Matumuuna Siusinaartumik pensionisiat pillugit Inatsisartut inatsisaat nr. 40, 9. december 2015-imeersoq, Inatsisartut inatsisaanni nr. 19, ulloq 28. november 2016-imeersumi, Inatsisartut inatsisaanni nr. 40, 23. november 2017-imeersumi, Inatsisartut inatsisaanni nr. 6, 27. november 2018-imeersumi, Inatsisartut inatsisaanni nr. 28, 28. november 2019-imeersumi, Inatsisartut inatsisaanni nr. 6, ulloq 19. november 2020, Inatsisartut inatsisaanni nr. 7, 19. November 2021 allannguutitalinni nalunaarutigineqarpoq aamma Inatsisartut inatsisaata allanngortinneqarnissaanut siunnersuut nr. 9, 20. juuni 2022-mersooq.

 

Kapitali 1

Aalajangersakkat nalinginnaasut il.il.

 

  § 1.  Siusinaartumik pensionisianik pisartagaqarnissamut pisinnaatitaanermut, qinnuteqartup danskisut innuttaassuseqarnissaa piumasaqaataavoq.

  Imm. 2.  Tamatumanili atuutinngilaq:

1)  Inunnut Isumaginninnikkut isumannaallisaaneq pillugu Nunat Avannarliit isumaqatigiissutaanni pineqartunut.

2)  Inunnut qinnuteqarneq sioqqutilaarlugu sivikinnerpaamik ukiuni pingasuni Kalaallit Nunaani aalajangersimasumik najugaqarsimasunut.

 

  § 2.  Siusinaartumik pensionisiaqalerniarnermut piumasaqaataavoq, qinnuteqartup Kalaallit Nunaanni, Nunat Avannarliit arlaanni imaluunniit nunami EØS-ip isumaqatigiissutaanik akuersisimasumi aalajangersimasumik najugaqartuunissaa.

 

§ 3.  Siusinaartumik pensionisiaqalernissamut piumasaqaataavoq, 15-inik ukioqalernermiit aammalu maleruagassat atuuttut toqqammavigalugit utoqqalinermi pensionisiaqalernermiit sivikinnerpaamik ukiuni pingasuni Kalaallit Nunaanni, Danmarkimi Savalimmiuniluunniit aalajangersimasumik najugaqarsimanissaq.

 

  § 4.  Inatsisartut inatsisaanni matumani aapparisaq naatsorsuunneqartoq tassaavoq siusinaartumik pensionisiaqartup katissimallugu aapparisaa, nalunaarsukkamik aapparisaa, imaluunniit katissimanermut assingusumik sivikinnerpaamik ukiumi ataatsimi aapparisimasaa.

  Imm. 2.  Aappaasoq isumaginninnerup iluani ulloq unnuarlu angerlarsimaffimmut aaliangersimasumik najugalittut nuuppat, siusinaartumik pensionisiaqartoq kisimiittutut isigineqassaaq.

 

Kapitali 2

Pisartagalersinnaaneq katersisarnerlu

 

  § 5.  Inuit 18-inik ukioqalersimasut taamaattorli sulisinnaassutsimikkut timikkut tarnikkulluunniit innarlerneqarsimasut, siusinaartumik pensionisianik pisartagaqalersinnaatitaapput.

 

  § 6.  Siusinaartumik pensionisiat inunnut timimikkut imaluunniit eqqarsartaatsimikkut ataavartumik innarlerneqarsimasunut pisartagarilersinneqarsinnaapput.

 

  § 7.  Tamakkiisuusumik siusinaartumik pensionisiaqarsinnaatitaassagaanni, piffissami 15-inik ukioqalernermit siusinaartumik pensionisiaqalersinneqarneq sioqqullugu Kalaallit Nunaanni, Danmarkimi Savalimmiuniluunniit sivikinnerpaamik piffissap 5/6-ani najugaqarsimanissaq piumasaqaataavoq. Tamakkiisuusumik siusinaartumik pensionisiaqalernissamut piumasaqaat eqqortinneqarsimanngippat, siusinaartumik pensionisiat aningaasartaasa amerlassusiat piffissap najugaqarfiusimasup aamma 15-inik ukioqalernermit pensionisiaqalersinneqarneq sioqqullugu piffissap 5/6-ia tunngavigalugit aalajangersarneqartassapput.

 

Kalaallit Nunaata, Danmarkip imaluunniit Savalimmiut akornanni kommuninut nuunneq

 

  § 7 a.  Innuttaasoq Kalaallit Nunaanni kommunimiit Danmarkimi imaluunniit Savalimmiuni kommunimut nuuppat, aamma innuttaasoq Inatsisartut inatsisaat una naapertorlugu siusinaartumik pensionisianik pisartagaqarpat, kommune qimanneqartoq paasissutissanik attuumassuteqartunik kommunimi nuuffigisami pensionisianik suliaqarnermi atorneqartussanngorlugit kommunimut nuuffigineqartumut avitseqatiginnissaaq.
  Imm. 2.  Suliamut paasissutissat attuumassuteqartut qallunaatuumut nutsertinneqarnerannut aningaasartuutit kommunimit qimanneqartumit akilerneqassapput.

 

  § 7 b.  Siusinaartumik pensionisianik pisartagaqartoq Kalaallit Nunaanni kommunimiit Danmarkimi imaluunniit Savalimmiuni kommunimut nuuppat, kommunimi nuuffigineqartumi annikinnerpaamik imaluunniit akunnattunik siusinaartumik pensionisianik pisartagaqartup siusinaartumik pensionisiani qaammatit 12-t tikillugit attatiinnarsinnaavai.

  Imm. 2.  Piffissami imm. 1-imi taaneqartumi siusinaartumik pensionisiat akuerineqartut nalilersorneqaqqissanngillat allanngortinneqarlutilluunniit.
  Imm. 3.  Siusinaartumik pensionisianik pisartagaqartoq qaammatit siulliit 12-it iluanni kommunimi nuuffigineqartumi siusinaartumik pensionisianik pisartagaqalernissaminik akuerineqarpat, Kalaallit Nunaanni kommunimit siusinaartumik pensionisiat akuerineqartut atorunnaarsinneqassapput.
  Imm. 4.  § 33-mi, imm. 1 naapertorlugu siusinaartumik pensionisianik pisartagalik kommunimi nuuffigineqartumi siusinaartumik pensionisianik pisartagaqalernissaminik akuerineqaruni, Kalaallit Nunaanni kommunimut qimanneqartumut nalunaaruteqarnissaminut pisussaaffeqarpoq.

 

  § 7 c.  Danmarkimiit siusinaartumik pensionisianik pisartagallit aamma Savalimmiuniit qaffasinnerpaanik siusinaartumik pensionisianik pisartagallit sulisinnaassuseqanngitsut imaluunniit annikitsuinnarmik sulisinnaassusillit nunatsinnut nuukkaangamik Kalaallit Nunaanni kommunimi nuuffigisaminni ingerlaannartumik qaffasinnerpaanik siusinaartumik pensionisianik pisartagaqalersinneqassapput.

