Sanaartorneq pillugu Inatsisartut inatsisaanni nr. 13, 26. maj 2010-meersumi, Inatsisartut inatsisaanni nr. 29, 13. juni 2023-meersumi  allanngortinneqartumi § 17 b, imm. 1 aamma imm. 3, § 17 d, imm. 2, § 17 e, § 17 f aamma § 29, imm. 2 naapertorlugit aammalu naalagaaffimmi oqartussat isumaqatiginninniarfigereerlugit makkua aalajangersarneqarput: 

 

 

 

  § 1.  Illuutinut inissianullu tunngasut kiisalu teknikikkut atortulersuutit il.il. pillugit paasissutissanik nuna tamakkerlugu nalunaarsuiffimmik Naalakkersuisut pilersitsillutillu ingerlatsissapput.

  Imm. 2.  Illuutinik Inissianillu Nalunaarsuiffik kommunalbestyrelsimit ingerlanneqartoq, illuutinut inissianullu tunngasut kiisalu teknikikkut illuliat il.il. pillugit paasissutissanik nalunaarsukkanik tunngaviusunik imaqassaaq aammalu paasissutissat nalunaarsukkat pisortani oqartussanut, ingerlatseqatigiiffinnut ingerlatsinissamut akuersissuteqartunut, inunnut suliffeqarfinnullu  atugassiissutigineqassallutik. 

  Imm. 3.  Illuutinik Inissianillu Nalunaarsuiffik pilersinneqarsinnaavoq, taamaalillutik piginnittut Sullissivik.gl aqqutigalugu digitalimik atsiorneq atuuttoq atorlugu illuummi imaluunniit teknikikkut atortorissaarummi il.il. ataasiarlutik allagarsiussisinnaassallutik nalunaarutiginnissinnaassallutillu.

 

  § 2.  Illuutinik Inissianillu Nalunaarsuiffimmi paasissutissat uppernartumik piffissalikkat, eqqortut tamakkiisullu nalunaarsorneqassapput, takuuk illuutit teknikikkullu illuliat il.il. pioreersut atorneqartullu kiisalu illuutit teknikkikkullu illuliat il.il. sananeqaleruttortut tamaasa pillugit ilanngussaq 1.

  Imm. 2.  Illuliat tassaanersut illuutit imaluunniit teknikikkut illuliat il.il., Illuutinik Inissianillu Nalunaarsuiffimmi nalunaarsorneqartussat, kommunalbestyrelsip aalajangissavaa.

 

  § 3.  Illuutinik Inissianillu Nalunaarsuiffimmi nunaminertap teqeqquisa nalunaarsorneqarneranni Nunaminertanut Nalunaarsuiffik tamanna pillugu najoqqutassatuaasutut akerlileruminaatsutullu atorneqassaaq.  

 

  § 4.  Illuutinik teknikikkullu atortorissaarutinik il.il., 1. januar 2026 sioqqullugu atorneqalernissaminnut akuerineqarsimasunik, tassanilu Kommunit ilisarnaataat, sumiiffimmut kode, kommunimi illumut normuliussaq, illup teqeqqui, najugaat, etage aamma immikkoortup normui, immikkoortup atorneqarfissaa il.il. ilaallutik, Illuutinik Inissianillu Nalunaarsuiffimmi nalunaarsuinermi Najukkanut nalunaarsuiffik tamanna pillugu paasissutissanut najoqqutassatut akerlileruminaatsutut atorneqassaaq. 

  Imm. 2.  Illunik teknikkikkullu atortorissaarutinik 31. december 2025-p kingorna atorneqalernissaminnut akuerineqarsimasunik Illuutinik Inissianillu Nalunaarsuiffimmi  nalunaarsuinermi kommunimi illut normuinik, illup teqeqquinik, etage-mik aamma immikkoortup normuanik pilersitsisoqassaaq.

  Imm. 3.  Illup teqeqquinut uuttuutit, takuuk imm. 2 kommunalbestyrelsimit suliarineqassapput aammalu Asiaq Misissueqqaarnerit ornigulluni illunik imaluunniit teknikkikkut atortorissaarutinik il.il. uttortaareerpat, nutarterneqassallutik. 

  

  § 5.  1. januar 2026-mit atuutilersumik pisortat paasissutissanut nalunaarsukkanut tunngaviusunut nalunaarsuiffiisa, illuutit teknikikkullu illuliat il.il. taakkunani ilaasimappata, nalunaarsuinerminni, Illuutinik Inissianillu Nalunaarsuiffik tamanna pillugu paasissutissanut najoqqutassatut akerlileruminaatsutut atussavaat.

