Naalakkersuisut suleriaasiat pillugu Namminersorlutik Oqartussat nalunaarutaat nr. 28, 13. juuli 2022-mersumi kapitali 9 naapertorlugu aalajangersarneqarput:

 

Kapitali 1

Atuuffii

 

1.1. Inatsisartut inatsisaannut, Namminersorlutik Oqartussat nalunaarutaannut aamma suliassaqarfiit akimorlugit kaajallaasitanut siunnersuutit, kiisalu naalagaaffimmi inatsisit aamma allaffissornikkut peqqussutit Kalaallit Nunaannut atuutsinneqalertussatut kissaatigineqartut, tusarniaassutigineqarnerannut malittarisassat atuupput.

 

1.2. Aningaasanut inatsisinut aamma ilassutitut aningaasaliissutinut inatsisinut siunnersuut, ilanngullugit oqaasertaliussat ilusiligaanerat, malittarisassani pineqartunut ilaatinneqanngillat. Taakkua Aningaasaqarnermut Naalakkersuisoqarfiup ataaniipput.

 

Kapitali 2

Inatsisartut inatsisaannut aamma Namminersorlutik Oqartussat nalunaarutaannut siunnersuutit

 

Suliffiup iluani tusarniaaneq

 

2.1. Inatsisartut inatsisaannut aamma Namminersorlutik Oqartussat nalunaarutaannut siunnersuutit Naalakkersuisoqarfinni attuumassutilinni suliffiup iluani tusarniaassutigalugit nassiunneqassapput. Naalakkersuisoqarfiit attuumassutillit paasineqassaaq, Naalakkersuisoqarfiit suliassaqarfiit siunnersuummit kalluarneqartussat.

2.1.1. Suliffiup iluani tusarniaanermi Naalakkersuisoqarfimmut tigusisumut sooq siunnersuut Naalakkersuisoqarfimmut pineqartumut nassiunneqarsimanersoq, taamaattussatut naatsorsuutigineqarsinnaasimassanngippat, sooq tusarniaaneq Naalakkersuisoqarfimmut pineqartumut nassiunneqarsimanersoq kiisalu Naalakkersuisoqarfiup suut isummerfigissagai naatsorsuutigineqarnersoq, Naalakkersuisoqarfimmut allanneqarsimassaaq.

2.1.2. Naalakkersuisoqarfiup suliffiup iluani tusarniaanermik tigusaqartup, Naalakkersuisoqarfiup ataani aqutsisoqarfimmut siunnersuut ingerlateqqinneqassanersoq nammineerluni nalilissavaa.

2.1.3. Siunnersuutit pisortanut aningaasaqarnikkut sunniuteqartussatut nalilerneqartut, Aningaasaqarnermut Naalakkersuisoqarfimmut suliffiup iluani tamatigut tusarniaassutigalugit nassiunneqartassapput.

2.1.4. Siunnersuutit digitalimik aaqqiissutissanik atuinissaq eqqarsaatigineqartillugu, Digitalimik Sullissinermut Aqutsisoqarfimmut suliffiup iluani tusarniaassutigalugit tamatigut nassiunneqartassapput.

 

2.2. Suliffiup iluani tusarniaanermut killigititaq nalinginnaasoq sapaatit akunneri marluupput.

2.2.1. Taamaattoq taamaallaat qaqutigoortumik pisuni siunnersuut sapaatip akunneranit ataatsimit sivikinnerusumik killeqartinneqarsinnaavoq.

 

2.3. Tusarniaanermut killigititap naareernerata kingorna attuumassuteqarnerat malillugu tusarniaanermut akissuteqaatit tiguneqartut ilanngunneqassapput, tamatuma kingorna siunnersuut tunngaviusumik inatsisilerinikkut pitsaassutsinik isumannaarinissamut (siullermeertumik inatsisilerinikkut pitsaassutsinik isumannaarineq) Inatsiseqarnermut immikkoortortamut nassiunneqassalluni.

 

Tamanut ammasumik tusarniaaneq

 

2.4. Naalakkersuisoqarfiup siullermeertumik inatsisilerinikkut pitsaassutsinik isumannaarinerup kingorna siunnersuut Inatsiseqarnermut immikkoortortamiit tigoreernerani, siunnersuut tamanut ammasumik tusarniaassutigalugu nassiunneqassaaq.

 

2.5. Siunnersuut tusarniaaffigineqartunut siunnersuummi immikkut soqutigisaqartutut naatsorsuutigineqartariaqartunut toqqaannartumik nassiunneqassaaq. Tamatuma saniatigut siunnersuut Naalakkersuisut tusarniaanermut quppernerannut ikkunneqassaaq.

 

2.6. Tusarniaanermut najoqqutassaniipput siunnersuut, siunnersuummut nassuiaatit aamma tusarniaanermut allakkiaq. Taamaattoq Namminersorlutik Oqartussat nalunaarutai nassuiaatitaqanngillat.

