Kapitali 1

Atuuffia aamma isumasiuutit

 

  § 1.  Takornarianik sullissinissanut akuersissutinut inatsisartut inatsisaat atuuppoq.

  Imm. 2.  Illunut, sanaartukkanut, aaqqissuussinernut, aqqusinernut aamma attaveqaasersuutinut allanut, takornarianik sullissinermik tunniussinernut atatillugu atorneqartunut, inatsisartut inatsisaat aamma atuuppoq.

  Imm. 3.  Takornariartitsisarnermik ingerlataqarneq aamma inuussutissarsiutigalugu ingerlatsinermizonenut immikkoortiterineq il.il. pillugit Inatsisartut inatsisaat malillugu, suliniutinut takornariartitsinermik suliaqarnermut akuersissutinut ilaasunut, inatsisartut inatsisaat atuutinngilaq.

 

  § 2.  Inuup nalinginnaasumik najugaata imaluunniit najugaqarfiata avataanut angalasoq, aamma angalaneq tamakkerluni imaluunniit ilaannaa nuannaariarnissaq, peqqissarnissaq imaluunniit sulinngiffeqarnissaq eqqarsaatigalugu pippat, aamma tassunga atatillugu sullissinermik pissarsippat, inatsisartut inatsisaanni matumani inuk “takornariatut” paasineqassaaq.

  Imm. 2.  Sullissineq suliniutitut ilusilik imaluunniit nioqqutissiatut pingaarnertut takornariatut sammitinneqartoq, aamma akiliisitsilluni tunniunneqartoq, “takornarianik sullissinertut” paasineqassaaq.

  Imm. 3.  Nunap ilaani sumiiffiup killillip iluani takornarianik sullissinermik imaluunniit sullissinernik arlalinnik tunniussinissamut pisinnaatitaaffittut “takornarianik sullissinernut akuersissut” paasineqassaaq.

  Imm. 4.  Inuk imaluunniit inatsisitigut pisinnaatitaasoq pisussaatitaasorlu, imm. 3 malillugu takornarianik sullissisinnaanermut akuersissummik tunineqartoq “pisinnaatitaaffinnik piginnittutut” paasineqassaaq.

Imm. 5.  Takornarianik sullissinernut akuersissutinik nalunaarfigineqarnissaq pillugu nalinginnaasumik pisortanit qinnuteqaatinik nassiusseqqusinertut, inatsisartut inatsisaanni matumani “neqerooruteqartitsineq” paasineqassaaq.

  Imm. 6.  Inatsisartut inatsisaanni matumani “najukkami sulisut” tassaapput sulisinnaasut Kalaallit Nunaanni inuit allattorsimaffianni najugaqartutut nalunaarsorneqarsimasut.

  Imm. 7.  Inatsisartut inatsisaanni matumani “najukkami pilersuisut” tassaapput pilersuisut Qitiusumik Suliffeqarfinnik Nalunaarsuiffimmi (CVR) Kalaallit Nunaanni angerlarsimaffeqartutut nalunaarsorsimasussaatitaasut.

 

Kapitali 2

Takornarianik sullissinnaanermut akuersissutit

 

  § 3.  Nunami sumiiffinni killilinni takornarianik sullissinermik tunniussinerni, akuersissummik tunniussisoqarnissaata piumasarineqarnissaa pillugu Naalakkersuisut malittarisassanik aalajangersaasinnaapput.

  Imm. 2.  Sumiiffimmi tassani takornarianik sullissinerit allatut ilusillit tunniunneqarsinnaanerat, sumiiffimmi takornarianik sullissinerit suussusaannut aalajangersimasunut akuersissummik piumasaqaatip mattutinngilaa.

 

  § 4. Inatsisartut inatsisaanni matumani § 9 malillugu ingerlatseriaaseq, aamma inatsisartut inatsisaanni matumani § 10 malillugu toqqaanissamut aalajangiinermut tunngaviit, aamma § 11 malillugu piumasaqaatit minnerpaaffissaanut aalajangersakkat tunngavigalugit, Naalakkersuisut akuersissummik nalunaaruteqarsinnaapput. Takornarianik sullissisinnaanermut akuersissut kisermaassassanngorlugu nalunaarutigineqassaaq.