 

Kapitali 3

Qulaajaanermik ingerlatsineq aamma piginnaanngorsaqqiineq

 

  § 8.   Qinnuteqartoq sulisinnaassutsimi ilaanik suli pigisaqaqqilersinnaanersoq paasiumallugu, siusinaartumik pensionisiaqalersitsinissap isummerfiginnginnerani periarfissat suliamut attuumassuteqartut tamarmik misissorneqassapput.

  Imm. 2.  Siusinaartumik pensionisiaqarnissamik qinnuteqartut tamarmik qulaajaaffigineqassapput. Qulaajaanermi qinnuteqartup isumalluutai misissuiffigineqassapput, qinnuteqartullu piginnaanngorsaqqinnermik ingerlataqarnermigut sulisinnaassutsini tamakkerlugu sulisinnaassutsilluunniit ilaa angoqqissinnaaneraa aalajangiivigineqassaaq. 

  Imm. 3.  Qulaajaanernut piginnaanngorsaqqinnernulluunniit najuutinnginnermut aamma peqataannginnermut kinguneqartitsinissat pillugit malittarisassanik erseqqinnerusunik Naalakkersuisut aalajangersaasinnaapput.

 

  § 9. Sulisinnaassuseq inuup pineqartup immikkut suliniuteqarfigineqarneratigut ineriartortinneqarsinnaasoq kommunalbestyrelsip qulaajaasoqarneranut atatillugu nalilersimappagu, taava kommunalbestyrelse tamanna pillugu aalajangiissaaq qinnuteqartorlu piginnaanngorsaqqinnissamut innersuullugu.

  Imm. 2.  Inummut ataatsimut naleqqussakkamik piginnaanngorsaqqinnissamik ingerlatsineq aqqutigalugu sulisinnaassuseq massakkuugallartoq ineriartortinneqarsinnaanngitsoq kommunalbestyrelsip nalilerpagu, taava paasissutissat tigummineqareersut tunngavigalugit piginnaanngorsaqqinnermik ingerlatsinerup kinguartinneqarnissaa aamma siusinaartumik pensionisiaqartitsinissaq pillugu kommunalbestyrelse aalajangiissaaq. Piginnaanngorsaqqinnermik ingerlatsinissap kinguartinneqarnissaa pillugu aalajangiinerup kingorna, kingusinnerpaamik ukiup 1-p qaangiunnerani, kommunalbestyrelsip suliaq nalilersoqqissavaa.

  Imm. 3.  Qinnuteqartoq sulisinnaassuseqanngitsoq, piffissamilu ungasinnerusumi sulisinnaassutsiminik ineriartortitsisinnaanngitsoq qulaajaanermut atatillugu uppernarsarneqarpat imaluunniit immikkorluinnaq pissutsit takutissinnaapassuk, piginnaanngorsaqqinnissaq ingerlanneqaqqaanngikkaluartoq siusinaartumik pensionisiaqartitsinissaq pillugu kommunalbestyrelse aalajangiisinnaavoq.

 

Kapitali 4

Siusinaartumik pensionisiaqarnermut maalaaruteqartarfik

 

  § 10.  Sulisinnaassuseq pillugu naliliinermut sumulluunniit attuumassuteqanngitsumik naammagittaalliuutinik qitiusumik suliaqartussanik siusinaartumik pensionisiaqarneq pillugu naammagittaalliuuteqartarfimmik Naalakkersuisut pilersitsissapput.

  Imm. 2.  Pensionisiaqarneq pillugu naammagittaalliuuteqartarfiup suleriaasissaanut naammagittaalliuuteqartarfiullu sulinissaanut, kiffartuussinikkut anguniagassaanut, piffissamilu atuuffiusumi naammagittaalliuuteqartarfiup siulittaasuanit innersuussisoqareerneratigut naammagittaalliuuteqartarfiup ilaasortaasa soraarsinneqartarnissaat pillugit kiisalu naammagittaalliuuteqartarfiup ilaasortaanik akissarsisitsisarnissaq pillugu Naalakkersuisut aalajangersaassapput.

 

  § 11.  Siusinaartumik pensionisiaqartitsisarneq pillugu maalaaruteqartarfik siulittaasoqassaaq inatsisilerituutut ilinniagaqarsimasumik, allanillu marlunnik ilaasortaqassalluni. Siulittaasoq aammalu ilaasortat ukiut sisamat atuuttussanngorlugit toqqarneqartassapput. Siusinaartumik pensionisiaqartitsisarneq pillugu maalaaruteqartarfiup suliffeqarnikkut, isumaginninnikkut, peqqissutsikkut, ilinniartitaanikkut aammalu nakorsaqarnikkut immikkut ilisimasaqartuussapput. Siusinaartumik pensionisiaqartitsisarneq pillugu maalaaruteqartarfimmi ilaasortat inuttut suliffeqarnikkullu immikkut ilisimasatik toqqammavigalugit toqqarneqartassapput.

 

Kapitali 5

Sulisinnaaneq pillugu naliliineq, nalileeqqinneq aalajangiinerlu

 

Sulisinnaassutsimik nalilersuineq

 

  § 12.  Qinnuteqaateqartup sulisinnaassusaa nalilersuiffigeriarlugu pineqartup tamakkiisumik sulisinnaassusiata procentia naatsorsorneqartassaaq.

 

Sulisinnaassuseq nalilersoqqittariaqarpoq

 

  § 13.  Siusinaartumik pensionisiaqartinneqarsimasut aammalu 60-it inorlugit ukiullit, sulisinnaassusiat ukiut tallimakkaarlugit nalilersuiffigineqaqqinneqarlutillu aalajangiivigineqartassapput.

  Imm. 2.  Siusinaartumik pensionisiaqartitsinermi akissaatit allanngortinneqaratik ingerlatiinnarneqassapput, tamatumani naliliiffigineqarsimappat pineqartup sulisinnaassusia allannguuteqarsimanani siusinaartumik pensionisiaqarnissamut tunngavigineqarsimasut allannguuteqarsimanngitsut.

  Imm. 3.  Nalilerneqarsimappat innuttaasup sulisinnaassusia malunnaateqarluartumik allannguuteqarsimasoq, taava siusinaartumik pensionisiaqartitsisarnermi pisartagaritinneqartut annikillisillugilluunniit qaffasinnerusunngorlugit aaqqiivigineqarsinnaapput.

  Imm. 4.  Nalilerneqarsimappat innuttaasup siusinaartumik pensionisiaqartinneqarnissaminut piumasaqaatigineqartut naammassisinnaajunnaarsimagai, taava siusinaartumik pensionisiaqartitsisarneq unitsinneqassaaq.

  Imm. 5.  Innuttaasoq § 9 imm. 3-mut pineqartunut ilaappat, sulisinnaassutsip naliliiffigineqaqqinnissaa pinngitsoorneqarsinnaavoq.

