Matumuuna nalunaarutigineqarput Sanaartorneq pillugu Inatsisartut inatsisaat nr. 13, 26. maaji 2010-meersoq, allannguutit ukunani pineqartut ilanngullugit Inatsisartut inatsisaat nr. 29, 13. Juuni 2023-meersoq.

 

Kapitali 1

Inatsimmi siunertaasut atuuffissaalu

 

  § 1.  Inatsisartut inatsisaata siunertarivaa:

1)  sanaartukkat ikuallattoornissaq, isumannaallisaaneq peqqinnissarlu eqqarsaatigalugit naammaginartumik toqqissisimanartunngorlugit sananeqarnissaasa ilusilerneqarnissaasalu qulakkeerneqarnissaa,

2)  sanaartukkat nunaminertallu sanaartorfiunngitsut sanaartukkanut atasut atuinissamut siunnerfigineqartoq eqqarsaatigalugu naammaginartumik pitsaassuseqalernissaasa aammalu illersorsinnaasumik aserfallatsaaliorneqarnissaasa qulakkeerneqarnissaa,

3)  sanaartukkat innarluutilinnut atoruminartunngorlugit ilusilersorneqartarnerisa siuarsarneqarnissaa,

4)  sanaartukkat ilusilersorneqarnermikkut pitsaassusiisa siuarsarneqarnissaat,

5)  iliuusissat, sanaartukkani isumalluutinik pisariaqanngitsumik atuinissamut pinaveersaarutaasussat siuarsarneqarnissaat,

6)  sanaartukkani atortut avatangiisinut ajoqutaanngitsut atorneqartarnerisa siuarsarneqarnissaat, kiisalu

7)  illuutinut inissianullu tunngasut ataqatigiissumik nalunaarsorneqartarnissaasa aqqutissiuunneqarnissaa qulakkiissallugu.

 

  § 2.  Inatsisartut inatsisaat atorneqassaaq:

1)  nutaamik sanaartornermi, sanaartukkamillu alliliinermi,

2)  inatsimmi aalajangersakkanut imaluunniit inatsit naapertorlugu aalajangersagaliarineqartunut naleqqiullugu sanaartukkami annertuumik allanngortiterinermi allatigullu allannguinermi,

3)  inatsimmi aalajangersakkanut imaluunniit inatsit naapertorlugu aalajangersagaliarineqartunut naleqqiullugu sanaartukkap atorneqarneranik annertuumik allannguinermi,

4)  sanaartukkamik ingutserinermi kiisalu

5)  sanaartukkami nukimmik atuinermut sunniuteqartussaalluni sanaartukkamik piusumik aserfallatsaaliuinermi, allanngortiterinermi allatigullu allannguinermi.

  Imm. 2.  Sanaartukkat tassaapput illut aammalu ilusilersukkat aalaakkaasut sanaartukkallu allat, inatsisip ilusilersukkanut aalaakkaasunut sanaartukkanullu atorneqarnerani inatsimmi isumagineqartussatut siunnerfigineqartussatut eqqarsaatigineqartunik tunngaveqarpata.

  Imm. 3.  Inatsimmi pineqartut tassaapput sanaartukkat, sanaartukkat qanga sananeqarsimanerat apeqqutaatinnagu aalajangersakkat ataasiakkaat imarisaanni tamatumunnga ersarissumik tunngaviliisoqarsimappat.

 

  § 3.  Inatsit manna aamma inatsit naapertorlugu aalajangersagaliaasut sanaartukkanut aalajangersimasunik ilusilinnut atuutissanngitsut imaluunniit ilaannaasumik atuutissasut illuliornermi malittarisassani aalajangerneqarsinnaavoq, tak. § 5. Tassani assersuutigalugu pineqarput ikaartarfiit, sulluliat, angallannermi sanaartukkat aamma imeqarfiit il.il.

 

Kapitali 2

Sanaartukkat aamma nunaminertat sanaartorfiunngitsut sanaartukkamut atasut suliarineqarnissaannut, ilusilerneqarnissaannut aserfallatsaaliorneqarnissaannullu piumasaqaatit

 

  § 4.  Sanaartugaq aatsaat atorneqalersinnaavoq:

1)  imermut eqqiluisaarnermi atoriikkamut avatangiisinik illersuinissamut inatsisimmut naapertuuttumik kuuffiliisoqarpat igitsinissamulluunniit aaqqissuussisoqarpat,

2)  imermik pilersuinermut inatsimmut naapertuuttumik imermik imigassamik pilersuisoqalerpat, kiisalu

3)  upalungaarsimanermut ikuallattoornissamullu inatsimmut naapertuuttumik qatserisinnaanermut isumannaatsumik periarfissaqalerpat.

  Imm. 2.  Sanaartornerup aallartinneqannginnerani imm. 1-imi piumasaqaatit naammassineqarsimanngippata, sanaartukkap atorneqalinnginnerani suliassat suliarineqarnissaannut qularnaveeqqusiinissaq kommunalbestyrelsip piumasarisinnaavaa.