  Imm. 2.  Imm. 1 malillugu takornarianik sullissisinnaanermut akuersissummik nalunaarfigitinniaraanni, inatsisartut inatsisaanni §§ 12-imiit 15 ilanngullugu piumasaqaatigineqartut aamma § 16 malillugu malittarisassat aalajangersarneqartut qinnuteqartup naammassisimassavai. Piffissami akuersissuteqarfiusumi tamarmi pisinnaatitaaffimmik piginnittup piumasaqaatit taakku naammassissavai.

  Imm. 3.  Takornarianik sullissisinnaanermut akuersissut sioqqutsisumik Naalakkersuisunit allakkatigut akuersissummik pinikkut allannut tunniunneqarsinnaavoq.

  Imm. 4.  Pisinnaatitaaffinnik piginnittut, akuersissummik pisimasut kikkuuneri, sumiiffimmi sumi akuersissut tunniunneqarsimanersoq, suut akuersissuteqarfiusimanersut, kiisalu akuersissutip sivisussusaa Naalakkersuisut tamanut saqqummiussinnaavaat.

  Imm. 5.  Imm. 1 malillugu takornarianik sullissisinnaanermut akuersissutip tunniunneqarnissaanut piumasaqaatit pillugit Naalakkersuisut malittarisassanik erseqqinnerusunik aalajangersaasinnaapput.

  Imm. 6.  Tamatumunnga tunngatillugu akuersissutit nalunaarutigineqarnissaannut piginnaasaqarneq kommunalbestyrelsinut suliassiissutigineqarnissaa pillugu, Naalakkersuisut malittarisassanik aalajangersaasinnaapput.

 

  § 5.  Takornarianik sullissisinnaanermut akuersissutit piffissami ukiut 20-it tikillugit nalunaarutigineqassapput.

  Imm. 2.  Piffissap akuersissuteqarfiusup ukiut 20-it tikillugit sivitsorneqarnissaa Naalakkersuisut nalunaarutigisinnaavaat. 

  Imm. 3.  Imm. 1-imiit 2 ilanngullugu apeqqutaatinnagit, akuersissummut piffissaliussap ataatsimoortup ukiut 30-it qaangissanngilai.

 

  § 6.  Suliniut inatsisartut inatsisaannut ilaatinneqartut pillugit paasissutissat tamaasa oqartussaasut sulianik suliarinninnerannut pisariaqartinneqartut, pisinnaatitaaffimmik piginnittup Naalakkersuisunut nalunaarutigissavai.

  Imm. 2.  Paasissutissiinissamik pisussaaffiup annertussusaa, qanoq ittuulluni aamma qanoq iluseqarluni nassiunneqarnissaa pillugit, Naalakkersuisut malittarisassanik aalajangersaasinnaapput. 

 

  § 7.  Sumiiffiup akuersissuteqarfiusup kommunianut, takornarianik sullissisinnaanermut akuersissutinut ataatsimiititaliamik nalilersuisussamik pilersitsinissaq atuinissarlu pillugit Naalakkersuisut aalajangiisinnaapput.

  Imm. 2.  Sumiiffimmut akuersissuteqarfiusussamut qinnuteqaatit pissutsillu allat inatsisartut inatsisaanni matumani ilaatinneqartut tunngavigalugit, Naalakkersuisut noqqaassuteqarnerisigut akuersissutinut ataatsimiititaliaq innersuussuteqassaaq.

  Imm. 3.  Akuersissutinut ataatsimiititaliami ilaasortat toqqarneqarnissaannut, siulittaasup toqqarneqarnissaanut, kiisalu akuersissutinut ataatsimiititaliami taasisarneq pillugit malittarisassat pillugit, Naalakkersuisut malittarisassanik aalajangersaasinnaapput.

 

  § 8.  Inatsisartut inatsisaanni matumani § 3-mi, §§ 12-imiit 15 ilanngullugu aamma §§ 17-imiit 18 ilanngullugu kiisalu inatsisartut inatsisaat manna malillugu aalajangersakkat aalajangersarneqartut malillugit piumasaatit avaqqunneqarnissaat, Naalakkersuisut pisuni immikkut ittuni akuersissutigisinnaavaat.