  Imm. 6.  Sulisinnaassuseq pillugu isumasiuinissamik aamma sulisinnaassutsip procentikkaartumik aalajangiivigineqarnissaanut tunngavissanik, sulisinnaassutsillu nalilerneqarnissaanut nalilersoqqinneqartarnissaanullu Naalakkersuisut malittarisassanik ersarinnerusunik aalajangersaassapput.

 

Uppernarsaatit aalajangiinerlu

 

  § 14.  Piginnaanngorsaareernerup naammassereernerani §§ 12 aamma 13 naapertorlugu sulisinnaassutsip naliiffigineqarnera nalilersoqqinneqarneralu kommunalbestyrelsimit suliarineqassaaq, taamaattoq tak. § 9.

  Imm. 2.  Kommunalbestyrelsi makku tunulequtaralugit aalajangiissaaq:

1)  Nassuiaat, pineqartup ilinniagaqarnerup suliaqarnerullu tungaatigut piginnaasaanik unammilligassaanillu allaatigisaqartoq kiisalu pineqartup sulisinnaassusaa pillugu ineriartortitsinissaq annertusaanissarlu suliniutinik kommunalbestyrelsi aallarnisaasimappat allaatiginnittumik.

2)  Nassuiaat, pineqartup sulisinnaassusaata ataavartumik annikillisimaneranik sunik tunngaveqarnersoq allaatiginnittumik.

  Imm. 3.  Suut uppernarsaatissatut tunngavigineqassasut pillugit Naalakkersuisut malittarisassanik ersarinnerusunik aalajangersaasinnaapput.

 

Kapitali 6

Pensionisiaqartitsinerit annertussusaat

 

  § 15.  Siusinaartumik pensionisiaqartitsisoq annikinnerpaamik pisartagarineqarsinnaasoq, qinnuteqaateqartut sulisinnaanera 51%-imiit 75% tikillugu annertussuseqarsimassappat.

  Imm. 2.  Imm. 1 naapertorlugu siusinaartumik pensionisiassat annikinnerpaat ukiumut tassaapput § 17, imm. 2 naapertorlugu siusinaartumik pensionisiat annerpaartaasa affaat.

  Imm. 3.  Siusinaartumik sulisinnaajunnaarnersiuteqarnermi pisartakkat appartinneqassapput, siusinaartumik sulisinnaajunnaarnersiuteqartoq aammalu taassuma aapparisaata ukiumoortumik isertitarisaat, tamatumani ilanngunnagit siusinaartumik sulisinnaajunnaarnersiutit, utoqqalinermi pensionisiat aammalu Nunani Avannarliit akornanni isumaginninnikkut Isumaqatigiissut naapertorlugu 28.000 kr.-it sinnerpatigit ilanngullugit § 17, imm. 2 naapertorlugu siusinaartumik sulisinnaajunnaarnersiutit annertunerpaat affaatut tunniunneqartartut. Aapparisaqarsimagaanni taassuma isertitai siulliit 100.000 kr.-it ilanngunneqassanngillat.

  Imm. 4.  Siusinaartumik pensionisiat annikinnerpaat §§ 20 aamma 21 naapertorlugit isertitatigut tunngaviit affaannik ikilisinneqassapput, § 17, imm. 2 naapertorlugu siusinaartumik pensionisiat annerpaartaasa affaat ilanngullugit 28.000 kr.-it ilanngaatigalugit.

 

  § 16.  Akunnattumik siusinaartumik pensionisiaqartitsisoqassaaq qinnuteqaateqartup sulisinnaassusia 26%-ip 50%-illu akornanni annertussusilerneqarsimappat.

  Imm. 2.  Imm. 1 naapertorlugu siusinaartumik pensionisiat akunnaatsumik annertussusillit ukiumut tassaapput § 17, imm. 2 naapertorlugu siusinaartumik pensionisiat annerpaartaasa 2/3-ii.

  Imm. 3.  Siusinaartumik sulisinnaajunnaarnersiutit appartinneqassapput siusinaartumik sulisinnaajunnaarnersiuteqartoq aammalu taassuma aapparisaata ukiumoortumik isertitai, tamatumani ilanngunnagit siusinaartumik sulisinnaajunnaarnersiutit, utoqqalinermi pensionisiat aammalu Nunani Avannarliit akornanni isumaginninnikkut Isumaqatigiissut naapertorlugu 28.000 kr.-it sinnerpagit ilanngullugit § 17, imm. 2 naapertorlugu siusinaartumik sulisinnaajunnaarnersiutit annertunerpaat pingasorarterutaatut tunniunneqartartut. Aapparisaqarsimagaanni taassuma isertitai siulliit 100.000 kr.-it ilanngunneqassanngillat.

  Imm. 4.  Siusinaartumik pensionisiat akunnattumik annertussusillit §§ 20 aamma 21 naapertorlugit 2/3-nik ilanngarneqassapput, § 17, imm. 2 naapertorlugu siusinaartumik pensionisiat annerpaartaasa pingajorarterutaannik ilallugit 28.000 kr.-inik ilanngarlugit.

 

  § 17.  Qaffasinnerpaamik siusinaartumik pensionisiaqartinneqassapput, innuttaasut 0 – 25%-ip akornanni sulisinnaassuseqartut.

  Imm. 2.  Siusinaartumik pensionisiat qaffasinnerpaaffiat ukiumut annertussuseqarput 124.340 kr.-it angullugit.

  Imm. 3.  Siusinaartumik pensionisiat apparneqassapput siusinaartumik pensionisiaqartoq aappaqarpallu taassuma aappaata ukiumut ataatsimut piffissami pineqartumi isertitaat siusinaartumik pensionisiat, utoqqalinersiat aamma pensionisiat Nunani Avannarlerni isumaginninnikkut sillimmasiisarnernik aaqqissuussinerit naapertorlugit 38.000 kr.-it qaangersimagaangatigit. Aappaqaraanni aapparisap isertitaani 100.000 kr.-it siulliit ilanngullugit naatsorsuunneqassanngillat

  Imm. 4.  §17, imm. 2 naapertorlugu, siusinaartumik pensionisiallit pisinnaatitaapput tunngaviusumik pensionisiani qaffasinnerpaamik siusinaartumik pensionit 50 %-iinik pisassallutik, aappaqarsimagunik aapparisaata piffissami pineqartumi tamakkiisumik isertitariunnagaasa annertussusii apeqqutaatinnagit. § 17, imm. 2 naapertorlugu, tunngaviusumik pensionisiat appartinneqassapput, siusinaartumik pensionisiallip ukiumut tamarmiusunik piffissami pineqartumi isertitaasa, siusinaartumik pensionisiat, utoqqalinersiat pensionisiallu Inunnut Isumaginninnikkut isumannaallisaaneq pillugu Nunat Avannarliit isumaqatigiissutaat malillugu akiliutigineqarsimasut, ilanngunnagit, 28.000 kr.-t, qaffasinnerpaamik pensionisiat 50 %-ii ilanngullugit, sinnerpatigit. § 15 imm. 4. Naapertorlugu, § 17, imm. 6 atorneqassanngilaq, appartitsisoqassaaq appasinnerpaamik siusinaartumik pensionisianut aningaasanut killiliussat assingi malillugit

  Imm. 5.  Siusinaartumik pensionisiallip sulisinnaassusia nalilersuiffigineqaqqissaaq, pineqartup pensionisiat saniatigut 80.000 kr.-ninik isertitaqarsimassappat. Qaffasinnerpaamik pensionisiaqarnera allanngortinneqassanngilaq pineqartup sulisinnaassusianik nalilersuiffigineqarnerani.

