Naalakkersuisut suleriaasiat pillugu Namminersorlutik Oqartussat nalunaarutaat nr. 28, 13. juuli 2022-mersumi kapitali 9 naapertorlugu aalajangersarneqarput:

 

Kapitali 1

Atuuffii

 

1.1. Malittarisassat Inatsisartut inatsisaannut, Namminersorlutik Oqartussat nalunaarutaannut aamma suliassaqarfiit akimorlugit kaajallaasitanut siunnersuutit, kiisalu Namminersorlutik Oqartussat inatsisinut nalunaarutaannut missingiutit Inatsiseqarnermut immikkoortortami inatsisilerinikkut pitsaassutsinik isumannaarinissamut tunniunneqarneranni atuupput.

 

1.2. Aningaasanut inatsisinut aamma ilassutitut aningaasaliissutinut inatsisinut siunnersuut, ilanngullugit oqaasertaliussat ilusiligaanerat, malittarisassani pineqartunut ilaatinneqanngillat. Taakkua Aningaasaqarnermut Naalakkersuisoqarfiup ataaniipput.

 

1.3. Kommunini maleruaqqusanut siunnersuutit malittarisassani pineqartunut ilaatinneqanngillat. Taakkunani kommuninut maleruaqqusanut malittarisassat malinneqassapput.

 

Kapitali 2

Inatsisartut inatsisaannut siunnersuutit

 

Tunngaviusumik inatsisilerinikkut pitsaassutsinik isumannaarineq (siullermeertumik pitsaassutsinik isumannaarineq)

 

2.1. Tunngaviusumik inatsisilerinikkut pitsaassutsinik isumannaarinissamut Inatsiseqarnermut immikkoortortaq siunnersuutip tiguneraniit sapaatit akunnerini 4-ni piffissaqarpoq.

 

2.2. Tunngaviusumik inatsisilerinikkut pitsaassutsinik qulakkeerineq, siunnersuutip suliffiup iluani tusarniaassutigineqareernerata kingorna, kisianni siunnersuutip tamanut ammasumik tusarniaassutigalugu nassiunneqarnissaa sioqqullugu pissaaq.

 

Malitseqartitsilluni inatsisilerinikkut pitsaassutsinik isumannaarineq (aappassaannik pitsaassutsinik isumannaarineq)

 

2.3 Malitseqartitsilluni inatsisilerinikkut pitsaassutsinik isumannaarinissamut Inatsiseqarnermut immikkoortortaq siunnersuutip tiguneraniit sapaatit akunnerini 2-ni piffissaqarpoq.

 

2.4. Malitseqartitsilluni inatsisilerinikkut pitsaassutsinik isumannaarineq, siunnersuutip tamanut ammasumik tusarniaassutigineqareernerata kingorna, kisianni siunnersuutip Inatsisartut Allattoqarfianni Inatsisilerinermi Immikkoortortaqarfiani inatsisilerinikkut pitsaassutsinik isumannaarinissamut nassiunneqarnissaa sioqqullugu pissaaq.

 

Kapitali 3

Allannguutissatut siunnersuutit Naalakkersuisunit saqqummiunneqartut

 

Inatsisilerinikkut pitsaassutsinik isumannaarineq

 

3.1. Naalakkersuisut Inatsisartut inatsisaannut siunnersuutinut allannguutissatut siunnersuummik, Inatsisartuni suliarineqartussamik, saqqummiippata, allannguutissatut siunnersuut taanna Inatsiseqarnermut immikkoortortami inatsisilerinikkut pitsaassutsinik isumannaarinissamut nassiunneqassaaq.

 

3.2. Inatsisilerinikkut pitsaassutsinik isumannaarineq, allannguutissatut siunnersuutip Inatsisartunut  nassiunneqarnissaa sioqqullugu pissaaq.

 

3.3. Allannguutissatut siunnersuut taanna nukingiussassatut iluseqarpat, taakkua Inatsisilerinermut immikkoortortami salliutinneqassapput aammalu sapinngisamik sukkanerpaamik pitsaassusaat isumannaarneqassallutik.

