsisitsinerata 0,5 procentit akiliutit akileqqu-neqarsinnaapput.

Imm. 2.  Taarsigassarsinissamut neriorsuineq akuerineqarpat taarsigassarsisup akiliutit kommunalbestyrelsimut akilissavaa.

 

§ 26.  Qularnaveeqqusiussaqarluni taarsigassarsinermi allagartap atsiorneqarneranut atatillugu suliamik suliarinninnermut 1.250 kr.-nik akiliummik kommunalbestyrelsi akileeqqusisinnaavoq.

Imm. 2.  Qularnaveeqqusiussaqarluni taarsigassarsinermi allagartap imminut sinnerluni atsiorneqarnerata isumagineqarnissaanut aamma imm. 1 naapertorlugu tamatumunnga akiliummik akileeqqusinissamut aningaaserivik ataaseq arlallilluunniit kommunalbestyrelsimit piginnaatinneqarsinnaapput.

 

Suliakkiisarneq

 

  § 27.  Kommunalbestyrelsip inissiaatileqatigiiffimmut kommunimit imaluunniit Namminersorlutik Oqartussanit pigineqartumut isumaqatigiissuteqarnermigut, ingerlatseqatigiiffik inissianik aqutsisoq Inatsisartut inatsisaat manna malillugu aqutsinissamut piginnaatissinnaavaa. Kommunalbestyrelsip suliakkiineq tamanna ingerlatseqatigiiffimmut pisussaaffittut suliakkiissutigisinnaavaa.

  Imm. 2.  Inissiaatileqatigiiffik imm. 1 naapertorlugu kommunalbestyrelsi sinnerlugu inatsisip matuma allaffissornikkut aqunneqarneranut atatillugu aalajangiisinnaavoq, tassungalu ilanngullugu akitsuutinik akiliisitsisarnermik isumaginnissinnaalluni.

  Imm. 3. Kommunalbestyrelsi inissiaatileqatigiiffimmut ilitsersuisinnaatitaavoq nakkutilliisussaallunilu.

 

Taarsigassarsinissamut qinnuteqarneq

 

  § 27 a. Illumik sanaqataaffiusumik nutaamik sanaartornissamut imaluunniit pissarsinissamut taarsigassarsitinneqarnissamut kommunalbestyrelsi tamanut ammasumik qinnuteqaqqusissaaq. Tamanut ammasumik qinnuteqaqqusineq marsip aallaqqaataanut piffissalerlugu, ukiumut ataasiartumik januaarimi pisassaaq. Ilassutitut aningaasaliinermi, qinnuteqarnissamut naammaginartumik piffissaliilluni tamanut ammasumik nutaamik qinnuteqaqqusisoqassaaq.

  Imm. 2.  Qinnuteqaatit tiguneqartut suliarineqarnerini, tak. imm. 1, akuerisaallutik qinnuteqartut illutaarnissaminnut pisariaqartitsinerpaasut, inissaminnillu periarfissatut tunineqarnissaminnut periarfissaqanngitsut salliunneqassapput.

  Imm. 3.  Qinnuteqaatit tiguneqarsimasut suliarineqareerlutik aalajangiiffigineqarnerisa kingorna aningaasaliissutinik atunngitsuugaqassappat, tak. imm. 1, kingusinnerusukkut qinnuteqaatit tiguneri malillugit qinnuteqaatit suliarineqassapput.

  Imm. 4.  Qinnuteqartut illutaarnissaminnut pisariaqartitsinerisa, periarfissatullu inissiamik pilersornissaminnut periarfissaasa imm. 2 malillugu nalilersorneqarnissaanni kommunalbestyrelsip suut eqqarsaatigisassatut pingaartissinnaanerai, pingaartitassaalu pillugit Naalakkersuisut aalajangersaasinnaapput.

 

§ 28. Illumik sanaqataaffiusumik sanaartornissamut imaluunniit pissarsinissamut taarsigassarsitinneqarnissamik qinnuteqaat allaganngorlugu kommunalbestyrelsimut nassiunneqassaaq.

Imm. 2.  Qinnuteqaammut ilanngunneqarsimassapput:

1) illumut sanaqataaffiusumut kissaatigineqartumut nassuiaat,

2) nunaminertamik qinnuteqarnerup assilinera,

3) nammineq aningaasalersuinerup pissarsiarineqarsinnaaneranut uppernarsaat,

4) pilersaarutaasumik piffissakkaartumillu aserfallatsaaliinissamut qinnuteqartup aningaasartuuteqarsinnaaneranut uppernarsaat aammalu

5) qinnuteqartup cpr. normua aamma najugaqarneranut allagartaa.

 

§ 29. Kommunalbestyrelsi qinnuteqartup akiliisitsiniarnermut oqartussami pisortanut akiitsui, imaluunniit inissianik aqutsisumi qinnuteqartup attartortitsisumut akiitsui pillugit oqaaseqaammik piniarsinnaanissaanut, qinnuteqartoq kommunalbestyrelsimut akuersissummik tunniussissaaq.