  Imm. 6.  §§ 20 aamma 21-ni taaneqartutut qaffasinnerpaamik pensionisiat 100 %-imik appartinneqassapput, isertitatigut toqqammaviusut 28.000 kr.-inik ilanngarlugit qaffasinnerusimassappata.

 

  § 18.  Procenti aaqqiissutissaq Kalaallit Nunaanni Naatsorsueqqissaartarfiup naatsorsugaa tunngavigalugu § 17, imm. 2 malillugu siusinaartumik pensionisiat amerlassusissaat aaqqiivigineqartassapput. Siusinaartumik pensionisiat qaammatini aqqaneq-marlunni kingullerni procentimut aaqqiissutissamut allannguutissatut naatsorsorneqartoq 1. julimeersoq tunngavigalugu aaqqiivigineqartassapput. Ukiumut ataasiarluni 1. januar aallarnerfigalugu atuuttussatut aaqqiisoqartassaaq.

  Imm. 2.  Akit il.il. pillugit nalilersuinerit annertussusaat 1. januarimiit toqqammavigineqalersussat pillugit Naalakkersuisut avammut nalunaaruteqartassapput.

 

  § 19.  § 17 naapertorlugu qaffasinnerpaamik siusinaartumik pensionisiaqartitsineq immikkut pisoqartillugu, naleqquttumik akissarsiaqarfiusumik suliffeqalernissamut piffissami ikaarsaarfiusumi, akuersissutigineqarsinnaavoq sivisunerpaamik ukiut ataasiakkaarlugit, naak siusinaartumik pensionisiaqartoq sulisinnaassutsimigut qaffasinnerpaamik siusinaartumik pensionisiaqarnissamut pisinnaatitsinngikkaluartoq. Tamanna immikkut pissutsini atuutissaaq najugaqarfigisami naleqquttumik akissarsiaqarfiusumik siusinaartumik pensionisiaqartoq suliffissaqartinneqanngippat. Siusinaartumik pensionisiaqartoq naleqquttumik suliffissarsisinnaanissaa imaluunniit suliffimmik naleqquttumik pilersitsinissaq ingerlaavartumik periarfissarsiuussissalluni kommunalbestyrelsip pisussaaffigaa.

  Imm. 2.  Suliffeqarnissamut periarfissaqartillugu kommunalbestyrelsi innersuussisassaaq. Siusinaartumik pensionisiaqartoq suliffimmut innersuunneqartumut suliffik tulluartuutillugu tigusisussaatitaavoq.

  Imm. 3.  Qaffasinnerpaamik siusinaartumik pensionisiaqartitsineq atorunnaassaaq qaffasinnerpaamik siusinaartumik pensionisiaqartitsinermut aallaqqaammut piumasaqaataasut eqquutsinneqarunnaarpata imaluunniit imm. 2 naapertorlugu suliffimmut innersuunneqartumut siusinaartumik pensionisiaqartoq itigartitsippat.

  Imm. 4.  Qaqugukkut suliffik tulluartuunersoq pillugu Naalakkersuisut malittarisassanik ersarinnerusunik aalajangersaasinnaapput.

 

Kapitali 7

Pensionit aningaasartaasa nalimmassartarneri, tunniussisarneq il.il.

 

Pensionit aningaasartaasa nalimmassartarneri

 

  § 20.  Siusinaartumik sulisinnaajunnaarnersiutit ukiut tamaasa 1. januaarimi aaqqiivigineqartassapput, tak. §§ 15-18.

  Imm. 2.  Siusinaartumik sulisinnaajunnaarnersiutit ataavartumik aaqqiivigineqartassapput isertarisat annertuumik allannguuteqarsimappata, tak. §§ 15-17. Allannguutit atuutilersinneqassapput isertitat allanngorneraniit qaammatip tulliuttumi aallaqqaataanniit atuutilersuimik.

  Imm. 3.  Siusinaartumik sulisinnaajunnaarnersiutit tunniunneqartalernerannit aammalu piffissami isertitarisat annertuumik allannguuteqarsimatillugit, siusinaartumik sulisinnaajunnaarnersiutit naatsorsorneqassapput isertitariligassatut naatsorsuutigineqartut toqqammavigalugit.

 

  § 21.  Siusinaartumik pensionisiaqartoq qitornartaarsimalluni sulinngiffeqarnermut atatillugu isertitami ilaanik annaasaqarpat, siusinaartumik pensionisiat piffissami sulinngiffeqarfiusumut nalimmassarneqassapput.

 

Paaqqinnittarfinni il.il. angerlarsimaffiup avataani inissisimagallarneq

 

  § 22.  Siusinaartumik pensionisiaqartoq paaqqinnittarfimmut il.il. angerlarsimaffiup avataanut inissinneqarallarpat tassanilu najugaqarneq pisortanit akilersorneqarpat, aamma siusinaartumik pensionisiaqartoq pilersuisussaatitaaffeqarpat imaluunniit angerlarsimaffimmut aningaasartuuteqarpat, siusinaartumik pensionisiat allannguuteqassanngillat.

 

Angerlarsimaffiup avataanut paaqqinnittarfinnut il.il. sivisunerusumik inissinneqarneq

 

  § 23.  Angerlarsimaffiup avataanut paaqqinnittarfimmut il.il. sivisunerusumik inissiisoqartillugu tassanilu najugaqarneq pisortanit akilersorneqarpat, qaammammi nuuffiusumi aamma qaammammi tulliuttumi siusinaartumik pensionisiat allannguuteqassanngillat, tamatumalu kingorna siusinaartumik pensionisiat qaffasinnerpaaffiisa 20 pct-ii tunniunneqartassapput.

 

Paaqqinnittarfimmiinnermi tapit il.il.

 

  § 24.  Siusinaartumik pensionisiaqartoq inissinneqartoq, tak. §§ 22-23, pissutsit ataasiakkaat nalilersuiffigineratigut inuttut tapeqartinneqarsinnaavoq. Meeqqanut tapisiaqartoqartillugu taakkununnga pisinnaatitaaffik allannguuteqassanngilaq.

  Imm. 2.  Siusinaartumik pensionisiaqartoq angerlarsimaffigisami avataani inissisimajunnaarpat, qaammatip tulliuttup aallaqqaataa aallarnerfigalugu siusinaartumik pensionisiat tunniunneqartarneri nanginneqassapput, tak. § 23.

