Pigisanik aalaakkaasunik piginnaatitaaffimmik pisisarneq imaluunniit atuisinnaatitaaneq

  § 1.  Inuit aamma inatsisitigut pisinnaatitaallutillu pisussaatitaasut, Inatsisartut inatsisaanni matumani aalajangersakkat malillugit tamanna pisussaasimanngippat, Kalaallit Nunaanni pigisamik aalaakkaasumik piginnaatitaaffimmik pisisinnaanngillat aammalu Kalaallit Nunaanni nunaminertanut atuisinnaatitaasinnaanatik.

  Imm. 2.  Aamma Kalaallit Nunaanni pigisamik aalaakkaasumik toqqaannartumik toqqaannanngitsumilluunniit pissarsisinnaasut atuisinnaatitaasullu, suliffeqarfinni piginneqataassutinik taasisinnaatitaanernilluunniit pigisaqarnissaq qularnaveeqqusiissuteqarnissarluunniit siunertaralugu pisinerit Kalaallit Nunaanni pigisamik aalaakkaasumik piginnaatitaaffimmik pisinertut aammalu Kalaallit Nunaanni nunaminertanut atuisinnaatitaanertut isigineqassapput. Immikkoortup immikkoortuani siullermi aalajangersagaq suliffeqarfinnut, § 5-imut ilaatinneqartunut atorneqassanngilaq.

  Imm. 3.  Inatsimmi matumani aalajangersakkat taamaaqataanik pilersaarusiorneq aamma nunaminertat atorneqartarnerat pillugit Inatsisartut inatsisaat naapertorlugu nunaminertamik atuisinnaatitaanissamik qinnuteqaatinut atuutsinneqarput.

  § 2.  Inatsisartut inatsisaat manna suliffeqarfiit pigisamik aalaakkaasumik nammineerluni inissamik atuisinnaatitaanermik pisinerannut imaluunniit utaqqiisaasumik atuisinnaatitaalernissamik pisinerannut atuutinngilaq.

  Imm. 2.  Inatsisartut inatsisaat Namminersorlutik Oqartussat, Naalagaaffiup, Savalimmiuni Namminersornerullutik Oqartusat imaluunniit Kalaallit Nunaanni kommunit Kalaallit Nunaanni pigisanik aalaakkaasunik piginnaatitaaffinnik pisisarneri imaluunniit atuisinnaatitaaneri, imaluunniit Kalaallit Nunaanni nunaminertanik atuisinnaatitaalertarneri ilaatinneqanngillat.

  Imm. 3.  Inatsisartut inatsisaanni sumiiffinni teknikkimullu atortulersuutini, Kalaallit Nunaanni Illersornissamut isumaqatigiissummi siunertanut atorneqartuni pigisanik aalaakkaasunik piginnaatitaaffinnik pissarsisarnerit imaluunniit atuisinnaatitaalernerit imaluunniit sumiiffinnut atuisinnaatitaalertarnerit ilaatinneqanngillat.

  Imm. 4.  Oqaasertaliussamut Pituffimmi Illersornissaqarfik ilaatinneqanngilaq.

  § 3.  Inuit danskisut innuttaassuseqartut Kalaallit Nunaanni pigisanut aalaakkaasunut piginnaatitaanermik imaluunniit atuisinnaatitaanermik pisisinnaapput.

  § 4.  Inuit danskisut innuttaassuseqanngitsut Kalaallit Nunaanni pigisanut aalaakkaasunut piginnaatitaanermik imaluunniit atuisinnaatitaanermik pisisinnaapput inuk pineqartoq:

1)  Kalaallit Nunaanni aalajangersimasumik najugaqarpat, aammalu ukiut marluk siuliini sivisunerusumiluunniit inuit allattorsimaffianni nalunaarsorsimappat, aamma

2)  Kalaallit Nunaannut tamakkiisumik akileraartussaatitaappat, aammalu ukiut marluk siuliini sivisunerusumiluunniit Kalaallit Nunaannut tamakkiisumik akileraartussaasimappat.

  § 5.  Aningaaseriviit, realkredit-imik taarsigassarsititsisarfiit, ingerlatseqatigiiffiit aningaasaliissutinik aqutsisartut, sillimmasiisarfiit, taakkununngalu ilanngullugit inuunermut sillimmasiisarfiit kiisalu soraarnerussutisiassanut aningaasaateqarfiit aamma suliffeqarfiit soraarnerussutisiassanik katersuisarfii il.il., Danmarkimi, Kalallit Nunaanni imaluunniit Savalimmiuni najugaqartut, aammalu Finanstilsynet-imit imaluunniit Tryggingareftirlitið-imit nakkutigineqartut, Kalaallit Nunaanni pigisanut aalaakkaasunut piginnaatitaaffimmik atuisinnaatitaanermilluunniit pisisinnaatitaapput, kiisalu nunaminertanik atuisinnaatitaalersinnaallutik.