 

Kapitali 3

Takornarianik sullissisinnaanermut akuersissutit nalunaarutigineqarnerat

 

  § 9.  Neqerooruteqartitsinerup kingorna aamma § 7, imm. 1 malillugu akuersissutinut ataatsimiititalianik attuumassuteqartunik tusarniaareernikkut, takornarianik sullissisinnaanermut akuersissut nalunaarutigineqassaaq. Qinnuteqarfissamut piffissaliussaq sioqqullugu minnerpaamik ullorsiutini ullut 45-t sioqqullugit, Naalakkersuisut nittartagaanni kiisalu tusagassiuutini Naalakkersuisut neqerooruteqartitsineq tamanut saqqummiutissavaat.

  Imm. 2.  Sumiiffimmut aalajangersimasumut neqerooruteqartitsisoqarsimappat, neqerooruteqartitsinerlu qinnuteqartumut piginnaassuseqartumut akuersissummik nalunaaruteqarnissamut periarfissiisimanngippat, qinnuteqarnissamut piffissaliussap naanerata kingorna kingusinnerpaamik qaammatit 18-it qaangiutsinnagit qinnuteqaatip tiguneqarsimanissaa piumasaqaatigalugu, nutaamik neqerooruteqartitseqqinnani takornarianik sullissisinnaanermut akuersissut nalunaarutigineqarsinnaavoq.

  Imm. 3.  Ingerlatseriaatsit imm. 1-imi aamma imm. 2-mi taaneqartut malillugit qinnuteqaatit tunngavigalugit, takornarianik sullissisinnaanermut akuersissutip nalunaarutigineqarnissaa Naalakkersuisut pinngitsoortissinnaavaat.

 

  § 10.  Neqerooruteqartitsinermi toqqaanissamut aalajangiinermi tunngaviit tulliuttut atorneqassapput, taamaattoq imm. 2 takuuk:

1)  Qinnuteqartup takornarianik sullissisinnaanermut akuersissummi pisussaaffimminik isumaginninnissaanut tekniskiusunut tunngasumik piginnaasai pisariaqartinneqartut.

2)  Qinnuteqartup takornarianik sullissisinnaanermut akuersissummi pisussaaffimminik isumaginninnissaanut aningaasaqarnermut tunngasumik piginnaasai pisariaqartinneqartut.

3)  Periuseq qinnuteqartup takornariartitsinermi nioqqutissap imaluunniit nioqqutissat qinnuteqaammut ilaasut qanoq ililluni tunniunnissaannut siunertaqarnersoq pillugu qinnuteqartup ingerlataqarnissaminut missiliuutaani uppernarsarneqarsimasut, tamakkununnga ilaallutik:

a)  Qinnuteqartup nioqqutissamik nittarsaassisinnaassusia kiisalu tuniniaaffissanik sunniuteqartunik pilersitsisinnaassusia.

b)  Qinnuteqartup suliffissanik pilersitsinissaminut kiisalu isumaqatigiissusiornermi, pilersuinermi kiffartuussutinilu pilersuisunik nunaqavissunik atuinissaminut piumassuseqarnera piginnaasaalu.

4)  Sumiiffimmi tamarmi imaluunniit sumiiffiup ilaani, siunissami takornarianik sullissisinnaanermik akuersissuteqarfiusinnaasutut ilaatinneqartumi, takornarianik sullissinerit suussusaata imaluunniit suussusaasa assingi pillugit pisinerulersitsiniarnermut, neqerooruteqarnermut, tuniniaanermut aamma tunniussinermut qinnuteqartup suliarinninniarnera imaluunnit piviusumik pilersaarusiornera.

5)  Piujuartitsinermik periaaseqarluni, pinngortitamut, avatangiisinut, silap pissusaanut, sulisut pisinnaatitaaffiinut aamma inuiaqatigiit soqutigisaannut nalinginnaasunut naleqquttumik qinnuteqartup takornarianik sullissinerit pillugit suliniutinik suliaqarsinnaanermut piginnaassuseqarnera aamma piumassuseqarnera. 

  Imm. 2.  Toqqaanissamut aalajangiinermut tunngaviit aallaavigalugit naliliinerup kingorna, qinnuteqartut naligiittut akornanni, inaarutaasumik toqqaanissaq siunertaralugu, imm. 1-imi taaneqartunit allaanerusunik, toqqaanissamut aalajangiinermi tunngavinnik naleqquttunik allanik, piviusoq naapertorlugu aamma kinaassusersiunngitsunik toqqaanissamut aalajangiinermut tunngavinnik Naalakkersuisut aalajangersaasinnaapput.