 

  § 5.  Illuliornermi malittarisassanik Naalakkersuisut aalajangersaassapput, tassanilu maleruagassat inatsit manna malillugu aalajangersarneqassapput.

 

  § 6.  Illuliornermi malittarisassani sanaartukkat sananeqarnerinut ilusilersorneqarnerinullu maleruagassanik aalajangersaasoqarsinnaavoq, makku eqqarsaatigalugit:

1)  isumannaallisaanissaq, ikuallattoornissaq peqqinnissarlu eqqarsaatigalugit isumagineqartussat,

2)  teknikkimut atortulersuutit suliarineqarnissaat, tassunga ilaatinneqarlutik aalajangersakkat eqqiluisaarnermut teknikkimullu atortunik, kiisalu innarluutilinnut teknikkikkut ikiorsiissutinik aalaakkaasunik kingusinnerusukkut ikkussuisinnaanermut periarfissiisut,

3)  atuinissaq siunnerfigineqartoq eqqarsaatigalugu sanaartukkat najugaqarfissat naleqquttumik ilusilersorneqarnissaat,

4)  sanaartukkat inunnit innarluutilinnit atorneqarsinnaasunngorlugit sanaartukkanik kiisalu sananeqaatinik atortunillu aalaakkaasunik ilusilersuinissaq,

5)  anguniagassanik malitassanik, sanaartukkat sananeqaataannik, atortut sananeqaataannik pequtinillu assigiissaakkanik atuinissamut iluaqutaasunik atuinissaq,

6)  iliuusissat, sanaartukkani pioreersuni taamatullu nutaani nukimmik pisariaqanngitsumik atuinissamut pinaveersaartitsissutaasussat,

7)  sanaartukkat portussusissaasa annertussusissaasalu naatsorsorneqartarnerat, aammalu sanaartukkap taassumalu nunataata portussusissaannik aalajangersaasarneq,

8)  iliuusissat, sanaartukkani pioreersuni taamatullu nutaani aatsitassanik pisariaqanngitsumik atuinissamut pinaveersaartitsissutaasussat, taakkununnga atortunik sananeqaatinillu aalajangersimasunik atuinissamut, aamma atortunik atoqqiinissamut aalajangersakkat ilaatinneqarlutik, kiisalu

9)  iliuusissat, sanaartukkat atortulersuutaasalu ilaanni akunnaatsumik ingerlatsinissamut, aserfallatsaaliuinissamut nutarterinissamullu iluaqutaasinnaasut.

  Imm. 2.  Illuliornermi malittarisassani ininut suliffiusussanut maleruagassanut atatillugu, sulisut peqqissusaannut ilorrisimaarnissaannullu iliuusissat, soorlu isersimaartarfiit, nerisarfiit, atisaasiviit, atisaajartarfiit, perusuersartarfiit, errorfiit uffarfiillu, kiisalu sinittarfiit pequtillu suliarineqarnissaannut ilusilersorneqarnissaannullu aalajangersakkanik aalajangersaasoqassaaq.

  Imm. 3.  Illuliornermi malittarisassat sillimanissaq peqqinnissarlu eqqarsaatigalugit teknikkikkut atortulersuutinik ingerlatsinermut aserfallatsaaliuinissamullu maleruagassiortoqarsinnaavoq. Maleruagassat atortunut nutaanut pioreersunullu atuutissapput.

 

  § 7.  Illuliornermi maleruagassani nunaminertat sanaartorfigineqanngitsut sanaartukkanut atasut meeqqanit inersimasunillu naammaginartumik najorneqarsinnaasunngorlugit, aqqusinertigut qimanneqarsinnaasunngorlugit tikinneqarsinnaasunngorlugillu, qatserisartut annaassiniarnissaannut aammalu biilit uninnissaannut periarfissaqartillugit angissusissaat, atortussat ilusilersorneqarnissaallu pillugit aalajangersaasoqarsinnaavoq.

  Imm. 2.  Nunaminertat sanaartorfigineqanngitsut, imm. 1 naapertorlugu maleruagassiarineqartut tunngavigalugit atugassanngortinneqarsimasut akuerineqarsimasullu siunertarineqartut uniorlugit atorneqaqqusaanngillat. Sanaartukkami inatsisip atuutilernissaa sioqqullugu sananeqarsimasumi nunaminertanik sanaartorfiunngitsunik, imm. 1-imi siunertatut taaneqartunik naammassinninnissamut piukkunnaatilinnik peqarpat, taakku sanaartorfigineqarnissaannut imaluunniit siunertat pineqartut uniorlugit atorneqarnissaannut kommunalbestyrelsi akerliusinnaavoq.

  Imm. 3.  Sumiiffimmut pilersaarummi imaluunniit kommunimi pilersaarusiornermut malittarisassani imm. 1 naapertorlugu pissutsinut aalajangersaasoqarsimatillugu, maleruagassat imm. 1 naapertorlugu aalajangersarneqarsimasut atorneqassanngillat.

