Matumuuna Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlataqartut aallarteqqinnissamut tapiiffigineqartarnerat pillugu inatsisartut inatsisaat nr. 3, 21.maj 2004-meersoq, Inatsisartut Inatsisaat nr. 57, 25. november 2024-meersumi allannguutit malitsigisai ilanngullugit nalunaarutigineqarpoq.

Atuuffia

  § 1.  Inuussutissarsiutigalugu aalisartunut, inuussutissarsiutigalugu piniartunut inuussutissarsiutigalugulu nunalerinermik ingerlataqartunut pigisat ajoqusernerisigut imaluunniit ukuninnga peqquteqartumik inuussutissarsiutiminnut tunngatillugu annaasaqarsimasunut Naalakkersuisut aallarteqqinnissamut tapiissuteqarsinnaapput:

1) atortut ajoquserneri uppernarsarneqarsimappata, 

2) inuussutissarsiummut tunngasut atortut tammarsimappata, 

3) uppernarsarneqarsinnaasumik ilungersunartumik napparsimasoqarpat allatigulluunniit uppernarsarneqarsinnaasumik ajoqusernermik kinguneqartumik timi atorlugu sulisinnaajunnaartoqarsimappat imaluunniit ingerlataqartup inuussutissarsiutaanut atassuteqartuni atortut aserorsimappata, imaluunniit

4)  inuussutissarsiornikkut nalinginnaasumik assigisaanilluunniit akornusertoqarsimappat. 

  Imm. 2.  Silap pissusaata allanngorneranik allatigulluunniit ajunaarnersuarmik pisoqarneranik peqquteqartumik inuussutissarsiornikkut isertitat tamakkiisut imaluunniit annertuut sivikitsumik ilimasaarneqarnikkut annaaneqarpata imm. 1, nr. 1-4-mi taaneqartut saniatigut imm. 1-imi taaneqartunut inunnut aningaasatigut Naalakkersuisut aallarteqqinnissamut tapiissuteqarsinnaapput.

  Imm. 3.  Imm. 1-2-mi pisunut uppernarsaanissaq pillugu Naalakkersuisut sukumiinerusumik malittarisassaliorsinnaapput.

Immikkut ittumik piumasaqaatit

  § 2.  Aallarteqqinnissamut tapiissutit tunniunneqarnissaannut piumasarineqarpoq § 1-imi ilaasut pisut matussusereerneqarsimassanngitsut imaluunniit nammineerluni pisortalluunniit sillimmasiinerinit matussuserneqarsinnaanngitsut. 

  Imm. 2.  Ingerlatsisoq qinnuteqarnerup nalaanit ukiut pingasut sioqqullugit ukiumut agguaqatigiissillugit 250.000 kr.-nik ikinnerusunilluunniit isertitaqarsimappat peqatigisaanillu qinnuteqarnerup nalaanit ukiut pingasut sioqqullugit agguaqatigiissillugit 100.000 kr.-t amerlaqataannik ikinnerusunilluunniit nalilinnik pigisaqarpat Naalakkersuisut imm. 1 avaqqussinnaavaat aallarteqqinnissamullu tapiissuteqarlutik.

Aallarteqqinnissamut tapiissutinik qinnuteqaat

  § 3.  Aallarteqqinnissamut tapiissutinik qinnuteqaat Naalakkersuisunut tunniunneqassaaq.

  Imm. 2.  Aallarteqqinnissamut tapiiffigineqarnissaq pillugu qinnuteqarnermi Naalakkersuisut qinnuteqarnermut immersugassiaat atorneqassaaq. Atortut ajoquserneri sakkulluunniit tammarneri pissutigalugit annaasanut aallarteqqinnissamut tapiiffigineqarnissamut qinnuteqaat, tak. § 1, nr. 1-2, ajoqusernerup tammaasaqarnerulluunniit pinerata kingorna qaammatisiutini ullut 30-t qaangiutsinnagit tunniunneqassaaq.

  Imm. 3.  Imm. 1 malillugu qinnuteqaammut qinnuteqartup aningaasaqarnikkut inissisimaffia pillugu uppernarsaat kiisalu inuussutissarsiornermut attuumasumik annaasaqarneq pillugu uppernarsaat ilaatinneqassaaq, takuuk § 1. 

