Meeqqat tapersersorneqarnissaannut Inatsisartut inatsisaat nr. 20, 26. juni 2017-imeersoq naapertorlugu, kingullermik Inatsisartut inatsisaatigut nr. 68, 20. novembari 2023-meersukkut § 55 a, imm. 5-ikkut allanngortinneqartumi kiisalu Inersimasunut paaqqinniffiit immikkut siunertallit pillugit Inatsisartut peqqussutaat nr. 6, 28. april 1988-imeersoq, Inatsisartut peqqussutaatigut nr. 5, 11. maj 1993-imeersukkut § 4, imm. 1-ikkut aamma § 6, imm.2-kkut allanngortinneqartumi aalajangersarneqarput:

 

Immikkoortoq 1

Meeqqanut Ilaqutariinnullu Sullissiviit aamma Ilaqutariit Illui

 

Kapitali 1

Suliassat

 

  § 1.  Meeqqanut Ilaqutariinnullu Sullissiviit kiisalu Ilaqutariit Illui meeqqanut, inuusuttunut ilaqutariinnullu, tassunga ilanngullugit ilaqutariinngulersut, meeqqat inuusuttullu inuttut atugarliortut imaluunniit immikkut ittunik pisariaqartitaqartut immikkut qitiutillugit suliaqarfiit assigiinngitsut akornatigut siunnersuisassapput, ilitsersuillutillu katsorsaasassapput.

 

  § 2.  Meeqqat tapersersorneqarnissaannut Inatsisartut inatsisaat naapertorlugu meeqqap inuusuttulluunniit angerlarsimaffittut kommunerisaani suliat pillugit sulianik suliarinnittartunut Meeqqanut Ilaqutariinnullu Sullissiviit aamma Ilaqutariit Illui ilitsersuillutillu siunnersuisassapput. 

  Imm. 2.  Meeqqap inuusuttulluunniit angerlarsimaffittut kommunerisaani suliamik nalilersuinermi, misissuinermi qulaajaanermilu Meeqqanut Ilaqutariinnullu Sullissiviit sulianik suliarinnittartoq ikiussavaat.

 

  § 3.  Meeqqanut Ilaqutariinnullu Sullissiviit aamma Ilaqutariit Illui §§ 1 aamma 2 malillugit meeqqamut pitsaanerpaajusoq qitiutillugu ilitsersuillutillu siunnersuissapput.

  Imm. 2.  Meeqqat ataasiakkaat akornanni attaveqaatitigut ataqatigiissakkamik suleqatigiinnissamik qulakkeerinninnissamut Meeqqanut Ilaqutariinnullu Sullissiviit aamma Ilaqutariit Illui oqartussaasunik attuumassuteqartunik suliaqarfiit assigiinngitsut akornatigut suleqateqassapput.

  Imm. 3.  Assigiinngitsunik suliallit akornanni ataqatigiissakkamik suleqatigiinnerat imm. 2 naapertorlugu Meeqqanut Ilaqutariinnullu Sullissivinni, Ilaqutariit Illuini sumiiffimmiluunniit allami pisortat ingerlatsiveqarfiani attaveqatigiit pillugit ataatsimiinnerisigut pisarsinnaapput.

 

Kapitali 2

Innersuussineq ingerlatsinerlu

 

  § 4.  Meeqqanut Ilaqutariinnullu Sullissivinni aamma Ilaqutariit Illuini neqeroorutinut innersuussineq kommunip ingerlatsiviani pisarpoq.

  Imm. 2.  § 5, nr. 5 aamma 6 taavalu § 6, nr. 1 aamma 3 naapertorlugit innuttaasut ajornartoornermi ikiuigasuarnermik innersuunneqarsimanngitsut Meeqqanut Ilaqutariinnullu Sullissiviinukarlutillu Ilaqutariit Illuinukarsinnaapput.

 

  § 5.  Meeqqanut Ilaqutariinnullu Sullissiviit minnerpaamik tullinnguuttunik neqerooruteqassapput:

1)  Ilaqutariinni siunersioqatigiinnerit imaluunniit assigisaanik suliniuteqarnerit, tassani meeqqat inuusuttullu 18-it inorlugit ukiullit taakkualu ilaqutaat attaveqarfigisartagaallu meeqqap pisariaqartitaanut ilungersornartitaanullu ilanngutitinneqassapput, meeqqap atugarissaarnerata ineriartorneratalu tapersersorneqarnissaa siunertaralugu inuit ilanngutitinneqartut ataatsimoorlutik pisussaaffiliisumik anguniagassaminnik pilersitsissapput.