 

  § 8.  Illuliornermi malittarisassani sanaartukkat akunnerminni naammaginartumik ungasissuseqarnissaat qaammaqqusersorneqarnissaallu qulakkeerniarlugu, sanaartukkat portussusissaat aammalu taakku aqqusinernut sanaartukkanullu saniliusunut ungasissusissaat pillugu maleruagassanik aalajangersaasoqarsinnaavoq.

  Imm. 2.  Sumiiffimmut pilersaarummi imaluunniit kommunimi pilersaarusiornermut malittarisassani imm. 1 naapertorlugu pissutsinut aalajangersaasoqarsimatillugu, maleruagassat imm. 1 naapertorlugu aalajangersarneqarsimasut atorneqassanngillat.

 

  § 9.  Illuliornermi malittarisassani aalajangersakkani sanaartukkat makkua pineqartunut ilaasimanngippata, pisuni tamani ataasiakkaani inatsisini isumagisassatut siunnerfigineqartut eqqarsaatigalugit kommunalbestyrelsip piumasaqaatai malillugit sananeqartassapput:

1)  Sanaartukkat inillu anginerusut pisiniarfittut, allaffittut, suliffissuartut, sannavittut toqqorsivittullu atorneqartussat.

2)  Oqaluffiit, isiginnaartitsisarfiit, akunnittarfiit, paaqqinnittarfiit, napparsimmaviit, perorsaaviit, sanaartukkat ilinniartitsinermik, saqqummersitsinermik nuannaariartitsinermilluunniit siunertaqarfiusut, kiisalu sanaartukkat inilluunniit annerusut, inunnit amerlasuunit katersuuffigineqartartut.

 

  § 10.  Sanaartukkat, nunaminertat sanaartorfigineqarsimanngitsut sanaartukkamut atasut aammalu taamatullu ilusilerneqarsimasut naammaginartumik pitsaasuutinneqassapput, taamaalillutillu sanaartukkami najugaqartunut allanullu ulorianaateqassanngillat allatulluunniit annertuunik amigaateqassanatik. Sanaartukkat inissisimaffiat eqqarsaatigalugu pissusissamisoortumik pitsaassuseqartinneqarlutik aserfallatsaaliorneqassapput.

  Imm. 2.  Sanaartukkap qanga sananeqarsimanera apeqqutaatinnagu imm. 1-imi aalajangersagaq atuutissaaq.

 

  § 11.  Sanaartukkani nutaani kiisalu sanaartukkani pioreersuni innaallagissamik, imermik kiassarnermillu atuinermut immikkut uuttuusersuisoqarnissaa, kiisalu teknikkikkut atortorissaarutinik siunertamut pisariaqartinneqartunik suliaqartoqarnissaa pillugu Naalakkersuisut maleruagassiorsinnaapput.

  Imm. 2.  Uuttuutit immikkoortut atuinermik uuttuisarnermut tunngaviusutut atorneqassanersut, aammalu qanoq pisoqartillugu immikkut uuttuusiinissamut piumasaqaatinik saneqqutsisoqarsinnaassanersoq pillugu maleruagassanik Naalakkersuisut aalajangersaasinnaapput.

  Imm. 3.  Inissiami imaluunniit inuussutissarsiornermut immikkoortortami annaasaqarfiusinnaasumi inissisimaffeqartumi kiassarnermik atuinermut uuttuusiinermi, kissap annaasassap annertussusissaanut, aammalu sulianik taamaattunik suliaqarnissamut maleruagassani iluarsiisoqassanersoq pillugu maleruagassanik Naalakkersuisut aalajangersaasinnaapput.

 

  § 12.  Allanngortiterinissamut imaluunniit allanngortitsinissamut pilersaarutaasoq illuliorfiup tikikkuminassusaanut annertuumik pingaaruteqanngikkaluartoq, sanaartukkani pioreersuni allanngortiterinermut aamma allannguinernut allanut, illuliornermi malittarisassani, tak. § 5, tikikkuminassuseq pillugu aalajangersakkat atorneqassanersut Naalakkersuisut aalajangersaasinnaapput. Taakkununnga ilanngullugu suliassap pilersaarutaasup suliarineqarneranut sanaartornermi aningaasartuutit aamma aalajangersakkat malillugit tikikkuminassusissamut pitsannguinernut aningaasartuutit akornanni aningaasaqarnikkut ataqatigiittoqassanersoq, taamaalillunilu aningaasartuutit akornanni nikingasoqalinnginnissaanut qulakkeerisoqassanersoq pillugu Naalakkersuisut aalajangersaasinnaapput.

  Imm. 2.  Imm.1 malillugu maleruagassat aalajangersarneqartut sanaartukkami pioreersumi imatut immikkoortinneqarsinnaapput:

1)  Sanaartugaq tamanut ammasumik iserfigineqarsinnaasoq.