  Imm. 3.  Aalajangiinermut tunngaviit imm. 1-imi aamma 2-mi taaneqartut aamma aalajangiinissamut tunngaviit imminnut missingersuunneqarnerat, § 9, imm. 1 malillugu neqerooruteqartitsinermut atatillugu tamanut saqqummiunneqassapput.

 

  § 11.  Piumasaqaatit minnerpaaffissaat, qinnuteqartup piukkunneqarniarluni naammassisassai, neqerooruteqartitsinermut atatillugu Naalakkersuisut aalajangersarsinnaavaat.

 

Kapitali 4

Pisinnaatitaaffinnik piginnittut

 

  § 12.  Takornarianik sullissisinnaanermik akuersissut taamaallaat inunnut tulliuttunik naammassinnittunut nalunaarutigineqarsinnaavoq:

1)  Kalaallit Nunaanni inunnik nalunaarsuisarfimmi adresseqartumut aamma piffissami minnerpaamik ukiut 5 qinnuteqarfik sioqqullugu tassani nalunaarsorneqarsimalluni,

2)  Kalaallit Nunaannut tamakkiisumik akileraartussaatitaasumut,

3)  nammineq pisuussutiminik tamakkiisumik atuisinnaasumut aamma akiliisinnaajunnaarneq-, akiliisinnaannginneq- imaluunniit atorunnaarsitsineq pillugit suliaqarfigineqanngitsumut, aamma

4)  pisortanut 100.000 kr.-it sinnerlugit akiligassanik akilerneqareertussaagaluanik akiligassaqanngitsumut.

 

  § 13.  Takornarianik sullissisinnaanermik akuersissut taamaallaat inatsisitigut pisinnaatitaasumut pisussaatitaasumullu tulliuttunik naammassinnittunut nalunaarutigineqarsinnaavoq:

1)  aningaaasaatileqatigiiffimmut imaluunniit inuup ingerlatseqatigiiffianutiit Kalaallit Nunaanni angerlarsimaffeqartumut,

2)  akiliisinnaajunnaarnermik, akiliisinnaannginnermik imaluunniit atorunnaarsitsinissaq pillugit suliaqarfigineqanngitsumut,

3)  aningaasaatileqatigiiffiup aningaasaataasa minnerpaamik 2/3-ii, aamma taasisinnaatitaanermut piginnaatitaaffiit minnerpaamik 2/3-ii toqqaannartumik toqqaannanngitsumilluunniit inunnit, § 12, nr. 1-4-mi piumasaqaatinik naammassinnittunit, pigineqarpata,

4)  inuup ingerlatseqatigiiffiani peqataasut minnerpaamik 2/3-ii § 12, nr. 1-4-mi piumasaqaatinik naammassinnippata, aamma

5)  ingerlatseqatigiiffik pisortanut 100.000 kr.-it sinnerlugit akiligassanngoreersunik akiitsoqassanngilaq.

 

Kapitali 5

Sillimaniarnermut pilersaarutit

 

  § 14.  Takornarianik sullissisinnaanermik akuersissummik qinnuteqartup qinnuteqaammi nassiunnerata peqatigisaanik sillimaniarnermut pilersaarut allaganngorlugu ilanngutissavaa.

  Imm. 2.  Takornarianik sullissinissat suussusaat, akuersissutip malitsigisaanik neqeroorutigineqartussatut eqqarsaatigineqartut, tassani sullissinerit takornarianut sammitinneqarlutik, tamarmik sillimaniarnermut pilersaarummi imarineqassapput.

  Imm. 3.  Sillimaniarnermut pilersaarut kalaallisut tuluttullu qaqugukkulluunniit takornarianit tikinneqarsinnaassaaq.

  Imm. 4.  Sillimaniarnermut pilersaarut ajutoorutaasinnaasunik nalilersuinermik aamma upalungaarsimanissamut pilersaarummik katitigaassaaq aamma nutarterneqarsimassaaq.