  Imm. 2.  Naalakkersuisut aamma kommunit taakkulu ataanni suliffeqarfiit IT atorlugu periaatsinik nutaanik pilersitsinerminni, nalunaarsuinerni illuutit teknikikkullu illuliat il.il. ilaasimappata, 1. januar 2026 atuutilersumik Illuutinik Inissianillu Nalunaarsuiffik illuutit teknikkikkullu illuliatil.il. pillugit paasissutissanut najoqqutassatut akerlileruminaatsutut atorneqartussanngorlugu, periaaseq aaqqissuutissavat. 

  Imm. 3.  Nunaminertat kommunalbestyrelsip illuliornermik suliassamik pilersitsivigisimasai tamarmik, Illuutinik Inissianillu Nalunaarsuiffimmi, kommunimi illumut naggataatigut normuliisoqarnissaata tungaanut, sanaartorfigineqartutut, nalunaarsorneqassapput, takuuk § 11. 

 

 

  § 6.  Najugaqarfiit immikkoortut init amerlassusai ilaatillugit nalunaarsorneqassapput. Init nassuiarneqarpoq tassaasut ineeqqat najugaqarfittut inatsisit malillugit atorneqarsinnaasut. Init igaffittut, uffarfittut, igaffiup silarliatut isaarissatullu aaqqissuunneqartut, taamatullu atugassanngortitat ineeqqatut isigineqanngillat. Igaffik iniutigisoq ineeqqatut ataatsitut nassuiarneqarpoq.

 

  § 7.  Illuutit teknikikkullu illuliaq il.il. quleriit tamakkiisumik angissusaanni kvadratmeterinngorlugu nalunaarsorneqassapput. Quleriit tamakkiisumik angissusaannik naatsorsuineq, Illuliornermi malittarisassani tamanna pillugu maleruagassanut sukkulluunniit atuuttunut naapertuuttumik naatsorsorneqassaaq.

  Imm. 2.  Quleriit tamakkiisumik angissusaat tamarmiusoq naatsorsorneqassaaq aammalu najugaqarfinnut, inuussutissarsiornermut atorneqartunut ataatsimoortarfinnullu immikkut ittumik agguataarlugu nalunaarutigineqassalluni.

 

 

  § 8.  Kommunalbestyrelsip illuutit teknikkikkullu illuliat il.il. pioreersut atorneqalereersullu, paasissutissat kommunalbestyrelsip nalunaarutigineqarnerisa nalaanni tigummiai tunngavigalugit Illuutinik Inissianillu Nalunaarsuiffimmut nalunaarutigissavai. 

  Imm. 2.  Kommunalbestyrelsi imm. 1 naapertorlugu kingusinnerpaamik 1. januar 2026 nalunaarutiginninnissamut pisussaaffeqarpoq. 

 

  § 9.  Kommunalbestyrelsip kommunip nunami sumiiffiata iluani illuutinut teknikikkullu atortorissaarutinut il.il. tamanut Illuutinik Inissianillu Nalunaarsuiffimmiittut nutartertassavai.

 

  § 10.  Kommunimi suliassap suliarineqarnera imaluunniit illumik imaluunniit teknikkikkut illulianik il.il. piginnittumiit nalunaarutiginninnerup tamatumunnga pissutissaqalersitsisarnera ilutigalugu, Illuutinik Inissianillu Nalunaarsuiffik kommunalbestyrelsip  ingerlaavartumik nutartertassavaa. 

  Imm. 2.  Kommunalbestyrelsi imatut pisoqartillugu Illuutinik Inissianillu Nalunaarsuiffimmik nutarterisassaaq: 

1)  Illumut imaluunniit teknikikkut atortorissaarummut il.il. atuilernissamut akuersissummik tunniussisoqarpat. 

2)  Illup imaluunniit teknikikkut atortorissaarutip il.il. pissusiviusuni atorneqalernera pillugu paasissutissat tiguneqarpata. 

3)  Illup imaluunniit teknikikkut atortorissaarutip il.il. pilersorneqarnera, atorneqarnera, aggulunneqarnera, ataatsimuulersinneqarnera imaluunniit aaqqissuunneqarnerata allanngortinneqarnera pillugu paasissutissat tiguneqarpata.

4)  Illup imaluunniit teknikikkut atortorissaarutip il.il. isaterneqarnissaannik akuersissummik tunniussisoqarpat. 

5)  Illuutinik Inissianillu Nalunaarsuiffimmiittut paasissutissat eqqortuunngitsut kommunalbestyrelsip paasippagu imaluunniit ilisimalerpagu.  