2)  Sanaartugaq inuussutissarsiornermi allaffissornermut sullissinermullu atorneqartoq.

 

Kapitali 3

Aqutsinermut aalajangersakkat

 

  § 13.  Suliassat § 2-mi pineqartut kommunalbestyrelsimit sananissamut akuersissummik pissarsisimatinnani aallartinneqaqqusaanngillat. Qinnuteqartup paasissutissanik qinnuteqaatip nalilersorneqarnerani pisariaqartinneqartunik tunniussinissaa pillugu kommunalbestyrelsi piumasaqarsinnaavoq. Sanaartukkamut suliami pissutsit tamarmik inaarutaasumik inissinneqanngikkaluartut sanaartugaq aallartinneqarsinnaasoq kommunalbestyrelsi naliliippat, sananissamut akuersissut immikkoortukkaarlugu agguarneqarsinnaavoq. Akuersissutip ullulerneqarneraniit ukioq ataaseq qaangiutsinnagu suliassat akuersissummi pineqartut aallartinneqarsimanngippata, akuersissut atorunnaassaaq. Sanaartugaq arlalinnik immikkoortulik aallartinneqarnerminiit ukiut marluk qaangiutsinnagit naammassineqarsinnaanngitsoq ilimagineqarpat, akuersissut suliamut immikkoortumut killilerneqassaaq.

  Imm. 2.  Illuliornermi malittarisassani inatsisit allat naapertorlugit qinnuteqaatigineqartumut akuersissutissatut pisariaqartinneqartut nalunaarutigineqarnissaat sioqqullugu kommunalbestyrelsip imm. 1 naapertorlugu nalunaaruteqarsinnaannginneranut aalajangersaasoqarsinnaavoq.

 

  § 14.  Suliat § 2-mut ilaatinneqartut kommunalbestyrelsi akuersiteqqaarnagu atorneqalissanngillat. Illuliornermi malittarisassani sanaartukkat naammassivinneqanngitsut atorneqarallarnissaannut aalajangersakkanik ilanngussisoqarsinnaavoq.

 

  § 15.  Illuliornermi malittarisassani akuersissutinut § 13, imm. 1-imi aamma § 14-imi taaneqartunut piumasaqaatinik sakkukinnerulersitsinissamut aalajangersakkanik ilanngussisoqarsinnaavoq, taakkununngalu ilaapput aalajangersakkat, sanaartukkanut aalajangersimasunik ilusilinnut piumasaqaatinik tamakkiisumik ilaannaasumilluunniit ilaatitsiviunngitsut.

 

  § 16.  Pissutsinik, inatsimmut matumunnga aammalu inatsit naapertorlugu peqqussusiarineqartunut uniuuttunik iluarsiinissaq sukkulluunniit sanaartukkamik piginnittup pisussaaffigaa. Aamma sanaartugaq inatsisit uniorlugit atorneqalerpat tamanna atuisup pisussaaffigissavaa.

  Imm. 2.  Piginnittoq atuisorluunniit, pissutsinik inatsisinik uniuiffiusunik iluarsiinissamik kommunalbestyrelsimit peqquneqarnermini malinninngitsoq, eqqartuussivitsigut aalajangiinikkut piffissap aalajangerneqartup iluani ingerlaavartunik akiliisussanngortinneqarluni pissutsinik iluarsiinissamut peqquneqarsinnaavoq. Akiliisitsissutit Nunap Karsianut tutsinneqassapput.

  Imm. 3.  Eqqartuussivitsigut aalajangiineq malillugu pissutsinik inatsisinik uniuiffiusunik iluarsiinissamut peqqussutitut nalunaarutigineqartoq piffissaq eqqorlugu naammassineqanngippat, aammalu akiliisitsissutissanik akiliisitsiniarneq peqqussutip naammassineqarnissaanik kinguneqartussatut isumaqarfigineqanngippat, kommunalbestyrelsip pisariaqartitsineq malillugu pissutsit piginnittumut imaluunniit atuisumut akiligassanngorlugit iluarsiiffigisinnaavai.

 

  § 17.  Sanaartukkap amigaateqarnera pissutigalugu najugaqartunut allanullu ulorianartorsiortitsisoqalissappat, sanaartukkap taassumalu avataani nunaminertat pisariaqartinneqartut malillugit assersorneqassasut inuerutsinneqassasullu kommunalbestyrelsip piumasarisinnaavaa. Assersuinissamut inuerutsitsinissamullu peqqussut erngerluni naammassineqanngippat, eqqartuussivitsigut aalajangiinikkut kommunalbestyrelsip tamanna piginnittumut akiligassanngorlugu naammassisinnaavaa.