  Imm. 2.  § 28 naapertorlugu kommunalbestyrelsi taarsigassarsinissamut qinnuteqaammik tigusinerminni erngerluni qinnuteqartup pisortanut akiitsoqarnera pillugu Akiliisitsiniartarnermi Oqartussaniit aamma pisortat inissianik attartortittagaannik aqutsisumiit oqaaseqaammik pissarsiniassaaq.

Imm. 3. Kommunalbestyrelsi qinnuteqartumut, pisortanut 25.000 koruunit sinnerlugit akilerneqanngitsunik akiitsoqartumut taarsigassarsititsinissamik neriorsuuteqarsinnaanngilaq.

 

§ 30.  Kommunalbestyrelsip suliamik suliarinninnermini, allatut isumaqatigiissuteqartoqarsimanngippat, § 29 naapertorlugu qinnuteqartoq suleqatigalugu suliaq isumagissavaa.

  Imm. 2.  Toqqavissap sanaartorneranut, illu suliarineqanngitsoq, innaallagissamik VVS-imillu ikkussuinerit, ilitsersuisumik ikiorteqarneq pillugit neqeroorutinik kiisalu sanaartorfigissaanermut aamma pisortat piumasaat malillugit innaallagissamut, imermut kuuffinnullu atassusernermut aningaasartuutinut missingiummik kommunalbestyrelsi pissarsiniassaaq.

  Imm. 3.  Ikuallattoornissamut illullu ajoqusersinnaaneranut sillimmasiisoqarnissaanut sillimmasiisarfimmiit neqeroorummik kommunalbestyrelsi pissarsiniassaaq, qinnuteqartoq aamma nammineerluni neqeroorummik piniarnissamik periarfissaqarpoq.

 

§ 31.  Illumi sanaqataaffiusumi sanaartornermi aningaasartuutit taarsigassarsiarineqarsinnaasut tamarmiusut pillugit missingersuummik kiisalu pilersaarutaasumik piffissakkaartumik aserfallatsaaliinissamut pilersaarut tunngavigalugu ingerlatsinermut missingersuummik kommunalbestyrelsi suliaqassaaq.

 

  § 32. Missiliuummik, ingerlatsinermilu missingersuummik qinnuteqartumit akuerisassanngortitanik kommunalbestyrelsi saqqummiussissaaq. Matuma kingorna nammineq akiliutissat akilerneqarsimanerat, tak. § 10 a, imm. 2, aningaaserivimmit qularnaveeqqusiussaasinnaasoq, tak. § 11, imm. 2 aamma akiliutaasinnaasut akilerneqarsimanerat, tak. § 25, apeqqutaatillugit taarsigassarsisitsinissamut siumut neriorsuummik kommunalbestyrelsi qinnuteqartumut nalunaaruteqassaaq.

 

  § 32 a. Ukiumut naatsorsuusiornermi kommunalbestyrelsip paasissutissat ukua ilanngutissavai:

1)  Ukiumi naatsorsuusiorfiusumi taarsigassarsisitsinissamik siumut neriorsuutit amerlassusaat.

2)  Taarsigassarsisitsinissamik siumut neriorsuutit atuuttut amerlassusaat.

3)  Taarsigassarsisitsinissamik siumut neriorsuutit ukiumi naatsorsuusiorfiusumi naammassisimasut amerlassusaat.

4)  Ukiumi naatsorsuusiorfiusumi aningaasaliissutinik tamarmiusunik atuineq.

  Imm. 2.  Paasissutissat sumiiffinnut agguataarneqassapput.

  Imm. 3.  Kommunalbestyrelsip ukiumut naatsorsuutinik saqqummiussinerata kingusinnerpaamik ilutigisaanik paasissutissat Naalakkersuisunut nassiunneqassapput.

 

Kapitali 5

Taarsigassarsianik tunniussineq

 

§ 33.  Nassiunneqartussatut tunniussineq pillugu uppernarsaasiinikkut atortunik pilersuisumut kommunalbestyrelsip taarsigassarsisitsinera tunniunneqassaaq.

Imm. 2. Sanaartorfigissaanermut, toqqavissap pilersaarusiorneranut sanaartorneranullu, illumut suliarineqanngitsumut aamma innaallagissamut, imermut, kiassarnermullu ikkussuinermut kiisalu ilitsersuisumit ikiorserneqarnermut taarsigassarsiissutit, suliat suliarineqarsimanerinut uppernarsaammik takutitsinikkut sulisartumut pineqartumut akilerneqassapput.

  Imm. 3.  Imm. 1-imit aamma 2-mit allaanerusunik taarsigassarsianik tunniussineq pillugu maleruagassat ilanngullugit taarsigassarsiat tunniunneqarneri pillugit malittarisassanik Naalakkersuisut aalajangersaasinnaapput.