 

Ilanngaassisarneq aamma nammineq akiliisarneq

 

  § 25.  Angerlarsimaffiup avataani inissisimanermi siusinaartumik pensionisianik tunniussisarneq pillugu, ilaatigut paaqqinnittarfinni il.il. inissisimanermi siusinaartumik pensionisianik ilanngaassisarneq pillugu, kiisalu isumaginninnermi ulloq unnuarlu angerlarsimaffimmi inissinneqarnermi nammineq isertitaqarneq pissutigalugu akiliisarneq ilanngullugu Naalakkersuisut malittarisassanik ersarinnerusumik aalajangersaassapput.

 

Kapitali 8

Tapisiat

 

Meeqqanut tapit

 

  § 26.  Siusinaartumik pensionisiallit meeqqanut 18-it inorlugit ukiulinnut pilersuisussaatitaasut meeqqat ataasiakkaarlugit tapisiaqaatigissavaat. Tapiutit tapiutigineqartassapput pilersuisussaatitaaneq toqqaannartumik pilersuinerunersoq imaluunniit meeqqanut akilersuutinik akiliisarnikkut eqquutsinneqarnersoq apeqqutaatinnagu.

  Imm. 2.  Pilersuisussaatitaaneq meeqqanut akilersuutinik akiliinikkut eqquutsinneqarpat, aningaasat meeqqanik akilersuutinik tigusisinnaatitaasumut il.il. meeqqanut kiisalu qitornavissiartaarnermi tapinut Inatsisartut peqqussutaanni malittarisassat naapertorlugit tunniuneqartassapput.

  Imm. 3.  Meeqqanut tapit siusinaartumik pensionisiaqartunut nunattalu avataanut nunassissimasunut tunniunneqartussaanngillat.

 

  § 27.  Meeqqanut tapit tunniunneqartarunnaassapput kinguliini patsisissaatitaasoq ataaseq arlallilluunniit eqquutsinneqarpata:

1)  Meeqqanik inuusuttunillu ikiorsiisarneq pillugu inatsisartut peqqussutaat malillugu meeraq angerlarsimaffiup avataanut inissinneqarsimappat imaluunniit pisortanit tamakkiisumik pilersorneqarpat,

2)  Meerarineqartoq ilinniagaqarnersiutisiaqarpat, matumani aamma sulilluni sungiusarnerup nalaani tamatumunnga malittarisassat malillugit pisartagaqarpat,

3)  Meerarineqartoq aapparminut, nalunaarsukkamik aapparminut meeqqamulluunniit nammineq pilersuisussaatitaalerpat.

 

  § 28.  Meeqqamut tapeq nalinginnaasumik meeqqanut tapip agguarneratigut naatsorsorneqarsimasoq qaammatikkaartumik ukiumoortumik aningaasanut inatsimmi aalajangiiffigineqarsimanera toqqammavigalugit tunniunneqartassaaq, takuulli imm. 3.

  Imm. 2.  Pilersuisut tamarmik siusinaartumik pensionisiaqartuusimappata, siusinaartumik pensionisialinnut tamanut meeqqamut ataatsimut tapisiaq ataaseq tunniunneqartassaaq.

  Imm. 3.  Siusinaartumik pensionisiaqartoq meeqqamut tapimik akiliisussanngortitaasimappat, allatut isikkoqartumik akiliuteqartarnissaq isumaqatigiissutigineqarsimanngippat ukiup affakkaartumik tapisiaq tunniunneqartassaaq.

  Imm. 4.  Meeraq pineqartoq siusinaartumik pensionisialimmi najugaqarsimassanngippat, aammalu siusinaartumik pensionisialik akiliuteqartarnissamut pisussaaffilerneqarsimappat, meeqqamut tapeq inersimasumut akisussaatinneqartumut tunniunneqartassaaq.

 

Inummut tapit

 

  § 29.  Inummut tapit kommunalbestyrelsimit akuersissutigineqartarput inuit ataasiakkaat pisariaqartitaat nalilersuiffigineqareernerisigut soorlu imaattut:

1)  ingerlaavartumik pisartakkatut sivisunerpaamik ukiumut ataasiakkaarlugit aalajangersarneqartunik, imaluunniit

2)  immikkut pisariaqartitat matussuserniarlugit ataasiarluni ikiorneqarneq, ilaatigut makkununnga:

a)  isarussat,

b)  atisat,

c)  pequtit,

d)  Kalaallit Nunaata iluani angalanermut aningaasartuutit naleqquttut, aamma

e)  ataasiaannarluni aningaasartuutit allat pisariaqartutut naatsorsuutigineqartut.

  Imm. 2.  Kalaallit Nunaata avataanut angalanerit ataasiartumik ikiorsiissutitut tunniunneqarsinnaanngillat.

  Imm. 3.  Inuttut tapit utertillugit akileqquneqarsinnaapput:

1)  illersorneqarsinnaanngitsumik aningaasanik aqutsinerlunneq pissutigalugu inuttut tapit tunniunneqarpata, imaluunniit

2)  siusinaartumik pensionisiaqartoq inuttut tapinik pisartagaqartoq kingusinnerusukkut aningaasanik piffissamut pineqartumut inuttut tapinik assinganik siunertaqartumik pissarsisimappat.

  Imm. 4.  Utertillugit akileeqqusineq aatsaat piumasarineqarsinnaavoq siusinaartumik pensionisiaqartumut tapinik aningaasaliissuteqarnermut atatillugu utertitsisussaatitaanermik ilisimatitsisoqarsimappat.

  Imm. 5.  Siusinaartumik pensionisiaqartumut Kalaallit Nunaata avataani aalajangersimasumik najugaqartumut inuttut tapit tunniunneqassanngillat.

  Imm. 6.  Inuttut tapit pillugit Naalakkersuisut malittarisassanik ersarinnerusunik aalajangersaasinnaapput.

 

Kapitali 9

Allaffissorneq

 

  § 30.  Inuit Kalaallit Nunaanni najugallit siusinaartumik pensionisianik, meeqqanut tapinik inuttullu tapinik qinnuteqaat kommunalbestyrelsimut tunniutissavaat. Inuit kommuneqarfiit killilersugaanerisa avataanni najugallit siusinaartumik pensionisianik, meeqqanut tapinik inuttullu tapinik qinnuteqaat Naalakkersuisunut tunniutissavaat

  Imm. 2.  Isumaginninnikkut isumannaallisaaneq pillugu Nunat Avannarliit isumaqatigiissutaat naapertorlugu siusinaartumik pensionisianik qinnuteqaat Naalakkersuisunut tunniunneqassaaq

  Imm. 3.  Inuup nammineerluni qinnuteqarsimanngitsup siusinaartumik pensionisiat pillugit kommunalbestyrelsi suliassamik aallartitsisinnaallunilu aalajangiisinnaavoq.

 

  § 31.  Siusinaartumik pensionisiliaqalernissamik pisinnaatitaaffeqalerneq pissaaq piumasaqaatit naammassineqareerpata aamma kommunalbestyrelsi siusinaartumik pensionisiaqalernissamik qinnuteqaammut akuersaartumik aalajangeereernerata kingorna qaammatip aallaqqaataani.