 

Kapitali 3 a

Illuutinik Inissianillu Nalunaarsuiffik

 

  § 17 a.  Illuutinik Inissianillu Nalunaarsuiffik:

1)  sanaartukkanut tunngasunik, sanaartukkani inissianut tunngasunik kiisalu teknikkikkut atortuutinut il.il. tunngasunik tunngaviusunik paasissutissartaqassaaq,

2)  illuutit qaqugukkut sanaartorneqarsimanerat apeqqutaatinnagu illuutinut tamanut, matumani inissiat inuussutissarsiorfiillu kiisalu teknikkikkut atortuutit uuttuutillu il.il. nalunaarsuiffimmi nalunaarsorneqarsimasut ilanngullugit, ersarissumik nalunaarsuiffeqassaaq atortorissaarutit kiisalu

3)  pisortani oqartussaasunut, inuinnarnut suliffeqarfinnillu paasissutissanik takunnissinnaatitsissaaq.

 

  § 17 b.  Malittarisassat Naalakkersuisunit aalajangersarneqartut malillugit kommunip killeqarfiani Illuutinik Inissianillu Nalunaarsuiffik kommunalbestyrelsip ingerlatissavaa.

  Imm. 2.  Illuutinik inissianillu kiisalu teknikkikkut atortuutinik il.il. nalunaarsuinermi pisariaqartumik ersarissuutitsinissaq pitsaassutsikkullu pitsaasuutitsinissaq, piginnittullu nalunaarutigisaannik nakkutiginnissalluni kommunalbestyrelsip qulakkiigassaraa. Illuutinik Inissianillu Nalunaarsuiffimmi paasissutissat pissutsinut piviusunut naapertuutinngitsut kommunalbestyrelsip malugippagu, paasissutissat nutarterneqarnissaat kommunalbestyrelsip isumagissavaa.

  Imm. 3.  Piginnittut nalunaarsuiffimmut nalunaarutaannik qanoq nakkutilliisoqarnissaannut Naalakkersuisut malittarisassanik aalajangersaasinnaapput.

 

  § 17 c.  Pisortani oqartussaasoq alla imaluunniit ingerlatseqatigiiffik namminersortoq Illuutinik Inissianillu Nalunaarsuiffimmik tamakkiisumik ilaannakortumilluunniit pilersitsinissaanik, ingerlatsinissaanik ineriartortitsinissaanillu Naalakkersuisut piginnaatissinnaavaat. Oqartussaasoq imaluunniit ingerlatsivik nalunaarsuiffimmik qanoq pilersitsinissaanut, ingerlatsinissaanut ineriartortitsinissaanullu Naalakkersuisut malittarisassanik aalajangersaassapput.

 

  § 17 d.  Illuutinik Inissianillu Nalunaarsuiffimmi paasissutissat tulliuttut nalunaarsorneqassapput:

1)  sanaartukkat ataasiakkaat ilisarnaataat, ukioq sanaartorfiusoq, inissisimaffia, angissuseq, ilusaa, atortorissaarutit, teknikkimut tunngasut, nukimmik pilersuutit atorneqarneralu, kiisalu

2)  inissiat imaluunniit inuussutissarsiorfiit ataasiakkaat ilisarnaataat, ukioq sanaartorfiusoq, angissuseq, ilusaa, atortorissaarutit, nukimmik pilersuutit atorneqarneralu.

  Imm. 2.  sanaartukkanut tunngasunik, sanaartukkanilu inissianut tunngasunik kiisalu teknikkikkut atortuutinut il.il. paasissutissanik allanik, pisortani oqartussat suliaannut pingaaruteqarsinnaasunik imaluunniit inuiaqatigiinnut allatigut soqutiginaateqartunik nalunaarsuisoqarnissaannik Naalakkersuisut malittarisassanik aalajangersaasinnaapput.

  Imm. 3.  Nalunaarsuinissami paasissutissat naammattut eqqortullu qulakkeerumallugit Naalakkersuisut kommunalbestyrelsilu paasissutissaasivinni allani paasissutissanik, Illuutinik Inissianillu Nalunaarsuiffimmi paasissutissanut ataqatigiissitsisinnaapput.

 

  § 17 e.  Illuutinik Inissianillu Nalunaarsuiffimmik ingerlatsinermi paasissutissanik atugassanik pisortani oqartussat kiisalu illunik, sanaartukkanik il.il. nalunaarsorneqarsimasunik piginnittuusut paasissutissanik paasissutissiisarnissaannut Naalakkersuisut malittarisassanik aalajangersaassapput.

  Imm. 2.  Naalagaaffeqatigiinnermi oqartussaasut isumaqatiginninniarfigereernerisigut, illuutit teknikkikkullu atortorissaarutit il.il. Kalaallit Nunaanni naalagaaffeqatigiinnermi oqartussaasunit atorneqartartut pillugit paasissutissanik nalunaarsuisarnissamik Naalakkersuisut immikkut ittunik malittarisassiorsinnaapput.