Imm. 5.  Pissutsit navianarsinnaasut pingaaruteqarnerpaat, suliniummut inatsisartut inatsisaanni matumani ilaatinneqartumut atassuteqartut pillugit, ajutooratarsinnaanermik nalilersuineq erseqqissumik annertuumillu paasissutissanik takornarianut ilisimasaqalersitsinissamut naleqquttuussaaq. Suliniutip piareersarneqarnerani ajutoorutaasinnaasunik nalilersuineq sulisut toqqarneqarneranni tunngaviussaaq, matumani angalanermi siulersuisut, angalanermi piffissaliussaq, pissutsit avataanersut nalilersorneqarneranni, atortussat toqqarneqarneranni il.il.

  Imm. 6.  Upalungaarsimanissamut pilersaarut ajutoorutaasinnaasunik nalilersuinermik tunngaveqassaaq aamma tulliuttunik imaqassalluni:

1)  annakannajaartoqartillugu imaluunniit ajunaarnermik pisoqartillugu iliuusissat aalajangerneqartussat allaaserineqarnerat,

2)  sulisuni suliniummi peqataasuni ilisimasassat, misilittagaqarnissaq aamma pisinnaasaqarnerit pillugit paasissutissat, aamma

3)  qinnuteqartup sulisuisa navianartumik pisoqartillugu qanoq qisuariaateqarnissaat pillugit, matumani attaveqaqatigiinnerup eqqarsaatigineqarnera ilanngullugu, paasissutissat.

  Imm. 7.  Pisuni inatsisiliornerit allat imaluunniit aalajangersimasumik sulisaatsit, suliniutip pineqartup suliarineqarneranut atasumik isumannaallisaanermut piumasaqaatinik malittarisassiuussisut, aamma qinnuteqartup eqqortissallugit pisussaaffigisai, atuutsillugit, imm. 1-miit 6 ilanngullugu aalajangersakkaniittut atuutinngillat.

 

Kapitali 6

Sillimmasiinermit matussusiineq aamma allatut qularnaveeqqusiineq

 

  § 15.  Pisinnaatitaaffinnik piginnittoq inuussutissarsiornermi akisussaanermut sillimmasiisimanissaa imaluunniit allatut qularnaveeqquserneqarsimanissaa pillugit Naalakkersuisut piumasaqaateqarsinnaapput.

  Imm. 2.  Pisuni, takornarianik sullissinernut pineqartunut matussusiisussamik inuussutissarsiornermi akisussaanermut sillimmasiisinnaaneq periarfissaatinnagu, aammattaaq qularnaveeqqusiinissaq alla periarfissaatinnagu, imm. 1 atuutinngilaq.

  Imm. 3. Imm. 1 malillugu sillimmasiinermit matussuserneqarnissamut aamma qularnaveeqqusiinissamut piumasaqaatit pillugit Naalakkersuisut malittarisassanik erseqqinnerusunik aalajangersaasinnaapput.

 

Kapitali 7

Najukkami sulisut pilersuisullu

 

  § 16.  Suliniutinut, takornarianik sullissisinnaanermut akuersissut malillugu suliarineqartunut, pisinnaatitaaffimmik piginnittup najukkami sulisut kiisalu najukkami nioqqutissanik kiffartuussinernillu pilersuiffinnik atuinissaa pillugit, Naalakkersuisut malittarisassanik aalajangersaasinnaapput.

 

Kapitali 8

Takornarianik sullissisinnaanermut akuersissummik tunineqarnerup kingorna pisinnaatitaaffimmik piginnittup pisussaaffii

 

  § 17.  Pisinnaatitaaffimmik piginnittoq qinnuteqarsimatinnagu aamma taaneqartorpiaat pillugit suliniutit pillugit pilersaarummut akuersissummik Naalakkersuisunit pisimatinnagu, pisinnaatitaaffinnik piginnittup suliniutinik takornarianik sullissisinnaanermut akuersissummi ilaasunik aallartitsinissaa inerteqqutaavoq. 

  Imm. 2.  Suliniutinut pilersaarut naleqquttumik annertussusilimmik tulliuttunik imaqassaaq: 

1)  Suliniutip ineriartortinneqarnissaannut kisitsisit anguniakkat pilersaarutigineqartut allaaserineqarnerat.

2)  Illut, illuliat assigisaallu akuersissummut atatillugu qanoq pilersinneqarniarnersut aamma atorneqarniarnersut allaaserineqarnerat.