 

  § 32.  Inuit siusinaartumik pensionisiallit qinnuteqaqqaanngikkaluarlutik utoqqalinermi pensionisianik pisartagaqalissapput utoqqalinermi pensionisiaqalersinnaaneq naak taakkuninnga pisartagaqartinneqarnissaq qinnutiginngikkaluarlugu angusimagunikku, inatsit manna tunngavigalugu pisartagarineqartut tamarmik ingerlaannartumik unitsinneqassapput.

 

Kapitali 10

Paasissutissiisussaatitaaneq, siusinaartumik pensionisiat atorunnaarsinneqarnerat misissuinissamullu pisinnaatitaaffik

 

  § 33.  Siusinaartumik pensionisiallip kommuni imaluunniit Naalakkersuisut ilisimatittussaavai isertitatigut atugarisani allannguuteqarsimappata imaluunniit aningaasaqarniarnermi toqqammavigisat allannguuteqarsimappata, imatut paasillugu pisartagaqarsinnaanermut toqqammaviusut nalilersoqqinneqarnissaat pisariaqalersimasoq, soorlu pisartakkat unitsikkallartussanngortinneqarnerannik atorunnaarsinneqarnerannilluunniit kinguneqarsimasinnaallutik.

  Imm. 2.  Siusinaartumik pensionisiat tunniunneqartarnerat unitsinneqassaaq, pisartagaqartitsinermut toqqammaviusut atorunnaarsimassappata.

  Imm. 3.  Siusinaartumik pensionisiaqartinneqartup paasissutissiisussaatitaaneq sumiginnarsimaguniuk imm. 1 malillugu ilisimaarinninnini imaluunniit ilisimaarinnittariaqarnini naapertorlugu, eqqunngitsumik tunngaveqarluni siusinaartumik pensionisiassanik pissarsisarsimaguni, taava eqqunngitsumik tunngaveqarluni pissarsiarisimasani utertittussanngussavai. Tamatuma saniatigut kommunalbestyrelse pisinnaatitaavoq ingerlaavartumik pensionisiarineqartunit allaninngaanniit matussusiissalluni, tamatumanili pineqaratik meeqqanut tapisiat.

 

  § 34.  Kommunalbestyrelsip pisussaaffigivaa siusinaartumik pensionisiaqartitsisarnermi tunniunneqartartut nakkutigissallugit, tassuunalu nakkutigissallugu siusinaartumik pensionisiaqarnissamut pisartagaqartariaqanngitsut pissarsitinneqartannginnissaat.

 

Kapitali 11

Tunniussaqarneq

 

  § 35.  Siusinaartumik pensionisiat tapiusinnaasullu tunniunneqartassapput qaammatikkaartumik siumoortumik.

 

  § 36.  Kommunalbestyrelsip nalilerpagu siusinaartumik pensionisiaqartoq nammineq

aningaasaatiminik aqutsisinnaanngitsoq, aalajangiisoqarsinnaavoq siusinaarluni pensionisiat tunniunneqartarnerinik aqutsisoqarnissaa, uani ilaallutik inummut namminermut tapit aamma meeqqanut tapit tunniunneqarneri. Taamatut aalajangiinerup nassataraa, kommunalbestyrelsi aalajangiisinnaasoq inunnut ataasiakkaat pensionisiat tunniunneqartarnerannut atatillugu nalinginnaasumik maleruagassat ileqqullu atorneqartut avaqqullugit tunniussisarnissaminut, taamaasiornikkullu qulakkeerniarneqassasoq siusinaartumik pensionisiaqartup inuuniarnermini aalajangersimasumik akilertakkani akilertarlugillu saniatigut inuussutissaqarnissaminut akissaqartassasoq.

 

  § 37.  Siusinaartumik pensionisiaqarnissamut piumasaqaataasut eqqortinneqarunnaarpata pisartagaqartitsineq qaammatip tulliuttup naaneranit unitsinneqarnissaa kommunalbestyrelsimit aalajangiiffigineqassaaq. Tunniunneqartartunilli unitsitsineq, Kalaallit Nunaat qimallugu nuunnermi qaammatip nuuffiusup naanerani pisassaaq, tak. § 7 b, taamaattorli nunani avannarlerni nunamut allamut imaluunniit nunamut allamut EØS-imik isumaqatigiissummut atasumut piumasaqaatinik nuunnermi eqquutsitsisoqarsimappat unitsinneqassanngillat.

  Imm. 2.  Siusinaartumik pensionisiallip maqaasineqarluni nalunaarutigineqarneraniit qaammatit pingasut qaangiunneranni uumaneralu uppernarsarneqarsinnaanngippat pisartagaqartitsineq qaammatip tulliup aallaqqaataanit unitsinneqassaaq. Siusinaartumik pensionisiaqarneq atuukkunnaassaaq, siusinaartumik pensionisiaqarnerup unitsinneqarneraniit ukiup ataatsip qaangiunnerani siusinaartumik pensionisialik suli uumanersoq uppernarsarneqarsinnaanngippat. Taamatut pisoqarsimatillugu siusinaartumik pensionisiassat unitsitsigallarnerup nalaani pineqartussaagaluit tunniunneqanngitsoornissaat.

  Imm. 3.  Siusinaartumik pensionisiallip toqukkut qimagunneranut atatillugu aappaqarsimappat aapparisimasaanut siusinaartumik pensionisiat qammammi toqukkut qimaguffiusup naaneraniit qaammatit marluk tunniunneqassapput.

 

Kapitali 12

Ilanngaasiisinnaatitaaneq

 

  § 38.  Siusinaartumik pensionisiat akiligassanut allatulluunniit pinngitsaalisaasumik akiliisitsiniarnermi pisortanut akiligassaqartoqartillugu taamaallaat attuumassuserneqarsinnaapput.

 

Kapitali 13

Naamagittaalliuuteqarsinnaaneq

 

  § 39.  Inatsisartut Inatsisaat manna toqqammavigalugu kommunalbestyrelsimit aalajangiisimanerit inatsisartut peqqussutaat Inunnik Isumaginninnerup aqunneqarnera aaqqissuusaaneralu pillugit aalajangersakkat naapertorlugit Isumaginninnermi Maalaaruteqartarfimmut suliassanngortinneqarsinnaapput, taamaattorli takuuk imm. 2.

  Imm 2. §§ 12 aamma 13 malillugit sulisinnaassutsip naliliiffigineratigut naliliiffigeqqinneratigullu sulisinnaassutsimut procentip aalajangersaaffigineqarnera pillugu kommunalbestyrelsip aalajangiineri Siusinaartumik pensionisiaqarnermut maalaaruteqartarfimmut maalaarutigineqarsinnaapput. Aalajangiinermiit sapaatit akunnerisa 6 iluanni maalaarut Siusinaartumik pensionisiaqarnermut maalaaruteqartarfimmut tunniunneqassaaq.

