Akitsuut

 

  § 1.  Inini, ineeqqani, inissiani, illuni, containerini najugaqarfinni, illuaqqani, tuperni assigisaannilu akiliisitsilluni unnuisitsinermut akitsuummik akiliisoqassaaq.

  Imm. 2.  Akitsuut inummut Kalaallit Nunaanni najugaqanngitsumut unnuinermut ataatsimut 30 kr.-iuvoq.

  Imm. 3.  Imm. 1-imi unnuinermik taaneqartumik akiliisitsilluni neqerooruteqartoq, inatsit una naapertorlugu akitsuummik akiliisussaatitaavoq.

  Imm. 4.  Inuit Kalaallit Nunaanni najugallit akitsuummik akiliisussaatitaasup apeqquteqarneratigut Kalaallit Nunaanni najugaqarnermut uppernarsaammik pisariaqartumik takutitsisussaatitaapput.

 

  § 2.  Akitsuummik akiliisussap akiliutissamik akiliisitsinerup ilutigisaanik, akitsuut akileqquneqassaaq.

 

Ilaatinneqanngitsut

 

  § 3.  § 1 tulliuttuni atuutissanngilaq:

1)  Akitsuummik akiliisussap piffissamut akitsuusiiffiusumut tamakkiisumik akitsuummik akiliutaa 600 koruuninit ikinnerusimappata.

2)  Inummut suliffeqarfimmulluunniit ataasiinnarmut attartortitsinermi, attartorneq unnunnik 21-nik tulleriinnik sivisunerusimappat.

3)  Angallassisup silap ajornera, teknikikkut unammilligassaqarneq assigisaannilluunniit patsiseqartumik inuk illusisippagu, angallassisullu unnuinermut aningaasartuut akilerpagu. 

  Imm. 2.  Imm. 1, nr. 2-mi ilaatitsinnginneq suliffeqarfinnut attartortitsinermi atuutinngilaq matumani angalatitsiviit, angalanernik aaqqissuisartut il.il. attartortitseqqiisartut imaluunniit inunnut unnuiffissanik arlaatigut paasissutisseeqqittartut ilanngullugit, matumani inuk imaluunniit inuit inimik il.il. atuisut unnunnik 21-nik tulleriinnik sivisunerusumik unnuisimanngippata.

 

Aqutsineq

 

  § 4.  Piffissaq akitsuusiiffik tassaavoq qaammatit pingasukkaat.

  Imm. 2.  Piffissap akitsuusiiffiup kingorna qaammatip tulliuttup ulluisa aallaqqaataanni akitsuut akilerneqassaaq, qaammatip akiliiffissap qaangiuttup kingorna qaammatip ulluisa aallaqqaataat eqqorlugu kingusinnerpaamik akiliuteqartoqassalluni. Ulloq akiliiffissaq eqqortoq arfininngorneruppat, sapaataappat nalliuttuuppal­luunniit piffissarititaasoq ulluinnarmut tullermut sivitsorneqassaaq.

  Imm. 3.  Akileraartarnermut ingerlatsivimmut akiliuteqartoqassaaq.

 

  § 5.  Akitsuummik akiliisussaatitaasut piffissap akitsuusiiffiusup qaangiunnerata kingorna aamma kingusinnerpaamik qaammatip tulliuttup ulluisa qulinganni paasissutissat nassiutissavai, taakku akileraartarnermut ingerlatsiviup innersuussinera malillugu akileraartarnermut ingerlatsivimmut akitsuummik akiliisussaatitaasup kinaassusersinissaanut, qaammammi ataatsimi unnuinerit amerlassusiinut, inuit qassiunerinut akitsuutillu annertussusianik paasiniaanermut atorneqassapput. Paasissutissanik nassiussinissamut piffissaliussaq kingulleq arfininngorneruppat, sapaataappat nalliuttuuppal­luunniit piffissaliussaq ulluinnarmut tulliuttumut sivitsorneqassaaq.

  Imm. 2.  Nassiussinermi immersugassat akileraartarnermut ingerlatsiviup suliarinikuusai, matumani digitalisut ilusillit ilanngullugit, atorneqassapput.

  Imm. 3.  Akileraartarnermut Aqutsiveqarfik naatsorsueqqissaarnissamik siunertamut atugassanik paasissutissanik amerlanerusunik pissarsiniarsinnaavoq, matumani ilaatigut akitsuummik akiliisussap piginnaassusia aamma unnuisut nuna najugaat.

 

  § 6.  Neqerooruteqartartumut piffissaq eqqorlugu akiliisimanngitsumut Akileraartarnermut ingerlatsivik peqqusisinnaavoq, qaammatinit pingasunit sivikinnerusumik nalunaarsuinermik tunniusseqqullugu. Taamatut pisoqartillugu aningaasat § 3, imm. 1, nr. 1-imi taanneqartut piffissamut sivikillisamut naapertuuttumik appartinneqartassapput.

  Imm. 2.  Taamatuttaaq neqerooruteqartumut piffissaq eqqorlugu akiliinngitsumut Akileraartarnermut ingerlatsivik peqqusisinnaavoq, akiliinissamut piffissaliussaminngarnit § 4, imm. 2-mi taaneqartuminngarnit akiliinissamut piffissaliussaq sivikinnerussasoq.

 

  § 7.  Akitsuummik akiliisussaq paasissutissanik eqqunngitsunik nassiussisimasoq taamaalillunilu akitsuummut ikippallaanik akiliisimasoq paasineqassagaluarpat, aningaasat akiitsukkat kingusinnerpaamik ullut 14-it qaangiunneranni akilerneqassasut piumasaqaatigineqassapput, akiligassanik kingusinaartumik akiliinermi ernialiussaasinnaasut ilanngullugit.

