Atuuffia

  § 1.  Kaajallaasitaq manna Namminersorlutik Oqartussat aktiaateqarluni ingerlatseqatigiiffiutaanni siulersuisunut akissarsiassanik aalajangersaanermut atuuppoq.

Akissarsiassanik inassuteqarnerit akuersissuteqarnerillu

  § 2.  Namminersorlutik Oqartussat aktiaateqarluni ingerlatseqatigiiffiutaanni akissarsiassat qaffasissusaat kaajallaasitami ilanngussaq 1 malillugu Naalakkersuisunit aalajangersarneqartarput.

  Imm. 2.  Akissarsiat qaffasissusaat matumunngalu allannguutit ataatsimeersuarnermi akuerineqassapput.

  Imm. 3.  Naalakkersuisut pisuni immikkut ittuni, pissutsit tamatumunnga pissutissaqartitsippata akissarsiat qaffasissusaannit allannguutinik aalajangiisinnaapput.

Akissarsiassat annertussusissaannik aalajangersaasarnermut politikki

  § 3.  Aktiaateqarluni ingerlatseqatigiiffinni Namminersorlutik Oqartussat pigisaanni akissarsiat qaffasissusiisa ilaasortat inuussutissarsiutigalugu ilaasortaasut aamma piginnaasallit tigummiinnarneqarnissaat qulakkiissavaat aammalu piginnaasanik nutaanik ingerlatseqatigiiffinni siulersuisuini pisariaqartinneqartunik sulisussarsiornissamut tunngavissiisuussallutik. Taamatuttaaq akissarsiat kajumissuseqarnissamut siunissamik ungasinnerusumi aktiaateqarluni ingerlatseqatigiiffinni Namminersorlutik Oqartussat pigisaanni naleqarnerulersitsinissaq qulakkiissavaat.

  Imm. 2.  Akissarsiat qaffasissusiat siulersuisut akisussaaffiini, piginnaasaanni aamma piffissamik atuineranni takussuserneqassasut, taamaaliornikkut akissarsiat qaffasissusiat naammaginartoq unammillersinnaasorlu pigiinnarneqarsinnaammat.

  Imm. 3.  Suliat amerlanerulernerat tamatumalu kingunerisaanik siulersuisut siulittaasuannut, siulittaasumut tullersortimut aamma kukkunersiuinermik ataatsimiititaliap sulineranut siulittaasumut aarlerinaatit annertunerulersut akissarsiatigut takuneqarsinnaassapput.

  Imm. 4.  Siulersuisunut akissarsiat suliat suugaluartulluunniit nalinginnaanerat aamma suliat annertussusiat sinnernagit kiisalu ingerlatseqatigiiffimmi aningaasatigut inissisimaneq sinnerlugu amerlassuseqassanngillat.

  Imm. 5.  Akissarsiat qaffasissusaat ingerlatseqatigiiffinni allani assersuuffigineqarsinnaasuni qaffasissutsit naapertorlugit nalimmassarneqassapput, taamaaliornikkut akissarsiat qaffasissusaat suliffeqarfinni qaffasinnerpaajunnaarlugit.

  Imm. 6.  Akissarsiat qaffasissusaat Naatsorsueqqissaartarfiup januar 2008-mi naleqqersuummik 100-mik nioqqutissanut kiffartuussinernullu tamanut akinut kisitsit iluarsiissutaa malillugu ukiut tamaasa iluarsineqartarput. Iluarsiissut januarimut kisitsit akinut iluarsiissutaasoq malillugu naatsorsorneqartarpoq tusindenullu qaninnerpaanut akunnaallisarneqartarluni.

Akissarsiat allat

  § 4.  Namminersorlutik Oqartussat aktiaateqarluni ingerlatseqatigiiffiutaat Namminersorlutik Oqartussat akitaateqarluni ingerlatseqatigiiffiutaanni siulersuisuni ilaasortanut akissarsiat aalajangersimasut saniatigut allanik akissarsiaqartitsisinnaanngillat, taamaattorli imm. 2 takuuk.

  Imm. 2.  Siulersuisut kukkunersiuinermut ataatsimiititaliamik pilersitsisimappata, tassani ilaasortat nalinginnaasut, siulersuisuni ilaasortat nalinginnaasumik akissarsiaasa 15 %-iannik sinneqanngitsunik aalajangersimasunik tapeqartinneqarsinnaapput.

Ukiumoortumik nalunaarusiami akissarsiat pillugit paasissutissat

  § 5.  Ukiumoortumik nalunaarummi maannakkut siulersuisuusut aamma siulersuusimasut akissarsiaat tamaasa ingerlatseqatigiiffiit Namminersorlutik Oqartussanit pigineqartut tamarmik nalunaarutigissavaat.

  Imm. 2.  Ukiumoortumik nalunaarusiaq ingerlatseqatigiiffiup nittartagaani takuneqarsinnaassaaq.

Atuutilersinneqarnera ikaarsaarnissamilu aalajangersakkat

  § 6.  Kaajallaasitaq manna ulloq 16. oktobari 2023-mi atuutilissaaq.

  Imm. 2.  Kaajallaasitaq manna kaajallaassitap atuutilernerata aalajangiiffigineqareerneratigut akissarsianut atuutilissaaq.

  Imm. 3.  Kaajallaasitap matuma Naalakkersuisut Namminersorlutik Oqartussat aktiaateqarluni ingerlatseqatigiiffiutaanni akissarsiaqartitsisarnermut politikkiat 21. januaari 2021-meersoq taarserpaa.

Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfik, ulloq 11. oktobari 2023

Kalistat Lund (sign.)

Nunalerinermut, Imminut Pilersornermut, Nukissiutinut Avatangiisinullu Naalakkersuisoq

/ Natuk Lund Olsen (sign.)