  Imm. 3.  Siusinaartumik pensionisiaqartitsineq pillugu sulisinnaassutsip nalilerneqarneranut aamma pissutsit allat pillugit maalaarut imaqartoq, aallaaviatigut Siusinaartumik pensionisiaqarnermut maalaaruteqartarfimmit suliarineqassaaq

  Imm. 4.  Siusinaartumik pensionisiaqartitsisarneq pillugu maalaaruteqartarfimmit aalajangikkat, ingerlatsiveqarfinnut allanut suliassanngorteqqinneqarsinnaanngillat.

 

Kapitali 14

Aningaasalersuineq naatsorsuuserinerlu

 

  § 40.  Siusinaartumik pensionisianut, meeqqat tapiinut inuttullu tapinut aningaasartuutit kommuninit tamakkiisumik akilerneqartassapput, takuuk § 44.

  Imm. 2.  Siusinaartumik pensionisiallit kommunit agguataarnerisa avataani aalajangersimasumik najugaqartut pensionisiaannut, meeqqanut tapisiaannut inummullu tapisiaannut aningaasartuutit Nunatta Karsianit akilerneqartassapput.

  Imm. 3.  Siusinaartumik pensionisialinnut Kalaallit Nunaata, Danmarkip Savalimmiulluunniit avataanni aalajangersimasumik najugaqartunut, siusinaartumik pensionisianut aningaasartuutit Nunatta karsianit akilerneqartassapput.

  Imm. 4.  Inatsisartut peqqussutaannik aqutsinermut aningaasartuutit oqartussaasutut akisussaasumit akilerneqartassapput.

 

  § 41.  Qaammatit ukiup naanerata kingorna kingusinnerpaamik kvartalip siulliup qaangiunneraniit qaammatip ataatsip qanngiutinnginnerani kommunimi siusinaartumik pensionisianik pisartagaqartut pillugit kisitsisitigut paasissutissat kommunalbestyrelsip Naalakkersuisunut nalunaarutigissavai.

  Imm. 2.  Paasissutissat nalunaarutigineqartussat imarisassaat ilusilersorneqarnissaallu pillugit malittarisassat Naalakkersuisunit aalajangersarneqassapput.

 

Kapitali 15

Atuutilersitsinermi ikaarsaariarnermilu aalajangersakkat

 

  § 42.  Inatsisartut inatsisaat 1. juli 2016 atuutilerpoq.

  Imm. 2.  Peqatigisaanik siusinaartumik pensionisiat pillugit Inatsisartut peqqussutaat nr. 4, 7. maj 2007-imeersoq aamma Siusinaartumik pensionisiat pillugit Namminersornerullutik Oqartussat nalunaarutaat nr. 13, 27. juni 2007-imeersoq atorunnaarsinneqassapput.

 

  § 43.  Siusinaartumik pensionisialik inatsisip atuutsilernerani 60-nik ukioqalereersimanngitsoq, ukiut 5-t qaangiutsinnagit Inatsisartut inatsisaat manna toqqammavigalugu ukiut 5-t qaangiutsinnagit sulisinnaassutsiminnik naliliiffigineqartussaapput. Siusinaartumik pensionisialik inatsisip matuma atuutsilernerani 60-nik ukioqalereersimasoq imaluunniit § 9 imm. 3-naapertorlugu naliliiffigineqarsimaguni, nammineq aalajangiiffigisinnaavaa ilumut sulisinnaassutsini pillugu nalilersitsikkusunnerluni.

  Imm. 2. Siusinaartumik pensionisialik inatsisip atuutilerneraniit ukiut 5-t ingerlanerini sulisinnaassutsiminik nalilersuiffigineqarnikuunngitsoq, tak. imm. 1, ukiuni tulliuttuni siusinaartumik pensionisiaqarnermi pensionisianik qaffasinnerpaanik pisartagaqartinneqassaaq.

  Imm. 3.  Siusinaartumik pensionisialik inatsisip atuutilernerani 60-nik ukioqalereersimasoq, imaluunniit § 9, imm. 3 naapertorlugu inissisimasuusimasoq, § 17 naapertorlugu siusinaartumik qaffasinnerpaanik pensionisiaqaannassooq tamatumani kr. 80.000-it sinnerlugit saniatigut isertitaqarsimanngikkuni aammalu nammineerluni sulisinnaassutsini pillugu nalilersuiffigitinnissani kissaatigisimanngikkuniuk.

  Imm. 4.  Siusinaartumik pensionisiallit inatsisip atuutilernerani suli 60-nik ukioqalersimanngitsut, sulisinnaanertik pillugu nalilersuiffigineqarsimanngitsut siusinaartumik pensionisiaat imak annertussuseqarsinnaapput:

1)  siusinaartumik pensionisialik kisermaaq ukiumut 109.000 kr.

2)  siusinaartumik pensionisialik aappalik, tamatumanilu aapparisaq pisortanit pensionisiaqarsimanngippat ukiumut 109.000 kr.

3)  siusinaartumik pensionisialik aammalu inooqatigalugu aapparisaa siusinaartumik pensionisialik ukiumut 81.750,-.

4)  siusinaartumik pensionisialik utoqqalinermut pensionisialimmik inooqatigalugu aappalik ukiumut 71.286,-.

  Imm. 5.  Imm. 4-mi pisartakkat taaneqartut Nunatsinni Naatsorsueqqissaartarfiup pisiassat akii pillugit nalunaarsuisarnera (forbrugerprisindeks) naapertorlugu allannguutai naapertorlugit aaqqiivigineqartassapput. Siusinaartumik pensionisiat 3%-mik aaqqiivigineqartassapput, pisiassanut akit 3%-mik allannguuteqarsimagaangata. Aaqqiissuteqarneq pisassaaq tulliuttumi 1. januar-imiit, tamatumanimi aallaavigineqassammat 1. julimi nioqqutissat akiisa naatsorsorneqarneranni killiffigisaq.

  Imm. 6.  1. januarimi aqqiissutigineqartussat pillugit Naalakkersuisut avammut nalunaaruteqartassapput.

  Imm. 7.  Siusinaartumik pensionisiat appartinneqassapput siusinaartumik pensionisialik aapparisaaluunniit, saniatigut imak isertitaqarnerat pissutigalugu, tamatumanili pineqanngillat Nunani Avannarlerni Isumaginninnikkut sillimmatit pillugit Isumaqatigiissutit:

1)  Ukiumut 28.000 kr.-nit siusinaartumik pensionisialimmut kisermaamut.

2)  Aappariinnut ukiumut 42.000 kr.-nit, tamarmik siusinaartumik pensionisiaqarsimappata.

3)  Aappariinnut 42.000 kr.-nit arlaa siusinaartumik pensionisiaqarsimappat, aappaalu pisortanit pensionisiaqartinneqarsimanngippat.

4)  Aappariinnut 70.000 kr., arlaa siusinaartumik pensionisiaqarsimappat, aappaalu utoqqalinermut pensionisiaqarsimalluni.

