Peqqinnissaqarfiup iluani napparsimasut naammagittaalliuuteqarsinnaanerannut taarsiiffigineqarsinnaanerannullu atatillugu aningaasat amerlassusissaasa ilaat pillugit Namminersorlutik Oqartussat nalunaarutaat
Peqqinnissaqarfiup iluani napparsimasut naammagittaalliuuteqarsinnaanerat taarsiiffigineqarsinnaanerallu pillugit Inatsisartut Inatsisaanni nr. 50, 25. november 2024-meersumi § 15, imm. 7 aamma § 16, imm. 4 naapertorlugit aalajangersarneqarpoq:
Nammineq akiliummik aalajangersaaneq
§ 1. Nammineq akiliut, peqqinnissaqarfiup iluani napparsimasut naammagittaalliuuteqarsinnaanerat taarsiiffigineqarsinnaanerallu pillugit Inatsisartut inatsisaanni § 15 naapertorlugu taarsiissutinit ilanngaatigineqartussaq 8.930 kr.-iuvoq, taamaattoq imm. 2 takuuk.
Imm. 2. Nammineq akiliut ukiumut ataasiarluni nalimmassarneqartarpoq, procenti aaqqiissutissaq aamma maannakkorpiaq aningaasarsiat pillugit Inatsisartut Inatsisaat naapertorlugu. Tamatuma kingorna aningaasat saqqummiunneqartut koruuninut tallimanut avinneqarsinnaasunut qaninnermut akunnaallineqassapput.
Meeqqamik annaasaqarnermi ajunngitsorsiassat aningaasartaasa amerlassusiinik aalajangersaaneq
§ 2. Peqqinnissaqarfiup iluani napparsimasut naammagittaalliuuteqarsinnaanerat taarsiiffigineqarsinnaanerallu pillugit Inatsisartut inatsisaanni § 16 naapertorlugu angajoqqaatut oqartussaassusilinnut ajunngitsorsiassaritinneqartut 198.500 kr.-upput.
Imm. 2. Imm. 1-mi ajunngitsorsiassat aalajangersarneqartut ukiumut ataasiarlutik 2 procentinik aaqqiissutitalimmik nalimmassarneqartassasut aalajangersagaavoq, procenti aaqqiissutissaq aamma maannakkorpiaq aningaasarsiat pillugit Inatsisartut inatsisaat naapertorlugu. Aningaasat koruunit aningaasartaanik 500-nik agguarneqarsinnaasunut qaninnermut akunnaallineqassapput. Akunnaaliliinissaq sioqqullugu piffissami nalimmassaaffiusumi aningaasat amerlassusii atuuttut tunuliaqutaralugit nalimmassaaneq pissaaq.
Atuutilersitsinermi ikaarsaariarnermilu aalajangersakkat
§ 3. Nalunaarut ulloq 14. februar 2025-mi atuutilerpoq.
Imm. 2. Nammineq akiliummik nalimmassaaneq § 1, imm. 2 naapertorlugu siullermeersumik ulloq 1. januar 2026-mi pissaaq.
Imm. 3. Ajunngitsorsiassat aningaasartaasa amerlassusiinik nalimmassaaneq tak. § 2, imm. 2 naapertorlugu siullermeersumik ulloq 1. januaari 2026-mi pissaaq.
Namminersorlutik Oqartussat, ulloq 4. februar 2025
Agathe Fontain (atsior.)
Peqqissutsimut Naalakkersuisoq
/ Nike Berthelsen (atsior.)