3)  § 2, imm. 6 malillugu najukkami sulisut, aamma § 2, imm. 7 malillugu takornarianik sullissinnaanermut akuersissut malillugu suliniutit suliarineqarnissaannut nioqqutissanik kiffartuussinernillu pilersuiffiit atorneqarnissaannut pilersaarutigineqartut allaaserineqarneri.

4)  Isumannaallisaanermut tunngasunut pisussaaffiit qanoq ililluni naammassineqarnissaannik pisinnaatitaaffimmik piginnittup qulakkeerinninnissaata allaaserineqarnera.

5)  Pisinnaatitaaffimmik piginnittup sulisui aamma isumaqatigiissusiorfigisai, takornariat aamma inuit allat, inuttut ajoqusernissamut navianartorsiortinneqannginnissaat qulakkeerniarlugu, pisinnaatitaaffimmik piginnittup suliniutai aamma aalajangersimasumik ingerlatseriaasia pillugit allaaserinninneq.

6)  Pinngortitap illersorneqarnissaa, avatangiisit illersorneqarnissaat, aalisarneq piniarnerlu pillugit aamma sulinermut pissutsinut inatsisit aamma ataatsimoorussamik isumaqatigiissutit qanoq ililluni pisinnaatitaaffimmik piginnittup naammassinninnissaminik qulakkeerinninniarneranik allaaserinninneq.

7)  Akuersissutip atorunnaarnerani, qanoq ililluni avatangiisit iluarseqqinneqarnissaannik pisinnaatitaaffimmik piginnittup qulakkeerinninnissaa pillugu allaaserinninneq.

  Imm. 3.  Pissutsit allanngornerisa tamanna piumasaqaatigippassuk, piaarnerpaamik aamma kingusinnerpaamik qaammatit 3 iluanni, pilersaarut allanngortitaq Naalakkersuisuni akueriteqqullugu pisinnaatitaaffimmik piginnittup nassiutissavaa.

 

  § 18.  Suliniutit takornarianik sullissisinnaanermik akuersissummi ilaatinneqartut pillugit nalunaarusiaq, pisinnaatitaaffimmik piginnittup ukiumoortumik Naalakkersuisunut nassiutissavaa.

  Imm. 2.  Pisinnaatitaaffinnik piginnittup nalunaarusianik nassiussisarnissaa pillugu Naalakkersuisut malittarisassanik erseqqinnerusunik aalajangersaasinnaapput.

 

  § 19.  Nalunaarusiaqarnermut atatillugu paasissutissat saqqummersimasut, pisortani oqartussanut suliffeqarfinnullu namminersorlutik oqartussanit pigineqartunut, Naalakkersuisut avitseqatigiissutigisinnaavaat.

  Imm. 2.  Inatsisartut inatsisaat malillugu takornarianik sullissisinnaanermik akuersissutit pillugit naatsorsueqqissaarnikkut paasissutissat Naalakkersuisut tamanut saqqummiussinnaavaat.

 

Kapitali 9

Akitsuusiinikkut akileraarut aamma akiliutinik akiliineq

 

  § 20.  §§ 21 aamma 22 malillugit, pisinnaatitaaffinnik piginnittoq takornarianik sullissisinnaanermut akuersissummut pisaminnut ukiumoortumik akitsuusiinikkut akileraarummik akiliisassapput. Akitsuusiinikkut akileraarut Naalakkersuisut pissavaat.

  Imm. 2.  Takornarianik sullissisinnaanermut akuersissummik piffissami tunineqarfiusumi. Akitsuusiinikkut akileraarummik akiliisussaatitaaneq aallartissaaq.

  Imm. 3.  Ukiumi, akitsuusiinikkut akileraarummut tunngasumi, decemberip naanerani akitsuusiinikkut akileraarut akilerneqassaaq.

 

  § 21.  Akiliuteqarluni aalisarnermut akuersissutinut akitsuusiilluni akileraarut tassaavoq tunngaviusumik akigititaq tapilu.

  Imm. 2.  Tunngaviusumik akigititaq ukiumut 2.500 koruuniuvoq.

  Imm. 3.  Tapi tikeraartumut ataatsimut ullormut ataatsimut 130 koruunitut naatsorsorneqassaaq. 

  Imm. 4.  Imm. 2-imi aamma imm. 3-mi aningaasat amerlassusaat procenti aaqqiissutissaq atorlugu naleqqussarneqassapput.