 

2.7. Tusarniaanermut allakkiami tusarniaanermut killigititaq, aammalu tusarniaanermut akissuteqaatit sumut nassiunneqassanersut, allassimassaaq.

2.7.1. Tusarniaanermut allakkiami aamma siunnersuutip imaasa pingaarnersai paasiuminartumik takulertoruminartumillu naatsumik nassuiarneqartariaqaraluarput. Tamanna pingaartumik Namminersorlutik Oqartussat nalunaarutaannut atuuppoq, pissutigalugu nalunaarutit inatsisissatut siunnersuutituulli nassuiaatitaqanngimmata.

2.7.2. Tusarniaanermut allakkiami, imaluunniit tassunga ilanngussami tusarniaaffigineqartunut tamaginnut allattuiffik aamma allassimassaaq.

 

2.8. tusarniaanermut najoqqutassat tamarmik kalaallisut danskisullu pigineqassapput.

 

2.9. Tamanut ammasumik tusarniaanermut killigititaq nalinginnaasoq sapaatit akunnerinik 4-nik sivisussuseqarpoq.

 

2.10. Tusarniaanermut killigititap naareernerata kingorna tusarniaanermut akissuteqaatit tiguneqartut tusarniaanermut quppernermut ikkunneqassapput. Tusarniaanermut akissuteqaatit nutserneqartanngillat.

 

Tusarniaanermut allakkiaq

 

2.11. Tusarniaanermut killigititap naareernerata kingorna tusarniaanermut allakkiaq tusarniaanermut akissuteqaatit tiguneqartut tunngavigalugit suliarineqassaaq.

 

2.12. Tusarniaanermut akissuteqaatini isummersornerit qanoq annertutigisumik siunnersuummi ilanngunneqarsimanersut, tamanna tamakkiisumik pisimanngippat, tusarniaanermut allakkiami paasissutissiissutigisariaqaraluarpoq.

 

2.13. Tusarniaanermut akissuteqaatinut allakkiaq Inatsisartut inatsisaannut siunnersuutinut nassuiaatinut ilanngussatut ilanngunneqassaaq. Namminersorlutik Oqartussat nalunaarutaannut tusarniaanermut allakkiaq Naalakkersuisut isummernissaannut tunngavissiamut ilanngussatut ilanngunneqassaaq.

 

2.14. Tulliullugu siunnersuut malitseqartitsilluni Inatsiseqarnermut immikkoortortami inatsisilerinikkut pitsaassutsinik isumannaarinissamut nassiunneqassaaq (aappassaannik inatsisilerinikkut pitsaassutsinik isumannaarineq).

 

Kapitali 3

Suliassaqarfiit akimorlugit kaajallaasitanut siunnersuutit

 

Suliffiup iluani tusarniaaneq

 

3.1. Suliassaqarfiit akimorlugit kaajallaasitanut siunnersuutit siullertut tunngaviusumik Inatsiseqarnermut immikkoortortami inatsisilerinikkut pitsaassutsinik isumannaarinissamut nassiunneqassapput (siullermeertumik inatsisilerinikkut pitsaassutsinik isumannaarineq).

 

3.2. Siullermeertumik inatsisilerinikkut pitsaassutsinik isumannaarinermiit oqaaseqaataasimasut ilanngunneqareerneranni, siunnersuut kaajallaasitap saaffigisaannut, ilanngullugit aamma aqutsisoqarfiit, suliffiup iluani tusarniaassutigalugu nassiunneqassaaq.

 

3.3. Suliffiup iluani tusarniaanermut killigititaq nalinginnaasoq sapaatit akunneri marluupput.

3.3.1. Taamaattoq taamaallaat qaqutigoortumik pisuni siunnersuut sapaatip akunneranit ataatsimit sivikinnerusumik killeqartinneqartariaqarsinnaavoq.

 

3.4. Tusarniaanermut killigititap naareernerata kingorna attuumassuteqarnerat malillugu tusarniaanermut akissuteqaatit tiguneqartut ilanngunneqassapput.

 

3.5. Siunnersuut tamatuma kingorna malitseqartitsilluni Inatsiseqarnermut immikkoortortami inatsisilerinikkut pitsaassutsinik isumannaarinissamut nassiunneqassaaq (aappassaannik inatsisilerinikkut pitsaassutsinik isumannaarineq).

 

3.6. Suliassaqarfiit akimorlugit kaajallaasitat inaarutaasumik iluseqarnerminni kalaallisut danskisullu pigineqassapput.

 

3.7. Tusarniaanermut tiguneqartunut tusarniaanermut akissuteqaatinut allakkiaq, Naalakkersuisut isummernissaannut tunngavissiami ilanngullugu allanneqartoq imaluunniit isummernissamut tunngavissiamut ilanngussatut ilanngunneqartussatut, suliarineqassaaq.

