Aalisarneq pillugu Inatsisartut inatsisaanni nr. 18-imi 31. oktober 1996-imeersumi, kingullerpaamik Inatsisartut inatsisaatigut nr. 17, 3. december 2009-imi allanngortinneqarsimasumi, § 12, imm. 3, § 23, imm. 1, § 26 aamma § 33 naapertorlugit, aalajangersarneqarput:

Kapitali 1

Aalisarnissamut inerteqqut

  § 1.  Uunga nalunaarummut ilanngussaq 1-imi nunap assingani sumiiffinni kalaallit aalisariutaat aalisaqqusaanngillat.

Kapitali 2
Irmingip Imartaani suluppaakkanik ikerinnaasiortunik aalisarnermi usinik nuussisarneq aamma angallatinut pilersuisarneq ikiorsiissuteqartarnerlu inerteqqutaapput

  § 2.  Suluppaakkanik ikerinnaasiortunik (Sebastes mentella) Irmingip Imartaaneersunik kalaallillu oqartussaaffianneersunik killeqartinneqartunit usinik nuussisarneq inerteqqutaavoq. Kalaallit aalisariutaat aamma imartani Kalaallit Nunaata oqartussaaffigisaasa avataaniittuni ikerinnaasiortunik suluppaagarniarnermi usinik taamatut nuussinikkut pissarsinissaat inerteqqutaavoq.

  Imm. 2.  Kalaallit aalisariutaasa aalisariutinut ikerinnaasiortunik suluppaakkanik tassanngaanneersunik pisaqarsimasunut pilersuinissaat ikiorsiissuteqarnissaallu inerteqqutaavoq.

Kapitali 3

Suluppaakkanik ikerinnaasiortunik tulaassinissamut inerteqquteqarneq

  § 3.  Irmingip Imartaaneersunik suluppaakkanik ikerinnaasiortunit taassumalu killeqarfianit pisanik kalaallit umiarsualiviinut tulaassineq inerteqqutaavoq.

  Imm. 2.  Aalisariutit Irmingip Imartaaneersunik suluppaakkanik ikerinnaasiortunit taassumalu killeqarfianit pisanik usillit Kalaallit Nunaata umiarsualiviinik atueqqusaanngillat, pilersorneqaqqusaanngillat ikiorserneqaqqusaanatillu.

Kapitali 4
Pineqaatissiissutit

  § 4.  §§ 1-3, unioqqutinneqarneri Kalaallit Nunaanni Pinerluttulerinermut inatsimmi maleruagassat naapertorlugit akiliisussanngortitsinermik arsaarinninnermillu kinguneqarsinnaapput.

  Imm. 2.  Ingerlatseqatigiiffiit il.il. (inatsisitigut akisussaaffimmik tigummiartut) Pinerluttulerinermi inatsimmi kapitali 5-imi malittarisassat malillugit pinerluuteqarsimasutut akisussaatinneqarsinnaapput.

  Imm. 3.  Akiliisitsissutit Nunatta Karsianut tutsinneqassapput.

Kapitali 5

Atortuulersitsineq

  § 5.  Nalunaarut manna nalunaaruteqarnikkut atuutsilersinneqarpoq.

Namminersorlutik Oqartussat, ulloq 25. juuni 2024

Kim Kielsen (atsior.)

Aalisarnermut Piniarnermullu Naalakkersuisoq

/ Emanuel Rosing (atsior.)