  Imm. 8.  Siusinaartumik pensionisiat appaallatsinneqartassapput saniatigut isertitaqarneq apeqqutaatillugu, taavalu tunniunneqartarunnaassallutik isertitarisat ukunanit annertunerulersimassappata:

1)  Siusinaartumik pensionisialik kisermaaq ukiumut 180.000 kr.-nit.

2)  Siusinaartumik pensionisiallit aappariit tamarmik siusinaartumik pensionisiallit, 270.000 kr.-nit.

3)  Siusinaartumik pensionisialik aapparisaalu pisortanit pensionisiaqartinneqanngitsoq, aappariinnut ukiumut 270.000 kr.-nit.

4)  Siusinaartumik pensionisialimmut aapparisaa utoqqalinermut pensionisialik, aappariinnut ukiumut 300.000 kr.-nit.

  Imm. 9.  § 17, imm. 2 naapertorlugu, siusinaartumik pensionisiallit, taakku ilagalugit siusinaartumik pensionisiallit Inunnut Isumaginninnikkut isumannaallisaaneq pillugu Nunat Avannarliit isumaqatigiissutaannut ilaasut, siusinaartumik pensionisiat qaffasinnerpaartaasa 20 procentiinik pisassapput, aappaqarsimaguni aapparisaata piffissami pineqartumi isertitarisartagaat tamarmiusut apeqqutaatinnagit.

  Imm. 10.  Naalakkersuisut siusinaartumik pensionisiat pillugit isertitatigut killissarititat qanoq annertutigissanersut aalajangersaavigisassavaat.

  Imm. 11.  Imm. 4-8-mi pisartakkat qummullu killissarititat taaneqartut atorunnaassapput, siusinaartumik pensionisiaqartarnermut nalilersuineq isumannaarneqarsimappat, kingusinnerpaamillu inatsisip atuutilerneraniit ukiut 5-t qaangiunnerisigut.

 

  § 44.  Inatsisip atuutilereernerani ukiut tallimat ingerlanerini siusinaartumik pensionisianut meeqqanullu tapiissutinut aningaasartuutit affaat nunatta karsianit affaallu kommunimit § 26 naapertorlugu akilerneqassapput. § 29 naapertorlugu inummut tapinut aningaasartuutit kommunimit akilerneqassapput.

 

 

 

Inatsisartut inatsisaata nr. 19, ulloq 28. november 2016-imeersup (Inatsisip kalaallisut oqaasertaani § 31-mik iluarsiineq)^[i] atuutsitsilernissamut aalajangersagaq una imaraa:

 

§ 2

 

Inatsisartut inatsisaat ulloq 1. december 2016 atuutilissaaq.

  Imm. 2.  Piffissami ulloq 1. juli 2016-imiit Inatsisartut inatsisaata matuma atuutilersinneqarnerata tungaanut siusinaartumik pensionisiaqalernissamik qinnuteqarnermi, siusinaartumik pensionisiaqalernissamik pisinnaatitaaffeqalerneq pissaaq, qinnuteqarnermiit piumasaqaatillu naammassineqarnerannit qaammatip tulliata aallaqqaataanit.

 

Inatsisartut inatsisaata nr. 40, 23. november 2017-imeersup (Qaffasinnerpaamik siusinaartumik pensionisianik pisartagaqartunut tunngaviusumik pensionisiaqartarnerup atulersinneqarnissaa, siusinaartumik pensionisialinnut kapitali 7-imi ikaarsaarnissami aalajangersakkami pineqartunut 20 pct.-imut malittarisassap atulersinneqaqqinnissaa, angalanermi aningaasartuutit naleqquttut pillugit § 29, imm. 1-ip erseqqissarneqarnissaa aamma § 33, imm. 3, aamma § 36 inatsisip kalaallisut oqaasertaani naqqiineq)^[ii] atuutsitsilernissamut aalajangersagaq una imaraa:

 

§ 2

 

Inatsisartut inatsisaat atuutilissaaq ulloq 1. januar 2018.

 

Inatsisartut inatsisaata nr. 6, 27. november 2018-imeersup (Oqaatsitigut naqqiutit)^[iii] atuutsitsilernissamut aalajangersagaq una imaraa:

 

§ 2

 

Inatsisartut inatsisaat atuutilissaaq 1. december 2018.

 

Inatsisartut inatsisaata nr. 28, 28. november 2019-imeersup (Kalaallit Nunaanni, Danmarkimi Savalimmiunilu kommunit akornanni paasissutissanik paarlaasseqatigiittarneq, nuunnermi siusinaartumik pensionisianik qaammatini 12-ini attassiinnarnissaq, ingerlaannartumik qaffasinnerpaanik siusinaartumik pensionisianik pisartagaqalersitsineq)^[iv] atuutsitsilernissamut aalajangersagaq una imaraa:

§ 2

 

Inatsisartut inatsisaat ulloq 1. januar 2020-mi atuutilissaaq.

 

Inatsisartut inatsisaata nr. 6, 19. november 2020-imeersup (Qulaajaanerit, piginnaanngorsaqqiinerit, najukkani pissutsit pissutigalugit tapiissuteqartitsigallarnerit aamma Siusinaartumik pensionisiaqarnermut maalaaruteqartarfimmut maalaaruteqarsinnaaneq pillugu erseqqissaaneq)^[v] atuutsitsilernissamut aalajangersagaq una imaraa:

 

§ 2

 

Inatsisartut inatsisaat atuutilissaaq 1. januar 2021.

 

Inatsisartut inatsisaata nr. 7, 19. november 2021-imeersup (Inunnut nungullarsimasunut utoqqalinersiaqalernissamut ukiorititat 65-it, aaqqiinermi tunngaviusumik allannguineq)^[vi] atuutsitsilernissamut aalajangersagaq una imaraa:

 

§ 3

 

Inatsisartut inatsisaat manna inatsisartut inatsisaata saqqummiunneqarnerata aqaguani atuutilissaaq, aamma 1. januar 2021-miit atuutilissalluni.

  Imm. 2.  Naak § 1, nr. 1 malillugu utoqqalinersiaqartinneqarnissamut ukiorititanut piumasaqaatinik naammassinnissinnaanngikkaluarlutik, inuit utoqqalinersiaqartinneqarnissamik aalajangiiffigineqareersut utoqqalinersiaqarsinnaatitaanertik annaassanngilaat.

 

Inatsisartut inatsisaata nr. 9, 20. juuni 2022-mersooq (Utoqqalinersiaqartunut utoqqalinersiat toqqammaviusut qaffanneqarneri, siusinaartumik utoqqalinersiat qaffasinnerpaat qaffanneqarneri aamma ilanngaassinnginnermi aningaasat tigummiinnagassat qaffanneqarneri)^[vii] atuutsitsilernissamut aalajangersagaq una imaraa:

 

§ 3

 

 

 

 

Isumaginninnermut, Suliffeqarnermut Nunamullu Namminermut Naalakkersuisoqarfik

ulloq 28. september 2022

 

 

Lona Lynge (atsior.)

Naalakkersuisoqarfimmi pisortaq

 

 

/ Karen Kiær Jakobsen (atsior.)