 

  § 17 f.  Pisortani oqartussat Illuutinik Inissianillu Nalunaarsuiffimmi takunnissinnaanerinut kiisalu Namminersorlutik Oqartussat ataanni pisortat ingerlatsinerinut, kommunillu Illuutinik Inissianillu Nalunaarsuiffimmik atuisussaatitaanerinut Naalakkersuisut malittarisassanik aalajangersaassapput

  Imm. 2.  Illuutit, inissiat teknikkikkullu atortorissaarutit il.il. pillugit paasissutissanik nalunaarsorneqarsimasunik atuuttunik suliffeqarfiit namminersortut il.il. inuillu takunnissinnaanerinut, matumani paasissutissanik killilimmik takunnissinnaanermut, paasissutissanillu takunnissinnaanermut akiliutissat pillugit Naalakkersuisut malittarisassanik aalajangersaassapput.

 

Kapitali 4

Kommunimi akuersissuteqarneq

 

  § 18.  Suliassamik suliaqarnermini inatsit manna aammalu maleruagassat inatsit tunngavigalugu aalajangersarneqartut malinneqarnersut kommunalbestyrelsip nakkutigissavaa.

  Imm. 2.  Inatsit manna imaluunniit maleruagassat taaneqartut malillugit peqqussutit malinneqarnersut, aammalu akuersissutini imaluunniit immikkut ittumik akuersissutini piumasaqaatigineqartut malinneqarnersut kommunalbestyrelsip nakkutigissavaa.

  Imm. 3.  Kommunalbestyrelsip unioqqutitsisoqartoq paasiguniuk, pineqartumi pissutsit pingaaruteqanngitsut pineqanngippata, inatsisit malinneqarnissaat anguniassavaa.

  Imm. 4.  Akuersissummik pigisariaqartumik pissarseqqaarani sanaartukkap aallartinneqartup unitsinneqarnissaanik peqqusissuteqarneq § 23 malillugu maalaarutigineqarsinnaanngilaq, tamatumani suliaq siumoortumik akuersissuteqarfigineqartussatut pisariaqartitsiviunngitsoq pineqanngippat.

 

Eqqartuussivimmi aalajangiinertaqanngitsumik isersinnaaneq

 

  § 19.  Sanaartukkami inatsimmik imaluunniit inatsit malillugu aalajangersakkanik suliarineqarsimasunik piumasaqaatinillu saqqummiunneqartunik unioqqutitsisoqarsimanersoq misissorniarlugu kommunalbestyrelsi eqqartuussivimmi aalajangiinertaqanngitsumik sanaartukkamut isersinnaanissamik piumasaqarsinnaavoq.

  Imm. 2.  § 17 b malillugu nalunaarsuinermut atugassanik paasissutissanik pissarsiniarluni sanaartukkap silataanik takusaanissaq uuttortaanissarlu siunertaralugit, kommunalbestyrelsi eqqartuussivimmi aalajangiinertaqanngitsumik illunukarnissamik piumasaqarsinnaavoq. Paasissutissat piginnittup paasissutissiissutigissallugit pisussaaffigisaanni paasissutissanik annertuumik nikingasoqarneranik pasitsaassaqarnermi, kommunalbestyrelsi illup iluanut alakkaaniarluni uuttortaaniarlunilu eqqartuussivimmi aalajangiinertalimmik illumukarsinnaavoq.

  Imm. 3.  Kommunip nakkutilliinermut sulisui piumaffigineqarnermikkut kinaassutsimut uppernarsaammik takutitsissapput.

 

  § 20.  Inatsimmi tunngaviliineq naapertorlugu illuummut isernissamut, aammalu § 17 naapertorlugu assersuinissamut inuerutsitsinissamullu politiit kommunalbestyrelsimut ikiuutissapput.

 

  § 21.  Inatsit aammalu taanna tunngavigalugu aalajangersagaliarineqartut malillugit kommunalbestyrelsip aqutsinissaanut maleruagassat illuliornermi malittarisassani aalajangersarneqarsinnaapput.

  Imm. 2.  Aalajangersakkat sanaartukkanut maleruagassiarineqartut malillugit aqutsinermi kommunalbestyrelsip oqartussaasunut allanut suleqateqarnissaa pillugu aalajangersakkanik Naalakkersuisut aalajangersaasinnaapput.

 

Kapitali 5

Immikkut akuersissuteqarsinnaaneq

 

  § 22.  Inatsimmi aalajangersakkanik aamma inatsit malillugu aalajangersarneqarsimasunik saneqqutsinissamut immikkut ittumik akuersissuteqartoqarsinnaavoq, tamanna eqqarsaatigisassanut aalajangersakkani pineqartuni tunngavigineqartunut naapertuuttutut naliliiffigineqarpat.

  Imm. 2.  § 8-mi maleruagassat aalajangersarneqartut saneqqunneqarnissaannut immikkut akuersissutit aatsaat nalunaarutigineqarsinnaapput, sumut immikkut akuerineqarnissamik qinnuteqartoqarnersoq pillugu aammalu sapaatip akunneri pingasut qaangiutsinnagit oqaaseqaatit kommunalbestyrelsimut nassiunneqarsinnaanerat pillugu kommunalbestyrelsip sanaartukkamut pineqartumut saniliusunut ilisimatitsissuteqareerneraniit sapaatit akunneri pingasut ingerlareerpata.