  Imm. 2.  Akitsuummik akiliisussaq akitsuummut amerlavallaartunik akiliisimasoq paasineqarpat, aningaasat 300 koruunimik amerlanerusimappata utertillugit tunniunneqassapput.

 

Akitsuummik kommunit atuinerat

 

§ 8.  Akitsuummut akiliutigineqartut kommunini ataasiakkaani unnuinernik nalunaarsorneqartut amerlassusaannut sanilliullugit kommunit akornanni agguaanneqartassapput.

  Imm. 2.  Unnuinertut nalunaarsorneqartut amerlassusaat ukiumi ulloq 31. december akileraartarnermut ingerlatsivimmit naatsorsorneqartassapput.

  Imm. 3.  Akileraartarnermut ingerlatsiviup ukiup siuliini akitsuutit ukiup tulliuttup naanissaa sioqqullugu kommuninut akilertassavai. Aaqqissuussinermik allaffissornikkut aqutsinermut aningaasartuutinut matussutitut, ukiumut akiliutit katillugit 300.000 kr-nik appartinneqartassapput.

  Imm. 4.  Najukkami nunallu immikkoortuani takornariaqarnerup inerisarneranut unnuinermut akitsuummit isertitat kommunit taamaallaat atortassavaat, matumani sumiiffimmi takornariat amerleriarneranni kingunerisinnaasat pitsaanngitsut millisinnissaat ilanngullugu.

  Imm. 5.  Akitsuummit isertitat aamma aningaasartuutit akitsuummut matussusiisut, kommunip naatsorsuutaani allassimassapput.

 

Allaffissornikkut najoqqutassiat

 

  § 9.  Naalakkersuisut inatsimmik uannga ingerlatsinissaq pillugu erseqqinnerusunik maleruagassiorsinnaapput, matumani akitsuummik akiliisussap paasissutissanik nalunaaruteqarnissaa ilanngullugu.

  Imm. 2.  Naalakkersuisut uppernarsaatit, taakku nuutinnerinik akitsuummik akiliisussap toqqortarinninnissamut pisussaaffii aamma akitsuummik akiliisussamut illuutinik attartortitsisoq pillugu paasissutissiisussaatitaanera pillugit maleruagassanik aalajangersaasinnaapput.

Imm. 3.  Naalakkersuisut akitsuummik akilersinneqarnikuusumit isertitanit kommunit atuisarnerat aamma naatsorsuutinik tunniussisussaaneq pillugu maleruagassanik aalajangersaasinnaapput, § 8, imm. 4-5 naapertorlugit.

 

Pineqaatissiissutit

 

§ 10. Inuk akiligassiissummik pineqaatissinneqassaaq, piaaraluni imaluunniit sakkortuumik mianersuaalliorluni:

1)  paasissutissanik eqqunngitsunik imaluunniit salluliuutinik tunniussisoq imaluunniit akitsuutinik naatsorsuinermut tassanngalu nakkutilliinermut atugassanik paasissutissanik nipangiusseqqasoq, § 5, imm. 1 imaluunniit

2) akileraartarnermut ingerlatsivimmut akitsuutit aningaasartaannik taggissanik ikinaarilluni nalunaarutiginninngitsoortoq, missiliuussinikkut akitsuutit annertussusaannik taggissanik nalunaarfigineqareernermi kingorna kingusinnerpaamik sapaatit akunneri 4-t qaangiutsinnagit.

  Imm. 2. Maleruagassiani, inatsisit una naapertorlugu saqqummiunneqartuni, inummut maleruagassiani aalajangersakkanik piaaraluni imaluunniit mianersuaalliorluni unioqqutitsisumut akiliisitsinissaq aalajangersarneqarsinnaavoq.

  Imm. 3.  Ingerlatseqatigiiffiit il.il. (inatsisitigut pisinnaatitaasoq pisussaatitaasorlu) Kalaallit Nunaanni pinerluttulerinermut inatsimmi kapitali 5-imi malittarisassat malillugit pinerluttulerinikkut akisussaatinneqarsinnaapput.

 

  § 11.  Naalakkersuisut naalakkersuisulluunniit pisinnaatitaasoq, Inatsisartut inatsisaanni matumani aalajangersakkanik unioqqutitsisoq nalunaarfigisinnaavaat, suliaq eqqartuussivikkoortumik malersuinertaqanngitsumik aalajangiiffigineqarsinnaasoq, pineqartoq unioqqutitsinermi pisuusutut nassuerpat aamma piffissaliussap erseqqinnerusumik nalunaarneqartup qinnuteqarnikkut sivitsorneqarsinnaasup nallinnginnerani nalunaarpat, akiligassiissummik taaneqartumik nassuerutigineqartumik akiliiumappat.

  Imm. 2.  Nassuernermut imm. 1-imi taaneqartumut tunngatillugu, Kalaallit Nunaanni eqqartuussisarnermut inatsimmi kapitali 38-mi maleruagassat, unnerluussutip imarisaaniittut taamaaqataanik atuutissapput.

Imm. 3.  Akitsuut piffissaq eqqorlugu akilerneqassaaq, imaluunniit akuersissuteqarnerup kingorna akilersinneqarsimappat, malersueqqinnissaq atorunnaassaaq.

 

  § 12.  § 10 imaluunniit § 11 malillugu akiligassiissutigineqartut Nunatta Karsianut nakkartinneqartassapput.

 

Atuutilersitsineq

 

  § 13.  Inatsisartut inatsisaat ulloq 1. januar 2026-mi atuutilerpoq aamma ulloq taanna aallarnerfigalugu unnuinernut pissalluni.

 

 

Namminersorlutik Oqartussat, ulloq 25. novembari 2024

 

 

Múte Bourup Egede (atsior.)

Naalakkersuisut Siulittaasuat