  § 6.  Ingerlatseqatigiiffiit aningaasaliisartut, Kalaallit Nunaanni najugaqartut Kalaallit Nunaanni pigisanut aalaakkaasunut piginnaatitaaffimmik pisisinnaapput imaluunniit atuisinnaatitaalersinnaapput, ingerlatseqatigiiffiup aningaasaliisartup aningaasaataanik tamarmiusunik pigisaqarunik, aammalu taasisinnaatitaanerit tamarmik inunnit §§ 3-4-mi taaneqartunit toqqaannartumik taasisinnaatitaaffigineqarpata.

  § 7.  Inuit imaluunniit suliffeqarfiit, akuerineqarnerit, akuersissutit uppernarsaatilluunniit atuuttut, aalisarnermut Inatsisartut inatsisaat, aatsitassanut tunngasunik suliaqarneq pillugu Inatsisartut inatsisaat, najukkani aatsitassanut tunngasunik suliaqarneq pillugu Inatsisartut inatsisaat, aatsitassat pillugit ingerlatallu tamatumunnga pingaarutillit pillugit inatsisartut inatsisaat (aatsitassanut ikummatissanullu inatsit), takornariartitsinermut aamma inuussutissarsiutigalugu suliaqarnermi nunap aggornerinut il.il. Inatsisartut inatsisaat, imaluunniit sumiiffinni toqqarneqartuni takornariartitsisarnissamut akuersissutinut Inatsisartut inatsisaat imaluunniit Sermip erngullu niuernikkut iluaqutigineqarnissaat pillugu Inatsisartut inatsisaat naapertorlugit Naalakkersuisunit tunniunneqartut tunngavigalugit suliaminnik ingerlatsisut, Kalaallit Nunaanni pigisanik aalaakkaasunik, suliffeqarfimminni atugassaminnik piginnaatitaaffimmik pisisinnaapput imaluunniit atuisinnaatitaalersinnaapput

  § 8.  Kalaallit Nunaanni peqatigiiffiit soqutigisaqaqatigiiffiillu, suliffeqarfimmik inuussutissarsiorfiusumik ingerlanngitsut, peqatigiiffik soqutigisaqaqatigiiffilluunniit CVR-imi Kalaallit Nunaanni angerlarsimaffeqartutut najugaqartutullu nalunaarsorsimappat, tamannalu ukiuni marlunni siuliini sivisunerusumiluunniit ingerlaannarsimappat, Kalaallit Nunaanni pigisanut aalaakkaasunut nunaminertanullu piginnaatitaaffimmik atuisinnaatitaanermilluunniit pisisinnaatitaapput, kiisalu nunaminertanik atuisinnaatitaalersinnaallutik.

  § 9.  Inuit suliffeqarfiillu, §§ 3-8-imi piumasaqaatinik naammassinninngitsut taamaallaat Naalakkersuisut siumoortumik allakkatigut akuersissuteqarnerini Kalaallit Nunaanni pigisanik aalaakkaasunik piginnaatitaaffinnik pisisinnaapput atuisinnaatitaalersinnaallutilluunniit.

  Imm. 2.  Naalakkersuisut qinnuteqaatip nalilersorneqarnissaanut atugassanik allakkianik paasissutissanillu annertunerusunik saqqummiussinissamik qinnuteqartoq pisussaaffilersinnaavaat.

  Imm. 3.  Naalakkersuisut akuersissutaat sukumiisunik atugassaqartitsiffiulluni piumasaqaateqartinneqarlunilu, aammalu piffissamut killilerneqarluni nalunaarutigineqarsinnaavoq.

  Imm. 4.  Naalakkersuisut pigisamut aalaakkaasumut atuisinnaatitaagallartarneq pillugu maleruagassanik, ilanngullugulu atuisinnaatitaagallarnermut piffissap sivisunerpaaffissaa pillugu maleruagassanik,  aalajangersaasinnaapput.

  § 10. Kalaallit Nunaanni pigisamik aalaakkaasumik piginnaatitaaffimmik imaluunniit atuisinnaatitaaffimmik kingornussinikkut, soorlu kingornussassanik suliaqarfiunngitsumik tigusinikkut imaluunniit ataatsimut pigisanik agguaanikkut tigusisoqassappat, § 9 malillugu Naalakkersuisut akuersissuteqarnissaat pisariaqanngilaq. Tamannattaaq Kalaallit Nunaanni pigisamik aalaakkaasumik ilaqutariinni siulinut kinguaanullu tunissutigineqartumik piginnaatitaaffimmik pissarsinermut imaluunniit atuisinnaatitaaffimmut atuuppoq.