2)  Aqqutissiuinertalimmik ilaqutariinnik katsorsaaneq.

3)  Naartusunut atugarliortunut angajoqqaanullu marluk inorlugit ukiulinnik qitornalinnut siusissukkut iliuuseqarneq.

4)  Oqaloqatiginnittarnikkut katsorsaaneq.

5)  Siumoortumik piffissamik inniminneeqqaarani innersuussinermilluunniit piumasaqaatitaqanngitsumik oqaloqatiginninnikkut ammasumik siunnersuineq.

6)  Ajornartoornermi ikiuigasuarneq.

 

  § 6.  Ilaqutariit Illui minnerpaamik tullinnguuttunik neqerooruteqassapput:

1)  Siumoortumik piffissamik inniminneeqqaarani innersuussinermilluunniit piumasaqaatitaqanngitsumik oqaloqatiginninnikkut ammasumik siunnersuineq ilitsersuinerlu.

2)  Aqqutissiuinertalimmik ilaqutariinnik katsorsaaneq.

3)  Ajornartoornermi ikiuigasuarneq.

 

  § 7.  Meeqqap, inuusuttup ilaqutariilluunniit Meeqqanut Ilaqutariinnullu Sullissivimmi katsorsarneqarnissaq pisariaqartitaa / pisariaqartitaat kommunip suliamik suliarinninnera utaqqimaarneqarnissaa avaqqunniarlugu, isumaginninnikkut misissuinerup pinnginnerani iliuusissatullu pilersaarusiunnginnermi kommunalbestyrelse Meeqqanut Ilaqutariinnullu Sullissivinni aamma Ilaqutariit Illuini katsorsaanissamik innersuussisinnaavoq.

 

Kapitali 3

Sulisoqarnermut piumasaqaatit

 

  § 8.  Nalunaarut manna naapertorlugu Meeqqanut Ilaqutariinnullu Sullissiviit kiisalu Ilaqutariit Illuisa suliassaannik suliarinnissinnaasunik Meeqqanut Ilaqutariinnullu Sullissiviit kiisalu Ilaqutariit Illui sulisunik piginnaasalinnik aalajangersimasunik atorfilinnik sulisoqassapput.

 

  § 9.  Atorfinitsinneqarnerup aallartinneranut atatillugu pikkorissartitsineq Isumaginninnermut Aqutsisoqarfimmit aaqqissuunneqarsimasoq § 8 naapertorlugu sulisut atorfimminni nipangiussisimasussaatitaaneq, nalunaaruteqartussaatitaaneq aamma paasissutissat inunnut tunngasut suliarineqartarnerat pillugit malitarisassat tunngaviusumik pikkorissarfigissavaat.

  Imm. 2.  Meeqqanut Ilaqutariinnullu Sullissivinni aamma Ilaqutariit Illuini pisariaqartitsineq naapertorlugu sulisut piginnaasaat ineriartortinneqassapput.

 

  § 10.  Ilaqutariit Illuini naammattumik sulisoqarnissamut tunngatillugu Meeqqanut Ilaqutariinnullu Sullissiviit Ilaqutariit Illuisa pisariaqartitaannut akisussaasuupput.

 

Kapitali 4

Paasissutissanik paarlaasseqatigiinneq

 

  § 11. Meeqqanut Ilaqutariinnullu Sullissiviit kiisalu Ilaqutariit Illui iliuusissatut pilersaarummik tunineqassapput suliamillu suliarinninnissamut paasissutissanik pisariaqartinneqartunik kommunip ingerlatsivianik paarlaasseqatigiissapput.

  Imm. 2.  Pisuni inuusuttup ilaqutariilluunniit innersuunneqarnerini suli isumaginninnikkut misissuinerup aallartinnginnerani naammassinnginneraniluunniit, iliuusissatut pilersaarummik tunniussinissaq piumasaqaataanngilaq. Iliuusissatut pilersaarutip naammassineqareernerata kingorna piaarnerpaamik nassiunneqassaaq.

