Quppernerup imai iserfigikkit
Oqaatsit toqqakkit
Ujaasinermut uterit
Allaffissornikkut najoqqutassiat
28. apriilip 2023
Atuuttut

Tamanut nalunaarutiginninnermut malittarisassat

Naalakkersuisut suleriaasiat pillugu Namminersorlutik Oqartussat nalunaarutaat nr. 28, 13. juuli 2022-mersumi kapitali 9 naapertorlugu aalajangersarneqarput:

 

Kapitali 1

Atuuffii

 

1.1. Malittarisassat Inatsisartut inatsisaasa, Namminersorlutik Oqartussat nalunaarutaasa. Namminersorlutik Oqartussat inatsisinut nalunaarutaasa aamma suliassaqarfiit akimorlugit kaajallaasitat tamanut nalunaarutigineqarnerannut atuupput.

 

Kapitali 2

Inatsisartut inatsisai

 

2.1. Inatsisartut inatsisaannut siunnersuut Inatsisartunit akuerineqartoq atuutilersinnaanissamut, Naalakkersuisut Siulittaasuannit taassuma akuerineqarneraniit kingusinnerpaamik sapaatit akunnerisa 4-t qaangiunneranni aalajangersarneqartussaavoq, takuuk Inatsisartut Naalakkersuisullu pillugit Inatsisartut inatsisaanni § 30, imm. 1.

 

2.2. Inatsisartut inatsisaannut siunnersuut inaarutaasumik akuerineqarpat, Inatsisartut Allattoqarfiata siunnersuut Inatsiseqarnermut immikkoortortamukaallugu suliap ingerlanera aallartittussaavaa.

 

2.3. Siunnersuut atsiorneqareersoq Tamanut nalunaarutiginninnermut allakkanik nakkartitsisarfimmut (saqqummiussineq@nanoq.gl) pdf-nngorlugu elektroniskimik nassiunneqassaaq aammalu word-fil-it aamma ilanngunneqassallutik.

 

2.4. Pappialanngorlugu atsiugaq allaqqaarnera taamatuttaaq Inatsiseqarnermut immikkoortortamut tunniunneqassaaq, taassuma allaqqaarnerata toqqorsivimmiilernissaa isumagissallugu.

 

2.5. Inatsiseqarnermut immikkoortortap siunnersuut Nalunaarutinut najoqqutassiamut nuussavaa, normulerlugulu ullulissallugu aammalu Naalakkersuisut Siulittaasuanut aalajangersarneqartussanngorlugu siunnersuut saqqummiutissallugu.

 

2.6. Tamatuma kingorna Inatsiseqarnermut immikkoortortap Inatsisartut inatsisaat maannakkut aalajangersarneqareersoq tamanut nalunaarutiginninnermut nittartakkami nalunaarutigissavaa kiisalu uani Lovgivning.gl tamanut saqqummersissallugu.

 

Kapitali 3

Namminersorlutik Oqartussat nalunaarutai

 

3.1. Namminersorlutik Oqartussat nalunaarutai innuttaasunut atuutsinneqarsinnaanissaminnut, tamanut nalunaarutigineqarsimassapput.

 

3.2. Namminersorlutik Oqartussat nalunaarutaannut siunnersuutip Naalakkersuisunit akuerineqareernerani, siunnersuut akuerineqareersoq Naalakkersuisumit pineqartumit taassumalu naalakkersuisoqarfimmi pisortaaneranit atsiorneqassaaq.

 

3.3. Siunnersuut atsiorneqareersoq Tamanut nalunaarutiginninnermut allakkanik nakkartitsisarfimmut (saqqummiussineq@nanoq.gl) pdf-nngorlugu elektroniskimik nassiunneqassaaq aammalu word-fil-it aamma ilanngunneqassallutik.

 

3.4. Pappialanngorlugu atsiugaq allaqqaarnera taamatuttaaq Inatsiseqarnermut immikkoortortamut tunniunneqassaaq, taassuma allaqqaarnerata toqqorsivimmiilernissaa isumagissallugu.

 

3.5. Inatsiseqarnermut immikkoortortap siunnersuut Nalunaarutinut najoqqutassamut nuussavaa aammalu normulissallugu ullulissallugulu.