Atortussaatitsinnginneq il.il.

§ 11.  Kalaallit Nunaanni pigisamik aalaakkaasumik, inatsimmi matumani aalajangersakkat uniorlugit piginnaatitaaffimmik pissarsineq imaluunniit atuisinnaatitaaneq  atuutsinneqartussaanngilaq.

  § 12.  Kalaallit Nunaanni pigisamik aalaakkaasumik piginnaatitaanermik pissarsiamik imaluunniit atuisinnaatitaanermik Kalaallit Nunaanni Eqqartuussivimmut nalunaarsugassamik nalunaaruteqarnermi, imaluunniit nunaminertamik atuisinnaatitaanermik qinnuteqarnermi, pisisup qinnuteqartulluunniit §§ 3-8-imi imaluunniit § 10-mi piumasaqaatit malillugit naammassisimanngippagit, Naalakkersuisuniit akuersissut takutinneqassaaq.

  Imm. 2.  Kalaallit Nunaanni Eqqartuussiviup Kalaallit Nunaanni pigisamik aalaakkaasumik piginnaatitaaffimmik pissarsiaq imaluunniit atuisinnaatitaaneq, oqaasertaliussami matumani aalajangersakkanut uniuuttoq nalunaarsugassanngorlugu nalunaarutigineqarpat piumasaqaat itigartissavaa.

  Imm. 3.  Naalakkersuisunit akuersissutitaqanngitsumik Kalaallit Nunaanni nunaminertanik atuisinnaatitaanissamut qinnuteqartoqarnerani qinnuteqartup §§ 3-8-mi piumasaqaatit naammassisimanngippagit, imaluunniit qinnuteqartoq § 10-mut ilaatinneqanngippat, Nunaminertanik atugassiisarnermut oqartussaasut itigartitsissapput.

Avaqqussineq

  § 13. Inatsisitigut isumaqatigiissutit, oqaasertaliussami matumani maleruagassanik saneqqutsiniarnermik siunertaqarluni isumaqatigiissutigineqartut ilimagineqartariaqartut atuutissanngillat.

Pineqaatissiinerit

  § 14. Inatsisartut inatsisaat manna uniorlugu Kalaallit Nunaanni pigisamut aalaakkaasumut piginnaatitaaffimmik imaluunniit Kalaallit Nunaanni nunaminertamik atuisinnaatitaanermik pisisoq, Kalaallit Nunaannut Pinerluttulerinermi inatsimmi maleruagassat malillugit akiliisitsinikkut pineqaatissinneqarsinnaavoq.

  Imm. 2.  Najoqqutassanut § 9, imm. 4 naapertorlugu aalajangersarneqartunut Kalaallit Nunaannut Pinerluttulerinermut inatsimmi maleruagassat malillugit pineqaatissiinernik akiliisitsinertut ilusilinnik aalajangersaasoqarsinnaavoq.

  Imm. 3.  Inatsisartut inatsisaat imaluunniit najoqqutassat Inatsisartut inatsisaat naapertorlugu aalajangersarneqartut akiliisitsinermik aalajangersaanissamik tunngavissiisimappata, akiliisitsineq Kalaallit Nunaannut Pinerluttulerinermut inatsimmi kapitali 5-imi maleruagassat malillugit inatsisitigut pisinnaatitaasumut pisussaatitaasumullu akiligassanngortinneqarsinnaavoq.

  Imm. 4.  Akiliisitsissutit, Inatsisartut inatsisaat manna, imaluunniit aalajangersakkat, Inatsisartut inatsisaat manna naapertorlugu aalajangersarneqarsimasut malillugit Nunap karsianut tutsinneqassapput.

Atuutsitsilerneq

  § 15.  Inatsisartut inatsisaat ulloq 1. Januaari 2026 atuutilissaaq.

  Imm. 2.  Inatsisartut inatsisaat pigisanik aalaakkaasunik piginnaatitaaffinnik piginnisaqalernissaq atuisinnaatitaalernissaq pillugu isumaqatigiissutinut, Inatsisartut inatsisaata atuutilereernerata kingorna isumaqatigiissutigineqartunut atuuppoq.

  Imm. 3. Inatsisartut inatsisaat pigisanik aalaakkaasunik atuisinnaatitaanissamut qinnuteqaatinut, Inatsisartut inatsisaata matuma atuutilernerata kingorna tunniunneqartunut atuuppoq.

Namminersorlutik Oqartussat, ulloq 20. novemberi 2025

Jens-Frederik Nielsen (atsior.)

Naalakkersuisut Siulittaasuat