  Imm. 3.  Sanaartornermi suliassamut immikkut akuersissuteqarfiusumut ukiut marluk qaangiutsinnagit akuersissummik tunniussisoqanngippat, immikkut ittumik akuersissut atorunnaassaaq. Sanaartornermi suliassaq immikkut ittumik akuersissuteqarfiusoq aallartinneqanngippat, immikkut ittumik akuersissut sanaartornerup aallartinnissaanut akuersissut ilanngullugu atorunnaassaaq, tak. § 13, imm. 1.

  Imm. 4.  Immikkut ittumik akuersissutit kommunalbestyrelsimit nalunaarutigineqassapput. Kommunalbestyrelsip immikkut ittumik akuersisarnermut oqartussaasutut sulinerat pillugu aalajangersakkanik Naalakkersuisut aalajangersaasinnaapput.

 

Kapitali 6

Maalaarutit

 

  § 23.  Apeqqutinut inatsisinik tunngaveqartunut tunngatillugu pissutsinut inatsimmi matumani pineqartunut tunngatillugu kommunalbestyrelsip aalajangiineri, taamaattorli tak. § 18, imm. 4, Naalakkersuisunut maalaarutigineqarsinnaapput.

  Imm. 2.  Kommunalbestyrelsip aalajangiineri allat aqutsinermi oqartussaasunut allanut maalaarutigineqarsinnaanngillat. Imm. 1 naapertorlugu Naalakkersuisut aalajangiineri aqutsinermi oqartussaasunut allanut maalaarutigineqarsinnaanngillat.

  Imm. 3.  Suliap inernissaanut annertuumik soqutigisaqartut ataasiakkaat kikkulluunniit kommunalbestyrelsip aalajangiineri pillugit maalaaruteqarsinnaapput.

 

  § 24.  Allamik aalajangiisoqarsimatinnagu ullormit aalajangiinerup tigusisussamut nalunaarutigineqarfianit sapaatit akunneri sisamat periarfissaritinneqarput.

  Imm. 2.  Kommunalbestyrelsip peqqussutaa pillugu maalaaruteqarneq naammassinninnginnissamut pisinnaatitaaffiliinngilaq. Taamaattorli maalaarut kinguartitsinissamut tunngavigineqassanersoq maalaaruteqarnermut oqartussaasut aalajangersinnaavaat.

 

  § 25.  Inatsit manna imaluunniit inatsit manna naapertorlugu peqqussusiaasimasut malillugit aqutsisoqarfimmi aalajangiinerit isummerfigitinniarlugit eqqartuussisulersuussinissat, ullormit aalajangiinerup pineqartumut nalunaarutigineqarfianiit qaammatit arfinillit qaangiutsinnagit suliakkiissutigineqassapput.

 

Kapitali 7

Akuersissutit piffissamut killilikkat piumasaqaateqarfiusullu

 

  § 26.  Inatsit manna naapertorlugu kommunalbestyrelsip akuersissutaa atuukkallartussatut, imaluunniit sanaartugaq immikkut ittumik iluseqarpat, sananeqarpat, inissisimaffeqarpat allatulluunniit issuteqartumik piffissamut killiliiffigineqarnissaa pisariaqarpat piffissamut aalajangersimasumut atuuttussatut nalunaarutigineqarsinnaavoq.

 

Kapitali 8

Akitsuutit

 

  § 27.  Inatsit naapertorlugu kommunalbestyrelsip qinnuteqaatinik suliaqarnissaanut akitsuutissat pillugit Naalakkersuisut maleruagassiussapput.

  Imm. 2.  § 6, imm. 3 aamma § 11 naapertorlugu iliuusissanut aallartinneqartussanut akitsuutissat pillugit Naalakkersuisut maleruagassiorsinnaapput.

 

  § 28.  Akitsuutit § 27-mi taaneqartut, aamma aningaasat kommunalbestyrelsip inatsit naapertorlugu siumoortumik naatsorsorsimasai illuutip qularnaveeqqusiissutigineqarneratigut akilersinniarneqarsinnaapput.

  Imm. 2.  Aamma akitsuutit aammalu imm. 1-imi aningaasartaliussat akilerneqanngitsut pisortanut akiitsut akilerneqanngitsut akilersinniarneqartarnerat pinngitsoortinniarneqarnerallu pillugit Inatsisartut inatsisaanni maleruagassat naapertorlugit akissarsianik il.il. ilanngaassisarnikkut akilersinniarneqarsinnaapput.