 

§ 34. Illu sanaqataaffiusoq, taarsigassarsisitsiffiusoq qaqugukkulluunniit ikuallattoornissamut illullu ajoqusersinnaaneranut sillimmaserneqarsimassaaq, aamma sanaartornerata nalaani.

  Imm. 2.  Ikuallattoornissamut illullu ajoqusersinnaaneranut sillimmasiisoqarsimaneranut uppernarsaateqanngitsunik aamma akiliinissamut kinguaattoorfiunngitsunut taarsigassarsianik kommunalbestyrelsi tunniussisinnaanngilaq.

  Imm. 3. Sillimmasiisarfiup sillimmasiissummut akiliutissaq akilerneqarsimanngitsoq pillugu kommunalbestyrelsi nalunaarfigisinnaavaa.

 

Kapitali 6

Qanoq ittuuneranik akuersineq

 

§ 35. Ukiumik ataatsimik sivisussusilimmik atuuttussamik illup sanaqataaffiusup qanoq ittuuneranik Naalakkersuisut akuersissuteqartassapput. Ilusilersorneqarnissaanut, atorneqarnissaanut, teknikikkullu atortulersuutinut kiisalu sanaqateqarnissamut Naalakkersuisut piumasaqaasiorsinnaapput.

Imm. 2. Illup qanoq ittuuneranik akuersisoqarnissaa pillugu qinnuteqaat illup sanaqataaffiusup ukiuni siullerni 20-ni naafferartumik aserfallatsaaliornissaanut pilersaarummik imaqassaaq. Pilersaarummi ukiuni siullerni 20-ni naafferartumik aserfallatsaaliinissamut pilersaarutigineqartunut ukiumut aningaasartuutit missiliornerinik naatsorsugaqassaaq.

 

Kapitali 7

Atulernissaanut ikaarsaariarnermilu aalajangersakkat

 

  § 36. Inatsisartut inatsisaat nr. 28, 3. decembari 2018-imeersoq ulloq 1. januar 2019 atuutilerpoq.

  Imm. 2. Peqatigisaanik Inissialiornermut, illunut ataatsimoorussanut, illuliassanut il.il. tapersiissuteqartarneq pillugu Inatsisartut peqqussutaat nr. 11, 19. november 2007-imeersumi §§ 47-63 atorunnaarsinneqarput.

 

 

§ 2

 

Inatsisartut inatsisaat nr. 27, 21. maaji 2024-imeersoq (Illunut sanaqataaffiusunut kommunimit taarsigassarsiat, illunillu sanaqataaffiusunik il.il. aserfallatsaaliuinissamut, nutarterinissamullu taarsigassarsiat tapiissutillu)^[1] ulloq 1. Juni 2024 atuutilissaaq.

  Imm. 2.  Inatsisartut inatsisaata matumap atuutilernissaa sioqqullugu illunut sanaqataaffiusunut taarsigassarsiarititat, taarsigassarsisitsinissamillu siumut neriorsuutit piumasaqaataat allanngortinnagit ingerlaqqiinnassapput.

  Imm. 3.  Inatsisartut inatsisaata atuutilernissaa sioqqullugu malittarisassat atuuttut naapertorlugit qinnuteqartut taarsigassarsitinneqarnissaminnik siumut neriorsorneqarsimasut, kommunalbestyrelsimut qinnuteqarnermikkut inatsisartut inatsisaanni matumani malittarisassat naapertorlugit taarsigassarsitinneqarnissaminnik nutaatut siumut neriorsorneqarsinnaapput.

  Imm. 4.  Taarsigassarsitinneqarnissamik siumut neriorsuummik nutaamik tunineqarnissamik qinnuteqaat kommunalbestyrelsip itigartissinnaavaa, tak. imm. 3, taarsigassarsitinneqarnissamik siumut neriorsuut tunngavigalugu inatsisitigut pituttorsimasumik aalajangersaasoqarsimappat imaluunniit nutaamik siumut neriorsuuteqarnissamut atatillugu aningaasartuuteqarnerunissamut aningaasaliissutitigut matussutissaqanngippat.

 

 

 

 

Ineqarnermut Attaveqaasersuutinullu Naalakkersuisoqarfik, ulloq 03. marsi 2025

 

 

Ruth Lindhardt (atsior.)

Naalakkersuisoqarfimmi pisortaaneq

 

 

/ Embla Kristjánsdóttir (atsior.)

 

 

[1] Inatsimmi allannguineq § 1, imm. 3, § 7, imm. 3, § 8, § 9, § 10, § 10a, § 10b, § 10c, § 10d, § 10e, § 11, § 12, § 15, imm. 4, § 23, imm. 1, nr. 1, § 27a, § 28, imm. 1, § 32, § 32a, § 33, imm. 2, § 35, imm. 1.