 

  § 22.  Akuersissutinut § 21-imi ilaatinneqanngitsunut, akitsuusiinikkut akileraarut ukiumut 7.500 kr.-iusoq akilerneqassaaq.

  Imm. 2.  Imm. 1-imi aningaasat amerlassusaat procenti aaqqiissutissaq atorlugu naleqqussarneqassapput.

 

  § 23.  Inatsisartut inatsisaat malillugu suliamik suliarinninnermut aamma oqartussaasut oqartussaasutut suliaqarnerannut atasumik aningaasartuutit, pisinnaatitaaffimmik piginnittumit akilerneqarnissaat pillugit Naalakkersuisut malittarisassanik aalajangersaasinnaapput.

  Imm. 2.  Imm. 1 malillugu akiliineq akiliutitut akileqquneqassaaq.

 

Kapitali 10

Nakkutilliineq, naalakkiuteqarneq aamma takornarianik sullissisinnaanermut akuersissutit atorunnaarsinneqarnerat

 

  § 24.  Takornarianik sullissisinnaanermut akuersissutinut, pisinnaatitaaffinnik piginnittunut, suliniutinut aamma pissutsinut inatsisartut inatsisaanni ilaatinneqartunut, Naalakkersuisut nakkutilliissapput.

  Imm. 2.  Nakkutilliinerup suliarineqarnissaa pillugu Naalakkersuisut malittarisassanik aalajangersaasinnaapput, matumani Kalaallit Nunaanni Namminersorlutik Oqartussat ataanni oqartussaasoq imaluunniit sullissivik sorleq nakkutilliinermik suliaqassanersoq ilanngullugit, imaluunniit nakkutilliinermik piginnaasaqarneq kommunalbestyrelsinut suliassiissutigineqarnissaa pillugu.

 

  § 25.  Pissutsit inatsisinik unioqqutitsisut iluarsineqarnissaat imaluunniit atorunnaarsinneqarnissaat pillugit pisinnaatitaaffimmik piginnittumut aamma allanut inatsisartut inatsisaanni matumani ilaatinneqartunut, Naalakkersuisut naalakkiummik nalunaaruteqarsinnaapput.

  Imm. 2. Pisinnaatitaaffimmik piginnittoq inatsisartut inatsisaat malillugu naalakkiummik malinnikkumanngippat, akuersissut inatsisartut inatsisaat manna malillugu atulersinneqartoq Naalakkersuisut utertissinnaavaat.

  Imm. 3.  Takornarianik sullissisinnaanermut akuersissutit utertinneqarnissaat pillugit Naalakkersuisut malittarisassanik aalajangersaasinnaapput.

 

  § 26.  Pisinnaatitaaffimmik piginnittup pisussaaffii qanoq annertutigissanersut imaluunniit pisinnaatitaaffinnik piginnittoq akuersissutip naanerata kingorna allakkut pisussaaffeqarnersoq pillugu, matumani pisinnaatitaaffimmik piginnittoq akuersissut malillugu suliniutit naammassineranni illunik, illuutinik il.il., pisinnaatitaaffimmik piginnittumit pilersinneqartunik, piiaassasoq, kiisalu iluarsaassissasoq, tamatumalu kingorna nakkutilliinermik assigisaanillu suliaqarnissaa ilanngullugit, Naalakkersuisut malittarisassanik akuersissummilu piumasaqaatinik aalajangersaasinnaapput.

  Imm. 2.  § 17 malillugu suliniutit pillugit pilersaarutip akuersissutigineqarnerani, imm. 1 malillugu pisinnaatitaaffinnik piginnittup pisussaaffiisa naammassineqarnissaannut qulakkeerinninniarluni piumasaqaatinik Naalakkersuisut aalajangersaasinnaapput, matumani qularnaveeqqusiinissaq pillugu. Pissutsit allanngornerisa tamanna pisariaqartilerpassuk, piumasaqaatit allanngortitat Naalakkersuisut aalajangersarsinnaavaat, matumani qularnaveeqqusiinerup allanngortinneqarnissaa pillugu.

  Imm. 3.  § 25, imm. 1 malillugu torersaanissamik naalakkiut pisinnaatitaaffimmik piginnittup naammassinngippagu, pisinnaatitaaffimmik piginnittup akiligassaanik akisussaaffianillu Naalakkersuisut suliniutit aallartissinnaavaat.