 

Kapitali 9

Pineqaatissiissutaasinnaasut

 

  § 29.  Akiliisussanngorluni pineqaatissinneqarsinnaavoq,:

1)  inatsisini maleruaqqusat imaluunniit inatsit tunngavigalugu peqqussutit suliarineqartut malillugit akuersissummik piniaqqaarani sanaartugassanik aallartitsisoq, sanaartukkamik atuilersoq imaluunniit iliuusissanik allanik aallartitsisoq, imaluunniit iliuusissanik allanik, oqartussaasumit pineqartumit akuerineqartumit allaanerusumik iliorluni siumoortumik akuersissummik piniaqqaarluni suliarineqartussamik aallartitsisoq,

2)  piumasaqaatinik inatsit malillugu akuersissummi aalajangersarneqartunik, imaluunniit inatsit naapertorlugu aalajangersakkanik suliarineqartunik unioqqutitsisoq,

3)  inatsit malillugu akuersissummi aalajangersarneqartut, imaluunniit inatsit naapertorlugu aalajangersakkanik suliarineqartut naapertorlugit peqqussummik imaluunniit inerteqqummik naammassinninngitsoq, imaluunniit

4)  aserfallatsaaliuinissamik, sanaartukkami najugaqartut allallu ulorianartorsiulernissaannut pinngitsuuiniarluni pisariaqartinneqartumik suliaqanngitsoortoq.

  Imm. 2.  Peqqussutini aalajangersakkanik unioqqutitsineq akiliisussanngortitsinermik kinguneqassanersoq, inatsit malillugu peqqussutini aalajangersarneqarsinnaavoq.

  Imm. 3.  Sanaartukkap suliarineqarnerani inatsisit malinneqarsimanngippata, sanaartukkamik isumaginnittuusoq imaluunniit suliaqartoq akiliisussanngortinneqarsinnaavoq, pissutsillu malillugit marluullutik akiliisussanngortinneqarsinnaapput. Suliassamik isumaginnittussanngortitsisoq taamaallaat akisussaatinneqarsinnaavoq, akiliisussanngortitsinermi akisussaatinneqartussamik allamik taasisinnaanngippat, imaluunniit pineqartup inatsisinut uniuuttuuneranik ilisimannilluni pasitsaassaqarsimalluniluunniit suleqataasimappat. Pissutsit malillugit inuit imm. 1-imi taaneqartut akisussaatinneqarsinnaapput.

  Imm. 4.  Inatsimmi imaluunniit peqqussutini inatsit malillugu aalajangersarneqartuni akiliisussanngortitsinissaq tunngavissaqarpat, pisinnaatitaallunilu pisussaatitaasoq Kalaallit Nunaanni pinerluttulerinermut inatsimmi maleruagassat malillugit akiliisussanngortinneqarsinnaavoq.

  Imm. 5.  Inatsit manna imaluunniit inatsit manna naapertorlugu peqqussutigineqartut malillugit akiligassanngortinneqartut Nunap Karsianut tutsinneqassapput.

 

Kapitali 10

Atuutilerfia

 

  § 30.  Inatsisartut inatsisaat 1. juli 2010 aallarnerfigalugu atuutilerpoq.

  Imm. 2.  Tamatuma peqatigisaanik pilersaarusiorneq aamma nunaminertat atorneqartarnerat pillugit Inatsisartut peqqussutaanni nr. 11-mi, 5. december 2008-meersumi §§ 33, 34 aamma 35 atorunnaarsinneqarput.

  Imm. 3.  Inatsisartut peqqussutaat imm. 2-mi taaneqartoq naapertorlugu maleruagassat piumasaqaatillu inatsimmi matumani maleruagassat aalajangersarneqartut tunngavigalugit taarserneqarnissamik atorunnaarsinneqarnissamillu tungaanut atuutiinnarallassapput.

 

  § 31.  Pituffimmi sakkutooqarfik inatsimmut matumunnga ilaatinneqanngilaq.

 

 

Inatsisartut inatsisaata nr. 29, 13. juni 2023-imeersup (Sanaartukkani piusuni nukimmik sipaarniarluni aaqqissuussinerit kiisalu nuna tamakkerlugu Illuutinik Inissianillu Nalunaarsuiffimmik IIN-imik pilersitsinissamut Naalakkersuisunut piginnaatitsisut)^[i] atuutsitsilernissamut aalajangersagaq una imaraa:

 

§ 3

 

Inatsisartut inatsisaat manna 2023-mi juulip aallaqqaataani atuutilissaaq.

  Imm. 2.  Kalaallit Nunaanni illunik inissianillu nalunaarsuisarneq pillugu GTO-mit kaajallaasitaq nr. 2.088 12. marts 1987-imeersoq, Sanaartorneq pillugu Inatsisartut inatsisaat naapertorlugu malittarisassatigut aalajangersarneqarluni allanngortinneqarnissaata imaluunniit atorunnaarsinneqarnissaata tungaanut atuutiinnassaaq.

 

 

 

Ineqarnermut Attaveqaasersuutinullu Naalakkersuisoqarfik, ulloq 13. november 2023

 

 

Ruth Lindhardt (atsior.)

Naalakkersuisoqarfimmi pisortaaneq

 

 

/ Embla Kristjánsdóttir (atsior.)