 

3.5. Tamatuma kingorna nalunaarutip tamanut nalunaarutiginninnermut nittartakkami nalunaarutigineqarnissaa kiisalu uani Lovgivning.gl tamanut saqqummersinneqarnissaa, Inatsiseqarnermut immikkoortortap isumagissavaa.

 

Kapitali 4

Namminersorlutik Oqartussat inatsisinut nalunaarutai

 

4.1. Namminersorlutik Oqartussat inatsisinut nalunaarutaat tassaavoq Namminersorlutik Oqartussat nalunaarutaat, inatsisip pingaarnerup aammalu inatsimmut pingaarnermut allannguutissatut inatsisit pisortatigoortumik ataatsimoortunngorlugu allanneqarneranik imaqartoq.

 

4.2. Namminersorlutik Oqartussat inatsisinut nalunaarutai Naalakkersuisunit akuerineqartussaanngillat aammalu Naalakkersuisumit pineqartumit atsiorneqartussaanatik. Namminersorlutik Oqartussat inatsisinut nalunaarutai allaffissornikkut atsiorneqassapput.

 

4.3. Siunnersuut atsiorneqareersoq Tamanut nalunaarutiginninnermut allakkanik nakkartitsisarfimmut (saqqummiussineq@nanoq.gl) pdf-nngorlugu elektroniskimik nassiunneqassaaq aammalu word-fil-it aamma ilanngunneqassallutik.

 

4.4. Pappialanngorlugu  atsiorsimasoq allaqqaarnera Inatsiseqarnermut immikkoortortamut tunniunneqassanngilaq.

 

4.5. Inatsiseqarnermut immikkoortortap siunnersuut Nalunaarutinut najoqqutassamut nuussavaa aammalu normulissallugu ullulissallugulu.

 

4.6. Tamatuma kingorna Namminersorlutik Oqartussat inatsimmut nalunaarutip tamanut nalunaarutiginninnermut nittartakkami nalunaarutigineqarnissaa kiisalu uani Lovgivning.gl tamanut saqqummersinneqarnissaa, Inatsiseqarnermut immikkoortortap isumagissavaa.

 

Kapitali 5

Suliassaqarfiit akimorlugit kaajallaasitat

 

5.1. Suliassaqarfiit akimorlugit kaajallaasitat tassaapput kaajallaasitat Naalakkersuisoqarfinnut imaluunniit Aqutsisoqarfinnut arlalinnut atuuttut.

 

5.2. Siunnersuut atsiorneqareersoq Tamanut nalunaarutiginninnermut allakkanik nakkartitsisarfimmut (saqqummiussineq@nanoq.gl) pdf-nngorlugu elektroniskimik nassiunneqassaaq aammalu word-fil-it aamma ilanngunneqassallutik.

 

5.3. Pappialanngorlugu atsiugaq allaqqaarnera taamatuttaaq Inatsiseqarnermut immikkoortortamut tunniunneqassaaq, taassuma allaqqaarnerata toqqorsivimmiilernissaa isumagissallugu.

 

5.4. Inatsiseqarnermut immikkoortortap kaajallaasitaq Nalunaarutinut najoqqutassiamut nuussavaa aammalu normulerlugulu ullulissallugu.

 

5.5. Tamatuma kingorna kaajallaasitap tamanut nalunaarutiginninnermut nittartakkami nalunaarutigineqarnissaa kiisalu uani Lovgivning.gl tamanut saqqummersinneqarnissaa, Inatsiseqarnermut immikkoortortap isumagissavaa.

 

Kapitali 6

Atuutilersitsinermut ikaarsaarnissamullu aalajangersakkat

 

 

6.1. Malittarisassat ulloq 10. september 2022 atuutilerput.

 

6.2. Peqatigissaanik tamanut nalunaarutiginninnermut malittarisassat 10. september 2022-meersut atorunnaarsinneqarput.

 

6.3. Malittarisassani makkunani aammalu Inatsisilioriaatsinut malittarisassani 1. november 2011-meersuni aalajangersakkat imminnut naapertuutinnginneranni, malittarisassani makkunani aalajangersakkat malinneqassapput.

 

 

Inatsisilerinermut immikkoortortaqarfik, ulloq 28. april 2023

 

 

Jógvan Svabo Samuelsen (atsior.)

Inatsisileriffimmi pisortaq

Atassuteqarnerit
Allanngortippaa