  Imm. 3.  Kommunalbestyrelsimi paasissutissat nutaat tiguneqarnerannit imaluunniit Illuutinik Inissianillu Nalunaarsuiffimmi paasissutissat eqqortuunnginnerisa paasisaqarnerata imaluunniit ilisimaneqalernerata kingorna kingusinnerpaamik ulluinnaat 21-t qaangiutsinnagit nutarterineq pissaaq.

  Imm. 4.  Illuutinik Inissianillu Nalunaarsuiffimmi paasissutissanik nutarterinermi oqaluttuarisaanermi paasissutissat nalunaarsukkat atatiinnarneqassapput aammalu paasissutissanit nalunaarsukkanit atuuttunit ersarissumik immikkoortisimaneqassallutik. Oqaluttuarisaanermi paasissutissat nalunaarsukkat, inatsit imaluunniit allaffissornikkut peqqussut malillugu tamanna pisussaasimanngippat, allanngortinneqaqqusaanngillat. 

 

  § 11.  Illumik imaluunniit teknikikkut illulianik il.il. sanaartornissamut nunaminertamik atugassiinissaq akuerineqartillugu, tamanna pillugu Illuutinik Inissianillu Nalunaarsuiffimmi nalunaarsuisoqarallassaaq, teqeqqui nalunaaqutserlugit aammalu illup atorneqarfissaa Nunaminertanut nalunaarsuiffik inniminniinermik atorneqarfissaatut nalunaarsorsimasoq atorlugu.     

  Imm. 2.  Kommunalbestyrelsi Illuutinik Inissianillu Nalunaarsuiffimmi nalunaarsuinermut atugassanik B-normuliigallassaaq, kommunimit inaarutaasumik illumut normuliinissap tungaanut, atuuttussamik.  

 

  § 12.  Pisortani oqartussat, ingerlatseqatigiiffiit inissianik aqutsisut, tamakkiisumik ilaannaasumilluunniit pisortani oqartussanit pigineqartut, kiisalu illunik teknikikkullu illulianik il.il. piginnittut piumaffigineqarnermikkut Illuutinik Inissianillu Nalunaarsuiffimmi nalunaarsuinermut attuumassuteqartunik paasissutissanik uppernarsaatinillu tamanik kommunalbestyrelsimut nalunaaruteqassapput, takuuk ilanngussaq 1. 

 

  § 13.  Pisortani oqartussaq kukkunernik imaluunniit amigaatinik paasisaqarpat imaluunniit Illuutinik Inissianillu Nalunaarsuiffimmi kukkusoqarsimasoq amigaatinillu peqartoq paasitinneqaruni, tamanna pillugu paasissutissat kommunalbestyrelsimut nalunaarutigineqassapput. 

 

  § 14.  Kommunalbestyrelsip 1. januar 2026 atuutilersumik paasissutissat Illuutinik Inissianillu Nalunaarsuiffimmiittut tulleriissaartumik aaqqissuussaasumik nakkutigineqarnissaat aaqqissuutissavaa.

  Imm. 2.  Illu imaluunniit teknikikkut illuliat il.il. pillugu paasissutissat tamakkerlugit nalunaarsorneqassapput. Paasissutissat amigaataasut pisortani oqartussanit, ingerlatseqatigiiffinnit inissianik aqutsisuusunit tamakkiisumik ilaannaasumilluunniit pisortani oqartussanit pigineqartunit kiisalu piginnittunit pissarsiariniarsarineqassapput.   

 

 

  § 15.  Sanaartugaq imaluunniit teknikkikkut illuamik il.il. piginnittup paasissutissat tamarmik Illuutinik Inissianillu Nalunaarsuiffimmi nalunaarsorneqarsimasut misissussavai.   

 

  § 16.  Illumik imaluunniit teknikikkut illuliamik il.il. piginnittup kommunalbestyrelsimit nalunaarut tunngavigalugu imaluunniit allanik tunngavilimmik Illuutinik Inissianillu Nalunaarsuiffimmi paasissutissat kukkuneqartut ilisimalerpagu, piginnittoq kommunalbestyrelsimut tamanna pillugu nalunaarutiginnissaaq.  

  

  § 17.  Paasissutissat Illuutinik Inissianillu Nalunaarsuiffimmi nalunaarsorsimasut imaluunniit nalunaarsorneqartussanngorlugit nalunaarutigineqarsimasut uppernarsaqqullugit, kommunalbestyrelsip illumik imaluunniit teknikkikkut illuliamik il.il. piginnittoq peqqusinnaavaa. 