 

Kapitali 11

Pineqaatissiinerit

 

  § 27.  Akiliisitaanermik pineqaatissinneqarsinnaavoq:

1)  isumannaallisaanermut pilersaarummik takornarianut kalaallisut tuluttullu saqqumisitsinnginnikkut § 14, imm, 3-mik unioqqutitsisoq,

2)  tamatumunnga ingerlatsinissamut pilersaarummik Naalakkersuisut akuersiseqqaartinnagit ingerlatanik aallartitsinikkut § 17, imm. 1-imik unioqqutitsisoq,

3)  inuussutissarsiornermi akisussaanermut sillimmasersimannginnikkut allatulluunniit qularnaveeqqusiisimannginnikkut atugassarititaasunik § 15, imm. 1 naapertorlugu aalajangersarneqarsimasunik unioqqutitsisoq,

4)  paasissutissanik oqartussap il.il. pinngitsoorani pigisassaanik eqqunngitsunik paatsiveerussaataasinnaasunilluunniit tunniussinikkut § 6, imm. 1-imik unioqqutitsisoq,

5)  ingerlatat takornariartitsisarnermut akuersissummut ilaatinneqartut pillugit nalunaarummik Naalakkersuisunut nassiussinnginnikkut § 18, imm. 1-imik unioqqutitsisoq.

  Imm. 2.  § 3, § 4, imm. 5, § 6, imm. 2, § 15, imm. 3, § 16 aamma § 18, imm. 2 malillugit malitassani atulersinneqartuni, Kalaallit Nunaanni pinerluttulerinermi inatsimmi malittarisassat malillugit pineqaatissiinerit akiliisitsissutitut ilusillit aalajangersarneqarsinnaapput.

  Imm. 3.  Inatsisartut inatsisaat imaluunniit inatsisartut inatsisaat malillugu malitassat atulersinneqartut akiliisitsissutip aalajangerneqarnissaa periarfissaliissutigippagu, akiliisitsissut Kalaallit Nunaanni pinerluttulerinermi inatsimmi malittarisassat malillugit inatsisitigut pisinnaatitaasumut pisussaatitaasumullu akileqquneqarsinnaapput.

  Imm. 4.  Akiliisitsissutit, imm. 1-imiit 3 ilanngullugu malillugit aalajangersarneqartut, nunatta karsiata pissavai.

  Imm. 5.  § 6, imm. 1-ip, § 18, imm. 1-ip, imaluunniit § 3, § 4, imm. 5, § 6, imm. 2, § 15, imm. 3, § 16 aamma § 18, imm. 2 malillugit aalajangersakkat aalajangersarneqartut unioqqutinneqarneranni, Kalaallit Nunaanni pinerluttulerinermi inatsimmi malittarisassat malillugit arsaarinninneq pisinnaavoq. Arsaarinninneq nunatta karsianut iluanaarutitut pissaaq.

 

Kapitali 12

Atuutilersitsinermut- ikaarsaariartitsinermullu aalajangersakkat

 

  § 28.  Inatsisartut inatsisaat ulloq 1. januar 2025 atuutilissaaq.

  Imm. 2.  Sumiiffinni nunami aalajangersimasuni takornariartitsinermut akuersissuteqartarnissaq pillugu Inatsisartut inatsisaat nr. 19, 3. december 2012-imeersoq atorunnaarsinneqassaaq.

  Imm. 3.  Takornariartitsinermik suliaqarnermut akuersissutit, Inatsisartut inatsisaata atuutilernerani nalunaarutigineqartut, atuuttuussusertik attatiinnassavaat. Akuersissutinut taamaattunut Sumiiffinni nunami aalajangersimasuni takornariartitsinermut akuersissuteqartarnissaq pillugu Inatsisartut inatsisaat nr. 19, 3. december 2012-imeersumi maannamut malittarisassat atuuttut atuutissapput. 

  Imm. 4.  Inatsisartut inatsisaanni § 21, imm. 4, aamma § 22, imm. 2 malillugit procenti aaqqiissutissaq atorlugu naleqqussaaneq, siullerpaamik 1. januar 2026 pissaaq.

 

 

Namminersorlutik Oqartussat, ulloq 6. decembari 2024

 

 

Múte Bourup Egede (atsior.)

Naalakkersuisut Siulittaasuat