Inatsisartunut qinersinissamik suaaruteqarneq

  § 1.  Inatsisartunut qinersisoqassaaq ulloq 11. marts 2025.

  § 2. § 1-ip malitsigisaanik taamatut avaqqussinikkut Inatsisartunut qinersinissaq pillugu Inatsisartut inatsisaat naapertorlugu naammassineqassaaq, takuuk imm. 2.

Imm 2. Inatsisartunut qinersineq pillugu Inatsisartut Inatsisaani § 12 imm. 3 malillugu partiit nutaat Qinersinermut ataatsimiititaliamut nalunaartussaanerannut killiussaq allannguuteqarpoq imaalilluni, nalunaartussaatitaaneq qinersinerup ullua sapaatip akunnerik sisamanik sioqqullugu tunniussisoqassalluni.

Suliniutit nunanut allanut tunngasut il. il.

  § 3. Inatsisartut Naalakkersuisullu pillugit Inatsisartut inatsisaanni § 29-mi tunngavissat tunngavigalugit, Naalakkersuisuugallartut, ikinnerpaamik partiit siulittaasuinit pingasunit akuerineqarlutik, Inatsisartuni ilaasortat ikinnerpaamik 2/3-iinik sinniisoqarlutik, piffissaq Naalakkersuisutut atuuffiat atuukkunnaareerpat makkununnga suliarinnissinnaanissamut pisinnaatinneqarput:

1)  Nunap naalagaaffiulluunniit nunani allani naalakkersuinikkut imaluunniit aningaasaqarnikkut soqutigisai, tamakkununnga ilanngullugit Kunngeqarfik Danmarkimut ataqateqarneq, naalagaaffinnut allanut pissaanilinnut imaluunniit naalagaaffiit assigiinngitsut soqutigisaannut tunngasut eqqarsaatigalugit isumaqatiginninniarnissamut kinguartinneqarsinnaanngitsumut pisinnaatitsissutip akuerineqarnera.

2)  Pisinnaatitsissut aalajangersakkami matumani nr. 1-imi matumani pineqartoq naapertorlugu isumaqatiginninniarnerit kinguartinneqarsinnaanngitsut suliarineqartarnissaat.

3)  Pisinnaatitsissut aalajangersakkami matumani nr. 1-imi pineqartoq naapertorlugu isumaqatiginninniarnerit kinguartinneqarsinnaanngitsut naammassinissaat, Kalaallit Nunaanni Namminersorneq pillugu inatsimmi Kapitali 4-mi pineqartunik inatsisit inuiannut tamanut tunngasut pillugit inaarutaasumik isumaqatigiissusiortoqarneranik kinguneqartinnagit.

Sanaartornissamut suliniutit pillugit isumaqatigiissusiornerit suliarinnittussarsiornerillu pillugit suliniutit

  § 4.  Inatsisartut Naalakkersuisullu pillugit Inatsisartut inatsisaanni § 29-mi tunngavissat tunngavigalugit, Naalakkersuisuugallartut, ikinnerpaamik partiit siulittaasuinit pingasunit akuerineqarlutik, Inatsisartuni ilaasortat ikinnerpaamik 2/3-iinik sinniisoqarlutik, sanaartornissamut suliniutinut pilersaarusiaralugit naammasseriikkanut 2025-mullu Aningaasaqarnermut Inatsimmi pisariaqartinneqartunik aningaasanik immikkoortitsivigineqareersimasunut suliarinnittussarsiornissamut isumaqatigiissusiornissamullu pisinnaatinneqarput, taamatut pisoqanngippat inuiaqatigiinnut ajoqutaasinnaappat, matumani ilanngullugit nunatta karsianut suleqatigisamulluunniit namminersortumut aningaasaqarnikkut kingunerluuteqassappat, imaluunniit suliffissaaleqinerutitsissappat sanaartornissamulluunniit suliniutinik kinguaattoortitsissappat.

  § 5. Inatsisartut inatsisaat unaa nalunaarutigineqareernerata aqaguani atulersinneqassaaq.

Namminersorlutik Oqartussat, ulloq 4. februar 2025

Múte Bourup Egede (atsior.)

Naalakkersuisut Siulittaasuat