 

  § 12.  Meeqqanut Ilaqutariinnullu Sullissivinni kiisalu Ilaqutariit Illuini kommunalbestyrelse katsorsaanissamik innersuussigaangat, kommunip ingerlatsivianit paasissutissanik pisariaqartinneqartunik paarlaasseqatigiinnissaq pillugu innuttaasumit akuersissummik pissarsiniartoqassaaq.

  Imm 2.  Akuersissummik piumasaqarneq avaqqunneqarsinnaavoq, meeqqap peqqissusaanut, ineriartorneranut peroriartorneranullu ikiorsiinissaq pillugu suliniuteqarnermik aallartitsinissaq pingaaruteqarluinnartutut isigineqarpat kiisalu ikiorsiinissamik suliniuteqarnerup siunertaa akuersissummik pissarsinngikkaluarluni anguneqarsinnaasutut isigineqarpat.

 

  § 13.  § 3, imm. 2 naapertorlugu assigiinngitsunik suliallit akornanni suleqatigiinnerisa ilaattut meeqqap inuttut ilaquttaminilu atugarisai pillugit paasissutissanik paarlaasseqatigiittoqarsinnaavoq, paarlaasseqatigiinneq Meeqqanut Ilaqutariinnullu Sullissivinni imaluunniit Ilaqutariit Illuini katsorsaanissap ilaattut pisariaqartinneqartutut isigineqarpat.

 

Immikkoortoq 2

Qimarnguiit

 

Kapitali 5

Siunertaq

 

  § 14.  Qimarnguiit inunnut tamanut tullinnguuttunik nalaataqarsimasunik utaqqiisaasumik najugaqarfiupput:

1)  nakuuserfigineqarneq,

2)  nakuuserfigineqarnissamik siorasaarfigitinneq, imaluunniit

3)  ilaqutariinni inooqatigiinnermiluunniit attuumassuteqartunik ajornartorsiuteqartunik tassungaluunniit assingusumik inissisimasut.

  Imm. 2.  Qimarnguinni najugaqartut meeqqanik ilaqarsinnaapput.

  Imm. 3.  Qimarnguinniinnermi qimarnguiit najugaqartunut siunnersuinissamik, ilitsersuinissamik isumassuinissamillu neqerooruteqassapput, tassunga ilanngullugit Meeqqanut Ilaqutariinnullu Sullissivinni aamma Ilaqutariit Illuini pisussat pillugit neqeroorutitut ittut.

 

Kapitali 6

Innersuussineq ingerlatsinerlu

 

  § 15.  Kommunalbestyrelse inoqarfinni tamani 1000-t sinnerlugit inulinni qimarnguinnik pilersitsinissamik ingerlatsinissamillu qulakkeerinnissaaq. Kommunalbestyrelse inoqarfinni mikinerusuni qimarnguinnik pilersitsisinnaallunilu ingerlatsisinnaavoq.

  Imm. 2.  Qimarnguiit kommunip pigisaattut imaluunniit imminnut pigisutut pilersinneqarsinnaapput.

  Imm. 3.  Qimarnguiit imminnut pigisut, kommunimi qimarnguiup imminut pigisup inissisimaffigisaani, ingerlatsinissaq pillugu kommunalbestyrelse isumaqatigiissusiorfigissavaat.

 

  § 16.  Innuttaasoq pisortatut oqartussanit innersuussisoqareerneratigut namminerluunniit saaffiginnereernikkut najugaqarsinnaavoq.

  Imm. 2.  Kinaassusermik isertuussilluni qimarnguimmiittoqarsinnaavoq.

 

  § 17.  Qimarnguinni tullinnguuttut neqeroorutigineqassapput:

1)  Inunnut qimarnguinniittunut illersuineq isumannaatsuunerlu.

2)  Ajornartoornermi ikiuigasuarneq.

3)  Siunnersuineq ilitsersuinerlu. 

4)  Najugaqarfissatut neqeroorummi utaqqiisaasumik najugaqarneq. 

 

Kapitali 7

Illup aaqqissuussaaneranut piumasaqaatit

 

  § 18. Qimarnguiit najugaqarfissatullu neqeroorutit ima aaqqissuunneqassapput, najugaqartut meeraqarpatalu meeraat sapinngisamik tamarmik immikkut ineqarsinnaasunngorlugit.