 

Kapitali 4

Namminersorlutik Oqartussat nalunaarutaannut siunnersuutit

 

Tunngaviusumik inatsisilerinikkut pitsaassutsinik isumannaarineq (siullermeertumik pitsaassutsinik isumannaarineq)

 

4.1. Tunngaviusumik inatsisilerinikkut pitsaassutsinik isumannaarinissamut Inatsiseqarnermut immikkoortortaq siunnersuutip tiguneraniit sapaatit akunnerini 4-ni piffissaqarpoq.

 

4.2. Tunngaviusumik inatsisilerinikkut pitsaassutsinik qulakkeerineq, siunnersuutip suliffiup iluani tusarniaassutigineqareernerata kingorna, kisianni siunnersuutip tamanut ammasumik tusarniaassutigalugu nassiunneqarnissaa sioqqullugu pissaaq.

 

Malitseqartitsilluni inatsisilerinikkut pitsaassutsinik isumannaarineq (aappassaannik pitsaassutsinik isumannaarineq)

 

4.3. Malitseqartitsilluni inatsisilerinikkut pitsaassutsinik isumannaarinissamut Inatsiseqarnermut immikkoortortaq siunnersuutip tiguneraniit sapaatit akunnerini 2-ni piffissaqarpoq.

 

4.4. Malitseqartitsilluni inatsisilerinikkut pitsaassutsinik isumannaarineq, siunnersuutip tamanut ammasumik tusarniaassutigineqareernerata kingorna, kisianni siunnersuutip Naalakkersuisuni akuersissuteqarfigineqartussanngorlugu nassiunneqarnissaa sioqqullugu, pissaaq.

 

Kapitali 5

Suliassaqarfiit akimorlugit kaajallaasitanut siunnersuutit

 

5.1. Suliassaqarfiit akimorlugit kaajallaasitanut siunnersuutit, tassa imaappoq kaajallaasitat Naalakkersuisoqarfimmi imaluunniit Aqutsisoqarfinni arlalinni atuuttussat, Inatsiseqarnermut immikkoortortami inatsisilerinikkut pitsaassutsinik isumannaariffigineqassapput.

 

Tunngaviusumik inatsisilerinikkut pitsaassutsinik isumannaarineq (siullermeertumik pitsaassutsinik isumannaarineq)

 

5.2. Tunngaviusumik inatsisilerinikkut pitsaassutsinik isumannaarinissamut Inatsiseqarnermut immikkoortortaq siunnersuutip tiguneraniit sapaatit akunnerini 4-ni piffissaqarpoq.

 

5.3. Tunngaviusumik inatsisilerinikkut pitsaassutsinik isumannaarineq, siunnersuutip suliffiup iluani tusarniaassutigalugu nassiunneqarnissaa sioqqullugu pissaaq.

 

Malitseqartitsilluni inatsisilerinikkut pitsaassutsinik isumannaarineq (aappassaannik pitsaassutsinik isumannaarineq)

 

5.4. Malitseqartitsilluni inatsisilerinikkut pitsaassutsinik isumannaarinissamut Inatsiseqarnermut immikkoortortaq siunnersuutip tiguneraniit sapaatit akunnerini 2-ni piffissaqarpoq.

 

5.5. Malitseqartitsilluni inatsisilerinikkut pitsaassutsinik isumannaarineq, siunnersuutip suliffiup iluani tusarniaassutigineqareernerata kingorna, kisianni inaarutaasumik akuersissuteqarfigineqartussanngorlugu nassiunneqarnissaa sioqqullugu, pissaaq.

 

Kapitali 6

Namminersorlutik Oqartussat inatsisinut nalunaarutaannut missingiut

 

6.1. Namminersorlutik Oqartussat inatsisinut nalunaarutai, tassa imaappoq inatsisip pingaarnerup aamma inatsimmut pingaarnermut allannguutitut inatsisit pisortatigoortumik ataatsimoortunngorlugit allanneqarnerat, aamma Inatsiseqarnermut immikkoortortami pitsaassutsit isumannaarneqartussanngorlugit nassiunneqassapput.