  Imm. 4.  Aallarteqqinnissamut tapiissutit sapinngisamik soqutigisaqaqatigiit kattuffiat susassaqartoq tusarniaavigereerlugu tunniunneqartassapput. § 1, imm. 1, nr. 4-mi aamma § 1, imm. 2-mi pisuni taaneqartuni soqutigisaqaqatigiit kattuffiat tusarniaavigineqartassaaq.

  § 3 a.  Aallarteqqinnissamut tapiissutit qinnuteqaammik aalajangersimasumik naliliineq tunuliaqutaralugu tunniunneqartassapput, tassunga ilanngullugu aallarteqqinnissamut aningaasartuutit akilernissaannut qinnuteqartoq nammineq naammattunik aningaasaateqarnersoq. 

  Imm. 2.  Atortut assingisa aseroqqinnerannut tammaqqinnerannulluunniit, tak. § 1, imm. 1, nr. 1-2, siusinnerpaamik tunniussinerup kingorna qaammatisiutini ukiut pingasut qaangiunneranni aallarteqqinnissamut tapiiffigineqarnissamut qinnuteqartoqarsinnaavoq.

Aallartitseqqinnissamut tapiissutit tunniunneqarnerat

  § 4.  Aallarteqqinnissamut tapiissutit minnerpaamik 2.000 kr. annerpaamillu 50.000 kr. ataasiaannarluni tapiissutitut tunniunneqassapput. Aningaasanut inatsimmi aningaasaliissutigineqartut iluanni aallarteqqinnissamut tapiissutisisoqarnissaanut taamaallaat aalajangiisoqarsinnaavoq.

  Imm. 2.  Naalakkersuisut aallarteqqinnissamut tapiissutit tunniunneqarnerannut piumasarisinnaavaat qinnuteqaateqartoq tapiissutit qanoq atorneqarnerat pillugit kingornatigut Naalakkersuisut piffissaliussaata iluani nassuiaateqassasoq.

Aallartitseqqinnissamut tapiissutit utertinneqarnerat

  § 5.  Naalakkersuisut aallarteqqinnissamut tapiissutit utertillugit akilerneqarnissaat piumasarisinnaavaat imaattoqarpat:

1) Inuk aallartitseqqinnissamut tapiiffigineqartoq kingusinnerusukkut taarsiivigineqarpat, tapiiffigineqarpat allatulluunniit Inatsisartut inatsisaat manna naapertorlugu siunertamut taamaaqataanut tapiissutinut matussutissinneqarsimappat.

2) Inatsisartut inatsisaat manna naapertorlugu piginnaatitaaffiginngisaminut tapiiffigineqarsimappat.

  Imm. 2.  Inuk aallarteqqinnissamut tapiiffigineqarsimasoq pisussaavoq Naalakkersuisunut nalunaarutigissallugit pissutsit atugarisami allanngorneri, taakkua kingunerisinnaallugu Naalakkersuisut, tak. imm. 1, aalajangersinnaallugu aallarteqqinnissamut tapiissutit utertillugit akileqqunissaat.

Inatsisinut allanut attuumassuteqarnera

  § 6.  Inuussutissarsiutigalugu aalisartut, inuussutissarsiutigalugu piniartut inuussutissarsiutigalugulu nunalerinermik ingerlataqartut aallarteqqinnissamut tapiiffigineqartarnerat pillugu Inatsisartut inatsisaat manna pisortat ikiorsiisarnerannut imaluunniit tapiisarnerat pillugu inatsiseqartitsinernut allanut taarsiulluni atuuttuunngilaq.

Inatsit naapertorlugu aningaasartuutit akilersorneqarnerat

  § 7.  Inatsisartut inatsisaat manna naapertorlugu aningaasartuutit Nunatta Karsianit akilerneqassapput. Inatsisartut inatsisaannut aningaasaliissutinut killiliussat ukiumoortumik Aningaasat pillugit inatsimmi aalajangersarneqartassapput.

Atuutilerfia

  § 8.  Inatsisartut inatsisaat atuutilissaaq ulloq 1. juli 2004-mi.

  Imm. 2.  Tapiiffigineqartussaatitaasunut 1. juli 2004 aallarnerfigalugu pisunut Inatsisartut inatsisaat atuutsinneqarsinnaavoq.

Aalisarnermut Piniarnermullu Naalakkersuisoqarfik, ulloq 15. februar 2025

Emanuel Rosing (atsior.)

Naalakkersuisoqarfimmi pisortaq

/ Thomas Rassing (atsior.)