  Imm. 2.  Najugaqartut uffarfeqarnissamut perusuersartarfeqarnissamut igaffeqarnissamut kiisalu isersimaartarfeqarnissamut periarfissaqassapput.

 

Kapitali 8

Qimarnguiit imminnut pigisut

 

  § 19.  Qimarnguiit imminnut pigisut ileqqoreqqusaliussapput.

  Imm. 2.  Qimarnguiit ileqqoreqqusaanni aalajangersakkanik makkuninnga imaqassaaq:

1)  Qimarnguiup siunertarisaa.

2)  Qimarnguiup aaqqissugaanerata ilusaa aalajangiisinnaassuseqarneralu.

3)  Qimarnguiup aningaasaqarnera qanoq aqunneqartassanersoq.

4)  Ileqqoreqqusat allannguuteqartinneqarnissaanni periusissat.

5)  Qimarnguik matuneqassagaluarpat taassuma aningaasaataasa qanoq atorneqarnissaat.

  Imm. 3.  Qimarnguinni ileqqoreqqusat Naalakkersuisunit akuerineqassapput.

 

  § 20. Qimarnguiit imminnut pigisut suli atulersinnagit Naalakkersuisunit akuerineqassapput.

  Imm.2.  Qimarnguiit imminnut pigisut ingerlatsinissaq pillugu kommunalbestyrelse isumaqatigiissusiorfigissavaat, minnerpaamik aalajangersakkanik makkuninnga imaqassaaq:

1)  Qimarnguiup sulineranut pingaarnertut anguniagaq.

2)  Qimarnguimmi inissat amerlassusaat illutaallu.

3)  Sullissinerit neqeroorutillu qimarnguiup neqeroorutigisaasa nassuiarneqarnerat.

4)  Innuttaasup qanoq qimarnguimmut saaffiginnittarnissaanut periaasissat kinalu qimarnguimmiissinnaanersoq.

5)  Kommunalbestyrelsip nakkutilliinissamut pisussaaffia tamatumalu annertussusaa.

6)  Sulisoqarnermut politikki.

7)  Piffissat ammasarfiit.

  Imm. 3.  Ingerlatsineq pillugu isumaqatigiissut qimarnguiup akuersissutigineqarnissaanik inassuteqaatitalerlugu kommunalbestyrelsip Naalakkersuisunut nassiutissavaa.

  Imm. 4.  1. martsi nallertinnagu Naalakkersuisut Nakkutilliinermik Ingerlatsiviannut nassiunneqartussamik kommunalbestyrelse ukiumoortumik nakkutilliineq pillugu nalunaarusiortassaaq.

 

Immikkoortoq 3

Aalajangersakkat nalinginnaasut

 

Kapitali 9

Kisitsisitigut paasissutissat

 

  § 21.  Kommunalbestyrelse kisitsisinik paasissutissanik assigisaanillu, Naalakkersuisut piumasarisaannik, nassiussinissamik pisussaaffeqarpoq.

 

Aningaasalersuineq

 

  § 22.  Meeqqanut Ilaqutariinnullu Sullissiviit, Ilaqutariit Illui aamma qimarnguiit kommuninit sumiiffigisaannit aningaasalersorneqarput.

  Imm. 2.  Qimarnguinnut imminnut pigisunut ingerlatsinernut Nunatta Karsia tapiissuteqarsinnaavoq.

 

Kapitali 10

Atuutilersitsinermut atorunnaarsitsinermullu aalajangersakkat

 

§ 23.  Nalunaarut manna ulloq 1. februari 2024 atuutilissaaq.

  Imm. 2.  Tamanna ilutigalugu Qimarnguiit pillugit Namminersornerullutik Oqartussat nalunaarutaat nr. 18, 8. december 2004-imeersoq atorunnaarsinneqarpoq.

 

 

Namminersorlutik Oqartussat, ulloq 23. januari 2024.

 

 

Aqqaluaq B. Egede (atsior.)

Meeqqanut, Inuusuttunut, Ilinniartitaanermut, Kultureqarnermut, Timersornermut, Ilageeqarnermullu Naalakkersuisoq

 

 

/ Heidi Lindholm (atsior.)