3.7.1. Tusarniaanermut allakkiaq aamma iluaqutaasumik tusarniaaffigineqartunut nassiunneqarsinnaavoq.

 

Kapitali 4

Naalagaaffimmi inatsisinut siunnersuutit aamma allaffissornikkut peqqussutit Kalaallit Nunaannut atuutilersinneqartussatut kissaatigineqartut

 

Suliffiup iluani tusarniaaneq

 

4.1. Danskit suliassaqarfinnut ministereqarfiisa siunnersuutip suliffiup iluani tusarniaassutigineqarnissaa ingerlattarpaat, tassani Naalakkersuisoqarfimmut suliassaqarfimmut akisussaasuusumut siunnersuut nalinginnaasumik aamma nassiunneqartarluni.

 

4.2. Siunnersuut Kalaallit Nunanni oqartussani suliffiup iluani tusarniaassutigalugu aamma nassiunneqassanersoq, Naalakkersuisoqarfiup suliassaqarfimmut akisussaasuusup naliliiffigissavaa.

 

Tamanut ammasumik tusarniaaneq

 

4.3. Danskit suliassaqarfinnut ministereqarfiisa siunnersuutip tamanut ammasumik tusarniaassutigineqarnera ingerlattarpaat, tassani Naalakkersuisoqarfimmut suliassaqarfimmut akisussaasuusumut siunnersuut nalinginnaasumik aamma nassiunneqartarluni.

 

4.4. Naalakkersuisoqarfiup suliassaqarfimmut akisussaasuusup siunnersuut Naalakkersuisut tusarniaanermut nittartagaannut ikkutissavaa, peqatigisaanillu siunnersuut tusarniaaffigineqartunut, danskit suliassaqarfimmut ministereqarfiata siunnersuummik nassiussivigisimasaannit, allaanerusunut, siunnersuut toqqaannartumik nassiunneqassanersoq nalilissallugu.

 

4.5. Tamanut ammasumik tusarniaanermut killigititaq nalinginnaasoq sapaatit akunneri sisamaapput.

 

4.6. Tusarniaanermut killigititap naareernerata kingorna Naalakkersuisoqarfiup suliassaqarfimmut akisussaasuusup tusarniaanermut akissuteqaatit tiguneqartut danskit suliassaqarfimmut ministereqarfianut ingerlateqqissavai.

4.6.1. Naalakkersuisoqarfimmi suliassaqarfimmut akisussaasuusumi tusarniaanermut akissuteqaat kalaallisooq tiguneqarpat, taakkua danskit suliassaqarfimmut ministereqarfiannut ingerlateqqinneqannginneranni danskisuunngorlugit nutserneqassapput. Naalakkersuisoqarfimmi suliassaqarfimmut akisussaasuusumi nutserneqarneranut aningaasartuutit akilerneqassapput.

 

4.7. Siunnersuut danskit suliassaqarfimmut ministereqarfiata tungaaniit inaarutaasumik naammassippat, taanna Naalakkersuisoqarfimmi suliassaqarfimmut akisussaasuusumut nassiunneqassaaq. Najoqqutassat tamarmik kalaallisut danskisullu nassiunneqassapput, tassa imaappoq inatsisip oqaasertai, nassuiaatit, tusarniaanermut allakkiaq, ilanngussat il.il. Danskit suliassaqarfimmut ministereqarfiata nutserneqarneranut aningaasartuutit akilissavai.

 

Paasissutissat annertunerusut

 

4.8. Naalagaaffiup inatsisaasa aammalu danskit naalakkersuisuisa allaffissornikkut peqqussutaasa tusarniaassutigineqartarnerat il.il. paasissutissanut erseqqinnerusunut takuuk Ministeriunerup ministereqqarfiata: ”Sulianut Kalaallit Nunaanut attuumassutilinnut, ministereqarfinniit suliarineqartarnerinut ilitsersuut” (link).

 

Kapitali 5

Atuutilersitsinermut ikaarsaarnermullu aalajangersakkat

 

5.1. Malittarisassat makkua ulloq 1. maj 2023 atuutilerput.

 

5.2. Peqatigisaanik inatsisini peqqussutit, kunngip peqqussutaasa, nassuiaatit il.il. suliffiup iluani aamma avataani tusarniaassutigineqartarnerat pillugu malittarisassat 27. november 2019-imeersut atorunnaarsinneqarput.

 

5.3. Malittarisassani makkunani aammalu Inatsisilioriaatsinut malittarisassani 1. november 2011-meersuni aalajangersakkat imminnut naapertuutinnginneranni, malittarisassani makkunani aalajangersakkat malinneqassapput.

 

 

Inatsisilerinermut immikkoortortaqarfik, ulloq  28. april 2023

 

 

Jógvan Svabo Samuelsen (atsior.)

Inatsisileriffimmi pisortaq