 

6.2. Namminersorlutik Oqartussat inatsisaannut nalunaarutini aallaqqaasiut, ataatsimoortunngorlugu allanneqarnera nassuiaatillu eqqortumik suliarineqarsimanersut Inatsiseqarnermut immikkoortortap misissussavaa.

 

6.3. Namminersorlutik Oqartussat inatsisinut nalunaarutai kalaallisut danskisullu tunniunneqassapput.

 

6.4. Namminersorlutik Oqartussat inatsisaannut nalunaarutit pitsaassusaannik isumannaarinissamut Inatsiseqarnermut immikkoortortaq missingiutip tiguneraniit sapaatit akunnerini 4-ni piffissaqarpoq.

 

Kapitali 7

Aalajangersakkat ataatsimoorussat

 

Siunnersuutinik tunniussineq

 

7.1. Siunnersuutit inatsisilerinikkut pitsaassusaasa isumannaarnissaannik qinnuiginninneq, Inatsisit pitsaassusaannut allakkanik nakkartitsisarfimmut (lovkvalitet@nanoq.gl) F2-mi inniminniinertut nassiunneqassaaq.

7.1.1. Inniminniinerni tamaginni siunnersuut ataasiinnaq nassiuteqqusaavoq.

7.1.2. Inniminniinermi siullermeertumik imaluunniit aappassaannik pitsaassutsinik isumannaarineq pineqarnersoq kiisalu siunnersuutip qulequtaa, allanneqassapput.

7.1.3. Allakkiat tunniunneqartut Word atorlugu pissapput.

7.1.4. Siunnersuutit aappassaannik pitsaassutsinik isumannaarinissamut nassiunneqartut, allannguutit siullermeertumik pitsaassutsinik isumannaarinerup kingorna ilanngunneqartut track changes atorlugu nalunaaqutserneqarnerannik imaqassapput.

 

Siunnersuutit teknikkikkut aaqqissuunnerat

 

7.2. Allakkiat Inatsisinik allaffissornikkullu peqqussutinik teknikkikkut aaqqissuussisarnermut

malittarisassat, allakkianik aaqqissuussisarneq pillugu kapitali 13-imiaalajangersarneqartutut teknikkikkut aaqqissuunneqarsimassapput.

 

7.3. Allakkiat teknikkikkut piumasaqaatinit annertuumik allaanerussuteqartut, Naalakkersuisoqarfimmut pineqartumut iluarsisassanngorlugit utertillugit nassiunneqassapput.

 

Immikkut ittumik akuersinissamut periarfissaq

 

7.4. Siunnersuutini immikkut nukingiussassatut iluseqartuni Naalakkersuisoqarfiup Inatsiseqarnermut immikkoortortaq killigititat il.il. saneqqunneqarnissaannut immikkut ittumik akuersinissamik qinnuigisinnaavaa.

 

Kapitali 8

Atuutilersitsinermut ikaarsaarnissamullu aalajangersakkat

 

8.1. Malittarisassat makkua ulloq 1. maj 2023 atuutilerput.

 

8.2. Peqatigisaanik siunnersuutinik inatsisilerinikkut pitsaassusaannik isumannaarinissamut Inatsisilerinermut immikkoortortaqarfimmut tunniussisarneq pillugu malittarisassat 10. september 2022-meersut atorunnaarsinneqarput.

 

8.3. Malittarisassani makkunani aammalu Inatsisilioriaatsinut malittarisassani 1. november 2011-meersuni aalajangersakkat imminnut naapertuutinnginneranni, malittarisassani makkunani aalajangersakkat malinneqassapput.

 

 

Inatsisilerinermut immikkoortortaqarfik, ulloq 28. april 2023

 

 

Jógvan Svabo Samuelsen (atsior.)

Inatsisileriffimmi pisortaq