 

  § 18.  Illut teknikikkullu illuliat il.il. Illuutinik Inissianillu Nalunaarsuiffimmi nalunaarsorsimasut allilerneqarpata, piiarneqarpata, allanngortinneqarpata, immikkoortinneqarpata imaluunniit kattunneqarpata, piginnittup paasissutissat Illuutinik Inissianillu Nalunaarsuiffimmi nalunaarsorneqarnissamut attuumassuteqartunut tamaasa kommunalbestyrelsimut nalunaarutigissavai. 

  Imm. 2.  Allanngortitsineq naammassineqarpat imaluunniit pissusiviusuni atorneqalerpat, imm. 1 naapertorlugu paasissutissat nalunaarutigineqassapput.

  Imm. 3.  Inissianut nammineq pigisanut tunngatillugu, illuutip inissianut nammineq pigisanut aggulunneqarnera imaluunniit aggulunneqarnerata allanngortinneqarnera pillugu nalunaarutiginninneq Kalaallit Nunaanni Eqqartuussivimmi nalunaarsorneqartussanngorlugu tunniunneqarpat, paasissutissat nalunaarutigineqassapput. 

 

 

  § 19.  Paasissutissanik ilanngussaq 1 naapertorlugu Illuutinik Inissianillu Nalunaarsuiffimmi nalunaarsorneqartussanngorlugit nalunaarutiginninneq. Sullissivik.gl aqqutigalugu Illuutiniik Inissianillu Nalunaarsuiffiup nittartagaani nalunaarutiginninnermut immersugassaq atorlugu pissaaq. Taamaattoq paasissutissat uppernarsaatillu allatut kommunalbestyrelsimut nalunaarutigineqarsinnaasut imaluunniit nalunaarutigineqassasut, kommunalbestyrelsip aalajangersinnaavaa. 

  Imm. 2.  Kommunalbestyrelsip imm. 1 naapertorlugu nalunaarutiginninneq akuerippagu, Illuutinik Inissianillu Nalunaarsuiffimmi paasissutissat nutarterneqassapput.  

 

  § 20.  Paasissutissat ingerlaannaq takuneqarsinnaasunik kukkuneqartut naliliisoqarpat, kommunalbestyrelsi paasissutissat §§ 16-17 naapertorlugit nalunaarutigineqartut iluarsaannissaannut pisussaaffeqarpoq.

  Imm. 2.  Nalunaarutiginninnerup aammalu pissusiviusunut tunngasut imminnut naapertuutinngitsut pasitsaassinermi, kommunalbestyrelsip nalunaarutiginninneq akuerisinnaanngilaa.  

 

 

 § 21. Suliffeqarfiit pilersuisut aamma pisortani oqartussat, illunut teknikikkullu atortorissaarutinut il.il. innaallagiamik, imermik kiassarnermillu kiisalu imikoorummik eqqaanissamut pilersuisut, paasissutissat Illuutinik Inissianillu Nalunaarsuiffimmut nalunaarutigissavaat. Nalunaarutiginninneq ilanngussaq 1-imi maleruagassat malillugit pissaaq.  

  Imm. 2.  Suliffeqarfinnit pilersuisunit pisortanilu oqartussanit paasissutissat ukiumut sisamariarluni, ulloq 10. januar, 10. april, 10. juli aamma 10. oktobari, nutarterneqartassapput. 

 

 

  § 22.  Illunik teknikikkullu atortorissaarutinik il.il. eqqissisimatitsineq pillugu paasissutissanik sapinngisamillu uppernarsaammik Nunatta Katersugaasivia Allagaateqarfialu kommunalbestyrelsimut nalunaaruteqassaaq. Kommunalbestyrelsi Illuutinik Inissianillu Nalunaarsuiffimmut nalunaarutiginnissaaq. 

 

  § 23.  Kommunalbestyrelsi illut teknikkikkullu illuliat il.il. eriagisariallit pillugit Illuutinik Inissianillu Nalunaarsuiffimmut nalunaarutiginnissaaq.

 

 

  § 24.  Illuutinik Inissianillu Nalunaarsuiffimmi paasissutissat tamanit pissarsiarineqarsinnaanngillat aammalu paasissutissanut nalunaarsukkanut najoqqutassanik allanik nutarterinermi ilaatinneqarsinnaanatik imaluunniit suliassani allani pisortani oqartussat suliarisassaanni ilaatinneqarsinnaanatik.  

