§ 1

Eqqumiitsuliornermik ingerlatsineq pillugu Inatsisartut inatsisaat nr. 11 6. juni 2016-imeersumi Eqqumiitsuliornermik ingerlatsineq pillugu Inatsisartut inatsisaata allanngortinneqarnera pillugu Inatsisartut inatsisaat nr. 25, 28. november 2019-imeersutigut allanngortinneqartoq, imaattunik allannguuteqarpoq:

1. § 8-p kingorna ilanngunneqassaaq:

”  § 8 a.  Naalakkersuisut eqqumiitsuliortunut pinngorartitsisunut ataqqinaammik tunniuttagaqarsinnaapput eqqumiitsuliornermik suliaqartunut eqqumiitsuliornermik suliaqartuni pingaaruteqartutut inissisimasunut.

  Imm. 2.  Ataqqinaammik tunniuttakkat eqqumiitsuliornermi pilersitsiortukkat pitsaassusaasa naliliivigineri taamaallaat tunngavigalugit tunniunneqarsinnaapput.

  Imm. 3.  Ataqqinaammik tunniuttakkanik sisamanik ukiunik qulinik sivisussusilikkanik tunisisoqarsinnaavoq. Ataqqinaammik tunniuttagaq tunniunneqarsimanngikkaangat ukiunik qulinik sivisussusilikkamik kingumut tunisisoqarsinnaanngussaaq.

  Imm. 4.  Ataqqinaammik tunniunneqartartut pillugit aalajangersakkanik erseqqinnerusunik Naalakkersuisut aalajangersaassapput, tassunga ilanngullugit § 1, imm. 1-imi piumasaqaatit aamma eqqumiitsuliorfiusutut eqqaaneqartut akornanni agguaassinerit.

  § 8 b.  Ataqqinaatissiissutinut tunniunneqartartunut aningaasat tunngaviusut ukiumut ataatsimut 250.000 kr.-iupput.

  Imm. 2.  Aningaasat tunngaviusut procenti aaqqiissutissaq aamma maannakkorpiaq aningaasarsiat pillugit Inatsisartut inatsisaanni maleruagassat malillugit procentimik aaqqiissutissamik ukiunut aningaasanut inatsiseqarfiusunut tamanut iluarsineqartassapput.

  Imm. 3.  Ataqqinaammik tunniuttakkat isertitat naapertorlugit annertussusilerneqartassapput.

  Imm. 4.  Ataqqinaammik tunniuttakkat isertitat naapertorlugit annertussusilerneqartarnissaat pillugit Naalakkersuisut malittarisassanik aalajangersaassapput.

  § 8 c.  Aningaasanut inatsimmi aalajangersarneqartut aningaasatut sinaakkusiussat iluanni eqqumiitsuliortunik akissarsisitsinermut Naalakkersuisut tapiissuteqarsinnaapput.

  Imm. 2.  Eqqumiitsuliortunik nersornaasiilluni tapiissuteqarneq pillugu Naalakkersuisut malittarisassanik aalajangersaassapput ukunatigut, aalajangiinermi tunngaviit pillugit, amerlassusaat pillugit aamma § 1, imm. 1-imi eqqumiitsulioriaatsit taaneqartut akornanni agguaaneq pillugu.”

§ 2

Inatsisartut inatsisaat ulloq 1. juli 2023 atuutilissaaq.

Namminersorlutik Oqartussat, ulloq 13. juuni 2023

Múte Bourup Egede (atsior.)

Naalakkersuisut Siulittaasuat