Peqqinnissaqarfiup sullissineri il.il. pillugit Inatsisartut peqqussutaanni nr. 15, 6. november 1997-imeersumi § 22, imm. 4, Inatsisartut peqqussutaat nr. 16, 20. november 2006-meersukkut allanngortinneqartoq naapertorlugu aalajangersarneqarput:

Atuuffia

  § 1.  Nalunaarummut uunga ilaapput inuit piffissami toquffimminni napparsimasut, Kalaallit Nunaanni Peqqinnissaqarfimmit (peqqinnissaqarfik) piffissami misissorneqarnerminni Kalaallit Nunaanni inunnik nalunaarsuiffimmut nalunaarsorsimasut aamma Kalaallit Nunaanni najugaqartut.

  Imm. 2.  Nalunaarummi aamma ilaapput napparsimallutik toqusut, Kalaallit Nunaata avataani misissorneqarnissamut imaluunniit katsorsarneqarnissamut innersuunneqarsimasut, aammalu katsorsarneqarnerup sivisussusaa pissutigalugu nunami najorallakkamut inunnik nalunaarsuiffimmik allanngortitsisariaqarsimasut, pineqartoq Kalaallit Nunaanni Peqqinnissaqarfik sinnerlugu suliarineqarpat.

  Imm. 3.  Nalunaarut napparsimasunut Kalaallit Nunaata iluani aamma avataani katsorsarneqarnissamut innersuunneqartunut atuuppoq.

Napparsimallutik toqusimasunik angallassineq

  § 2. Nalunaarummi matumani aalajangersarneqarpoq napparsimalluni toqusoq akeqanngitsumik nunatsinni ilisiffissamukaanneqarnissaannut pisinnaatitaaneq, nunatsinni peqqinnissaqarfimmit:

1)  Pineqartoq illoqarfimmini, nunaqarfimmini imaluunniit ukioq naallugu angerlarsimaffeqarfimmi avataani misissortinnissaanut katsorsartinnissaanulluunniit innersuuneqarsimappat, aamma

2)  Angerlarsimaffimmi avataani uninnganissaanut innersuussiffiusumi toqusimappat.

  Imm. 2.  Napparsimalluni toqusup imm. 1, nr. 1 aamma 2 malillugu angallanneqarnissaa nunatsinni peqqinnissaqarfimmiit akilerneqassaaq, nunatsinni nunattalu avataanit allanit oqartussanit akilerneqanngippat.

  § 3. Toqukkut qimaguttut akeqanngitsumik angallanneqarneri arsai qummuattamut ilivermulluunniit ikillugit pissaaq.

  Imm. 2.  Toqungasup timaata arsaasaluunniit angallassinermi qanoq poortorneqassanersut nunatsinni peqqinnissaqarfiup aalajangissavaa, pisinermilu aningaasartuutinut akisussaasuussallutik.

  Imm. 3. Toqusup timaa ikuallanneqassanersoq, kinguneranilu arsai qummuattamut ikillugit imaluunniit illerfimmik assartorneqassanersoq nunatsinni peqqinnissaqarfimmit aalajangerneqassaaq, tak. imm. 1.

  Imm. 4.  Peqqinnissaqarfiup imm. 3 malillugu aalajangiinera naliginnaasumik toqusup toqusulluunniit qanigisaasa kissaataanik tunngaveqassaaq, ukuninnga peqquteqanngippat:

1)  Kissaatigisaq malillugu angallassisoqarsinnaanngippat,

2)  Kissaatigisaq malillugu angallassinissaq akisuallaarpat, imaluunniit

3)  Immikkut ittumik ajornarpallaartumik tunngavilersuuteqarpat.

  Imm. 5. Kissaatigisamut imm. 4, nr. 2-mut tunngatillugu nunatsinni peqqinnissaqarfimmiit aatsaat itigartitsisoqarsinnaavoq, toqusumut qanigisaasup assartuinissamut angallassinissamut kissaatigisaat peqqinnissaqarfiullu assartuinissamut angallassinissamut neqeroorutaat aningaasatigut nikingassutaasut toqusumut qanigisaasumut akilerneqarnissaanut neqeroorutigineqartoq itigartitsissutigineqarpat imaluunniit killissarititaasoq qaangerlugu akisoqarsimanngippat.

  § 4. Toqusimasumik timmisartukkut, umiarsuakkut, imaluunniit taakku ataatsimut atorneqarlutik akeqanngitsumik angallassineq pissanersoq, nunatsinni peqqinnissaqarfimmit aalajangerneqassaaq.

  § 5. Nunatsinnut toqusup timaanik illerfimmiittumik imaluunniit toqusup arsai qummuattamiitinneqartumik angallassinermi nunami ilerrup toqusulluunniit arsaasa sumiiffigisaani assartuinermut malittarisassat atuuttut malinneqassapput.

Atuutsilersitsineq

  § 6. Nalunaarut 1. juni 2025-mi atuutilerpoq.

  Namminersorlutik Oqartussat, ulloq 23. maj 2025

Anna Wangenheim (atsior.)

Peqqissutsimut inunnullu Innarluutilinnut Naalakkersuisoq

/ Nike Berthelsen (atsior.)