  

 

  § 25.  Illuutinik Inissianillu Nalunaarsuiffimmi illuutit aamma teknikkikkut illuliat il.il. pillugit paasissutissat, Illersornissamut ministereqarfimmit imaluunniit Inatsisit Atuutsinneqarnerannut ministereqarfimmit atorneqartut, Illersornissamut ministereqarfimmit imaluunniit Inatsisit Atuutsinneqarnerannut ministereqarfimmit sioqqutsisumik allaganngorlugu akuersissuteqartoqarsimanngippat, pissarsiarineqarsinnaanngillat imaluunniit allanut ingerlateqqinneqarsinnaanatik.

  Imm. 2.  Illuutit aamma teknikkikkut atortulersuutit il.il., suut imm. 1-imi pineqartunut ilaatinneqassanersut, naalagaaffiup allaganngorlugu Naalakkersuisunut nalunaarutigissavaa. Naalakkersuisut illuutinik aamma teknikkikkut illulianik il.il. imm. 1-imi pineqartunut ilaatinneqartunik Illuutinik Inissianillu Nalunaarsuiffimmi nalunaarutiginnissapput.

  Imm. 3.  Illuutit aamma teknikkikkut illuliat il.il. imm. 1-imi pineqartunut ilaatinneqartut pillugit Illuutinik Inissianillu Nalunaarsuiffimmi ikkussinerit taamaallaat inunnit isumannaallisaanermi akuerineqarsimasunit suliarineqarsinnaapput.

 

  § 26.  Illuutit aamma teknikkikkut illuliat il.il., attaveqaasersuutaasut pingaaruteqartut pillugit Illuutinik Inissianillu Nalunaarsuiffimmi paasissutissat, sioqqutsisumik Naalakkersuisunit allaganngorlugu akuersissuteqartoqarsimatinnagu takuneqarsinnaanngillat imaluunniit allanut ingerlateqqinneqarsinnaanngillat. 

  Imm. 2.  Illuutit aamma teknikkikkut illuliat il.il., imm. 1-imi sorliit pineqartunut ilaasutut isiginerlugit, piginnittoq imaluunniit ingerlatsinermut akisussaasuusoq Naalakkersuisunut allaganngorlugu nalunaaruteqassaaq. Illuutit aamma teknikkikkut atortulersuutit il.il. imm. 1-imi pineqartunut ilaanersut pillugu Naalakkersuisut aalajangiissapput aammalu Illuutinik Inissianillu Nalunaarsuiffimmi nalunaarutiginnissallutik.

  Imm. 3.  Illuutinik Inissianillu Nalunaarsuiffimmi paasissutissani ikkussinerit, takuuk imm. 1, taamaallaat inunnit isumannaallisaanermi akuerineqarsimasunit suliarineqarsinnaapput.

 

 

  § 27.  Kalaallit Nunaannut Pinerluttulerinermut inatsimmi maleruagassat malillugit akiligassinneqarluni pineqaatissinneqassaaq, piaaraluni imaluunniit mianersuaalliorujussuarluni 

1) § 15 malillugu nalunaarutiginninngitsoq,

2) §§ 16-17 imaluunniit § 19 malillugit paasissutissanik nalunaarutiginninngitsoq,

3) paasissutissanik § 18 imaluunniit § 22 malillugu piumasarineqartunik piffissaagallartillugu nalunaarutiginninngitsoq,

4) § 20, § 21 imaluunniit § 23 malillugu piumasarineqartumik nalunaarutiginninngitsoq,

5) paasissutissanik Illuutinik Inissianillu Nalunaarsuiffimmi nalunaarsorneqartussanik  eqqunngitsunik nalunaarutiginnittoq imaluunniit tunniussisoq imaluunniit,

6) paasissutissanik Illuutinik Inissianillu Nalunaarsuiffimmeersunik pisinnaatitaanani pissarsisoq imaluunniit,

7) paasissutissanik ukunannga §§ 25-26-mi pineqartunut ilaasunik pisinnaatitaanani pissarsisoq imaluunniit ingerlateqqiisoq.

  Imm. 2.  Kalaallit Nunaannut Pinerluttulerinermut inatsimmi, kapitali 5-imi maleruagassat malillugit inatsisitigut pisinnaatitaasut pisussaatitaasullu imm. 1 naapertorlugu akiliinissamik peqquneqarsinnaapput. 

 

  § 28.  Nalunaarut manna ulloq 1. januar 2026-mi atuutilerpoq. 

 

  § 29.  Nalunaarummi Illersornissaqarfik Pituffik pineqartunut ilaatinneqanngilaq.  

 

  

 

 

Isumaginninnermut, Suliffeqarnermut, Ineqarnermut, Attaveqaasersuutinut, Isorliunerusunullu Naalakkersuisoq 

 

 

 

 

/Ruth Lindhardt